KEJADIAN 49

Yakob hala-kokola mate'en-na

1Basa boema, Yakob naloo anan-nala, de nafa'da nae, “Makabubua mai ia, deka moo au. Au sanga afa'da emi, hata fo neukose emi la'ola'din nai fai makabuin:

2Makabubua leon, hei Yakob anan-nala lemin,

mamanene Israel, fo emi amam.

3Ruben, fo au ana ulung-nga,

o nde au be'i-balakaing, boa sosak fo au palani tatibatung-nga,

O nde ao makadelek, ma mabe'i-balakai manituk nai basa au anang-ngala dalek.

4Mu'dak la'iesak-kana, o mako'ba sama leo oe-a,

nalosa o ta nde makasososak-ka fa;

nana o sungu moo au sao makahatung-nga,

o tao manggenggeo o amam pepe'un-na.

5Simeon ma Lewi tolanook-kala;

sila taka besi nde buas naseti-nalakak.

6Au ta tunga nai sila lalahalan-na dalek fa,

ma boeo, ta nai sila nakabubuan-na dalek fa.

Nana sila lanisa nai nasa-meluk-ka dalek,

ala ke'di ketu meoasu ei uan-na hu kande namahoko-setelek-ka.

7Sila nasa-melun, nanasoo-supak leona, nanahu nasa-melun ba'un-na seli.

Sila nasa-melu mangalaun-na, nanasoo-supak leona, nanahu dale susue-lalai taak-kala.

Neukose Au tao tapasasalas nai basa Israel lala'en-na.

Neukose Au nggenggela-ngganggalis lai leoina lala'en-na tala'da.

8Yehuda, neukose o kaa-ma o musum-ma, kandoun-na;

neukose o tolanoom-mala koa-kio o,

ma ala senek nai o matam-ma.

9 # Bil. 24:9; Nin. 5:5 Yehuda sama leo singa molisoluk;

ana taonisa musun-na, boema ana fali leo ndunun dale neu;

nananaua, boema nangape'uk

ma ta hapu hataholi esa boen, napalani fafae fan.

10Neukose Yehuda ho'u aitete'e nusak-ka,

neukose tititi-nonosin paleta losa dodoon-na.

Neukose leoina-kala leni bea mai,

ma ala senek ma lakatele nai matan-na.

11Keledei anan-na, nanapa'ak neu ai,

ai angol fo malole nanseli.

Ana safe bua papaken-na nenik angol,

angol-la, pilas leo daak-ka.

12Matan-na pilas, nanahu ninu angol,

nisin-na fulak, nanahu ninu kapaoe.

13Neukose Zebulon leo deka no tasi-a;

neukose ofak-kala see nai namo see seen-na;

losa nusa Sidon-na dae toon-na.

14Isakhar ndia sama leo keledei balakaik

fo nakandondoo nai lepeneun-nala tala'da.

15Ana nita mamanak ndia malole na seli

ma nusak ndia lole na seli boema nakatele,

fo ana nau fua bua-lo'as neu alun lain

ma lakasetin naue-nale'di da'di leo ata.

16O Dan, neukose o maketu-mala'di

o leoinam o da'di leo esa sama leo fe'ek manai Israel-la.

17O sama leo menge nai enok-ka su'un-na,

menge malasok-ka, nai mangalolok-ka su'un-na,

fo ana kaa ndala eitingan-na

losa hataholi manasa'ek-ka busuhenin.

18Ou Manetualain, au ahani talu-talu neu so'da-molek fo, O fee-ka.

19Gad, neukose nakodaa-la sapu-la o,

tehu neukose o lepos fali, fo o mamanako masafali seluk-kasa.

20Asyer, o nana'a-nininum sasi kao-kao ma mala'da hiik,

neukose o sadia nana'a-nininuk ba'eneu mane-manek-kala.

21Naftali, sama leo nusa nanapo'ihenik-ka

anan-nala mata makeek-kala.

22Yusuf sama leo keledei ana

keledei fuik-ka, deka no oemata,

nalaik nai letek-ka huun-na.

23Musu sapu neni momopo-mamaten,

Ana usin nenik kokouk ma kokouisik.

24Tehu Yusuf alun-na natea nahele,

kokouisin-na natea nahele,

nanahu Manafoo Mabe'i-balakai lea,

Yakob Manetualain-na, Israel Manamasulu-mahapan-na, koasan-na.

25O amam Manetualain, tulu-fali o,

Fo Manakoasa, ba'e-pala o,

nenik u'dan-na neme lalai mai,

ma oe-a neme dae buin-na mai.

Nenik ni'iana ma sapi, 26gandum ma bunga,

O amam Manetualain baba'e-papalan

lena heni lete-letek fo, lamalasi lanseli-a su'i-beten-nala.

Ela leo been-na, basa baba'e-papalak sila-la, kona neu Yusuf langan lain, neu dedein lain.

Ndia nde malole lena neme tolanoon-nala mai.

27Benyamin nde been-na, busa fui makaa-makisu mangalauk.

Ana kaa-na nana'an-na nai fai fafain-na.

Ana baba'en nai fai le'odaen-na.”

28Israel leo ka sanahulu duan-nala nde sila, ma hala heheluk fo sila aman kokolak-kana, nai lelek ana fe nate'a nasi'da-naba'ek-ka neu sila esa-esak.

Yakob maten de latoi-latonon

29-30 # Kej. 23:3-20 Basa boema, Yakob helu anan-nala nae, “Ba'ihanak seluk bai te, neukose au fali sama leo au bei-ba'i kaing-ngala. Soona matoi au nai sila boboan-na, nai leak Makhpela dalek, nai Mambre boboan dulu, fo nai dae Kanaan-na. Abraham asan-na leak ma tina manai boboa kaisun, neme Efron, hataholi Het ndia mai so, fo ana taon da'di mamana natoi mamates. 31#Kej. 25:9-10, 35:29Abraham ma Sara, Isak ma Ribka, nanatoi-natonok lai ndia; ma au atoi-atono Lea nai ndia boe. 32Tina ma leak manai ndia, nanaasa basak neme hataholi Het-ta mai so. Matoi-matono au nai ndia.” 33#Hat. 7:15Lelek Yakob helu basa anan-nala boema, nangape'uk de maten leona.

Currently Selected:

KEJADIAN 49: twu

Highlight

Copy