Levitikɔs 22
22
Afɔrbɔdze No Krɔnkrɔnyɛ
1Na EWURADZE kasaa kyerɛɛ Moses dɛ, 2Kasa kyerɛ Aaron nye ne mbabanyin no, ma wɔmpaa hɔnho mfi Israelmba hɔn ndzɛmba krɔnkrɔn no ho, wɔ dza wɔtsew ho ma me no ho, amma woeenngu me dzin krɔnkrɔn no ho fi: emi nye EWURADZE. 3Se hɔn dɛ, obiara a ofi hom asefo nyinara mu wɔ hom ebusuasantsen mu a, ɔtwe bɛn ndzɛmba krɔnkrɔn a Israelmba tsew ho ma EWURADZE, na ɔwɔ n’ahoɔfi wɔ no ho no, ɔkra no wobotwa no efi m’enyim akyen: emi nye EWURADZE. 4Ɔbanyin biara a ofi Aaron n’asefo mu a ɔyɛ kwatanyi, anaa ɔwɔ ahosen no; mma onndzi ndzɛmba krɔnkrɔn no bi nnkodu dɛ no ho bɛtsew. Na obi a ɔka adze biara a fun egu ho fi, anaa banyin a no ho nsu sen fi no mu; 5anaa obiara a ɔka adze biara a ɔwea, dze bogu noho fi, anaa banyin bi a n’ahoɔfi biara a ɔwɔ no bɛma ɔafa no ho ahoɔfi no; 6no ho nntsew araa kodu ewimbir, na mma onndzi ndzɛmba krɔnkrɔn no bi, gyedɛ oguar wɔ nsu mu ansaana. 7Na sɛ iwi kɔtɔ a, no ho bɛtsew; na n’ekyir no ondzi ndzɛmba krɔnkrɔn no bi, osiandɛ ɔyɛ n’edziban. 8Dza noara ewu, anaa mbowa atsetsew no no, mma onndzi mmfa nngu noho fi: emi nye EWURADZE. 9Dɛm ntsi wondzi m’ahyɛdze do, amma woeenngu ho fi na wɔaannsoa bɔn wɔ ho, na woeennwuwu wɔ mu; emi nye EWURADZE a metsew hɔn ho no. 10Mma ɔhɔho biara nndzi adzekrɔnkrɔn no bi: ɔsɔfo ne mamforanyi, anaa ɔpaanyi, nndzi adzekrɔnkrɔn no bi: 11Mbom sɛ ɔsɔfo bi tɔ ɔkra bi a, ne sika enyadze no, ɔno na ondzi bi; na hɔn so a wɔwo hɔn wɔ ne fie no, hɔn na wondzi n’edziban no bi. 12Na sɛ ɔsɔfo ne babaa bi wohyia no ma hɔho bi a, mma onndzi ndzɛmba krɔnkrɔn ohim afɔr no bi. 13Mbom sɛ ɔsɔfo no ne babaa bi yɛ kunafo, anaa wɔko no, na onnyi ba, na ɔsan kɔ n’egya fie, dɛ ne mbofraber mu a ondzi n’egya edziban no bi: ɔhɔho biara dze, mma onndzi bi. 14Na sɛ nyimpa bi dzi adzekrɔnkrɔn no bi ber a onnyim a, ɔno ɔmfa n’ebupɛn enum mu kor nto do, na ɔmfa adzekrɔnkrɔn no mma ɔsɔfo no. 15Na mma wonngu Israelmba hɔn ndzɛmba krɔnkrɔn a wɔdze brɛ EWURADZE no ho fi; 16amma wɔaannsoa asodzi ho mbusu biara, sɛ wodzi hɔn ndzɛmba krɔnkrɔn no a: na emi nye EWURADZE a metsew hɔn ho no.
17Na EWURADZE kasaa kyerɛɛ Moses dɛ, 18Kasa kyerɛ Aaron, nye ne mbabanyin no, nye Israelmba nyinara, na se hɔn dɛ, Obiara a ofi Israel ofi mu no, anaa ofi Israel mu ahɔho mu a ɔdze n’ayɛyɛdze ba, dɛ hɔn anohobadze mu biara, anaa hɔn ayamuyi afɔr mu biara a wɔdze brɛ EWURADZE bɔbɔ ɔhyew afɔr no; 19nyɛ onyin a onndzii dzɛm; anantwi mu o, nkɔsɔw mu o, anaa mpɔnkye mu o ama aasɔ enyi ama hom. 20Mbom adze biara a odzi dzɛm no, mma hom mmfa mmba: na ɔrennyɛ enyisɔdze mma hom. 21Na obiara a ɔdze asomdwee afɔr bɛbrɛ EWURADZE dɛ ɔdze rehyɛ anohoba ma, anaa ɔdze reyɛ ayamuyi afɔr no, ofi anantwikuw anaa nguankuw mu no, ɔmma ondzi mu na aasɔ enyi; dzɛm biara nnyi no ho. 22Dza n’enyi efura, anaa oebubu, anaa oepira, anaa ɔahohon, anaa ntwem anaa ase egu no ho no, mma hom mmfa iyinom mmbrɛ EWURADZE, na mma mmfa hɔn mu bi mmbɔ ogya afɔr so wɔ afɔrmbukyia no do mma EWURADZE. 23Na ɔnantwisaa anaa eguambaa a no ho biribi bor do anaa ɔtɔ sin wɔ ne beebi no, ayamuyi afɔr no fa no bɔ; na ɔyɛ anohobadze a ɔronnsɔ enyi. 24Dza no ntɔhwɛbo ebubu, anaa adwerew, anaa abɔ, anaa etwa no, mma hom mmfa mmbrɛ EWURADZE; nkyii so mma hom nnyɛ dɛm wɔ hom asaase do. 25Eso mma hom nngye iyinom mu biara wɔ ɔnanaben bi nsamu mmfa nnyɛ hom Nyankopɔn edziban mmba; osiandɛ hɔn sɛɛ wɔ hɔn ho, dzɛm bi wɔ hɔn ho: wɔrennyɛ enyisɔdze mma hom.
26Na EWURADZE kasaa kyerɛɛ Moses dɛ, 27Sɛ wɔwo nantwisaa, ɔkɔsɔw, anaa apɔnkye, a, ɔno ɔnko ne na n’ase nda esuon; na ofi da a otsia awɔtwe no dze rokɔ no, ɔsɔ enyi dɛ ogya afɔr ayɛyɛdze ma EWURADZE. 28Na sɛ ɔnantwiber o, oguamber o, mma hom nnku ɔno nye ne ba nyina da kor. 29Na sɛ hom bɔ aseda afɔr ma EWURADZE a, hom mbɔ ma ɔnsɔ enyi mma hom. 30Da no ara na wondzi; mma hom nngya mu bi mma adze nkye do: emi nye EWURADZE. 31Dɛm ntsi hom nsie me mbra, na wondzi do: emi nye EWURADZE. 32Na mma hom nngu me dzin krɔnkrɔn no ho fi: na mo ho bɛtsew wɔ Israelmba mu: emi nye EWURADZE a metsew hom ho no a 33medze hom fi Egypt asaase do bae, dɛ mebɛyɛ hom Nyankopɔn no: emi nye EWURADZE.
Currently Selected:
Levitikɔs 22: MFANBRP
Highlight
Copy
Compare
Share
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.