Genesisi 47
47
1Zonake Josefa i lo ya bika ka Faro, aku ka yena: Dadani i chikele ni vanakulori, ni tiyivu tabye, ni tihomu tabye, ni zilo zontlhe lezi va nga nazo, vata hi le Kanani; makunu va kona le tikweni ga Goxeni.
2I lo hlawula ntlhanu wa vanakulobye a famba navo mahlweni ka Faro.
3Faro aku ka vanakulobye va Josefa: Mitiro ya nwina nja yini? Vaku ka Faro: Malanza ya wena mbarisi, hambu ni vararu va hina kambe.
4Vaku ka Faro kambe: Hi tela ku ta luvela lomu tikweni legi, hakuva a ga hi kona wuriselo ga mitlhambi ya malanza ya wena, hi kota ya ndlala yi tikileko le tikweni ga Kanani; hikwalaho ha ku kombela lezaku a malanza ya wena ma vumelwa ku aka le tikweni ga le Goxeni.
5Faro i lo byela Josefa, aku: A raru wa wena ni vanakuloni va chikele ka wena:
6A tiko ga Gipite gi kona mahlweni ka wena; akisa a raru wa wena ni vanakuloni ka tiko go saseka nguvu; va akise tikweni ga le Goxeni. Loku va hi kona vavanuna vo tlhariha xikari kabye, va yimise a kuva varisi va tihomu ta mina.
7Zonake Josefa i lo neha Jakobe, a raru wakwe, ka Faro. Jakobe i lo losa Faro.
8Faro aku ka Jakobe: Malembe ya wutomi ga wena mangani ke?
9Jakobe aku ka Faro: A malembe ya wutomi ga mina i 130, kanilezi a malembe ya wutomi ga mina ma komile, ma tlhela ma biha; cima a nzi chikelangi malembeni ya vadadani va mina, xikhatini xa kuhanya kabye.
10Jakobe i lo salisa Faro, zonake i lo suka mahlweni kakwe.
11Josefa i lo akisa a raru wakwe ni vanakulobye lomu tikweni ga Gipite; i lo va nyika wutshamu go nona tikweni ga Ramsesi, kota kuleletela ka Faro.
12Zonake Josefa i lo wundla raru wakwe ni vanakulobye, ni yontlhe a nghamu ya raru wakwe, hi ku va nyika zakuga zi ringanako ni kutala ka vanana vabye.
13Ku wa hi hava zakuga tikweni gontlhe, hakuva a ndlala yi wa tshingile nguvunguvu; lomu tikweni ga Gipite ni tikweni ga le Kanani va wa boteka hi ndlala.
14Zonake Josefa i lo hlengeletela mali yontlhe leyi yi nga wa hi lomu tikweni ga Gipite ni lomu tikweni ga Kanani, ya mavele lawa ma nga wa xabyiwa; i lo yi neha ndlwini ya Faro.
15Kanilezi laha na mali yi mbhelile tikweni ga Gipite ni tikweni ga le Kanani, a vaGipite vontlhe va lota ka Josefa, va taku: Hihe zakuga! Xana hi tafa mahlweni ka wena lezi hi mbhetileko mali ke?
16Josefa aku: Nehani mitlhambi ya nwina, nzi ta muha zakuga; matshanwini ya mali nzi ta xava tihomu ta nwina, lezi a mali yi mbhelileko.
17Zonake va lo neha mitlhambi yabye ka Josefa, yena i lo va nyika zakuga, va lo neha ni mahaxi, ni tiyivu, ni tihomu, ni timbongola, zonake i lo va hanyisa hi mavele gontlhe lego lembe, hi ku xava zifuyo zabye zontlhe.
18Laha na gi mbhelile lego lembe, va lota kambe ka yena, va taku: Hosi, hi nga ta fihla nchumu ka nwinyi wa hina; a mali ya hina yi mbhelile, ni zifuyo zi mbhelile, zontlhe zi tlhelele ka hosi ya hina; a ku salangi nchumu, a handle ka mimiri ni masimu ya hina basi.
19Xana hi tafa mahlweni ka wena, hina ni tiko ga hina ke? Ngha u hi xava hina ni masimu ya hina, hi tava tikhumbi ta Faro loku wa nga hi nyika mbewu kasi hi ta hanya hi ngafi, kasi a masimu ya hina ma nga hunzuki ma maha xiwula.
20Hikwalaho Josefa i lo xava a tiko gontlhe ga Gipite gi maha ga Faro: hakuva a vaGipite vontlhe va lo xavisa masimu yabye hi kota ya ndlala hakuva a ndlala yi wa va xanisa: zonake a tiko gontlhe gi lo lumba Faro.
21Hi tlhelo ga vanhu i lo va susa a va yisa mitini, kusukela ka tlhelo ginwani ga Gipite kala ka ginwani tlhelo ga kona.
22Ntsena a tiko ga vapristi a nga gi xavangi, hakuva a vapristi va wa hi ni xiavelo xabye, va nga wa nyikwa hi Faro: hikwalaho a va xavisangi masimu yabye.
23Zonake Josefa aku ka vanhu: Nzi mu xavile mu maha vanhu va Faro, nwina ni masimu ya nwina. Makunu a mbewu ya nwina hi leyi, fambani mu ya rima masimu.
24Zonake a siku ga kutshovela, a xirunzu xa wuntlhanu mu ta nyika Faro, lezi za mune zi tava za nwina, mu ta ti vekela mbewu leyi mu ta nga byala ha yona, ni kuga nwina ni mingango ya nwina ni vanana va nwina.
25Vona vaku: U hi hlayisile! Ngha hi kuma thomo mahlweni ka hosi ya hina, hina hi ta kuva tikhumbi ta Faro.
26Hikwalaho Josefa i lo veka nayo tikweni gontlhe ga Gipite kala inyamutlha, lezaku Faro a nyikiwa xipanze xa wuntlhanu, ntsena a tiko ga vapristi goce, hakuva gi wa nga hi ga Faro.
27A vaIsraeli va lo aka tikweni ga Gipite le tikweni ga Goxeni; laho va lo fuya, va tala, va enzelekelana nguvu.
28Jakobe i lo hanya lomu Gipite 17 wa malembe; zinghaho a masiku ya wutomi gakwe ma wa hi 147 wa malembe.
29Laha a xikhati xa kufa ka Israel xi nga wa tshinele, yena i lo vitana Josefa nʼwana wakwe, aku ka yena: Loku mina nzi kumile thomo mahlweni ka wena, enghenisa a canja ga wena lahasi ka hangaswa ga mina, u nzi mahela hi liranzo ni kutsumbeka, lezaku u nga nzi lahli lomu Gipite.
30Loku nzi etlela ni vadadani va mina, u ta nzi susa lomu Gipite u ya nzi lahla tsizeni gabye. Josefa aku: Nzi ta maha kota kuwula ka wena.
31Israel aku: Hlambanya mahlweni ka mina. I lo hlambanya mahlweni kakwe. Zonake Israeli i lo korama laha tihlokweni ta mubhedi wakwe.
Currently Selected:
Genesisi 47: TSC72
Highlight
Share
Compare
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
