MARAKUT 9
9
1Yorage nagagirik, ”Kit aakumi yime wonogwe nogo, at Ala omaawi ambik me, aakumi at abu'me piya wage kaga'lek kiigak, kambumunggup mondok lek o, yinuk, abet aret yokkiragi o,” yinuk, yoragagerak.
Puurom time nen enete alik negen agagerak wone
(Mat 17:1-13, Luk 9:28-36)
2Yorage nagagirik, ti'nuk, nogo 6 yippunuk, at Yetut nen at Peterut togon, Yaya togon, Yakobut togon wogoren puurom ambi nggorek paga lagi nage nagagirik, it inalik time wonogwe me, inengaanom at enete alik negen agagerak 3Enete alik negen age nagagirik, ambogoyum laambu abinak ndelenak-welenak eereegerak. It mbogoyum laambu abinak aruwak nduk kooko mengga kwak ti lek o. Ata, abinak abu alik negen laambu lombok age mbareegi, 4it Eliya Muta imbirak Yetut inom lambumbunuk, wone mbanggwi iyareegwaarak. 5Wone mbanggwi iigo nogogwaarik, at Peterut nogo nen Yetut yoge logonet, ”Nogoba Ngguru wae! Nit yime wonogwe yi, obeelom aret me, kit logorak nduk, ooliya kenagan wuriyak. Ambi ti kat, ambi ti Muta, ndi, ambi Eliya kinake wuriyak o,” yoreegerak. 6It at nogo, ”Iya!” yinuk, inagabiti ambik age mbareegi, nonggop yubok kenok, togop yereegerak.
7Yoge mbareegi, ameraakot nobarinake nagagirik, enggela'me nogome nen oone ari logonet, ”An naput niniki kunik yi aret me, at oone mban konenggo logonip o,” yinuk, ari koneneegwaarak. 8Ari konembunuk, inigen penggek togon pekkogo nogogwaarik, it lek iigak, at Yetut alik mban wonage inigen kogogwaarak.
9Puurom paga nen wambi wogo logonet, at Yetut nen, ”An aap aret nda'nagagirak yi, kambunuk nogo menggam nen awo neenik a'nuk mi'naga'lek neegak, eeke kinigen neegotak nogo aakumi abu yoraagup o.”
10Yorage mbareegi, eeke kogogwaarak nogo aakumi yoroolik kwe, inalik logonet perak, ”At kambunuk nogo menggam nen eenik arigin o, yo'niragaarak yi, nonggop togon yigi mbakop?” yinuk, 11wone mbanggo nogogwaarik, at yogo logonet, ”It Ala wone liiru mbanak unde nogo nen, nonggop nduk Eliya aa'nduk aret woroorak, yogo menggaarak o?” yinuk, Yetut kin waganeegwaarak.
12Kin waganggo mbareegwa, at nen, ”Eliya aa'nduk aret wage logomingg rik, yi eekwi ndi eekwi ndegeni woraagin o, yogwe nogo ti, abet aret yogwe kwe, an aap aret nda'nagagirak nogo noba aaninggin-paaninggin agago panugwi, miyuk-meya eerogo panugwi, eeriyak liiru mbaneegerak nogo ti, nonggop nduk mbaneegerak mbakop?” 13Yorage nagagirik, ”Lek o. At Eliya muk wagagerak ninom logonet kwe, wone liiru mbaneegerak nogo ndak-ndak aakumi nen it iniki mba'nuk aret at eeppiyareegwaarak o, yinuk, yokkirage agarik o,” yoragagerak.
Kugi wulaga inikime unggwagagerak obeelom eereegerak wone
(Mat 17:14-21, Luk 9:37-43a)
14Wone togop aret agan wambi wage me, at oone waganggwi ando piinok nogogwaarak nogo inom, it Ala wone liiru mbanak unde nogo inom, aakumi ambik kuwak aago iigak, wone wakwi inigen iyareegwaarak. 15Iigo mbareegwa, it aakumi nogo at wage inigen kogo nogogwaarik, ”Iye!” yinuk, ale'nggen mbako nogogwaarik, puu'nuk, at owagam keyage wappi nogo mbareegwa, 16at nogo nen, ”Kit aap yi kinom nano wone wako ogotik o?”
17Yorage mbareegi, aakumi ambik kuwak aago nogo aap ambi nen at yoge logonet, ”Nogoba Ngguru wae! An naput kugi inikime unggwage nagagirik, oone lek eereegerak me, kat kowagam wonok wagi o. 18Kugi inikime lik yi wage kenok, anobak yimbi-nagak eeke nagaatik, ambe wulilan nggelo agan nage logonet, eyak nggilik maake, eeke nagaatik, nggi'nggak eekkolage menggerak me, kat koone waganggwi nogo nen kugi nggiginogo wumbuwak nduk yoragarak mendek, it nen wumbuurak meek iigirak o,” yinuk, yoreegerak.
19Yoge mbareegi, at Yetut nen, ”Kit aakumi yogondak wonogwe kiniki noba panggombunuk abet nombaka'lek nugu monggotak yi, wologo wae! An ne mande ninom logonuk, name nagin kwe? Ne mande yanggorogon kit ninom logorak kwe?” yinuk, yorage nagagirik, ”Wulaga ti, wonok wa'nip o,” 20yorage mbareegi, wulaga nogo at owagam wonok wogo mbareegwa, kugi at inikime wonage nogo nen Yetut kage nagagirik, wulaga nogo eenggi-iyok puk-puk ege logonet, piyanogo nggween paga nggimbege nagagirik, lagak-mbagak eeke logonet, ambe me awoori lagap-lagap eereegerak. 21Ambe me awoori lagap-lagap eeke me, at Yetut nen, ”At togop eeke kagak, ne mande wonagagerak o?”
Yinuk, ogoba yoge mbareegi, ogoba nogo nen, ”At wulaga yi mbuuluk paga nen itok mondok aret eeke menggerak o. 22Kugi yi oba age logonet, ne ambi paga kani kunik me mambege, ne ambi paga yiime mambege, eeke menggerak me, kat nen yi eekak ndi eekak abok obeelom mban eeke menggendak me, nabuwa mba'nuk, obeelom ee'ninabu o.”
23Yoge mbareegi, at Yetut nogo nen, ”Kat eeke menggendak yo'negendak ti, aakumi abet mbakwi mendek nen ambi mendek eeriyak kenok, lek arigin lek o. Mondok arigin aret o,” yoreegerak.
24Yoge mbareegi, wulaga ogoba nogo nen, ”Niniki abet mbake kwe, ambinom abet mbarikit nduk eeppanu o,” yinuk, oone nggwok togon aret yoreegerak.
25Yoge mbareegi, aakumi kuwak ari wogwe nogo at Yetut enegen iige nagagirik, kugi nogo mberege logonet, ”Kugi kat inaruk logu eeginake, wi eeginake, eeke menggendak yi, wundi nak o. Wundi nage logomenggendik, ti'nuk, unggwi woroorak abu mage o.”
26Yinuk, mberege mbareegi, kugi nogo kwa ari nagagirik, wulaga nogo eenggi-iyok puk-puk ege logonet, wundi nagagerak. Wundi nage kagak, wulaga nogo kambak negen aago wonage me, it aakumi ambik nogome nen, ”Kanggerak o,” yinuk, 27yereegwaarak kwe, at Yetut nen eenggi pigogo mippege mbareegi, mi'nagagerak.
28Mi'nage mbareegi, at Yetut oome unggwagagerak wonage me, at oone waganggwi inom inalik logonet, ”Nit nonggop nduk kugi ti nggiginogo wumbuurak meek ee'ninake agaarik mbaken?”
29Yogo mbareegwa, at nogo nen, ”Kugi togop ti mendek ti, we alik ambi paga eeriyak lek o. Ata, inake tamban eekwi paga mban nggiginogo wumbiigo menggaarak o,” yoragagerak.
At Yetut nen, ”Noorugun o,” yinuk, ne ambinom paganogo yoragagerak wone
(Mat 17:22-23, Luk 9:43b-45)
30-31O time nen wundi nogo nogogwaarik, o Nggalileya unggwi nogogwaarak. Unggwi nogo nogogwaarik, at oone waganggwi nogo mamunirage logonet, ”An aap aret nda'nagagirak yi, it aakumi nen nooruwak nduk, Ala nen kooneegerak paga, neebe pigogo wogorage kenok, nooko mbarumengga, nogo mbere yippunuk, neenik arigin o,” yinuk, wone mamunirawam me, at Nggalileya unggwi nagagerak nogo, aakumi ineenu ogwe iyo, eebi mbareegerak. 32Wone nogo yoragagerak it nogo kobak logonet kwe, kin woorak inagabiti nen puk aret ogogwaarak.
”Aap nggwok ti ta o?” yereegwaarak wone
(Mat 18:1-5, Luk 9:46-48)
33Ti'nuk, peebi nen, o Kaperenaum nogogwaarak. Nogo nogogwaarik, oome unggunuk, at Yetut nen it nogo yorage logonet, ”Kit tu paga wogo logonet, nano wone agan wogwe kiigi o?”
34Yorage mbareegi, it nogo tu paga wogo logonet, ”An iya, kat iya?” agan wogogwaarak me, inoone lek aret puk ogogwaarak. 35Puk ogo mbareegwa, at nogo kwi'na'nuk, at oone waganggwi 12 nogo wiiragagerak wogo mbareegwa, yorage logonet, ”An aap nggwok logokit o, yinuk, mbakwi kiinok, aakumi abok inabu'me inayeloman aret logomunggup o.” 36Yorage nagagirik, elege ambi waganogo it inenggela'me pi wa'nuk, ogome wagangge nagagirik, it yorage logonet, 37”At elege yi waganggwi pogom an nendage kunogo togop aret waganggwi kiinok ti, an aret wo'nakwi o. Ndi, an mban wo'nakwi lek o. Ata, an nappani wagagerak Ala nogo inom aret waganggwi o,” yoragagerak.
”Ninom ogoorak lek kenok ti, nit mendek aret,” yoragagerak wone
(Luk 9:49-50)
38Yorage mbareegi, at Yaya nen, ”Nogoba Ngguru wae! Nit nen aap ambi kugi inikime unggwagagerak kat kendage agago nggiginogo wumbiige ninigen kogo nogoorik, at ninom nugulik me, Mage o, yogoorak o.”
39Yogo mbareegwa, at Yetut nogo nen, ”An nendage agago eerubok mendek eeppunuk, an maluk eeppanugun lek me, mage yoriyak ti mage o. 40It ninom ogoorak lek kenok ti, nit mendek aret o. 41It aakumi nen, Keritut apuri aret o, yinuk, niyo tookkirogwe iinok ti, onggo kolaamunggup lek ti lek o Kolaamunggup aret o, yinuk, abet aret yokkiragi o,” yoragagerak.
Maluk eeriyak ee'ninake kenok, eeko logorak wone
(Mat 18:6-9, Luk 17:1-2)
42Yorage nagagirik, ”It aakumi nen elege-aabologwe iniki noba panggombunuk abet nombako menggaarak yi, maluk eeruwak nduk inikime manabi wagaatak paga maluk eekwi iinok, yugum nggwok paga inenggaanok keele yilinogo yi yenggenak me mbo mambiyanetak en op o. 43Kineenggi paga maluk eeriyak eekkinake kenok, peenok mbanogo nappinip o. Kineenggi imbirak wonage kagak, kani moonuk wunuk mban ari minggim time unggwi noorak ti meek o. Ndi, mbanogo nappunuk, peenok mbanak kagak mondok ineenik menggam time unggwi noorak perak, op o. 45Kiniyok paga maluk eeriyak eekkinake kenok, peenok mbanogo nappinip o. Kiniyok imbirak wonage kagak, kani moonuk wunuk mban ari minggim time mbo nappinagarak ti meek o. Ndi, mbanogo nappunuk, peenok mbanak tiyo'luk aga mondok ineenik menggam time unggwi noorak perak, op o. 47Kinigen paga maluk eeriyak eekkinake kenok, peenok kilirogo pinip o. Kinigen peenok imbirak wonage kagak, kani moonuk wunuk mban ari minggim time mbo nappinagarak ti meek o. Ndi, kilirogo punuk, peenok paga mban at Ala abu'me unggwi noorak perak, op o. 48Inggolenggen nuguttiyak mban ari, kani noguk ari lek mondok wunuk mban ari, eeke minggim time nappinagarak ti meek o.
49Ikan mayu kak eerogo pogo mengga kwak, togop aret Ala nen kani pinagagin o.
50Mayu obeelom aret kwe, andi lek wurik kenok, nonggop togon eerogo andi warak eeriyak o? Kit mayu andi warak pogom aakumi inenggela'me logonet, kinom lambunik aret logonip o,” yinuk, yoragagerak.
Currently Selected:
MARAKUT 9: WNO
Highlight
Share
Copy
Want to have your highlights saved across all your devices? Sign up or sign in
