Levitikɔs 24
24
Nkandzea No Do Nhwɛe
1Na EWURADZE kasaa kyerɛɛ Moses dɛ, 2Hyɛ Israelmba ma wɔmbrɛ wo olive ngo krɔnkrɔn a woesiw a wɔdze sɔ gya, ma wɔmfa nsɔ kandzea nsi do daa. 3Dase ntwamutam no ekyir, wɔ ehyiadzibuw no mu, na Aaron nsiesie mfi ewimbir nkodu anapa wɔ EWURADZE enyim daa: ɔnyɛ daa ahyɛdze wɔ ebusuasantsen mu. 4Onsiesie nkandzea no wɔ sika mapa kandzeadua a no ho tsew no do wɔ EWURADZE enyim daa.
Kyerɛ Paanoo No
5Na fa isiam pa, na fa bi to tatar duebien; efa ebupɛn du mu ebien nyɛ tatar kor. 6Na hyehyɛ no akyerɛpɛn ebien, esia nyɛ kyerɛpɛn kor, wɔ sika mapa pon a no ho tsew no do wɔ EWURADZE enyim. 7Na fa krɔbɔw gyirengyirenn to kyerɛpɛn kor do, ma ɔnyɛ nkaadze wɔ boodoo no do, mekyerɛ ogya afɔr mma EWURADZE. 8Ahomgyeda biara ɔnhyehyɛ no yie wɔ EWURADZE enyim daa: ɔyɛ Israelmba afamu daa ahyɛmu. 9Na ɔnyɛ Aaron nye ne mbabanyin dze; na wondzi no wɔ mbrɛ ɔyɛ krɔnkrɔn: na ɔyɛ krɔnkrɔndze mu adzekrɔnkrɔn a ofi EWURADZE ogya afɔr do ma no wɔ daa ahyɛdze do.
Mbusu Ho Asotwe
10Na Israelnyi ɔbaa bi ne babanyin a n’egya yɛ Egyptnyi, fiir edzi wɔ Israelmba no mu: na Israelnyi ɔbaa no ne babanyin no ɔnye Israelnyi ɔbanyin bi dzii aperper wɔ nseraban no mu; 11na Israelnyi ɔbaa no ne babanyin no kaa Dzin no ho ebususɛm, na ɔdomee: na wɔdze no brɛɛ Moses. Na ne na ne dzin dze Selomit, Dibri ne babaa a ofi Dan ebusuakuw mu. 12Na wɔdze no siei, ama woeenya EWURADZE n’anomu asɛm ma wɔaaka akyerɛ hɔn ana.
13Na EWURADZE kasaa kyerɛɛ Moses dɛ, 14Fa nyia wɔadom no fir edzi kɔ nseraban no ekyir; na ma hɔn a wɔtsee no nyinara mfa hɔn nsa ngu n’etsifi, na ma mboanofo no nyinara nsiw no abo. 15Na kasa kyerɛ Israelmba dɛ, Obiara a ɔdom ne Nyankopɔn no ɔbɔsoa no bɔn. 16Na nyia ɔka EWURADZE ne dzin ho ebususɛm no, oku na wonku no; osiw na mboanofo no nyinara nsiw no abo: ɔhɔho o, okuromnyi o, sɛ ɔka EWURADZE ne dzin ho ebususɛm a, wonku no. 17Na nyia ɔbɔ nyimpa biara adze ma ɔtɔr no, oku na wonku no; 18na nyia ɔbɔ abowa adze ma owu no ɔnhyɛ ananmu: nkwa nhyɛ nkwa ananmu. 19Na sɛ nyimpa ma ne nyɛnko dzi dzɛm a; dɛ mbrɛ ɔno ɔayɛ no, dɛmara na wɔmfa nyɛ no; 20Obu nhyɛ obu ananmu, enyiwa nhyɛ enyiwa ananmu, ese nhyɛ ese ananmu: dɛ mbrɛ ɔama nyimpa bi edzi dzɛm no, dɛmara na wɔnyɛ mma no. 21Na nyia oku abowa no ɔnhyɛ ananmu: na nyia oku nyimpa no wonku no. 22Mbra kor ara nda hɔ mma hom, dɛ mbrɛ ɔtse ma ɔhɔho no, ɔnyɛ dɛmara mma okuromnyi no: na emi nye EWURADZE hom Nyankopɔn. 23Na Moses kasaa kyerɛɛ Israelmba, na wɔdze nyia ɔdomee no fiir edzi kɔr nseraban no ekyir, na wosiiw no abo. Na Israelmba yɛɛ dɛ mbrɛ EWURADZE hyɛɛ Moses no.
Currently Selected:
Levitikɔs 24: MFANBRP
Highlight
Copy
Compare
Share
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.