YAYA 11
11
Aap Latarut kambeegerak wone
1Aap ambi endage Latarut awi Mbetaniya, kwe Mariya awuluk Mata imbirak inawi ambit me aret wonogwe me, andi eereegerak. 2Kwe Mariya nogo ti, kwe ninogoba endagembogut iyok paga amburu mbenambunuk, eeruwak paga woloneegerak nogo aret. At oweeluk Latarut nogo andi eeke mbareegi, 3awurilogwe komologwe nogo nen wone agago nappiigo logonet, ”Ninowe o. Aap kat kiniki kunik nogo andi eekerak wonage o,” yinuk, Yetut yori nawuk nduk, nappiyareegwaarak.
4Nappiyareegwaarak nogo, nogo nogogwaarik, yogo mbareegwa, Yetut konengge nagagirik, yorage logonet, ”At Latarut andi eekerak nogo ti, kambuurak nduk eekerak lek o. Ata, an Ala aput ambi eeke neenok tiyappanumenggaarak paga Ala kunduk tiyanak kin kaawak nduk eekerak o,” yinuk, yoragagerak.
5At Yetut nen Mata inom, at oweeluk inom, Latarut inom, iniki kunik aret wonagagerak. 6Iniki kunik aret wonagagerak me, at Latarut andi eekerak nogo konengge nagagirik, iniki nen ne mbere time aret puk wonagagerak. 7Puk wonagagirik, at oone waganggwi mendek yorage logonet, ”Niniyok paga o Yureya nawok o.”
8Yorage mbareegi, it nen, ”Ie Ngguru! It aap Yakuri mendek nen awo ngget iluk yugum paga kooriyak eekwi iigom nogome kagak noorak mban ari agandik ya?”
9Yogo mbareegwa, at nen, ”Wologwe! O ne ambit wegetak wonage kagak, 12 jam age menggerak nogo lek a? Ndi, ti kenok, it aap o liingge paga nogwe iinok, o eya inigen kogo menggaarak me, iniyogobit lik togon egeraagin lek o. 10It aap oonikiya paga nogwe iinok perak, at eya eeginake menggerak nogo inikime eya eeginaka'lek me, iniyogobit lik togon egerage kagak, nogo logogun o.” 11Ti yorage nagagirik, wone ambi yorage logonet, ”Ninoreeluk Latarut nogo yege me, an eenik eeppi naakit o.”
12Yorage mbareegi, it at oone waganggwi nen, ”Ninogoba o. At we nogo yege kenok ti, obeelom arigin o,” yinuk, yoreegwaarak.
13At Yetut nen Latarut kanggerak me nduk yoragagerak kwe, it nen, ”We nogo yege kagak ari,” mbako mbareegwa, 14at Yetut nen pagak togon yorage logonet, ”Latarut muk kanggerak o. 15Ndi, kit kiniki noba panggombunuk abet nombarubagip nduk an time logolik yime wonagarak nogo kit kinake aret wonagarak me, nale'nggen mbake agarik o. At wonage me nawok o.”
16Yorage mbareegi, at Tomat endage ambi Kulu'mbere toonak nogo nen oreewi yorage logonet, ”Nit at ninom aret kambuwok nduk, nawok o,” yinuk, yoragagerak.
”Aakumi kanggwi iinok, ineenik agago mippiige minggirak an aret o,” yoragagerak wone
17Yorage mbareegi, Yetut nage nagagirik, at Latarut kanggwi iinok, piigo menggam pereegwaarak kagak, nogo 3 yereegerak koneneegerak. 18O Mbetaniya o Yerutalem korotok tu noorak 3 kilometer negen wonagagerak me, 19it Yakuri mendek apit nen Mata Mariya imbirak inoweeluk kambeegerak me, iniki eyak wappiyaawok nduk, iya wogogwaarak.
20Iya wogogwaarak wonogwe me, at Mata nen Yetut wage konengge nagagirik, Mariya oome kwi'ndak kagak, at endekem ka wundeegerak. 21Ka wungge nagagirik, Yetut yoge logonet, ”Ai nogoba o! Kat yime mbet-mbet wa'netak en, an noweeluk kambenetak lek kwe, 22yogondak kat nen Ala ngginooge keenok, at wokkege menggerak nogo ti neenu o.”
23Yoge mbareegi, at Yetut nen, ”Kat koweeluk nogo eenik a'nuk mi'narigin o.”
24Yoge mbareegi, at Mata nen, ”E o! At peebi o age yobok aakumi ineenik agago mippiige eyom paga eenik a'nuk mi'narigin ti neenu o.”
25Yoge mbareegi, at Yetut nen, ”Aakumi ineenik agago mippiige minggirak an aret me, kit ambi nen kiniki noba panggombunuk, abet nombakwi kiinok, kambumonggotak kwe, kineenik a'nuk, mi'narumunggup o. 26Ndi, it aap ineenik logonet, iniki noba panggombunuk, abet nombakwi iinok, kambugun mondok lek o. Wone yi nogo abet mbaken a, lek a?”
27Yoge mbareegi, at kwe Mata nen, ”E o, nogoba. Ala aput leenogo mippereegerak Keritut o nggween paga yime woroorak nogo kat aret kombake agarik o,” yinuk, yoreegerak.
Yetut le yereegerak wone
28Ti yoge nagagirik, at Mata oweeluk Mariya nogo mbabok wiiri nage nagagirik, wage mbareegi, yoge logonet, ”Mariya wae. Ngguru time logonet, wiigege agaarik o.” 29Yoge nogo Mariya konengge nagagirik, pilak togon mi'na'nuk, Yetut owagam nagagerak. 30Yetut nogo oome unggwaga'lek Mata imbirak lambuneegwam ta'nogo awo wonage me ka nagagerak. 31Ndi, it aap Yakuri mendek kwe Mariya inom oome logonet, iniki eyak wappugwi nogo nen kwe Mariya pilak togon mi'na'nuk, wungge inigen kogo nogogwaarik, ”At kanggerak pegam nogome le yi nage,” mba'nuk amugurok nogogwaarak.
32Amugurok nogwe me, kwe Mariya Yetut wonage me ka nage nagagirik, Yetut abu'me tebe yinuk, ”Ai nogoba! Kat yime mbet-mbet wa'netak en, an noweeluk kambenetak lek o.”
33Yoge mbareegi, Mariya inom, it aap Yakuri mendek Mariya mugurok nogogwaarak nogo inom, leenggup maakwi Yetut iige nagagirik, iniki aagi wo agan lagangge mbareegi, eebe nugurit wage logonet, 34”Wologwe! At eebe nggeeme pogotak o?”
Yorage mbareegi, ”Pekka mok o, nogoba.”
35Yogo mbareegwa, at Yetut le yereegerak. 36Le ari mbareegi, it aap Yakuri mendek nen, ”Wologwe! At Latarut iniki kunik lombok me le ari yi kaanip o.”
37Yogwi iigak, it ando perak, ”Wologwe! Aap yi, enegen mbuk obeelom eereegerak nogo nen at Latarut kangge kero, eenik kagak, obeelom eeriyak meek nduk, wonagaarik ari mbakop?” yogogwaarak.
Aap Latarut eenik agago mippereegerak wone
38Yogo mbareegwa, Yetut ne ambinom iniki aagi wo agan lagangge mbareegi, eebe nugege kagak, kangge mbareegi, pereegwam nogome aret nagagerak. Kangge mbareegi, pereegwam nogo ti, ndoome yugum tu narak aret wonage me, 39Yetut nen, ”Yugum tu narak ti, ponggonogo nappinip o.”
Yorage mbareegi, at Latarut awuluk Mata nogo nen, ”Nogoba o. Kanggerak kagak nogo 3 yegerak me, muk obari agaarak o.”
40Yoge mbareegi, Yetut nen, ”Kat kiniki noba panggombunuk, abet nombake keenok, Ala endage abu tiyanak logonet, eeke menggerak kaamunggun o, yokkigirak nogo lek a?” 41Yoge mbareegi, yugum ponggonogo nappogo mbareegwa, Yetut nogo ena ni'nage nagagirik, ”Nogoba o. Kat an noone muk konenggendak me wa yokkigi o. 42Kat an noone mondok konengge menggendak nogo, an neenu aret kwe, it aakumi ugun mi'ndak wonogwe yi nogo, kat nen nappani wagagindak abet aret mbaruwak nduk, yokkigi o.” 43Yoge nagagirik, at oone nggwok paga, ”Latarut wae! Wundi mok o.” 44Yoge mbareegi, at kambeegerak nogo wundi wage logonet, at eenggi-iyok nggerenak, ndi, yum etenggen-ogobak pirik-perek eerak wundi wagagerak. Wundi wage mbareegi, at Yetut nen, ”Nege logowak nduk, yum perenak ti piinggaanip o,” yinuk, yoragagerak.
Yetut wariyak kooneegwaarak wone
(Mat 26:1-5, Mrk 14:1-2, Luk 22:1-2)
45Yorage mbareegi, it Yakuri mendek Mariya mugurok nogogwaarak nogo nen Yetut eeke inigen kogo nogogwaarik, iniki Yetut oba panggombunuk, abet mbareegwaarak. 46Ndi, it ando nen perak, Pariti mendek iya nogo nogogwaarik, Yetut eekerak nogo mbininogo yorogogwaarak. 47Yorogo mbareegwa, it aap Ala unde inoweewi inom, it aap Pariti mendek inom, nen it aap wone amburu mbangga kuwak eeppiigo nogogwaarik, yorogo logonet, ”Aap ti, nineenu ariyak ninagabiti warak mendek apit aret eerit nage menggerak me, nit nonggop eerumun o? 48Eerit nege logowak nduk teppugwi niinok, it aakumi abok aret iniki at oba panggombunuk, abet mbako logonet, amugurok nogo mbarumengga, it aap Oroma mendek nen wogo logomenggaarik, Ala awi wurik inom, nit aakumi nineebe inom, lek eerogo pinanugwi iyoorak me, nonggop eerumun o?” yinuk, yereegwaarak.
49Yogo mbareegwa, aap it mendek ambi Ala unde inowe me, tahun ti paga Ala awi wurik me eeke nagagerak endage Kayapat nogo nen, ”Wologwe! Kit abu kineenggo'lek kobak wonogwe kiigi o. 50Nit aakumi nineebe abok aret lek eerogo pinaniyak ti meek o. Ata, aap ambit nen nit aakumi abok ninake kambuurak perak, op yi kogo ogotik?” yinuk, yoragagerak. 51Wone yoragagerak nogo ti, at alik iniki koombunuk nen yoroolik o. Ata, tahun ti paga Ala unde inowe logonet, eeke nagagerak me, at Ala nen at eeppege kagak, peebi at Yetut aakumi Iterali mendek inake kambuurak me nduk, yoragagerak. 52Aakumi Iterali mendek inake mban ti lek o. Ata, it aap Ala apuri yi awi ndi awi mak eerak wonogwe nogo ambit me kuwak eeppiyoorak inake kambuurak me nduk, yoragagerak.
53Yoragagerak ti eyom paga it Yetut mondok wariyak nduk, wone mbaneegwaarak, 54Wone togop aret mbaneegwaarak me, Yetut aap Yakuri inenggaanom nggwok paga ambinom noolik. Time nen o tini ambi Eperayim karume korok nogome nagagerak. Nage nagagirik, at oone waganggwi mendek inom time aret wonagagerak.
55Wonogwe me, it Yakuri Ala ndomba warogo Patika lariyak eyom panggoni wage mbareegi, laka'lek iigak, it aakumi inabin kooppunuk, ugun nawok nduk, iname lombok nen o Yerutalem nogogwaarak. 56-57Nogo nogogwaarik, it aap Ala unde inoweewi inom, it aap Pariti mendek inom, nen, ”At eebe nggeeme wonage nogo liippogo logomonggotik, eebe nit pigaawok nduk, yo'nira wa'nu o,” yinuk, wone lengganinabeegwaarak me, Ala awi wurik me inigen luk eeko logonet, ”At Yetut lakome woraagin a, lek a? Kit nonggop mbakop o?” yinuk, it-it wone mbaneegwaarak.
Currently Selected:
YAYA 11: WNO
Highlight
Share
Copy
Want to have your highlights saved across all your devices? Sign up or sign in
