MATIYUT 26
26
At Yetut wariyak kooneegwaarak wone
(Mrk 14:1-2, Luk 22:1-2, Ya 11:45-53)
1At Yetut wone ti abok aret yorage nagagirik, it at oone waganggwi nogo yorage logonet, 2”Nogo mbere yippunuk, ndomba Patika lariyak kineenu me, lakwi eyom paga an aap aret nda'nagagirak yi, eyo karo-karo paga nabembanuwak nduk, Ala nen kooneegerak paga neebe pigogo aakumi wogoraagin o,” yinuk, yoragagerak.
3Yorage kagak, it Ala unde inoweewi inom, aakumi inogobamini inom, aap Ala unde inowe endage Kayapat awoore'nggam time kuwak eeko nogogwaarik, 4at Yetut kote aret pippunuk, waruwok nduk, inom wone mbanggo logonet, 5”Aakumi it mban-mban wat-wat yogwe iyo, laago lakwi paga pigoorak mage o,” yinuk, yereegwaarak.
Kwe ambi nen amburu Yetut oba kilippereegerak wone
(Mrk 14:3-9, Ya 12:1-8)
6At Yetut o Mbayitani aap Timon awin aaga'ne kunik wonagagerak nogo ame wonage me, 7kwe ambi iri'ngga narwastu amburu onggo abu nggwok pogo menggaarak mendek nogo, yiiwak yugum mendaarak paga toolak wonok Yetut owagam wage nagagirik, at Yetut mbi nengge kagak, anobak paga kilippereegerak. 8Kilippege nogo, it Yetut oone waganggwi inigen kogo nogogwaarik, inanini nen mberugo logonet, 9”Amburu yi paga onggo wu nggwok wappunuk, aakumi inamendek lek wogoroorak op kagak, nonggop nduk aanom warogo eekerak?”
10Yogwe nogo Yetut yelok iige nagagirik, it yorage logonet, ”Obeelom ee'nakerak me, nonggop nduk, mberugo ogotik o. 11It inamendek lek ti, kinom mondok logomunggup kwe, an perak, kit ninom mondok logogin lek o. 12Kwe yi nen, amburu noba kilippanegerak nogo ti, an kangge neenok, neebe ndoome mambaniyak nogo nduk pipuk eerogo panegerak me, teppinip o. 13Obeelom wone wonok yi awi ndi awi yoranet nugu logonet, kwe yi ee'nakerak nogo, aberak logowak nduk, yoranet nugu logogun o, yinuk, abet aret yokkiragi,” yoragagerak.
At Yurat nen Yetut waruwak nduk, onggo mbaneegerak wone
(Mrk 14:10-11, Luk 22:3-6)
14Yorage mbareegi, it aap 12 mendek ambi endage Yurat Ikariyot nogo nen it aap Ala unde inoweewi inowagam nage nagagirik, 15”Yetut wokkirage neenok, onggo ngge wo'nirumunggup o?” yinuk, yorage mbareegi, it aap nogo nen onggo wu mbuti perak anggen 30 wogoreegwaarak. 16Wogoreegwaarak ti eyom paga nen at Yurat nogo, ”O ngge eyom paga eebe pigogo wogoroorak koonnage kaamun?” yinuk, tokkage nagagerak.
Yetut at oone waganggwi inom laago Patika nunggugwaarak wone
(Mrk 14:12-21, Luk 22:7-14, 21-23, Ya 13:21-30)
17 Roti mbi piika'lek mendek lappunuk, ne aa'nduk noorak eyom paga, it Yetut oone waganggwi nogo nen Yetut owagam wogo nogogwaarik, yogo logonet, ”Ndomba warogo Patika larak nawok nduk, nggeeme pipuk eerogo pagago logowi o?”
18Yogo mbareegwa, Yetut nen, ”Kit o tini nggwok time unggwogo logomonggotik, aap time mendek ambi yogo logonet, At Ngguru nen, An eeriyak nogo panggo yi wagaarak me, it noone waganggwi ninom kat kame time laago Patika larogo nawok o, yinuk, yegerak yoru o.”
19Yorage mbareegi, it at oone waganggwi nogo at Yetut lenggani-nabeegerak nogo ndak-ndak eeko logonet, ndomba Patika larogo pipuk eerogo pugwi a nogogwaarak.
20O kiip age mbareegi, at Yetut at oone waganggwi 12 nogo inom wogo nogogwaarik, kwi'na'nuk, 21mbi nonggo logonet, at nen, ”Aap kit mendek ambi nen nooruwak nduk aakumi yoraagin kagi, yinuk, abet aret yokkiragi o.”
22Yorage mbareegi, iniki abu puru yogo nogogwaarik, inalik nen ambi yogak eeko logonet, ”Ai nogoba. An aret ilik, lek a?”
23Yogo mbareegwa, Yetut nen, ”Aap nimbirak nineenggi tenggap me tamonogo nunggwi yi nen aret neebe nooruwak nduk, yoraagin o. 24An aap aret nda'nagagirak yi, an eeriminggirak nabok wone liiru mbanak ndak-ndak nagin kwe, at aap it aakumi neebe nooruwak nduk yoramenggerak ti perak, abuwa o. Nda'nariyak lek mendek nda'nagagerak o.”
25Yorage mbareegi, at Yurat Yetut eebe waruwak nduk yoramenggerak nogo nen Yetut yoge logonet, ”Ai Ngguru. An aret ilik?”
Yoge mbareegi, Yetut nen, ”Kat nen aret yikkolagan o,” yoreegerak.
Mbi amburu noorak mamuniragagerak wone
26Yoge nagagirik, mbi nonggo logonet, at Yetut nen roti mbi eenggi me wagangge nagagirik, ”Nogoba Ala wa,” yinuk, karerogo, at oone waganggwi nogo wogorage logonet, ”Yi an neebe aret me, waganogo nanip o.”
27Yorage nagagirik, amburu yiiwa'na toolak nogo eenggi me waganogo, ”Nogoba Ala wa,” yinuk, 28wogorage logonet, ”Kit aap ambik kinomaluk lek eerogo pinaganuk, Ala kinom lambumbinagarak wone abok yokkirage nogo kit abet mbarubagip nduk, namiya kilirik aret me, kit abok aret nanip o. 29Ndi, an ta, o yogondak yi kuli paga nen nok peebi an nogoba abu'me piige minggim logonet, anggur anggen amburu ngget mendek ninom noorak eyom ari waga'lek kagak an anggur anggen amburu yi nengga'lek aret logogin yokkiragi o,” yoragagerak.
30Yorage nagagirik, ndawi wappunuk, wundi nogo nogogwaarik, puurom Tayitun paga lagi nogogwaarak.
”Yetut ti neenggo'lek yumunggun o,” Peterut yoreegerak wone
(Mrk 14:27-31, Luk 22:31-34, Ya 13:36-38)
31Puurom Tayitun paga lagi nogo logonet, at Yetut nen, ”Ala ari logonet, An aap ndomba inarum menggerak nogo wake mbariminggi, wam ndomba kombogonak mondok kole ma'narugun o, yinuk, yereegerak liiru mbanak me, kit abok aret oonikiya yi paga an neenok, Nineebi o, yinuk, teppaninuk, kole mbaganumunggup o. 32An neenik agago mippanege kenok perak, kit naga'lek kiigak an naa'nduk o Nggalileya time nagin o,” yoragagerak.
33Yorage mbareegi, at Peterut nogo nen, ”Lek o. It abok aret, Yetut nineebi o, yinuk, teppaganuk mbaganggwi iigak kwe, an nalik perak, teppaganuk mbaganigin mondok lek o.”
34Yoge mbareegi, at Yetut nen, ”Yogondak oonikiya yi paga ayam oone awo yaga'lek kagak, kat ne kenagan paga, Yetut ti neenggo'lek yumunggun o, yinuk, abet aret yokkigi o.”
35Yoge mbareegi, at Peterut nen, ”An nimbirak kambuurak kenok, kambuurak aret me, Yetut neenggo'lek ti perak, yigin abu lek o.”
Yoge mbareegi, it at oone waganggwi nogo abok aret togop lombok yoreegwaarak.
Yetut o Nggetemani logonet, tamban eereegerak wone
(Mrk 14:32-42, Luk 22:39-46)
36Ti yogo nogogwaarik, at Yetut at oone waganggwi nogo inom o endage Nggetemani ari nogo nogogwaarik, at Yetut at oone waganggwi nogo yorage logonet, ”An iru time tamban eeri nage me, kit ya'i logonip o.” 37Yorage nagagirik, Peterut inom, it Tebereyut apuri mbere nogo inom, wogoret nage nagagirik, iniki puru yinuk, mondok aaninggin agagerak. 38Age nagagirik, ”Wologwe wae. An niniki puru ari logonet, kambuurak ee'nake me, kit yime logonet, ninom ndak-ndak tum wako logowok o.”
39Yoranok, nirurogon nage nagagirik, enete wanduk togon winna'nuk, Ala yoge logonet, ”Ai nogoba. An ee'naburak yiiwak toolak kwak yi, noorak lek teppaniyak kenok, teppanu o. Ndi, lek kenok, an niniki mba'nuk eerigin ti lek o. Ata, kat kiniki mba'nuk aret eerigin o,” yinuk, tamban eereegerak.
40Tamban eeke nagagirik, at oone waganggwi nogo inowagam wagagerak. Wage nagagirik, nogo yugwi enegen iige nagagirik, Peterut yoge logonet. ”Wulaga. Kit ne ambit iluk ninom tum wako logorak meek kenok nogo yogo ogotik? 41Niniki nen obeelom eeriyak mbakwi kwe, nineebe nen eeriyak meek ee'ninake menggerak me, maluk eeriyak kinikime nggagani wage kero, tum wako logonet, tamban eeko logonip o.”
42Yoge nagagirik, ne ambi teppiinok nage nagagirik, Ala yoge logonet, ”Ai, nogoba. An amburu toolak yi nengga'lek me teppaniyak meek kenok, kat kiniki mba'nuk aret eeriyak o,” yinuk, tamban eereegerak. 43Tamban eeppunuk, iyok paga wage nagagirik, it aap nogo yuurak eeginake mbareegi, nogo yugwi enegen iyareegerak.
44Nogo yugwi iigak, teppiinok, nage nagagirik, oone aa'nduk ne mbere paga Ala yoreegerak nogo, peebi ne ambinom tamban eeke logonet, togop aret yoreegerak. 45Tamban eeppunuk, it at oone waganggwi nogo inowagam wage nagagirik, ”Kit yonggonggologo logonet, nogo mban yogo logorak mbako ogotik ya? It maluk eeko menggaarak nen an aap aret nda'nagagirak neebe nooruwak nduk wogoroorak eyom muk panggo yi wagaarak o. 46At neebe nooruwak nduk, nonggo mbanggerak nogo muk korok aret wage me, nawok nduk, mi'nanip o,” yinuk, yoragagerak.
Yetut pigaganeegwaarak wone
(Mrk 14:43-50, Luk 22:47-53, Ya 18:1-12)
47At Yetut awo yorage kagak, it aap 12 mendek yendennagagerak Yurat nogo wage logonet, it Ala unde inoweewi inom, it aakumi inogobamini inom, nen aap ambi aago, paloowi waganggwi, yawi ogobakkigirik waganggwi, ee'nuk, Yetut wa nawak nduk, nappiya wogogwaarak nogo inom aret wogogwaarak. 48Ndi, at Yetut eebe waruwak nduk, onggo mbaneegerak nogo nen, aa'nduk inom wone mbangge logonet, ”Yelok kabagip nduk, an aap ambi kambugege neenok, aap nogo ti aret, mba'nuk, piganu o,” yinuk, wone inom mbaneegerak me, 49at nogo nok-nok Yetut owagam nage nagagirik, ”Nogoba Ngguru wa,” yinuk, kambugege mbareegi, at Yetut nen, ”Wulaga! Kat eerikit nduk wagandak nogo eeru o.”
50Yoge mbareegi, it aap nogo kok wogo logonet, Yetut pigaganeegwaarak. 51Pigaganggo mbareegwa, Yetut inom menggaarak aap ambi nen paloowi nggigik togon agago aap Ala unde endagembogut ayeloman nogo aruk tabok togon nappereegerak. 52Tabonogo nappege mbareegi, at Yetut nen, ”It aap paloowi paga inookwi iinok, it nen onggo paloowi paga aret inooko menggaarak me, kobaloowi ti awiina yonggolu o. 53An nili yuwak nduk, yogondak yi paga it mbogut paga menggaarak melaikat apit ineebe 12 aago wo'niruwak nduk, an nogoba nggino yoriyak meek mbaken? 54Nggino yoriyak op aret kwe, yoge neenok, Togop eeriyak, Ala wone liiru mbanak nogo nonggop togon a'me lik yuurak mbaken? A'me lik yuwak nduk, an yoga'lek aret agarik o.”
55Yoge nagagirik, ne ti paga at Yetut nen it aakumi kuwak aago nogo yorage logonet, ”Aap yogoot iyagalo piginabi nogo mengga kwak, inom, wonok wogotak ya? Ko'lu'kii'me Ala awi wurik me mamunggirage neegak, pi'nake'lek wonogotak kwe, 56it Ala yorogo nogogwaarak nabi-nabi nen liiru mbaneegwaarak nogo a'me lik yuwak nduk, ee'nabi wogotak me, op aret o.”
Yorage mbareegi, at oone waganggwi nogo nen Yetut teppunuk, kole mbaganeegwaarak.
It aap wone amburu mbanggo menggaarak nen Yetut owak looneegwaarak wone
(Mrk 14:53-65, Luk 22:54-55,63-71, Ya 18:13-14, 19-24)
57Kole mbaganggo mbareegwa, it Yetut eebe pigaganeegwaarak nogo, wonok aap Ala unde endagembogut Kayapat owagam it aap Ala wone liiru mbanak unde inom, aap inanggok inom, kuwak eerak wonogwe me, nogogwaarak. 58Nogwe iigak, at Peterut nogo inambo'me yanabek at Ala unde endagembogut awoore'nggam panggo yi nage nagagirik, unggwi na'nuk, ”Nonggop eekwi iyaamun?” yinuk, at aap nggwok nogo awuri inenggela'me inom kwi'nari unggwagagerak. 59Kwi'ndak wonage kagak, it Ala unde inoweewi inom, it wone amburu mbanggo menggaarak abok aret inom, ”At Yetut waruwok nduk, taani nen pilit wone at oba pugwi iyaamun?” yinuk, 60aap ambik nen pilit wone oba lenggenugun ta'lek wogogwaarak kwe, alom kwaaka'lek aret wonogwe me, ti'nuk, peebi aap mbere wogo nogogwaarik, 61”Aap yi nen, An Ala awi wurik minogo punuk, obaane'me wuke neegak, nogo mbere aret yumunggup yereegerak o.”
62Yorogo mbareegwa, at Ala unde endagembogut nogo mi'nage nagagirik, ”It aap yi inoone koba pagagwi me, kat koone onggo ambi yoraamunggun a, lek a?” 63Yoge mbareegi, at Yetut nogo oone lek puk wonagagerak. Puk aret wonage mbareegi, at Ala unde endagembogut nen, ”Kat Keritut Ala aput keenok, paganogo yo'niraanok nduk, at Ala eenik menggerak endage paga yokkigi o.”
64Yoge mbareegi, at Yetut nen, ”Ti kat nen aret yagandak kwe, an ambi yokkiri o. O yogondak yi kuli paga nen an aap aret nda'nagagirak yi, at omaawi ambik menggerak nogo eenggi abe'nggan mi'ndak wonage logominggirik, mbogut paga ndugwi enggela'me wambi wage neyaamunggup o, yinuk, yokkiragi o.”
65Yorage mbareegi, at Ala unde endagembogut nogo nen ayum nibinggolage logonet, ”Ala miyuk-meya eerogo pege yi kagak, ambi ngge inom yo'niraawak nduk, tokkogo ogotik? At yegerak abu konenggotak me, 66nonggop eeruwi mbakop?”
Yorage mbareegi, it nen, ”Mondok wariyak aret o.”
67Yogo nogogwaarik, woori enete me lenggenggogwe, ineenggi lingginik paga wakwi, ndi, ando ineenggi telak wakwi, eeko logonet, 68”Wulaga Keritut. Ta nen kooke kagan? Yu nda!” yinuk, yogo nogogwaarak.
Peterut nen, ”Yetut ti an neenggo'lek,” yereegerak wone
(Mrk 14:66-72, Luk 22:56-62, Ya 18:15-18,25-27)
69Yogwi iigak, at Peterut nogo oore'nggam taati kwi'ndak wonage me, kolaga inayeloman ambi wage nagagirik, ”Kat kunduk, at Yetut o Nggalileya mendek kimbirak nege menggendak keegi o.”
70Yoge mbareegi, at Peterut it abok inenggaanom paga, ”Kat yagandak ti, an neenggo'lek ubi!” 71Yoge nagagirik, tu nda'nggi paga ari wungge mbareegi, kolaga ambi nen Peterut enegen kage nagagirik, it time mendek yorage logonet, ”Aap yi kunduk, at Yetut Nataret mendek imbirak menggerak aret o.”
72Yorage mbareegi, at Peterut ne ambi ari logonet, ”An aap ti, mondok neenggo'lek Ala enggaanom paga abet aret yokkigi o.”
73Yoge nagagirik, nogome wonage me, ti'nuk, it ugun wonogogwaarak nogo nen Peterut yogo logonet, ”Koone ari ti paga kat it mendek abet aret yelok keego o.”
74Yogo mbareegwa, ”An aap ti, abu neenggo'lek me, nogoba owak o,” yinuk, Ala owak mbangge kagak, ayam nogo oone aret yereegerak. 75Ayam oone ari mbareegi, at Yetut nen, ”Towe ayam oone awo yaga'lek kagak, kat ne kenagan paga, Yetut ti an neenggo'lek yumunggun o,” yinuk, yoreegerak nogo, at Peterut iniki abe'nage mbareegi, wundi nanuk, iniki puru ari nagagirik, le nggwok yereegerak.
Currently Selected:
MATIYUT 26: WNO
Highlight
Share
Copy
Want to have your highlights saved across all your devices? Sign up or sign in
