Levitikɔs 23
23
Afahyɛ Ahorow
1Na EWURADZE kasaa kyerɛɛ Moses dɛ, 2Kasa kyerɛ Israelmba, na se hɔn dɛ, EWURADZE n’afahyɛ a wɔahyehyɛ a, hom mpaa mu dɛ ɔyɛ nhyiamu krɔnkrɔn no, mekyerɛ iyinom nye m’afahyɛ a mahyehyɛ. 3Nda esia na wɔnyɛ edwuma: na da a otsia esuon no yɛ ahomgye mu ahomgyeda, nhyiamu krɔnkrɔn a; mma hom nnyɛ edwuma biara: ɔyɛ ahomgyeda ma EWURADZE wɔ hom tsenabew nyina.
4Iyinom nye EWURADZE n’afahyɛ a wɔahyehyɛ, mekyerɛ nhyiamu krɔnkrɔn a hom mpaa wɔ ne mber a wɔahyɛ mu no. 5Bosoom a odzi kan no ne da a otsia duanan no n’ewimbir no yɛ EWURADZE apaho. 6Na bosoom no ara mu da a otsia duenum no yɛ EWURADZE epitsi afahyɛ: nda esuon na hom ndzi epitsi. 7Da a odzi kan no nyɛ nhyiamu krɔnkrɔn: mma hom nnyɛ edwumadzen biara. 8Mbom hom mbɔ ogya afɔr mma EWURADZE nda esuon: da a otsia esuon no yɛ nhyiamu krɔnkrɔn; mma hom nnyɛ edwumadzen biara.
9Na EWURADZE kasaa kyerɛɛ Moses dɛ, 10Kasa kyerɛ Israelmba, na se hɔn dɛ, Sɛ hom du asaase a medze rema hom no do, na wotwa no do ndɔbaa a, ɔno hom mfa hom ndɔbaa mu nduadzewakan no ifi mbrɛ ɔsɔfo no: 11na ɔntow ifi no wɔ EWURADZE enyim, ma ɔnsɔ enyi mma hom: ahomgyeda no n’adzekyee na ɔsɔfo no ntow. 12Na da a hom tow ifi no, hom mfa eguambaanyin a onndzii dzɛm a oedzi afrenhyia mbɔ ɔhyew afɔr mma EWURADZE. 13Na no ho edziban afɔr nyɛ isiam pa efa ebupɛn du mu ebien a wɔdze ngo afrɔw, ogya afɔr a oyi nka huanhuam ma EWURADZE: na no ho nom afɔr nyɛ wenyin, hin ebupɛn anan mu kor. 14Na mma hom nndzi boodoo, anaa eburow totoe, anaa nomanoma, kɛpem dɛ hom dze hom Nyankopɔn ayɛyɛdze no bɛba ana: ɔyɛ daa ahyɛdze wɔ hom ebusuasantsen mu wɔ hom tsenabew nyinara mu.
15Na hom mfitsi ahomgyeda no n’adzekyee nkan nda, mfa mfi da a hom dze ɔtow afɔr ifi baa no do; ma ahomgyeda esuon nwie du: 16hom nkan adaduenum ma onkesi ahomgyeda a otsia esuon no n’adzekyee; na hom mfa edziban afɔr fofor mbrɛ EWURADZE. 17Hom mfa efa (efah) ebupɛn du mu ebien nyɛ ntɔwntɔwmu mfi hom tsenabew mbra: ɔnyɛ isiam pa, wɔmfa mbɔrkaw nto, ma ɔnyɛ nduadzewakan mma EWURADZE. 18Na hom mfa nguambaa esuon a wonndzii dzɛm a woedzi afrenhyia afrenhyia, nye ɔnantwisaa eburwa kor, nye nguannyin ebien nka boodoo no ho mbra: wɔnyɛ ɔhyew afɔr mma EWURADZE, mfa nka hɔn edziban afɔr, nye hɔn ɔnom afɔr ho, mekyerɛ ogya afɔr a oyi nka huanhuam ma EWURADZE. 19Na hom mfa apɔnkyenyin kor mbɔ ho afɔr, nye nguambaanyin ebien a woedzi afrenhyia afrenhyia mbɔ asomdwee afɔr. 20Na ɔsɔfo no ntow hɔn nye nduadzewakan boodoo no nyɛ ɔtow afɔr wɔ EWURADZE enyim, nka nguambaa ebien no ho: ɔnyɛ krɔnkrɔn mma EWURADZE mfa mma ɔsɔfo no. 21Na hom mbɔ dawur da no ara; ɔnyɛ nhyiamu krɔnkrɔn mma hom: mma hom nnyɛ edwumadzen biara: ɔyɛ daa ahyɛdze wɔ hom tsenabew nyinara mu wɔ hom ebusuasantsen mu.
22Na sɛ hom twa hom asaase do ndɔbaa a, mma nntwa hanoa dze no korakora, nkyii so mma nndzi wo ndɔbaa no mpɛpɛw: gya no hɔ fa ma ohianyi, nye ɔhɔho: emi nye EWURADZE hom Nyankopɔn.
23Na EWURADZE kasaa kyerɛɛ Moses dɛ, 24Kasa kyerɛ Israelmba dɛ, Bosoom a otsia esuon no ne da a odzi kan no, nyɛ ahomgye pa mma hom; wɔnhɛn totorobɛnto nyɛ nkaa, nhyiamu krɔnkrɔn. 25Mma hom nnyɛ edwumadzen biara: na hom mbɔ ogya afɔr, mma EWURADZE.
26Na EWURADZE kasaa kyerɛɛ Moses dɛ, 27Naaso bosoom a otsia esuon yi ara ne da a otsia du no nye mpata da: ɔnyɛ nhyiamu krɔnkrɔn mma hom, na hom mbrɛ homho adze; na hom mbɔ ogya afɔr mma EWURADZE. 28Na mma hom nnyɛ edwuma biara wɔ no ara mu: na ɔyɛ mpata da, ma wɔaapata ama hom wɔ EWURADZE hom Nyankopɔn enyim. 29Na obiara a ɔnnkɛbrɛ noho adze da no ara mu no, wobotwa no efi ne man mu akyen. 30Na obiara a ɔyɛ edwuma biara wɔ dɛm da no ara mu no, wɔbɛsɛɛ no efi ne man mu. 31Mma hom nnyɛ edwuma biara: ɔyɛ daa ahyɛdze wɔ hom ebusuasantsen mu wɔ hom tsenabew nyinara. 32Ɔnyɛ ahomgye pa mu ahomgyeda mma hom, na hom mbrɛ hom akra adze: bosoom no ne da a otsia akron no n’ewimbir, ofi ewimbir kodu ewimbir, na hom ndzi hom ahomgyeda no.
33Na EWURADZE kasaa kyerɛɛ Moses dɛ, 34Kasa kyerɛ Israelmba dɛ, Bosoom a otsia esuon no yi ara ne da a otsia duenum no ɔyɛ ntamadan afahyɛ nda esuon ma EWURADZE. 35Da a odzi kan no yɛ nhyiamu krɔnkrɔn: mma hom nnyɛ edwumadzen biara. 36Nda esuon na hom mbɔ ogya afɔr mma EWURADZE: da a otsia awɔtwe no nyɛ nhyiamu krɔnkrɔn mma hom; na hom mbɔ ogya afɔr mma EWURADZE: ɔyɛ nguabɔ ewiei; mma hom nnyɛ edwumadzen biara.
37Iyinom nye EWURADZE n’afahyɛ a wɔahyehyɛ a hom mpaa mu dɛ ɔyɛ nhyiamu krɔnkrɔn no, ma wɔmfa ogya afɔr mbrɛ EWURADZE, ɔhyew afɔr, nye edziban afɔr, okum afɔr, nye ɔnom afɔr, kor wɔ nankasa ne da mu: 38ɔsor EWURADZE n’ahomgyeda no, na ɔsor hom ayɛyɛdze, na ɔsor hom anohoba, na ɔsor hom ayamuyi afɔr nyinara a hom dze ma EWURADZE no.
39Naaso bosoom a otsia esuon no ne da a otsia duenum no mu, sɛ hom roboaboa asaase no do nduadzewa ano a, hom nhyɛ EWURADZE fa no nda esuon: da a odzi kan no nyɛ ahomgye pa, na da a otsia awɔtwe no nyɛ ahomgye pa. 40Na da a odzi kan no hom mfa ndua fɛɛfɛw do nduadzewa, nye menankɔnson, nye ndua wusuww n’abaw, nye esukɔn do ndua; na hom enyi ngye wɔ EWURADZE hom Nyankopɔn enyim nda esuon. 41Na hom nhyɛ no fa mma EWURADZE nda esuon wɔ afrenhyia mu: ɔyɛ daa ahyɛdze wɔ hom ebusuasantsen mu: bosoom a otsia esuon no mu na hom nhyɛ. 42Hom ntsenatsena asese mu nda esuon; hɔn a wɔyɛ amamba wɔ Israel nyinara ntsenatsena asese mu: 43ama hom ebusuasantsen eehu dɛ emi na memaa Israelmba tsenatsenaa asese mu wɔ aber a miyii hɔn fii Egypt asaase do no: emi nye EWURADZE hom Nyankopɔn. 44Na Moses kaa EWURADZE n’afahyɛ a wɔahyehyɛ no kyerɛɛ Israelmba.
Currently Selected:
Levitikɔs 23: MFANBRP
Highlight
Copy
Compare
Share
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.