YUHANI 4
4
I Miri Yehu dàngu na kawini Hamaria
1Mbàda rongu-daka da tau Parihi ba darihi dangupa da pa-panaungu pangala-na dàngu da pa-parunu-na i Yehu welingu lai Yuhani. (2Nda Nyuna wikia duna làti i Yehu na ma-parunungu tàka jiaha da papanau-ana.) 3Ba napii-nyaka paraïna i Yehu ba mbàda rongu-daka da tau Parihi na rukuna nuna, ka laku-nanyaka welingu la tana Yundia hi nabeli la tana Nggalilia. 4Nu ba nalaku lupangu-ma nalii ningu la Hamaria. 5Ka tàka-nanyaka i Yehu la hau paraingu la Hamaria na ma-tamungu Hikàru, nda namarau-a welingu la tana pawua-na i Yakupu la handàka-na lai Yuhupu anana. 6Lai nu ninya na humuru-na i Yakupu. Ba njili halawàla-mananya nàmu la ngarangia i Yehu, mandapu-nanyaka la lihi humuru. Nu ràkangu njàmu hakambulu dua-yaka la tidu lodu. 7-8Tàka da papanau-na i Yehu hambàda-haka la paraingu, palua pakei pangangu.
Tunaka nu nàmu-nyaka na haàtu kawini Hamaria, mainanya pataku wai. Napanii i Yehu, “Màla ràmbu, peku duna hiana ka kukarai pa-ngunungu?” wànanya.
9Nanapa-ya na kawini Hamaria, “Ka ni hi tau Yahundi-kau ni Umbu, tàka nyungga hi tau Hamaria-ka duku; ka nggikina hiu karaika wai pa-ngunungu?” wànanya. (Nadu na tau Yahundi ba nda na-panggolu-a dàngu tau Hamaria.)#na tau Yahundi ba nda na-panggolu-a dàngu tau Hamaria; jàka ndia: da tau Yahundi nda dabihu-a pa-unungu la kaha dàngu la maku da paunu wàda da tau Hamaria-mbu.
10Nanapa-ya i Yehu, “Jàkau pinya làti na pawua-na i Ala dàngu jàka nggamuya na makarai-kau wai pa-ngunungu, jiangu-ma làti bau karai pa-ngunungu lai Nyuna, tàka hi nawua-nggau wai luri,” wànanya.
11Tàka na kawini, “Ba nda ninguki pataku wàmu ni Umbu, tàka lalu manjolungu-ya yiana na humuru. Ka nggii biaka ungalangu ningu wai luri? 12I Yakupu na boku la mangilu-ma duma, na mawua-nggamanya nyuma#nyuma; jàka ndia: nyuta. yiana na humuru. Nyuna wiki lai yiahu-ma nataku ningu wai pa-ngunungu; hamanai da anana dàngu da bandana. Bau kakaya ka jia rihi-munya-kaka i Yakupu?” wànanya.
13Tàka i Yehu, “Na tau na mangunu-nya na wai yiana nahili madau-mapa napa,” wàna. 14“Tàka na tau na mangunu-nya na wai na pawua-nggunya napa, nda nahili madau-apa lundu nu - nu. Nadu na wai na pawua-nggunya nu napa, napa nanjadi-ya mata wai la wikina na ma-tapanjiru hi nawua-nya luri na ma-langatàka dàngu na ma-palupangu,” wànanya.
15Nanapa-ya na kawini, “Ai màla àru Umbu, wua-ngganya làti nu na wai, ka àmbu kuhili madau, dàngu ka àmbu kuhili mai pataku wai lai yiahu,” wànanya.
16“Lua wa, kau paaunya na leimu, kau mangu pamai beli yiahu,” wàna i Yehu.
17“Nda ningua duku leinggu,” wàna na kawini.
“Deningu manai nyuna ba wàmu,” wàna i Yehu. 18“Nadu ba mbàda pa-limangu-muka pa-mangoma, tàka na mini na ma-kanoma-kau nàhu nda lei-amunya,” wànanya.
19“Pi-nggunyaka nàhu ba wunangu kau, Umbu,” wàna na kawini. 20“Da boku la mangilu-ma duma da-hamaya-nya i Ala la palindi yiana, tàka na banjaru-mi nyimi, dapanii ba Mbulungu la Yeruhali-a duna na ngia pa-hamayangu lai Ala, wàda,” wàna na kawini.
21“Langatàka nàhu wànggunggau,” wàna i Yehu. “Napa ninya na rehina, jàka na-hamayangu lai Ama na tau, nda jia-ayapa la palindi yiana dàngu nda la Yeruhali-mbupa. 22Nyimi dimi tau Hamaria hamaya-minya na panda tandami, tàka nyuma duma tau Yahundi, hamaya-manya Nyuna na patanda-mama duma, nadu na pa-mànangu wàngu ba welina la tau Yahundi-du. 23Na nyuna ninya napa na rehina, dàngu rehi-mana-nyaka nàhu na tau ba wàngu àtalu-na na Ngahuna i Ala, da hamaya-nya i Ama ba Ala ma-padeningu-ya, hama tuna na pambuha-na i Ama. 24Maa ba Ngahu-duya i Ala, dàngu ba mbulungu wàngu àtalu-na na Ngahuna i Alama-a hi pekuna na tau pa-hamaya-nya i Ama, pa-namatu-nya ba Ngahuya.”
25Nanapa-ya na kawini, “Kupi-manya-duku ba nàmunya napa na Hanganji Ma-pamànangu (na Karitu ba wàda). Jàka natàka-ka, napa napeka-ndanya mbuu ndàbana,” wàna.
26Nanapa-ya i Yehu, “Ka ni hi jia madu-kaka mapanii dànggau nàhu,” wànanya.
27Nu la rehi nu, ni beli-njaka da papanau-na i Yehu. Ka hangàtaru-danyaka ba daita-ya panii dànguna tau kawini i Yehu. Tàka nda haàtu-a la hongada nyuda ma-paàra-nya nu na kawini, “Nggàra pahimbu-mu ràmbu,” mawàna-nya, jàka ndia ma-paàra-nya i Yehu, “Ka nggikina Umbu hiu panii dànya nina na kawini?” mawàna-nya.
28Ka dunjaku-madua-nanyaka na wuru waina hi na-nyanyaru la paraingu nu na kawini, hi napanii-nja da tau lai nu, 29“Mai kai ita dàndanya na tau na mapeka hàla-ngganya mbuu ndàbana na pawunda-ngguka. Talànga wanguna jiaya ihu ni na Hanganji Ma-pamànangu!” wànanja. 30Ka luhu-danyaka welingu la paraingu nuda da tau hi dalua lai Yehu.
31Nu ba tuna, karai-danyaka i Yehu paraï da papanau-na ka nangangu, “Nganguwa làti Umbu Ngguru,” wàdanya.
32Nanapa-ya i Yehu, “Ninguma duku pangaanggu, na panda pimi nyimi,” wànanja.
33Ka paàrangu-danyaka dàngga anguda da papanau-na, “Ningu ihu tau mangàndi-nya pangangu kawai?” wàda.
34Tàka i Yehu, “Na pangaanggu duku jia ba kununju-ya na pambuha-na Nyuna na ma-palewa-ka, dàngu la pa-palundu-nya na paràma pawua-nangga. 35Nyimi dimi ‘Patu mbua wula-kinaka na rehi muti’ wàmi. Tàka Nyungga duku, ‘Tàngaru-ha ni da woka da mambàda ma-rarangu, ràka pamuti-mahaka, wànggunggai,’ wànanja. 36Da tau da mamuti ngalangu-danyaka duda wundada, ka pa-uhingu-danyaka ihi paraï nduma luri na ma-langatàka dàngu na ma-palupangu. Ka da-maràngga hawola da ma-hàbarungu dàngu da mamuti. 37Na pa-deningu-ma yiana na lara lii, ‘Na haàtu natanggu hàbarungu, tàka na haàtui natanggu muti,’ ba wàna. 38Paràha-nggunggai palua pamuti la woka panda pokami; mbàda ràma-naka na tau hawiangu lai nu, tàka tanggu utungu-minyaka nyimi welingu la paràma-da nyuda,” wànanja.
39Nadangu na tau Hamaria lai nu la paraingu na mapawai lai Yehu, ruku paniina nuna na kawini, ‘Napeka hàla-ngganja mbuu ndàbada na pawunda-ngguka,’ ba wànanja. 40Ba datàka-ka lai Yehu da tau Hamaria, pamanda-danyaka i Yehu ka na-ndàdiku-ki lai nyuda. Nu ba tuna ndàdiku-nanyaka lai nu i Yehu dàmbu lodu mandaina.
41La hambeli-na nu narihi dangu-mapa na tau na mapawai lai Yehu ruku panau wiki-nanja paraïna i Yehu. 42Ka panii-danyaka nuna na kawini, “Nàhu hi mapawai, nda rukuna na paniimu nyumu-apa, tàka rukuna ba rongu wiki-mama-nyaka Nyuna, dàngu pi-manyaka ba jiaya Nyuna-maka na Ma-pamàna-nya yia la pinu tana,” wàdanya.
Na pa-màlaru-nanya na anana na panggawi uma Hanganji paraïna i Miri Yehu
43Ba dàmbu lodu-naka la Hikàru laku-nanyaka la Nggalilia i Yehu. 44Mbàda panii wiki-manaka i Yehu, “Na haàtu wunangu nda patembi-aya la parai wikina,” mbàda wànaka. 45Tàka ba natàka-ka la Nggalilia nayema mbaha etiya tau lai nu, maa ba nimanja nyuda la Yeruhali la Lodu Remi Paha, dàngu daita hàla-mahaka mbuu ndàbada da pawunda-na i Yehu lai nu.
46Tunaka nu beli-nanyaka i Yehu la Kana la tana Nggalilia na ngia pa-pambeli-nanya wai angguru na wai. La paraingu lai nu ninya na haàtu panggawi ma-pareta, hidu-nanya na anana la Kapinaumu. 47Ba narongu ba mbàda ninyaka i Yehu la Nggalilia welingu la Yundia, lua-nanyaka lai Yehu pakarai-ya ka nalua la Kapinaumu pa-pamàlaru-ya na anana ba meti-ama-naka. 48Napanii i Yehu nu la panggawi ma-pareta, “Jàka ndai itaha da pa-hangàtarungu, ndai pawaia,” wànanya.
49Nanapa-ya nu na panggawi, “Ai, parenggangu àru làti Umbu, ba ndedi nameti na ananggu,” wànanya.
50Tàka i Yehu, “Lakuwa nyuna, màlaru-nanyaka na anamu,” wànanya. Nu na tau nawaiya na paniina i Yehu, hi nalaku. 51Nàhu ba la ngarangia-ya, mai-danyaka da tau la umana papanii-nya, “Mbàda màlaru-naka na anamu umbu,” wàdanya.
52Hi na-paàra-nja jàka njàmu piraya ba na-màlaru nu na anakeda. Danapa-ha nyuda, “Ràkangu njàmu hauyaka la tidu lodu kangeu, ba na-pànjangu na mbana ihina,” wàdanya. 53Ka namu-nanyaka paraïna na amana na anakeda, ba jiaya la rehi nu napanii-nanya paraïna i Yehu, “Màlaru-nanyaka na anamu,” ba wànanya. Ka pawai-danyaka lai Yehu, nyuna wiki dàngu mbutana na ihi uma-naka.
54Nuna-duyaka na pa-hangàtarungu na pa-panduangu wàna na pawunda-na i Yehu la Nggalilia la hambeli belina welingu la Yundia.
Currently Selected:
YUHANI 4: KAM
Highlight
Share
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
