Genesisi 50
50
A kulahliwa ka Jakobe ni kufa ka Josefa.
1Zonake Josefa i lo wela hehla ka nghohe ya raru wakwe, i lo rila hehla ka yena, a mu pswopswa.
2Josefa i lo leletela a malanza yakwe ya tinʼanga ku petsela ni ku tota a raru wakwe; ni tinʼanga ti lo longisela a xirumbi xa Israeli.
3Ku lo hunza 40 wa masiku, hakuva a masiku ya kulongisela ma wa hi lawo; ni vaGipite va lo mu rila 70 wa masiku.
4Makunu laha na masiku ya xirilo ma hunzile. Josefa i lo wulawula ni vanhu va yindlu ya Faro, aku: Loku mina nzi kumile thomo mahlweni ka nwina, nzi wuleleni tindleveni ta Faro muku:
5Dadani wa mina i nzi hlamhanyisile aku: Nzi lava kufa; u ta ya nzi lahla nkeleni wa mina, lowu nzi ti xaveleko tikweni ga Kanani. Makunu nzi vumeleni nzi kanziha nzi ya lahla dadani; nzi ta wuya.
6Zonake Faro aku ka yena: Kanziha u ya lahla raru wa wena kota lezi a ku hlambanyisileko.
7Josefa i lo kanziha a ku ya lahla raru wakwe, zinwe ni wontihe malanza ya Faro, a masingalakati ya yindlu ya Faro, ni masingalakati wontihe ya tiko ga Gipite, va lo kanziha zinwe naye.
8Zinwe ni vontlhe va ngango wa Josefa, ni vamakabye vakwe, ni vontlhe va ngango wa raru wakwe; va lo siya zivanana zabye, ni tiyivu tabye, ni tihomu tabye lomu tikweni ga le Goxeni.
9Ku lo kanziha zinwe naye a tikareta, ni vakhileli va mahaxi; ku wa hi xidlemo xa hombe nguvu.
10Vona va lo chikela minzhimbyeni ya ku hulela kona le Atade, lowu wu nga tlhatukweni wa Jordani, laho va lo rila hi hlomulo wa hombe ni mikosi ya hombe nguvu; Josefa i lo maha a nkosi wa ku rila raru wakwe ntlhanu wa masiku ni mambiri.
11Zonake a vaaki va tiko lego, va nga vaKanani, loku va wonile a xirilo lexo xi mahilweko laho nzhimbyeni wa ku hulela wa le Atade, vaku: Xirilo xa va le Gipite, hi lexi xa hombe; hikwalaho va lo chula a nzhimbo lowo ku Abel-mizraime, lowu wu nga tlhatukweni wa Jordani.
12A vana va Jakobe va lo maha ka yena kota lezi a nga va leletele.
13A vana vakwe va lo mu yisa tikweni ga le Kanani, va ya mu lahla lomu ka mhako ya simu ga Makapela, leyi Abrahama a nga xava ka Efroni, a muHiti hi tlhelo ga Mutsuwuka-gambo wa Mamre, kasi ku maha xilahla xa vafi. Miti. 7:16
14Zonake laha Josefa na lahlile raru wakwe, i lo tlhelela Gipite ni vanakulobye, ni vontlhe lava a nga famba navo ku ya lahla raru wakwe.
15Laha a vanakulobye va Josefa va nga wona lezaku a raru wabye i file, va lo wulawulisana xikari kabye, vaku: Kutani Josefa i ta hi venga, a hi tlhelisela kubiha kontlhe loku hi nga mu mahela.
16Va lo byela Josefa, vaku: Dadani wa wena na a nga se kufa, i hi leletele, aku:
17Mu ta byela Josefa, muku: Tsetselela milanzu ya vamakabye va wena ni kuonha kabye, hakuva va ku mahele kubiha; hikwalaho tsetselela malanza ya Nungungulu wa raru wa wena, a kuonha kabye! Zonake Josefa i lo rila laha va nga wa wulawula ka yena.
18A vanakulobye va lo ta ti wisa wutsumbu gabye mahlweni ka yena, vaku: Hina hi malanza ya wena.
19Josefa aku ka vona: Mu nga chavi; kasi nzi ta ti veka wutshanwini ga Nungungulu xana ke?
20Nwina mu wa alakanyile ku nzi mahela kubiha, kanilezi Nungungulu i lo nzi alakanyela kusasa, kasi a fela ku maha lezi zi mahekileko, ni lezaku a ponisa a tiko legi ga hombe.
21Hikwalaho mu nga chavi, nzi ta mu wundla ni vana va nwina. Zinghaho i lo va chavelela, a tangalisa timbilu tabye.
22Josefa i lo simamisa a tshama le Gipite zinwe ni va yindlu ya raru wakwe: Josefa i lo hanya 110 wa malembe.
23Josefa i lo wona vanana va Efraime va xizukulwana xa wunharu; ni vana va Makira nʼwana Manasse, na vona va lo belekelwa madzolweni ya Josefa.
24Zonake Josefa aku ka vanakulobye: Mina nzafa; kanilezi Nungungulu i ta mu enzela, hakunene i ta mu humesa ka legi tiko, a mu yisa tikweni legi a nga hlambanya ka Abrahama, na Isaka, na Jakobe, lezaku i ta va nyika gona.
25Josefa i lo hlambanyisa a vana va ka Israeli, aku: Laha Nungungulu a ta nga mu enzela, nwina mu ta rwala a marambu ya mina mu famba nawo. Ekso. 13:19; Jox. 24:32; Maheb. 11:22
26Zonake Josefa i lofa na hi ni 110 wa malembe; va lo lulamisela a xirumbi xakwe, va mu veka nghaxeni le Gipite.
Currently Selected:
Genesisi 50: TSC72
Highlight
Share
Compare
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
