MATIYUT 27

Yetut wonok Pilatut wogori nogogwaarak wone

(Mrk 15:1, Luk 23:1-2, Ya 18:28-32)

1O wege mbareegi, it Ala unde inoweewi abok inom, it aakumi inogobamini inom, Yetut wariyak wone amburu mbambunuk, 2eebe keele maarogo at nggubereno endage Pilatut nogo wonok iri nogogwaarak.

Yurat kambeegerak wone

(Nap 1:18-19)

3Ndi, aakumi nen Yetut waruwak nduk, onggo mbaneegerak at Yurat nogo nen it wone amburu mbanggo menggaarak nen Yetut wariyak kooneegwaarak nogo kage nagagirik, iniki wakko'nok, wu mbuti perak anggen 30 nogo wonok, iyok paga it aap Ala unde inoweewi inom, it aap inanggok inom, inowagam nage nagagirik, 4”Ai. An nen aap maluk eerulik kagak, warubagip nduk, onggo mbanggirak me, maluk aret eekirak o.”

Yorage mbareegi, it nen, ”Wone ti nit ninoba agaarak mbaken? Ti kat kobaalombok aret o.”

5Yogo mbareegwa, at Yurat nen wu mbuti perak nogo Ala awi wurik me time mbo tek eerogo mambege nagagirik, wundi nanuk, enggaanok keele yilunggola nage nagagirik, kambeegerak.

6Kangge mbareegi, it Ala unde inoweewi wu mbuti perak nogo waganggo nogogwaarik, ”Wu yi, aap amiya paga onggo mbanak aret me, Ala ake wu pogo menggam taati puurak mage o,” yinuk, 7aap nggiru mendek kanggwi iinok, nggween kabunogo taambiigo logowak nduk, aap nggween mendek paga togolowak ogobakkigike minggim nogome aret wu mbuti perak nogo paga onggo mbaneegwaarak. 8Nggween ti, aakumi inamiya kilirik paga onggo kunik me, endage, ”Aap Amiya Wundeegim aret o,” yinuk, yogondak awo yogwe aret wonogwe o.

9-10Ti eereegwaarak nogo ti, at Ala nen yoge kagak, Ala wone yorage nagagerak nabi ambi Yeremiya nen ari logonet, ”It aakumi Iterali mendek nen at eebe onggo ti wu mbuti perak anggen 30 puurak op o, yogogwaarak nogo aret waganogo at ninogoba endagembogut yo'nereegerak ndak-ndak aap nggween mendek togolowak ogobakkigike minggim onggo mbanggologogwaarak o,” yinuk, yoragagerak nogo, ne ti eyom paga aret a'me lik yereegerak.

At Pilatut nen Yetut eegwa'me waganeegerak wone

(Mrk 15:2-5, Luk 23:3-5, Ya 18:22-38)

11Ndi, at Yetut nogo nen aap nggubereno owagam mi'nari wage mbareegi, at nggubereno nogo nen eegwa'me wagangge logonet, ”Yakuri inowe endagembogut kat aret ilik?”

Yoge mbareegi, at Yetut nen, ”Ti kat nen aret yagan o.” 12Yoreegerak kwe, it aap Ala unde inoweewi inom, aap inanggok inom, nen wone at oba lenggenogo pugwi iigak, at onggo ambi abu yoroolik puk aret wonagagerak.

13Puk aret wonage mbareegi, at Pilatut nogo nen, ”Yi wone ndi wone koba lenggenogo pagagwi yi, kat konengga'lek agandik?”

14Yoreegerak kwe, onggo yoraga'lek abu puk aret mbareegi, at nggubereno nogo nen, ”Aap yi iya kagi,” yinuk, pi wareegerak.

”Yetut mondok waruwok o,” yereegwaarak wone

(Mrk 15:6-15, Luk 23:13-25, Ya 18:39-19:16)

15Ndi, it aap Yakuri laago lako logonet, kuwak eeko menggaarak nogo nen, ”Aap keele maarak ambi ti, piinogo wo'niret o,” yogwi iinok, at nggubereno nogo nen piinogo wogorage nagagerak me, 16nogo eyom paga aap maluk nggwok eerit nage nagagerak paga endage ineenu ogogwaarak endage Mbarabat nogo, keele maarak wonage me, 17-18it aakumi kuwak eeko mbareegwa, at Pilatut nen it inanini agaket paga Yetut wonok wogwe yelok iige nagagirik, ”Kit kiniki nen ta piinogo wokkiroorak mbakop? At Mbarabat ilik, Yetut endage Keritut piinogo wokkiroorak a?” yoragagerak.

19Yorage nagagirik, owak looninake minggim taati kwi'na'nuk, wonage me, aap ambi wage nagagirik, Pilatut yoge logonet, ”Pilatut wae. Kat kakwe nogo oonikiya yi paga abi kage logonet, Aap ti iniki abu koonak kagak maluk eeppugwi, kage nagaarik, iniki aaninggin ambik agaarak me, Nore nen maluk eeppege kero, yori nak o, yo'nege mbaki, yokkiri wagi o,” yori wagagerak.

20Nogo yoge kagak, it Ala unde inoweewi inom, aap inanggok inom, nogo nen it aap kuwak aago nogo yorogo logonet, ”Mbarabat keele piinogo teppege logonet, Yetut wariyak wo'niraawak nduk, Pilatut yo'nip o,” yinuk, wone inikime manabit nogogwaarak. 21Inikime manabit nogwe at nggubereno nogo nen iige nagagirik, ”Aap mbere me, ambi ta piinogo teppuurak mbakop?”

Yorage mbareegi, ”Mbarabat aret o.”

22Yogo mbareegwa, at Pilatut nen, ”Ndi, ti kenok, at Yetut endage keritut yogwe yi, an nonggop eerogo pi o?”

Yorage mbareegi, it abok nen yogo logonet, ”Eyo karo-karo paga nabenogo puurak aret o.”

23Yogo mbareegwa, at nen, ”At maluk ngge eekerak paga yogop o?”

Yorage mbareegi, ”Eyo karo-karo paga nabenogo puurak aret o,” yinuk, abunuk inoone nggwok paga ya-mba yogogwaarak.

24Yogo mbareegwa, Pilatut nogo nen oone we aanom warogo ari, ndi, nawone-kawone yogo logonet, maluk nggwok eeriyak age, eeke kage nagagirik, niyo toolak waganogo it aap kuwak aago inenggaanom paga eenggi kooke logonet, ”Aap yi amiya an noba arigin lek o. Kit kinoba aret logogin me, kinobaalombok aret koonggo logonip o.”

25Yorage mbareegi, it aakumi inoone wonggok togon yogo logonet, ”At amiya ti, nit ninapuri-ninombowologwe ninom ninoba logorak op aret o.”

26Yogo mbareegwa, at yoreegwaarak nogo ndak-ndak at Mbarabat keele piinogo teppege, ndi, Yetut ti, ya'mbiran wappunuk, eyo karo-karo paga nabenogo puwak nduk, wogorage, eereegerak.

It aap yigin unde nen Yetut miyuk-meya eerogo pereegwaarak wone

(Mrk 15:16-20, Ya 19:2-3)

27Wogorage mbareegi, it nggubereno awuri yigin unde nogo nen at Yetut wonok wone amburu mbanggo menggam unggwogo nogogwaarik, ineebe abok aret Yetut eebe ninggippunuk, wonogo logonet, 28at ayum nggooppunuk, yum alik maa'ngga warak yippugwi, 29alok komaarogo anobak paga yippugwi, wim owak mbanogo eenggi abe'nggan wogogwi, eeppogo nogogwaarik, ineebe at abu'me tebe yinuk, agi'ndok kanggo logonet, ”Wa! It aap Yakuri inowe endagembogut kat aret me, wa. Nogoba wa,” yinuk, 30woori lengga eerogo pugwi, wim owak mbanak eenggi me nogo ndimbunuk anobak me tela eerogo wakwi, eeppunuk, 31miyuk-meya eerogo pogo nogogwaarik, yum maa'ngga warak nogo nggooppunuk, at ayum nogo yippogo nogogwaarik, eyo karo-karo paga nabembuwok nduk, wonok wundi nogogwaarak.

Yetut eyo karo-karo paga nabembereegwaarak wone

(Mrk 15:21-32, Luk 23:26-43, Ya 19:17-27)

32Wundi nogwe me, aap o Kireni mendek endage Timon inom labunggo nogogwaarik, inoone omaawi paga, ”Eyo karo-karo aago yi, piyaninuk nak o.” 33Yogo nogogwaarik, o endage it inoone paga, ”Nggologota o,” yogo menggam nogome ari nogogwaarak. O ti, nit ninoone paga, Anobak Yelenak aret o. 34Nogo nogogwaarik, anggur amburu inom, ambiki amburu ale mendek inom, nenggelak-kenggelak agago punuk noorak nduk, wogoreegwaarak mendek, ombat wakkage nagagirik, noorak eebi mbareegerak.

35It nen Yetut eebe nogo eyo karo-karo paga nabembunuk, ”Ambogoyum ta koloorak kaamun?” yinuk, yugum anggen nggween paga mbo wuppegak eeko logonet, ayum nogo ambi kolagak eeko nogogwaarak. 36Eeko nogogwaarik, taati kwi'na'nuk logonet, Yetut arum wonogogwaarak. 37Wonogo logonet, ”Aap Yakuri inowe endagembogut Yetut yi aret o,” yinuk, oba lenggeneegwaarak wone nogo liiru mbanogo Yetut anobak irimbaga eyo nogo paga nabembereegwaarak. 38Nabembogo nogogwaarik, aap yogoot iyagalo mbere Yetut eebe peenok-peenok eyo inalitak paga nabenogo piyareegwaarak.

39Nabembiigo mbareegwa, it aakumi ando nogwe-wogwe nogo inuut walok yogo logonet, ”Keyik! 40An Ala awi wurik minogo punuk, obaane'me wuke neegak, nogo mbere yigin yagandak yi, kat Ala aput aret keenok, kagap ndakko'nok wambi mok ubi.”

41Yogo mbareegwa, it Ala unde inoweewi inom, it Ala wone liiru mbanak unde inom, it aap inanggok inom, Yetut miyuk-meya eerogo pogo logonet, 42”At nen aakumi inagap ndaganake nagaarak kwe, at eebe agap ndakkoloorak meek yi kogop a? Aap Iterali inowe endagembogut aret me, yogondak eyo paga nen wambi wage kenok perak, nit abet ombarugun o. 43Iniki Ala oba panggonak logonet, An Ala aput aret o, ari nagaarak me, Ala nen inikilom ombake kenok, agap ndaruwak o,” yinuk, yereegwaarak.

44Ndi, it aap yogot iyagalo Yetut inom eyo karo-karo paga nabembiyareegwaarak nogo kunduk, Yetut enggali wappogo logonet, togop aret yoreegwaarak.

Yetut kambeegerak wone

(Mrk 15:33-41, Luk 23:44-49, Ya 19:28-30)

45Yogo mbareegwa, o liingge jam 12 kuli paga nen jam 3 kuli ari nage kagak, o time apit aago aret wonagagerak. 46Ndi, jam 3 negen ari nage mbareegi, at Yetut oone nggwok paga ari logonet, ”Eli, eli lama tabakatani,” yoreegerak. Yoreegerak nogo ti, nit ninoone paga, ”Nogoba Ala o. Nogoba Ala o. Nonggop nduk an teppanegen o?” yinuk, yoreegerak.

47Yoge mbareegi, it time wonogogwaarak ando nen Yetut oone ari inaruk konembogo nogogwaarik, ”Aap yi, Eliya wiige agaarik o,” yinuk, 48yogo mbareegwa, aap it mendek ambi puu'nuk nage nagagirik, tut ta'mbit leenogo anggur amburu aleegwi mendek tamombunuk, nawak nduk, wim yigirok paga kunogo wogoge mbareegi, 49it ando nen, ”Eliya nen agap ndari wage kaawam me, puk o.” 50Yogo mbareegwa, at Yetut ne ambinom kwa ari logonet, iniki woronggo'nok kambeegerak.

51Iniki woronggo'nok kangge mbareegi, yum Ala awi wurik me akenggwe tugunik wonagagerak nogo agi nen oolo muundak nggoguk yi wambi wage, nggween nuk ari, yugum puut-puut abok langgu-langgu wambi wage, eeke logonet, 52ndi, aakumi kanggaatak ineebe mambiigo menggam nogome tu kuu'narit nage mbareegi, Ala apuri kambeegwaarak nogo ambik ineenik a'nuk, mi'nogo nogogwaarak. 53Ndi, peebi at Yetut eenik a'nuk mi'nage mbareegi, it nogo ndoome nen wundi nogo nogogwaarik, o tini Ala ake leenak minggim nogome unggwogo mbareegwa, aakumi ambik inigen iyareegwaarak.

54Ndi, at yigin unde inowe inom, it Yetut arum wonogogwaarak inom, nogo nen mi nuk ari, yi eekak ndi eekak eeke, inigen kogo nogogwaarik, inagabiti ambik age mbareegi, ”At yi Ala aput abet aret kogo o,” yinuk, yereegwaarak.

55Ndi, it kumi ambik o Nggalileya nen Yetut ake eerit inom nogogwaarak nogo nen Yetut eyo paga nabenak wonage nda nen inigen nakkogogwaarak. 56Inigen nakkogogwaarak nogo ti, at Mariya Magaralena inom, it Yakobut Yutup imbirak inagalo Mariya inom, at Tebereyut apuri inagalo inom, kumi ando inom, ti nen aret inigen nakkogogwaarak.

Yetut eebe ndoome mambereegwaarak wone

(Mrk 15:42-47, Luk 23:50-56, Ya 19:38-42)

57O kiip age mbareegi, aap eenggi warak Arimateya mendek ambi endage Yutup, Yetut oone wagangge menggerak me, 58Pilatut owagam wage nagagirik, ”Yetut warak eebe wo'niru o,” yinuk, ngginooge mbareegi, at Pilatut nen wogoruwak nduk, yoragagerak. 59Wogogo mbareegwa, at Yutup nogo nen Yetut eebe wagangge nagagirik, mbogoyum abu laambu koorak paga perenogo, 60ndoome yugum eno nendaarogo pateegim mambege nagagirik, yugum tabak nggwok laganogo tungga nappunuk, nagagerak. 61Ndi, at Mariya Magaralena, kwe Mariya ambi nogo imbirak aap warak pereegwam nogome engga lolo kwi'ndak aret wonogogwaarak.

Yetut wa unggwogwe iyo, tum wako nogogwaarak wone

62It aap Yakuri tamban eeriyak nduk, pipuk eeppogo nogogwaarik, nogo yippunuk, ko'lu ti paga it aap Ala unde inoweewi inom, aap Pariti inom, kuwak eeppunuk, Pilatut owagam wogo nogogwaarik, 63”Ninogoba wae. At aakumi nomoninake menggerak nogo nen awo eenik logonet, Nogo mbere yippunuk, mi'narigin o, yereegerak nogo nineenu me, 64at oone waganggwi nogo nen wogo logomenggaarik, eebe kote wappunuk, aakumi yorogo logonet, Kambunuk nogo menggam nen eenik a'nuk mi'nagaarak, yogwe iinok, at Yetut aa'nduk aakumi iniki nomoninabeegerak ti mbuuluk negen, ndi, it at oone waganggwi nogo nen nggwok togon nomoninakwi iyo, kat nen Yetut eebe warak pegam nogome ne kenagan kuli paga tum wako logowak nduk, kawuri yoret o.”

65Yogo mbareegwa, at Pilatut nen, ”Kinake tum wako logorak ineebe yi aret me, it nen tum wako logorak nogo kinobaalombok koombunuk, yoraanip o.”

66Yorage mbareegi, nogo nogogwaarik, yugum narak nogo paga wa'mbok punuk, it yigin unde nogo nen aap warak pereegwam nogome tum wako logowak nduk, piinok, nogogwaarak.

Currently Selected:

MATIYUT 27: WNO

Highlight

Copy