MARAKUT 13
13
”Ala awi wurik langgunogo nappugun,” yoragagerak wone
(Mat 24:1-2, Luk 21:5-6)
1At Yetut Ala awi wurik me nogome nen wundi nage me, at oone waganggwi nogo ambi nen, ”Ngguru wae. Yugum nggwok inom, o wurik inom, mondok kigirikwe yi ket o. Wi!” yinuk, pi wareegerak.
2Pi wake mbareegi, at Yetut nogo nen, ”O mondok iya wurik kagan yi, yugum oba lu'luk aago logorak lek o. Abok tigitogon langgunogo nappege kaamunggun o,” yoragagerak.
”Piyak-payak eerogo aaninggin-paaninggin kinoba pinagagun o,” yinuk, yoragagerak wone
(Mat 24:3-14, Luk 21:7-19)
3Yoge nagagirik, at Ala awi wurik ena wunggagak put Tayitun nogo paga lagangge nagagirik, kwi'ndak mbareegi, at Peterut togon, Yakobut togon, Yaya togon, Andereyat togon, inom inalik a'nuk kin wakkogo logonet, 4”Kat yo'niragandak nogo, mandenom arigin o? Togop eeriyak yo'niragandak nogo, a'me lik yuurak eyom koorok panggo ari kagak, nano eeke paga nineenu ariyak mbaken? Yo'niret o.”
5Yogo mbareegwa, at Yetut nogo nen, ”Aakumi nen nomongginakwi iyo, kiniki tum wako logonip o. 6It aakumi ambik aret an nendaga kunit wogo logonet, Keritut nogo an aret o, yinuk, it aakumi ambik iniki nomoninabugun o. 7Wim nggaganggwi, nambukwi, abok kinaruk konenumonggotak kwe, kiniki lek arugup o. Ti arit woramenggerak kwe, age yobok ari wage logonet, eeke mbarugup o. 8Aakumi inanebunu lombok ndegek wim nambukwi, o yi awi ndi awi abok lambumbunuk, wim nggwok nambukwi, yi awi ndi awi nuk ari, mbi noogalo age, ti eerigin ti, we kumi elege enegen paganak yagan wako mengga kwak, kinoba aaninggin-paaninggin eeppinagage kaamunggup o.
9Wone amburu mbangga inowagam pikkiret nogwe, it Yakuri tamban eeko menggam nen yawi lambu agago kinookwi, an noone waganeegutak paga it aap yo'nggok inom, aap inendagembogut inom, inowagam wokkiren pinagi nagun me, kiniki tum wakkologo logonu o. 10Peebi age yobok paga eeriyak awo kagak, aa'nduk nen wone obeelom wone yi aakumi ndi aakumi yoranet nugu logomunggup o. 11Ndi, kineegwa'me woorak nduk kineebe wokkiren nogwe iinok, Wone ngge yoraamun? yinuk, kiniki piirik eerugup o. Kit kiniki koombunuk, yoroorak lek o. O ti eyom paga aret at Aberiniki nen kiniki nggaganogo yokkirage kagak yoroorak o. 12Ore nen ore aret waruwak nduk pigogo wogorage, ogoba nen apuluk waruwak nduk pigogo wogorage, inapurilogwe nen inagalomini-inogobamini inom ogooppunuk inooruwak nduk wogorogwe, eerugun o. 13Kit an noone waganeegutak nogo paga it abok aret ineebi kinombarugun kwe, kiniki kwi'ndak nu'lek eeppunuk logomonggotak kenok, o age yobok kuli paga nen kinagap ndarigin o,” yoragagerak.
Inobak aaninggin-paaninggin lombok eeppiyoorak wone
(Mat 24:15-28, Luk 21:20-24)
14(Kit liiru mbanak pekkogwe yi, kiniki liippinip o.) Yorage nagagirik, ”Ogole warak alik mendek lombok ambi wage logominggirik, unggwageelik me nogome mi'nari ungguminggirak wonage kogo logomonggotik, Iya! yinuk, kit o Yureya mendek put paga time kole mbaganggo logomunggup o. 15Kiname ugun wonogwe nogo kinamendek tilaabaga kola laganggwi, 16kinayabu me wonogwe nogo nen kinayum kiname kola wogwe, eerumunggup lek o. Ata, time nen aret kole mbaganumunggup o. 17O ti eyom paga kumi inabila inom, inaagalogwe awo inilak kuninakwi inom, ti perak, inabuwa! 18O mayu tit kunik eeke kagak age kero, tamban mban eeko logonu o. 19At Ala nen yi mendek ndi mendek wakkagagerak kuli nen, yogondak kuli yi paga aakumi inoba aaninggin-paaninggin eeppiigo nogogwaarak kwe, ti, we mbuuluk aret eeppiigo nogogwaarak. Yogondak kunduk mbuuluk aret eeppiigwi kwe, o ti eyom paga kinoba aaninggin-paaninggin alik tam warak lombok eeppinagagwi iyaamunggup o. 20Aaninggin-paaninggin eeppinagarak eyom nogo Ala nen kuli panggoppi woraagin lek kenok, aakumi inagap lek abok aret inoorigin me, at Ala nen at apuri miirogo leeninabeegerak mendek inookwi iyo, kuli pigin aret o.”
21Yorage nagagirik, ”Ti eeremenggerak kagak, aap ambi nen, Keritut nogo yi kaanip o. Ndi, aap ambi nen, Keritut nogo ti kaanip o, yokkirogwe iinok, kiniki abet aret mbarugup o. 22It ando pilit wone yokkirogo logonet, Keritut nogo an aret o. Ala wone yokkirogo nogogwaarak nabi mendek nogo ti, an aret o, yinuk, agan wogo logomenggaarik, it aakumi Ala apuri miirogo leeninabeegerak nogo nomoninaburak op kaamun ilik? yinuk, nomoninabuwok nduk inagabiti warak mendek inom, eerubok mendek inom, eekwi iigak aret kwe, 23ti awo eeka'lek kagak, abok aret paganogo yokkirage me, kiniki liippunuk tum wako logonip o,” yinuk, yoragagerak.
”An aap aret nda'nagagirak woraagin,” yoragagerak wone
(Mat 24:29-36, Luk 21:25-28)
24Yorage nagagirik, ”Ti eyom paga aaninggin-paaninggin eeppinagago mbarumengga, oonegen apit age, tut abinak lek age, 25laaluguragan mbogut paga nen ngginu-ngginu nggween paga wambit wage, it mbogut paga oolo yime inomaawi menggaarak nogo inaganak nuk irage, eerigin. 26Eeke mbariminggi, an aap aret nda'nagagirak nogo namindik-namendek li'luk eekko'nok, nayuk warak logonet, ndugwi enggela'me wambi wage neyaamunggup. 27Wage logominggirik, it mbogut paga yonggo nugu menggaarak melaikat nogo o alom-alom nappiige neenok, it Ala nen miirogo leeninabeegerak nogo o ilin-unggut time nen aret kuwak eeginabugun o,” yinuk, yoragagerak.
Eyo ara paga eegu laarogo yoragagerak wone
(Mat 24:32-35, Luk 21:29-33)
28Yorage nagagirik, ”Eyo ara anggup larikit nduk eeke menggerak nogo kiniki wakkanip o. Anggup mbilangge nagaatik, engga larikit nduk eeke kenok, O kinikit nduk panggo yegerak o, yinuk, yogo monggotak nogo pogom, 29Togop eerigin o, yinuk, yokkiragarak nogo eeke kinigen kogo logomonggotik, Koorok panggok yegerak kogo o, yinuk, mbarumunggup o. 30Kit yogondak wonogwe yi, awo lek aga'lek kiigak, abok eeriyak yokkiragarak nogo a'me lik ari kaamunggup o, yinuk, abet aret yokkirage agarik o. 31Mbogut inom, nggween inom ti, lek arigin aret kwe, an noone ti perak, lek arigin lek mondok aret logogin o,” yoragagerak.
32Yorage nagagirik, ”An aap aret nda'nagagirak nogo, o ndi eyom paga woroorak inom, oonegen ndi paga woroorak inom, nogo aakumi abu ineenggo'lek aret o. It mbogut paga yonggo nugu menggaarak melaikat kunduk ineenggo'lek aret. Ndi, an Ala aput kunduk neenggo'lek aret o. An nogoba perak, alik mban eenu menggerak o,” yoragagerak.
”Ti eyom woroorak kineenggo'lek o,” yoragagerak wone
(Mat 24:36-44)
33Yorage nagagirik, ”Ndi eyom woroorak kineenggo'lek aret me, kiniki liippunuk logonet, tum wako logonip o. 34Aap ambi nen aap inawi naakit nduk eeke logonet, at ayeloman mini nogo oorum logonet, eeko logowak nduk inalitik-inalitak punogo piige, ndi, at tungga unde menggerak nogo tu ndogonum logowak nduk yoge, eerogo piinok, nogo mengga kwak, 35at awi unde nogo kiyoma nggwe woraagin ilik, nogo iniki paga woraagin a? Towe oone ari kagak woraagin ilik, liingge woraagin a? Ndi eyom paga woraagin kineenggo'lek me, kinaket paga logonet, kiniki tum wako logonip o. 36Abera'lek me wage logominggirik, kit ugun nogo yugwi enegen kiige kero, kinaket paga logonet, tum wako logonip o, 37yinuk, yokkiragarak nogo kwak, kit aakumi abok aret yokkirage agarik o,” yinuk, yoragagerak.
Currently Selected:
MARAKUT 13: WNO
Highlight
Share
Copy
Want to have your highlights saved across all your devices? Sign up or sign in
