YAYA 10
10
Ndomba ndegeninake menggerak wone
1Yorage nagagirik, Yetut nen ambinom yorage logonet, ”It aap ndomba anggenogona unggwogo logonet, tu nda'nggi paga unggwaga'lek neget uum unggwogwe iinok ti, aap inayogot wulo kiraaka mendek aret o. 2Ndi, aap ambi tu nda'nggi paga unggwage kenok perak, aap ndomba ndegeninake menggerak aret o. 3At ndomba ndegeninake menggerak nogo wage kenok, aap ndomba inaru arum menggerak nogo nen tu paakkage menggerak. At andomba nogo at oone konenggo menggaarak me, inendage kunogombo wogoret wundi nage menggerak. 4At andomba lombok abok aret wogoret wundi nanuk, at aa'nduk nage kagak, at oone konenak me, at ambokan amugurok nogo menggaarak. 5Aap inambik inambokan amuguren nogolik o. Aap inambik inoone liippega'lek me, mbaganugun aret o, yinuk, mondok abet aret yokkiragi o,” yoragagerak.
6Wone eegu laarogo yi yoragagerak kwe, at mba'nuk yoragagerak nogo it liippega'lek aret wonogogwaarak.
”Ndomba abe ndegeninake minggirak an aret o,” yinuk, yoragagerak wone
7Liippega'lek wonogo mbareegwa, at Yetut nen ambinom yorage logonet, ”Ndomba unggwogo menggam tu an aret o. 8An waga'lek neegak, it aap inaa'nduk wogogwaarak nogo abok inayogot wulo kiraaka mendek mban wogogwaarak me, ndomba nen it inoone konengga'lek aret wonogogwaarak. 9Tu unggwogo menggam an aret o. It aap tu an wonage yi paga unggwi wogwe iinok, inagap ndakkolaagun o. Inagap ndarak wonogwe me, yinggak-unggwagak eeko logonet, inagari'ngga mbanogo nenet nogo logogun o. 10It aap kiraaka nogo nen ndomba kiraakkologwe, inookwi, lek eerogo piigwi, eeruwok nduk, wogo menggaarak kwe, an perak, ineenik eeginabikit nduk, wagagirak o. Ineenik eeppiyaminggirak logonet, iniki ale'nggen mondok alik negen kaawak nduk wagagirak.
11Ndomba obeelom ndegeninake minggirak an aret o. At ndomba obeelom ndegeninake nogo nen andomba inake kambikit mbake menggerak kwe, 12it aap ando nen, Yi nit ninandomba lek me, yinuk, liirogon ndegeninaka'lek, We onggo kolaawok, mba'nuk, ndegeninakwi nogo nen perak, nggeewo endekem mendek wage inigen kogo nagaatik, ndomba mbo piinok, mbaganggo menggaarak. Mbaganggwi iigak, nggeewo nogo nen ndomba eyak nggereniige logonet, mappiige menggerak. 13It aap nogo nen we onggo kolaawok mba'nuk, ndomba liirogon piirogo wonogwe lek me, mbo piinok, mbaganggo menggaarak. 14Ndomba obeelom ndegeninake minggirak an aret o. An nogoba nen an eenu menggerak, 15ndi, an nen at neenu minggirak nogo ndak-ndak, an togop aret nandomba neenu, ndi, it nen an ineenu aret monggoorak o. Togop logonet, an nandomba inake kambikit mbake minggirak. 16An nandomba anggenogo yime mban wonogwe lek o. Ando alik ambime wonogwe me, wogonabit nage logominggirik, inom piya woroorak koonak me, piya woraaminggirak logonet, it an noone konenggwi, ndi, ineebe ambit lambunik iigak, an nalik aret ineebe ndegeninake, eeke logogin o.
17Neenik arikit nduk, kambikit mbake minggirak me, nogoba iniki kunik ee'nake menggerak o. 18It aakumi nen an noorogo paniyak meek o. An niniki mba'nuk nen aret kambigin o. An kambikit mbake kenok ti, kambigin aret. Ndi, neenik arikit mbake kenok ti, neenik arigin aret, eeke logokit nduk, nogoba nen lenggannereegerak o, yinuk, mondok abet aret yokkiragi o,” yoragagerak.
19Wone ti nogo yoragagerak paga it Yakuri mendek iniki ogoorak ka'let eekkologogwaarak. 20Eekkologo logonet, it ando nen, ”At kugi inikime lik ari nagagirik, kumili kunggerak kagak, nonggop nduk at oone konenggo ogotik?”
21Yogwe iigak, it ando nen, ”Lek o. Wone ti, aap kugi inikime nen ari lek o. Kugi nen aap inigen mbuk obeelom eeginaburak op mbakop?” yinuk, yogogwaarak.
It aap Yakuri nen Yetut mbo pereegwaarak wone
22Yogo mbareegwa, peebi o Yerutalem it aap Yakuri mendek Ala awi wurik ogobakkigireegwaarak aberogo laago lakwi eyom panggoni wagagerak. Nogo eyom paga o mayu tit kunik wonagagerak me, 23Yetut Ala awi wurik onggu'me awe aago me ambi Talomo wureegim nogome nege nagagerak. 24Time nege me, it Yakuri mendek at owagam kuwak eeri wogo nogogwaarik, ”Niniki piirik tit niigak teppinanemenggendak ne mande logogun o? Ala nen leenogo mippereegerak Keritut nogo kat aret kenok, mondok pagak togon yo'niret o.”
25Yogo mbareegwa, at nen, ”An muk yokkiragagirak kwe, kit abet mbaka'lek aret ogotik. Nogoba endage paga eeke minggirak nogo paga nabok pagak ari menggerak kwe, 26kit an nandomba mendek lek me, an abet nombaka'lek aret ogotik. 27An nandomba ti, an noone konenggo menggaarak. An nen it neenu minggirak me, it nen an mu'neret wogo menggaarak. 28Mu'neret wogwe iinok, an mondok-mondok ineenik eeginake minggirak me, it kobak arugun mondok lek o. Ndi, aakumi nen kunduk an neenggi me ndininabugun mondok lek mban. 29Yi aap ndi aap inomaawi mbuuluk negen kwe, nandomba apit wo'nereegerak nogoba nogo perak, alik omaawi ambik wonage me, aakumi nen ndomba an nogoba eenggi me nen ndininabugun mondok lek o. 30An nogoba nimbirak ambit aret o,” yinuk, yoragagerak.
31Yorage mbareegi, it Yakuri mendek nen Yetut ambinom waruwok nduk yugum waganeegwaarak. 32Waganggo mbareegwa, Yetut nen, ”An obeelom eeke logorak nogoba nen yo'nereegerak nogo kit kaabagip nduk, apit aret eeke nagarak kwe, ngge eekirak paga kit yogondak yugum paga an nooriyak nduk, eeko ogotik?”
33Yorage mbareegi, it Yakuri mendek nen, ”Kat obeelom eekendak paga koorugun lek o. Ata, Ala miyuk-meya eerogo pege, ndi, kat aap aret kwe, Ala pogom eekko'net nage, eeke ti paga aret korugun o.”
34Yogo mbareegwa, at nen, ”Ala nen wone lengganogo yokkirage logonet, Kit Ala pogom wonogwe o, yinuk, liiru mbanak wonage nogo lek a? 35Ala wone liiru mbanak ti, alik mbeyok arilik nit nineenu me, at Ala nen it aakumi at oone koneneegwaarak nogo, Kit Ala pogom wonogwe o, yoragagerak me, 36at nogoba nen leenogo panege nagagirik, nggween paga yime nappani wagagerak an nogo nen, An Ala aput aret o, yokkirage paga kit nonggop nduk, Kat Ala miyuk-meya eerogo pege o, yinuk, yo'nogo ogotik? 37An nogoba eeke menggerak nogo eeka'lek neenok, kit kiniki noba panggombunuk abet nombariyak lek ti op aret kwe, 38eeke neegak, kit kiniki noba panggombunuk, abet nombariyak meek kenok, an nogoba ninikime wonage, ndi, an at inikime wonage, kit kineenu arubagip nduk, an eeke minggirak nogo ti mban abet mbako logonip o,” yinuk, yoragagerak.
39Yorage mbareegi, at ambinom pigaawok nduk eereegwaarak kwe, ineenggi me nen peranogo piinok, mbaganeegerak.
40Mbagangge nagagirik, yi Yoreran wunda nanuk, at Yaya aa'nduk aakumi yiime wuppiige nagagim nogome puk ari nagagerak. 41Puk ari nagagerak wonage me, aakumi ambik at owagam wogo nogogwaarik, ”At Yaya nen nineenu ariyak ninagabiti warak mendek eeke logolik kwe, aap yi abok yo'nirage menggerak nogo perak, abet mban aret yo'nirage menggerak kogo o,” yinuk, 42aakumi apit iniki Yetut oba panggombunuk, abet mbareegwaarak.
Currently Selected:
YAYA 10: WNO
Highlight
Share
Copy
Want to have your highlights saved across all your devices? Sign up or sign in
