KEJADIAN 24
24
Ishak inowen uhe hilibag ane
1Abrahamen mun ane man ane turukmu Ninikni Allahn ineyap turukmen eneg ebe mondabi sabal atfag. 2Sabal atfareg amingmingangge aren angge foroho latfahon ino hiyag utuk lit, ”An nuyug honggolegma hat hinggik kila femihin.#Indam ap ekeyen uruk ane fahet tem toho ehek peruk lamuhuk ulug ari hag toho turuk latfag. 3Kila femihinteg Ninikni Allah pohol kinang senehon inowen holegma namloho Ishak fahet haren Kanaan kinang tu fam wereg hiyap yami ruhuk fug ulug hele tem toho imihin. 4An indag napfag ambeg lamihinteg an ninggareg nowe ot sehelimuwon hiyap eke yami rik lamihin,” ulug hiyag itfag.
5Hiyag itfagma amingmingangge inowen ele uruk lit, ”Hiyap Ishaken helelep puhukon inowen hat min o Kanaan lul fug uhu halug hamloho ino hondohik waruhukteg haren embeselug wilip atik inag ambeg lahuk ano?” ulug kapal hibag.
6Kapal hibagma Abrahamen, ”Fug, an namloho hondoholug lahun fug! 7Ninikni Allah poholma werehon inowen an nikni ibamen og naplug wilip atukmu nori embeselug waharik iyagma Aren kinang Kanaan aru we tem toho hat humbusagsi og isahuk ulug sali imbibag. At inowen hat let habukag ulug ot malaikat ino monde fik waruhumu haren an namloho fahet hiyap ino hondoholug waruhun. 8Hiyap inowen hat min o Kanaan lul fug uhu halug ketiya sali emberuk lahenon fahet wenggel ha fug angge hindi se roho hebe eneg waruhun. Ari fahet namloho hondoholug lahun fug!” ulug hiyag itfag. 9Hiyag itfagma amingmingangge inowen Abraham uyug honggolegma inggik kila fibareg Abrahamen ibag ane hikit toho sali imbibag.
10Sali imbibareg amingmingangge inowen wam unta numen men fano-fano angge ikniyen tohon men wibareg hun Nahor tam welatfag ambeg o Mesopotamia kinangma libag. 11Libareg o hupmu hiyap ik hinanggik waharuk li horog atfagma wam unta itano kel tawag ulug ik fahet habulfag ambeg o pumbuk sel fil welatfahon iraham kel tibag. 12Kel taruk lit amingmingangge inowen sembahyang uruk lit, ”An nikni Abraham Ikni Allah welahenon, nikni Abraham fahet hindi haruk lit aren perisi ane hikit toho timinen let napmihin! 13Tot welamulteg o aruwen hilani malik ik an welahi ambeg tu hinang ta wamusa. 14It wamuson arimano misig ubam heng uruk lit ik kubag fam hinanggowon an tot naminen og nimin iminmu aren ik hinang hitminteg hambohom unta oho og isa lamin imisiyon ino fahet Nikni Allahn Ishak fahet hiyap mumalehekon tu pemin. Ari teko lamisi halug nikni Abraham Allahn indi haruk lit aren peruk ane hikit toho tehek ulug noluk atmisi,” ulug sembahyang uruk latfag.
15-16Sembahyang obog toho irikim itano hiyap tuhum anggolowon yu werehon misig unuk Ribka kubag ik hinangguruk angge umaloma ha roho o inowen wilip atug watfag. Ribka ino Abraham ot Nahor inowen Milka hilibareg Betuel indag tibahon ino ahaloho watfag. Watfareg ik fahet habulfag ambeg ino wambibareg ik kubag fam hinanggibareg suhuloho laharukmu 17Abraham amingmingangge ino folo-folo hiyap ino iraham libareg, ”Nahaloho, ik tot hinang nimin,” ulug heng tibag.
18Heng tibagma hiyap inowen, ”Nikni, amin,” ulug kubag ino folo-folo umaloman pila fibareg ik hinanggoho og itfagma nibag. 19Nibagma hiyap inowen, ”Hat hambohom oho ik hinang isa laminmu enehum toho nalusa,” ibag. 20Ibareg ik hinanggowon ino folo-folo walug libareg wam untan ik naruk ambeg hilili fibareg nin hinanggoho hilili fik larukmen eneg wam arimano enehum toho nibag. 21Ari turukmu Abraham amingmingangge inowen Nikni Allahn anden pihi ane hikit toho let napmisi ano ulug ele uk fug angge hiyap ino kim haruk lit welatfag.
22Wam arimano ik enehum toho nibagma amingmingangge inowen ambiyangmangge men sehene piren men umbagpag turukon emas fam wirihon wibareg hiyap ino og utuk lit, 23”Hikni unuk sa? Hikni ambeg an numalikisi men nohulen kolo reg ambeg wereg ano?” ulug kapal hibagma 24Ribka inowen, ”An nikni Nahor men Milka menen indag tibahon Betuel wereg,” ibareg, 25”Nit ninibam hat fahet kolo reg ambeg wereg. Hambohom nohoruk ambeg fahet oho hoholangge weregma wamen naruk angge oho anggolo foroho lahe,” ibag.
26Ari ibagma amingmingangge ino kinangma sahung atfareg sembahyang uruk lit, 27”An nikni Abraham Ikni Allah wel haptuk lahi. Haren nikni Abraham hindi haruk lit ubam hiyag itikin ane hikit toho tehen. An nikni ot amlohowen ondohowon wereg ambeg pikit hondog naptug wahen,” ibag.
28Ari ibagma Ribka ino isinga ambeg libareg amingmingangge inowen ele ibag ane fahet isinga hiyag utukmu 29-30Ribka owe Laban inowen oho hol hibareg yet harukmen ot ino ambiyangmangge men sehene men wan tegma yet hibag. Yet hibareg Laban ino o inowen wilip atfareg folo-folo Abraham amingmingangge ambohom men ik fahet habulfag ambeg iraham weregma libareg, 31”Nikni, hat Ninikni Allahn indi hasuhon welahenma selma tuma welatmihin fug. Hat men hambohom men nohoruk ambeg hale fehereg ninibam lulen ma,” ibareg 32hondoholug ibam libag. Libareg Laban inowen wam untan ha rulug watfag angge arimano lisoho pila fibareg wam nohoruk ambeg hoholangge tuwale fibareg naruk angge oho og isibag. Og isibareg Abraham amingmingangge umalikisi men unuyug umabukag ulug ik hinang isa watfag. 33Suburu osoko alukema imbibagma amingmingangge inowen ele uruk lit, ”Suburu uwan na fug lit an wahi ane fahet tam hiyag hisamin halug eneg namin,” ibagma Laban inowen, ”Nikni, hiyag nisimin!” ibag.
34Ibagma, ”An Abraham amingmingangge wahi,” ibareg, 35”An nikni ino Ninikni Allahn indi haruk lit wam domba, kambing, sapi, unta, keledai men fano-fano angge perak emas men amingmingangge ap angge hiyap angge anggolo roho og itisimu at ino tung ahun atisi. 36An nikni uhe Sara ino mondabi sabal atisi angge famen malik ap angge indag itisimu nikniyen an war aruhuk halug anden angge aruma obog toho namloho tuwen ngi aruhu peruk lit wereg. 37Aren hiyag nutuk lit, ’An namloho fahet haren Kanaan hiyap yami ruhuk fug ulug tem toho imihin. 38An nikni welatfag ambeg lamihinteg an nowe ot sehelimuwon hiyap eke hiyahakunteg hondoholug waruhun,’ ulug hiyag nitisi. 39Hiyag nitisimu anden te, ’Hiyap inowen hat men Kanaan kinangma lul fug uruk halug nangginoho tuhuk?’ ulug kapal harikikmu 40aren te, ’Nikni Allah alukema welahi ahun inowen hat let habukag ulug ot malaikat monde fik waruhumu an namloho fahet nowe ot sehelimuwon hiyap eke hiyahakun. 41Nori arimanowen hiyap eke og hutuk eleg isalug eneg ketiya sali emberuk lahenon fahet wenggel ha fug angge hindi se roho hebe eneg waruhun,’ ulug hiyag nitisi.
42Hiyag nitisimu yoho ik fahet habulig ambeg wahireg nindimuwen sembahyang uruk lit, ’Nikni Abraham Ikni Allah welahenon, Abrahamen perisi ane hikit toho timinen let napmihin. 43Tot welamulteg hilani malik misig ik an welahi ambeg tu hinang ta watmisiyon fam ik hinang nimin ulug heng timinmu 44aren, ’Nikni, ik hinang hitminteg hambohom unta oho og isa lamin,’ imisiyon ino fahet Nikni Allahn Abraham amloho fahet hiyap mumalehekon tu pemin,’ ulug sembahyang ihi. 45Sembahyang obog toho irikim itano Ribka ino kubag umaloma ha roho wahareg ik hinanggik wambehekma anden ik hinang nitmihin ulug heng ihi. 46Heng ihimu ik kubag ino folo-folo umaloman pilabe fehekteg, ’Nikni, ik namihinmu hambohom oho og isa laminmu nalusa,’ ehekma ninggi. Ninggimu nambohom oho ik og isa laha. 47Og isa lahareg wahama anden, ’Hat hikni sa?’ ulug kapal hihimu, ’An nikni Nahor men Milka menen indag tibahon Betuel ino wereg,’ ehekma ambiyangmangge men sehene piren men umbagpag turuk angge emas fam wirihon wan tibihi. 48Wan tibihireg norohole han sahung ahireg nikni Abraham Ikni Allah wel turuk lit, ’Haren an nikni ot amlohowen ondohowon wereg ambeg hondog naplug wahenma hili tu nikni amloho fahet hiyahaki,’ ulug wel tihi. 49Ari fahet hiren an nikni hinindi reg lit nununggul unuk misihon angge re tuk teg ane hikit toho tul pelihip halug fag toho hiyag nitlihip. Tul fug pelihip halug oho seleg toho hiyag nitlihipmu hiyap winon eke yami rik lamin,” ulug hiyag isibag.
50Hiyag isibagma Laban men Betuel menen hiyag utuk lit, ”Ninikni Allahn perisi ane hikit toho teko lahama niren nungge uk fug tehen 51Ribka aru hat men lahupmu Ninikni Allahn perisi ane hikit toho hikni amlohowen hilahu,” ibag. 52Ibag ane ari hol hibareg Abraham amingmingangge ino kinangma sahung atfareg Ninikni Allah wel tibag. 53Wel tibareg sum wan turukon men aliliyangge emas perak fam wirihon men wibareg Ribka og itfareg isinga men owe men oho fano-fano angge og isibag.
54Og isibareg Abraham amingmingangge men umalikisi men arimanowen ik men suburu men nibareg nohibag. Nohibareg likiya in atfareg amingmingangge inowen, ”An nikni ambeg laminen hiyag nitlihip,” ulug hiyag isibag.
55Hiyag isibagma Ribka owe men isinga menen hiyag utuk lit, ”Ribka ino o sabirenam ano numenam ano nit min welamuhukteg hat men lahup,” ulug hiyag itfag.
56Hiyag itfagma amingmingangge inowen, ”Ninikni Allahn let naptukmu nikniyen perisi ane hikit toho tirikik angge re hiren an sen naplihip fug. Nikni ambeg folo-folo laminen hiyag nitlihip,” ulug hiyag isibag.
57Hiyag isibagma iren te, ”Ribka ino wol tulteg kapal hul,” ibareg 58Ribka wol tibareg kapal haruk lit, ”Ap tu men lalihip ano?” ulug kapal hibagma, ”Ambiyeg lul,” ibag.
59Ibagma Ribka men ebe totma forohoman eneg welatfag hiyap ino men unubam, ”Abraham amingmingangge tu men umalikisi men ambiyeg lalihip,” ulug hiyag isibareg 60Allah unuk fam Ribka hi ruruk lit,
”Hat nonot welahenon ap teng-teng angge winag isa fug toho welamuhubon inisinga aruhun.
Haren ondohowonen endebuhubon arimanowen ap seliyon apmayap eneptuk lit inibam pin halog toho unusuruk lamuhup,” ulug hi ribag.
61Hi ribagma Ribka men amingmingangge hiyap angge arimano menen enesum tug tibibareg wam unta fam lahibareg Abraham amingmingangge ino men libag.
62Libag li itano Ishak ino Kanaan kinang ik ambut fil libareg ik fahet habulfag ambeg ”Allah Mondabi Oluk Werehonen Kim Niyarisi Ambeg” suwalehon ino horogma welatfag. 63Wereg lit o misihim sambil hupmu yabuk ke pen hil lamin ulug ibamen wilip atfareg yet harukmen wam unta arimano waharukmu yet isibag. 64Yet isarukmen Ribka inowen oho Ishak yet hibareg wam unta ino famen wambibareg 65Abraham amingmingangge ino kapal haruk lit, ”Ap misig yabukmuwen nit ninibil waharukon ari sa?” ibagma hun inowen, ”An nikni waharuk ari,” ibag. Ibagma Ribka inowen sum fam orohole hililip tibag.
66Ari turukmu amingmingangge inowen tibag ane fahet Ishak hiyag itfag. 67Hiyag itfagma Ishak inowen Ribka nuhe ulug hilibareg isinga Sara welatfag ibam kilapfag. Kilapfareg wereg lit Ishak inowen nisinga war atisimu nindi siyag toho weregman ubalma waha ulug Ribka fahet indi haruk latfag.
Currently Selected:
KEJADIAN 24: YLI
Highlight
Share
Copy
Want to have your highlights saved across all your devices? Sign up or sign in
@ LAI 2018
KEJADIAN 24
24
Ishak inowen uhe hilibag ane
1Abrahamen mun ane man ane turukmu Ninikni Allahn ineyap turukmen eneg ebe mondabi sabal atfag. 2Sabal atfareg amingmingangge aren angge foroho latfahon ino hiyag utuk lit, ”An nuyug honggolegma hat hinggik kila femihin.#Indam ap ekeyen uruk ane fahet tem toho ehek peruk lamuhuk ulug ari hag toho turuk latfag. 3Kila femihinteg Ninikni Allah pohol kinang senehon inowen holegma namloho Ishak fahet haren Kanaan kinang tu fam wereg hiyap yami ruhuk fug ulug hele tem toho imihin. 4An indag napfag ambeg lamihinteg an ninggareg nowe ot sehelimuwon hiyap eke yami rik lamihin,” ulug hiyag itfag.
5Hiyag itfagma amingmingangge inowen ele uruk lit, ”Hiyap Ishaken helelep puhukon inowen hat min o Kanaan lul fug uhu halug hamloho ino hondohik waruhukteg haren embeselug wilip atik inag ambeg lahuk ano?” ulug kapal hibag.
6Kapal hibagma Abrahamen, ”Fug, an namloho hondoholug lahun fug! 7Ninikni Allah poholma werehon inowen an nikni ibamen og naplug wilip atukmu nori embeselug waharik iyagma Aren kinang Kanaan aru we tem toho hat humbusagsi og isahuk ulug sali imbibag. At inowen hat let habukag ulug ot malaikat ino monde fik waruhumu haren an namloho fahet hiyap ino hondoholug waruhun. 8Hiyap inowen hat min o Kanaan lul fug uhu halug ketiya sali emberuk lahenon fahet wenggel ha fug angge hindi se roho hebe eneg waruhun. Ari fahet namloho hondoholug lahun fug!” ulug hiyag itfag. 9Hiyag itfagma amingmingangge inowen Abraham uyug honggolegma inggik kila fibareg Abrahamen ibag ane hikit toho sali imbibag.
10Sali imbibareg amingmingangge inowen wam unta numen men fano-fano angge ikniyen tohon men wibareg hun Nahor tam welatfag ambeg o Mesopotamia kinangma libag. 11Libareg o hupmu hiyap ik hinanggik waharuk li horog atfagma wam unta itano kel tawag ulug ik fahet habulfag ambeg o pumbuk sel fil welatfahon iraham kel tibag. 12Kel taruk lit amingmingangge inowen sembahyang uruk lit, ”An nikni Abraham Ikni Allah welahenon, nikni Abraham fahet hindi haruk lit aren perisi ane hikit toho timinen let napmihin! 13Tot welamulteg o aruwen hilani malik ik an welahi ambeg tu hinang ta wamusa. 14It wamuson arimano misig ubam heng uruk lit ik kubag fam hinanggowon an tot naminen og nimin iminmu aren ik hinang hitminteg hambohom unta oho og isa lamin imisiyon ino fahet Nikni Allahn Ishak fahet hiyap mumalehekon tu pemin. Ari teko lamisi halug nikni Abraham Allahn indi haruk lit aren peruk ane hikit toho tehek ulug noluk atmisi,” ulug sembahyang uruk latfag.
15-16Sembahyang obog toho irikim itano hiyap tuhum anggolowon yu werehon misig unuk Ribka kubag ik hinangguruk angge umaloma ha roho o inowen wilip atug watfag. Ribka ino Abraham ot Nahor inowen Milka hilibareg Betuel indag tibahon ino ahaloho watfag. Watfareg ik fahet habulfag ambeg ino wambibareg ik kubag fam hinanggibareg suhuloho laharukmu 17Abraham amingmingangge ino folo-folo hiyap ino iraham libareg, ”Nahaloho, ik tot hinang nimin,” ulug heng tibag.
18Heng tibagma hiyap inowen, ”Nikni, amin,” ulug kubag ino folo-folo umaloman pila fibareg ik hinanggoho og itfagma nibag. 19Nibagma hiyap inowen, ”Hat hambohom oho ik hinang isa laminmu enehum toho nalusa,” ibag. 20Ibareg ik hinanggowon ino folo-folo walug libareg wam untan ik naruk ambeg hilili fibareg nin hinanggoho hilili fik larukmen eneg wam arimano enehum toho nibag. 21Ari turukmu Abraham amingmingangge inowen Nikni Allahn anden pihi ane hikit toho let napmisi ano ulug ele uk fug angge hiyap ino kim haruk lit welatfag.
22Wam arimano ik enehum toho nibagma amingmingangge inowen ambiyangmangge men sehene piren men umbagpag turukon emas fam wirihon wibareg hiyap ino og utuk lit, 23”Hikni unuk sa? Hikni ambeg an numalikisi men nohulen kolo reg ambeg wereg ano?” ulug kapal hibagma 24Ribka inowen, ”An nikni Nahor men Milka menen indag tibahon Betuel wereg,” ibareg, 25”Nit ninibam hat fahet kolo reg ambeg wereg. Hambohom nohoruk ambeg fahet oho hoholangge weregma wamen naruk angge oho anggolo foroho lahe,” ibag.
26Ari ibagma amingmingangge ino kinangma sahung atfareg sembahyang uruk lit, 27”An nikni Abraham Ikni Allah wel haptuk lahi. Haren nikni Abraham hindi haruk lit ubam hiyag itikin ane hikit toho tehen. An nikni ot amlohowen ondohowon wereg ambeg pikit hondog naptug wahen,” ibag.
28Ari ibagma Ribka ino isinga ambeg libareg amingmingangge inowen ele ibag ane fahet isinga hiyag utukmu 29-30Ribka owe Laban inowen oho hol hibareg yet harukmen ot ino ambiyangmangge men sehene men wan tegma yet hibag. Yet hibareg Laban ino o inowen wilip atfareg folo-folo Abraham amingmingangge ambohom men ik fahet habulfag ambeg iraham weregma libareg, 31”Nikni, hat Ninikni Allahn indi hasuhon welahenma selma tuma welatmihin fug. Hat men hambohom men nohoruk ambeg hale fehereg ninibam lulen ma,” ibareg 32hondoholug ibam libag. Libareg Laban inowen wam untan ha rulug watfag angge arimano lisoho pila fibareg wam nohoruk ambeg hoholangge tuwale fibareg naruk angge oho og isibag. Og isibareg Abraham amingmingangge umalikisi men unuyug umabukag ulug ik hinang isa watfag. 33Suburu osoko alukema imbibagma amingmingangge inowen ele uruk lit, ”Suburu uwan na fug lit an wahi ane fahet tam hiyag hisamin halug eneg namin,” ibagma Laban inowen, ”Nikni, hiyag nisimin!” ibag.
34Ibagma, ”An Abraham amingmingangge wahi,” ibareg, 35”An nikni ino Ninikni Allahn indi haruk lit wam domba, kambing, sapi, unta, keledai men fano-fano angge perak emas men amingmingangge ap angge hiyap angge anggolo roho og itisimu at ino tung ahun atisi. 36An nikni uhe Sara ino mondabi sabal atisi angge famen malik ap angge indag itisimu nikniyen an war aruhuk halug anden angge aruma obog toho namloho tuwen ngi aruhu peruk lit wereg. 37Aren hiyag nutuk lit, ’An namloho fahet haren Kanaan hiyap yami ruhuk fug ulug tem toho imihin. 38An nikni welatfag ambeg lamihinteg an nowe ot sehelimuwon hiyap eke hiyahakunteg hondoholug waruhun,’ ulug hiyag nitisi. 39Hiyag nitisimu anden te, ’Hiyap inowen hat men Kanaan kinangma lul fug uruk halug nangginoho tuhuk?’ ulug kapal harikikmu 40aren te, ’Nikni Allah alukema welahi ahun inowen hat let habukag ulug ot malaikat monde fik waruhumu an namloho fahet nowe ot sehelimuwon hiyap eke hiyahakun. 41Nori arimanowen hiyap eke og hutuk eleg isalug eneg ketiya sali emberuk lahenon fahet wenggel ha fug angge hindi se roho hebe eneg waruhun,’ ulug hiyag nitisi.
42Hiyag nitisimu yoho ik fahet habulig ambeg wahireg nindimuwen sembahyang uruk lit, ’Nikni Abraham Ikni Allah welahenon, Abrahamen perisi ane hikit toho timinen let napmihin. 43Tot welamulteg hilani malik misig ik an welahi ambeg tu hinang ta watmisiyon fam ik hinang nimin ulug heng timinmu 44aren, ’Nikni, ik hinang hitminteg hambohom unta oho og isa lamin,’ imisiyon ino fahet Nikni Allahn Abraham amloho fahet hiyap mumalehekon tu pemin,’ ulug sembahyang ihi. 45Sembahyang obog toho irikim itano Ribka ino kubag umaloma ha roho wahareg ik hinanggik wambehekma anden ik hinang nitmihin ulug heng ihi. 46Heng ihimu ik kubag ino folo-folo umaloman pilabe fehekteg, ’Nikni, ik namihinmu hambohom oho og isa laminmu nalusa,’ ehekma ninggi. Ninggimu nambohom oho ik og isa laha. 47Og isa lahareg wahama anden, ’Hat hikni sa?’ ulug kapal hihimu, ’An nikni Nahor men Milka menen indag tibahon Betuel ino wereg,’ ehekma ambiyangmangge men sehene piren men umbagpag turuk angge emas fam wirihon wan tibihi. 48Wan tibihireg norohole han sahung ahireg nikni Abraham Ikni Allah wel turuk lit, ’Haren an nikni ot amlohowen ondohowon wereg ambeg hondog naplug wahenma hili tu nikni amloho fahet hiyahaki,’ ulug wel tihi. 49Ari fahet hiren an nikni hinindi reg lit nununggul unuk misihon angge re tuk teg ane hikit toho tul pelihip halug fag toho hiyag nitlihip. Tul fug pelihip halug oho seleg toho hiyag nitlihipmu hiyap winon eke yami rik lamin,” ulug hiyag isibag.
50Hiyag isibagma Laban men Betuel menen hiyag utuk lit, ”Ninikni Allahn perisi ane hikit toho teko lahama niren nungge uk fug tehen 51Ribka aru hat men lahupmu Ninikni Allahn perisi ane hikit toho hikni amlohowen hilahu,” ibag. 52Ibag ane ari hol hibareg Abraham amingmingangge ino kinangma sahung atfareg Ninikni Allah wel tibag. 53Wel tibareg sum wan turukon men aliliyangge emas perak fam wirihon men wibareg Ribka og itfareg isinga men owe men oho fano-fano angge og isibag.
54Og isibareg Abraham amingmingangge men umalikisi men arimanowen ik men suburu men nibareg nohibag. Nohibareg likiya in atfareg amingmingangge inowen, ”An nikni ambeg laminen hiyag nitlihip,” ulug hiyag isibag.
55Hiyag isibagma Ribka owe men isinga menen hiyag utuk lit, ”Ribka ino o sabirenam ano numenam ano nit min welamuhukteg hat men lahup,” ulug hiyag itfag.
56Hiyag itfagma amingmingangge inowen, ”Ninikni Allahn let naptukmu nikniyen perisi ane hikit toho tirikik angge re hiren an sen naplihip fug. Nikni ambeg folo-folo laminen hiyag nitlihip,” ulug hiyag isibag.
57Hiyag isibagma iren te, ”Ribka ino wol tulteg kapal hul,” ibareg 58Ribka wol tibareg kapal haruk lit, ”Ap tu men lalihip ano?” ulug kapal hibagma, ”Ambiyeg lul,” ibag.
59Ibagma Ribka men ebe totma forohoman eneg welatfag hiyap ino men unubam, ”Abraham amingmingangge tu men umalikisi men ambiyeg lalihip,” ulug hiyag isibareg 60Allah unuk fam Ribka hi ruruk lit,
”Hat nonot welahenon ap teng-teng angge winag isa fug toho welamuhubon inisinga aruhun.
Haren ondohowonen endebuhubon arimanowen ap seliyon apmayap eneptuk lit inibam pin halog toho unusuruk lamuhup,” ulug hi ribag.
61Hi ribagma Ribka men amingmingangge hiyap angge arimano menen enesum tug tibibareg wam unta fam lahibareg Abraham amingmingangge ino men libag.
62Libag li itano Ishak ino Kanaan kinang ik ambut fil libareg ik fahet habulfag ambeg ”Allah Mondabi Oluk Werehonen Kim Niyarisi Ambeg” suwalehon ino horogma welatfag. 63Wereg lit o misihim sambil hupmu yabuk ke pen hil lamin ulug ibamen wilip atfareg yet harukmen wam unta arimano waharukmu yet isibag. 64Yet isarukmen Ribka inowen oho Ishak yet hibareg wam unta ino famen wambibareg 65Abraham amingmingangge ino kapal haruk lit, ”Ap misig yabukmuwen nit ninibil waharukon ari sa?” ibagma hun inowen, ”An nikni waharuk ari,” ibag. Ibagma Ribka inowen sum fam orohole hililip tibag.
66Ari turukmu amingmingangge inowen tibag ane fahet Ishak hiyag itfag. 67Hiyag itfagma Ishak inowen Ribka nuhe ulug hilibareg isinga Sara welatfag ibam kilapfag. Kilapfareg wereg lit Ishak inowen nisinga war atisimu nindi siyag toho weregman ubalma waha ulug Ribka fahet indi haruk latfag.
Currently Selected:
:
Highlight
Share
Copy
Want to have your highlights saved across all your devices? Sign up or sign in
@ LAI 2018