KELUARAN 8
8
Soe ka dua: Lo'donggelek
1Boema Manetualain, nafa'da Musa nae, “Muu leo manek-ka muu, fo mafa'dan Au hala hehelung-nga nde ia nae, ‘Po'i Au anang-ngala la'o, fo leu sene-do'ok neu Au. 2Metema o ta nau fa soona, neukose Au fe lo'donggelek-kala mai, fo henu nusak ia, fo da'di leo huhuku-dodokik. 3Neukose Lee Nil-la, henuk no lo'donggelek-ka, nalosa bana sila-la kalua mai, fo leu leo o uma manem dale leu, ma leu leo o kama susungum dale, ma o pepe'um lain leu, leu leo o manapaletam-mala ma laun-nala uman dale leu, nakalenak leu leo mamana tutunu loti-la dalek, ma kete-la dalek leu. 4Lo'donggelek sila-la, neukose lakaboku fo lakalala'ba o, basa manapaleta-la, ma laun-nala.’ ”
5 Manetualain nafa'da Musa nae, “Madenu Harun, fo nakandoondoo aitete'en-na neu lee-la, oelolok-kala, ma lifu-la lain, fo ela lo'donggelek-kala poka mai, fo dae Masir-ra henuk no lo'donggelek-ka.” 6Boema, Harun leleuk aitete'en-na leo basa oe-la lain neu, boema lo'donggelek-kala poka mai, de henu nusak ndia. 7Tehu, basa malelak siula-tongonok-kala, pake sila malela-nala boe, de lo'donggelek-kala poka mai, nai nusak ndia.
8Boema, manek-ka naloo Musa no Harun, de nafa'das nae, “Hule-haladoi neu Manetualain, fo ela Ana tao namopo lo'donggelek ia-la soona, neukose au po'i o leoinam-ma la'o, fo leu tunu-hotu tutunu-hohotuk soaneu Manetualain.”
9Musa nataa nae, “No namahokok, neukose au hule-haladoi soaneu au Ama Maneng. Maketu fain-na, soona neukose au hule-haladoi fe au Ama Maneng-nga, basa manapaleta-la, ma laun-nala. Soona, neukose au Ama Maneng-nga, natapo'i neme lo'donggelek ia-la mai, fo ta ela esa boen, ela ka'da manai Lee Nil-la.”
10Manek ndia nataa nae, “Balahaa soona, hule-haladoi fe au.”
Musa nae, “Neukose au tao atetu au Ama Maneng-nga nonoken-na. Soona neukose, au Ama Maneng-nga bubuluk, nae ta hapu Manetualain fe'ek, sama leo Manetualain, fo ami Manetualaim-ma. 11Neukose, Ana soi-po'i au Ama Maneng-nga, basa manapaleta-la ma laun-nala, leme lo'donggelek sila-la mai. Ta hapu lo'donggelek nai uma-la so'on, ela ka'da manai Lee Nil-la.” 12Boema, Musa no Harun la'o leona. Basa boema, Musa hule-haladoi neu Manetualain, fo ela Ana tao namopo lo'donggelek fo Ana fen neu manek-ka ndia. 13Manetualain sipok Musa nonoken-na, de mate la'iesak lo'donggelek manai uma-la, manai uma-la so'dan-na, ma manai tina-la. 14Hataholi Masir-rala, hehele lakabubua lo'donggelek mates sila-la, de ladodou, nalosa basa nusak-ka lala'en-na naboo pulu. 15Lelek manek-ka nita, nae lo'donggelek sila-la mates so, boema nalanga batu. De sama leo hata fo Manetualain nafa'da basan nae, manek-ka ta nau taoafik neu Musa no Harun hala-kokolan fa.
Soe ka telu: Ninik
16 Manetualain nafa'da Musa nae, “Madenu Harun, fo ana fepa aitete'en-na neu dae lain, soona daesopuk manai nusa Masir-ra lala'en-na, neukose nasafali da'di nenik.” 17Boema, Harun fepa aitete'en-na neu dae lain, de daesopuk manai Masir lala'en-na, nasafali da'di nenik, de lakamomotu-la hataholi-la ma bana-la. 18Basa malela siula-tongonok-kala, ala sanga enok lenik sila malelan-nala, fo lakadada'dik nenik boe, tehu ta da'di fa. Nenik-kala nai basa mamanak lala'en-na, 19#Luk. 11:20 nalosa basa malela siula-tongonok sila-la, lafa'da manek-ka lae, “Manetualain nde tao ia.” Tehu, manek ndia nalanga batu nahele, de sama leo hata fo Manetualain, nafa'dan nae, manek ndia, ta nau taoafik neu Musa no Harun hala-kokolan fa.
Soe ka haa: Pena
20 Manetualain nafa'da Musa nae, “Lolebalahaak soona, muu leo manek-ka muu, nai lelek ana kona leo lee dale neu, fo mafa'dan, Au hala-kokolang nde ia nae, ‘Po'i Au anang-ngala la'o, fo leu sene-do'ok neu Au. 21Metema o ta nau fa soona, neukose Au fe pena-la mai leo o mai, leo manapaleta-la ma laun-nala. Hataholi Masir-ra uman-nala, nakalenak basa nusak-ka lala'en-na, henuk no pena. 22Tehu neukose Au ta'da fe'e nusa Gosyen-na, fo Au anang-ngala mamana leleon-na. Neukose ta hapu pena nai naa fa, fo ela emi bubuluk, mae Au, fo Manetualain nde manatao manada'dik ndia. 23Neukose Au ta'da fe'e Au anang-ngala loo o laum-mala. Balahaa soona, neukose manada'di beuk ndia ana da'di.’ ” 24Manetualain fe pena makadotok nanseli leo uma manek-ka, ma basa manapaleta-la uma-nala neu. Basa nusa Masir-ra lala'en-na doi-doso lanseli, nanahu pena sila-la.
25Basa boema, manek-ka naloo Musa no Harun, de nafa'da nae, “Meu tunu-hotu tutunu-hohotuk soaneu emi Manetualaim-ma, tehu ka'da nai nusak ia dalek.”
26Musa nataa nae, “Malole lenak bosok, nanahu ami tutunu-hohotum sila-la, neukose ana da'di nakamumuluk-nakamamaek ba'eneu hataholi Masir-ra, de tao leo bee-o ala pia lisa ami. 27Ami muse meu leo mook solokaek-ka meu, fo dodoon-na la'ok faik telu, soaneu ami tunu-hotu tutunu-hohotuk neu Manetualain, fo ami Manetualaim-ma, sama leo paletan neu ami-a.”
28Boema manek-ka nafa'da nae, “Hei, au po'i emi meu leo mook solokaek-ka meu, fo tunu-hotu tutunu-hohotuk soaneu Manetualain, fo emi Manetualaim-ma, sa'di boso meu leo dook-ka meu. Mafandendelek, fo hule-haladoi fe au!”
29Musa nataa nae, “Au la'o, fo no lai-laik au hule-haladoi neu Manetualain, fo ela balahaa soona, pena sila-la la'oela au Ama Maneng-nga, basa manapaleta-la, ma laun-nala. Tehu, boso ke'di-ndiu seluk ami bai, ma boso mapanggengge leoina Israel-la, fo leu tunu-hotu tutunu-hohotuk soaneu Manetualain.”
30Musa la'o leona, boema ana hule-haladoi neu Manetualain, 31de Manetualain sipok Musa huhule-haladoin. Pena sila-la, ala laa la'oela manek-ka, basa manapaleta-la, ma laun-nala. Ta ela esa boen. 32Tehu oek ia boe, manek-ka nalanga batu, de ana ta po'i leoina ndia, la'o fa.
Currently Selected:
KELUARAN 8: twu
Highlight
Share
Copy
Want to have your highlights saved across all your devices? Sign up or sign in
