YUHANI 1

Na Pulungu paluri wàngu

1Weli mulangu, ba ndedi padika-nya na pinu tana, mbàda ni-manyaka na Pulungu.

Angu-mada i Ala na Pulungu

dàngu hama-mada i Ala na Pulungu.

2Weli mulangu-maka ba anguda i Ala.

3Nyuna hi kiri padika-nya mbuu ndàbana,

mbuu ndàbada da maninja,

nda haua pa-padikangu jàka nda Nyuna.

4Ngia paweli luriya na Pulungu,#Ngia paweli luriya na Pulungu; jàka ndia: Mbuu ndàbada da pa-padikangu, ningu lurida jàka da-pambulu dànya na Pulungu.

tàka na luri nawua-nya harii na tau.

5Na harii na-hambila la kapàtangu,

tàka nda jia pàda-ananya paraïna kapàtangu.

6Mai-nanyaka na tau papalewa-na i Ala,

Yuhani-ya na tamuna.

7Mainanya pa-bobaru-ya na harii,

ka napawai ndàba na tau.

8Nyuna wiki nda jia-aya na harii,

bobaru-nanya na harii-ma-a duna.

9Na harii weli wingungu na maharii ndàbanya na tau,

namaiya la pinu tana.

10Na Pulungu ninya la Pinu tana,

Nyuna hi kiri padika-nya na pinu tana,

tàka nda natanda-aya paraï pinu tana.

11Mainanya la tana wiki-mana

tàka nda dayema-aya paraï banjaru wikina.

12Jiapa-kai ba tuna, ningumai tau mayema-ya Nyuna

dàngu napawai lai Nyuna;

hi nawua-nja kangeha la pa-ana Ala,

13ba nadedi nda welina la taua,

maa ba welina lai Ala duna na luri bidi.

14Mbàda njadi-naka tau na Pulungu,

hi na-ngiangu la pahiku-nda,

dàngu mbàda ita-ndanyaka na mangunju-na.

Nu na mangunju-na pangàndi-mananya welingu lai Ama

ba ana kamehangu-na i Amaya duna.

Ba itaya Nyuna ita-ndanya i Ala

dàngu ita-ndanya na namu-nanda nyuta.

15Na maina i Yuhani ba hakahii-na Nyunaya, na-bobaru-ya:

“Nyuna yiana jia-yaka na pambàda paniinggu:

Napa Nyuna namai pa-malamiringu welingu lai nyungga,

tàka na nyuna narihi bokulu-mapa welingu lai nyungga,

nadu ba ndedi ningga nyungga, mbàda ni-manyaka duna Nyuna,” wàna.

16Pa-namungu ju - juaya;

nda na-kambotahu,

na pa-kanyuru-nanda.

17Na ukuna i Miri tangala-nya la ngaruna i Muha.

Tàka na pa-namungu dàngu na tànjina i Ala

na-paloha-ndanya lai Yehu Karitu.

18Nda ningua mambàda itaya i Ala,

hinggilu-na na Ana Kamehangu-na i Ala,

na mahama-nya i Ama dàngu ba kanjupu jorutu-ya na pakeingu-da.

Nyuna-maka na mapeka-ndanya i Ama hi kiri tanda-ndanya.

Na hakahiingu-na wiki i Yuhani

(Mat. 3:1-12; Mrk. 1:1-8; Luk. 3:1-18)

19Ba ha-pajia-ha da liku uru Yahundi la Yeruhali, da-paràha-nja palua lai Yuhani da ratu dàngu da tau Lewi la pa-paàra-nya, “Nggamukau dumu nyumu?” wàminya, wàdanja.

20Napeka pa-habolangu i Yuhani, “Nda jia-aka duku nyungga na Hanganji Ma-pamànangu,” wànanja. 21“Jàka tuna, ka nggamukau dumu nyumu?” wàda na paàra-danya. “Ka jia-kauka yia i Elia?” wàdanya.

“Ndia-a,” wàna i Yuhani.

“Jia-kauka nu na Wunangu?”#na Wunangu: Nyuna nu jiaya na pa-nedingu ba nàmunya napa hi na-bobaru-ya na maina na Hanganji Ma-pamànangu. wàda nahili paàra-danya.

“Ndia-a,” wàna ba nahema.

22“Jàka tuna nu, panii-nggama jàka nggamukau nyumu yia,” wàda, “ka peku patàka-manya na hemamu la tau ma-paràha-nggama, jàka nggikina wàmu na ruku wikimu?” wàdanya.

23Nahema i Yuhani, “Jiaka nyungga-maka na patiki-na i Wunangu Yahaya:

‘Na tau na mawara la maràda wara:

Pa-linjaku-nya ànda i Miri,’ na mawàna,” ba wàna.

24Da tau papalewa tau Parihi#Da tau papalewa tau Parihi; jàka ndia: Nyuda nu da papalewa, tau Parihi-ha, jàka ndia: nyuda. 25da-paàrangu “Jàka nda jiakau na Hanganji Ma-pamànangu, jàka nda jiakau i Elia, jàka nda jiakau nu na Wunangu, ka nggikina hiu parunungu tau?” wàdanya.

26Nahema i Yuhani, “Nyungga duku ku-parunungu wàngu wai. Tàka ninya la padua-mi nyimi na panda tandami. 27Na malamiri-pa namaina welingu lai nyungga, tàka la pangguli-ha da liku halapa-ana nda ràka-mbunggu,” wàna ba nahema-ha.

28Mbuu ndàbada nuda la Mbetani-ha danjadi ningu, la pahunga lodu welingu la Luku Yorundangu na ngia pa-parunungu na tau i Yuhani ma-parunungu.

Na Ana Mbimbina i Ala

29Hadangu harii naita-ya paraïna i Yuhani ba nàmunya i Yehu lai nyuna. Hi napanii i Yuhani, “Tàngaru-ya, nina jiaya na Ana Mbimbina i Ala na ma-podahu njalana na pinu tana. 30Jiaya Nyuna-maka na papanii-nggu, na mamai pa-malamiringu welingu lai nyungga, tàka narihi bokulu-pa welingu lai nyungga, nadu ba mbàda ni-manyaka duna ba ndedi kudedi nyungga. 31Ba ndedipa nda kutanda-aya jàka nggamuya Nyuna. Tàka ba jia pàkuya làti hi kiri mainggu pa-parunungu wàngu wai, ka natanda-ya Nyuna paraï banjaru Ihirailu,” wàna.

32Napeka-mbu i Yuhani, “Kuita-ya na Ngahuna i Ala ba hama kulundiha-ya puruna welingu la awangu, hi engana lai Nyuna. 33La rehi nu ndedi kupi-anya jàka nggamuya Nyuna. Tàka i Ala na ma-paràha-ngga pa-parunungu wàngu wai mbàda pani-nanggaka, ‘Jàkau itaya puruna na Ngahuna i Ala, hi na-ngiangu la haàtu tau, jiaya Nyuna-maka nu napa na ma-parunungu wàngu Ngahuna i Ala,’ mbàda wàna-nggaka. 34Mbàda ita wiki-manggu-nyaka,” wàna i Yuhani, “dàngu ku-hakahii-nya lai nyimi, ba Ana Alaya Nyuna,” wàna.

Da kawunga papanau-na i Miri Yehu

35Hadangu harii hili ninya lai nu i Yuhani dàngu tau madua papanau-na. 36Ba naita-yaka ba nàhunya i Yehu, panii-nanyaka, “Tàngaru-ya! Nina jiaya na Ana Mbimbina i Ala,” wàna.

37Nu rongu-madanya na kareuku nuna paraï da madua da papanau-na i Yuhani hi dalua patundu-nya i Yehu. 38Hi nambaili i Yehu, hi naita-ha ba datundu-nya. Ka paàra-nanjaka, “Nggàra pahimbu-mi?” wànanja.

Da napaya nyuda, “Nggikau ungiangu ningu Umbu Ràmbi?” wàda. (Ràmbi ba wàda, Ngguru, wàda-duka nu.)

39“Mai kai ita wiki-minya,” wàna i Yehu. Lua karia-danyaka hi daita-ya na ngia pa-ngiangu-na. Nu njàmu patu-yaka la malingu. Ndàdiku-danyaka lodu nu lai Nyuna.

40Na haàtu welingu la tau madua da marongu-ya nu na paniina i Yuhani, hi dakiku-nya i Yehu, jiaya i Andaria, na anguna paluhu i Himungu Peturu. 41Ri - ringa-naka i Andaria pahimbu-ya i Himungu na anguna paluhu, hi napanii-nya, “Mbàda jàngapu-manyaka nyuma i Mahia,” wàna. (Mahia ba wàna, Karitu, wàna nu Hanganji Ma-pamànangu) wàna-duka.#(Mahia ba wàna ... Hanganji Ma-pamànangu) wàna-duka: Tàngaru-ya la kalokatu hilu la lawiti Karitu. 42Lua karia-nanyaka i Himungu lai Yehu paraïna i Andaria.

Tàka i Yehu napanau-ya i Himungu hi napanii, “Nyumu jiakau i Himungu, anana i Yona. Napa i Kepàhu wàndanggau,” wànanya. (Kepàhu ba wàna, Peturu wàna-duka nu, palindi watu, ba wànda.)

Na paau-nanya i Pilipu dàngu i Natanaïlu paraïna i Miri Yehu

43Hadangu harii ka lua la Nggalilia wànaka i Yehu. Na-tàbuku-ya i Pilipu, hi napanii-nya, “Mai kau tundungga,” wànanya. 44I Pilipu, tau welingu la Mbetuhaida-ya nu na pangia-da i Andaria dàngu i Peturu. 45I Pilipu na-jàngapu-ya i Natanaïlu hi napanii-nya, “Mbàda jàngapu-manyaka na tau na patiki-na i Muha la Mbuku Ukuna i Ala, dàngu na pa-bobaru-da da wunangu. Nyuna nu jiaya i Yehu welingu la Naharitu, anana i Yuhupu,” wànanya.

46Tàka nanapa-ya i Natanaïlu, “Jia pekuna kaka nu paningu mahàmu welingu la Naharitu?” wàna.

“Mai kau ita wiki-munya” hi wàna i Pilipu.

47Ba naita-yaka nàmunya i Natanaïlu paraïna i Yehu, panii-nanyaka na rukuna nyuna, “Tàngaru-ya, nàmu na tau Ihirailu weli wingungu. Nda ningua kambàliku-na duna nyuna,” wàna.

48“Ka nggikina hiu tanda biaka, Umbu?” wàna i Natanaïlu ba na paàra-nya i Yehu.

Nanapa-ya i Yehu, “Ba ndedi napaau-nggau i Pilipu, mbàda ita-nggunggauka la lumbu kapilitu,” wànanya.

49“Ai Umbu Ngguru,” wàna i Natanaïlu, “Anana i Ala-makau Umbu! Hanganji banjaru Ihirailu-makau Umbu!” wànanya.

50Napanii i Yehu, “Hi kiri pawaimu jia ba ngahanggu papanii-a ba mbàda ita-nggunggauka la lumbu kapilitu, ai? Napa naa, kau itangu marihi halawàla-nya nuna!” wànanya. 51Nahili panii i Yehu, “Langatàka-manggunya, napa uitaya ba na-tawanggahu na awangu, dàngu da papalewa-na i Ala da mahei puru ba da mai la Ana Tau,” wànanya.

Currently Selected:

YUHANI 1: KAM

Highlight

Copy