Levitikɔs 27
27
EWURADZE Akyɛdze No Mponee
1Na EWURADZE kasaa kyerɛɛ Moses dɛ, 2Kasa kyerɛ Israelmba, na se hɔn dɛ, Sɛ nyimpa bi hyɛ anohoba ma a, nkorɔfo no nyɛ EWURADZE dze dɛ mbrɛ w’abotwa tse. 3Na w’abotwa wɔ banyin a oedzi mfe eduonu do dze kodu nyia oedzi mfe eduosia do no ho nyɛ dwɛɛtɛɛ dwetɛbona eduonum, dɛ mbrɛ krɔnkrɔnbea dwetɛbona tse. 4Na sɛ ɔyɛ ɔbaa a, ɔno w’abotwa nyɛ dwetɛbona eduasa. 5Na sɛ ofi nyia oedzi mfe enum do dze kodu nyia oedzi mfe eduonu do a, ɔno w’abotwa wɔ ɔbanyin ho nyɛ dwetɛbona eduonu, na ɔbaa ho so dwetɛbona du. 6Na sɛ ofi nyia oedzi bosoom do dze kodu nyia oedzi mfe enum do a, ɔno w’abotwa wɔ ɔbanyin ho nyɛ dwɛɛtɛɛ dwetɛbona enum, na ɔbaa ho so w’abotwa nyɛ dwɛɛtɛɛ dwetɛbona ebiasa. 7Na sɛ ofi nyia oedzi mfe eduosia nye ekyir do a; sɛ ɔbanyin a, ɔno w’abotwa nyɛ dwetɛbona duenum, na ɔbaa ho so dwetɛbona du. 8Mbom sɛ ɔyɛ ohianyi dodow kyɛn w’abotwa no a, ɔno wɔmfa no mbegyina ɔsɔfo no enyim, na ɔsɔfo no ntwa no bo; dɛ mbrɛ nyia ɔbɔɔ anohoba no ne nsa bɔso do no ara na ɔsɔfo no ntwa no bo.
9Na sɛ ɔyɛ abowa a adasa dze bi yɛ ayɛyɛdze brɛ EWURADZE a, dza nyimpa biara dze mu bi ma EWURADZE no nyinara nyɛ krɔnkrɔn. 10Mma ɔnndan no, nkyii so ɔnnsakyer no, ɔmmfa papa nnsesa bɔn, anaa ɔmmfa bɔn nnsesa papa: na sɛ koraa ɔdze abowa bɛsesa abowa a, ɔno emu ebien nyina ɔno nye dza wɔdze sesaa no no nyɛ krɔnkrɔn. 11Na sɛ ɔyɛ abowa biara a no ho nntsew a wɔmmfa bi nnyɛ ayɛyɛdze mmbrɛ EWURADZE a, ɔno ɔmfa abowa no mbegyina ɔsɔfo no enyim: 12na ɔsɔfo no ntwa no bo, sɛ oye o, omuo o: dɛ mbrɛ woara ɔsɔfo no botwa no bo no, dɛmara na ɔnyɛ. 13Mbom sɛ pon ara na ɔbɔpon no a, ɔno ɔmfa no mu ebupɛn enum mu kor nto wo bo a itwae no do.
14Na sɛ nyimpa bi tsew ne fi ho dɛ ɔnyɛ krɔnkrɔn mma EWURADZE a, ɔno ɔsɔfo no ntwa no bo, sɛ oye o, omuo o: dɛ mbrɛ ɔsɔfo no botwa no bo no, dɛmara na ongyina. 15Na sɛ nyia ɔtsew ho no bɔpon ne fi a, ɔno ɔmfa wo bo a itwae no ne sika no mu ebupɛn enum mu kor nto do, na ɔnyɛ nedze.
16Na sɛ nyimpa bi tsew n’asaase mu haban mu bi ho ma EWURADZE a, ɔno w’abotwa nyɛ dɛ mbrɛ no nduae tse: atoko a woedua no homer#27.16 HOMER: Ɔbɛyɛ dɛ olonka ahaebien. kor no bo yɛ dwɛɛtɛɛ dwetɛbona eduonum. 17Sɛ ahosɛpɛw afe no do na ɔtsew ne haban ho a, ontua dɛ mbrɛ bo a woetwa no tse no ara. 18Mbom sɛ ahosɛpɛw afe no ekyir na ɔtsew ne haban ho a, ɔno ɔsɔfo no mbubu sika no ano mma no dɛ mbrɛ mfe a aka ma akɔso ahosɛpɛw afe no tse no, na wɔntsew bo a itwae no do. 19Na sɛ pon ara na nyia ɔtsew haban no ho no bɔpon a, ɔno ɔmfa wo bo a itwae no ne sika no mu ebupɛn enum mu kor nto do, na wonsi no pi mma no. 20Na sɛ ɔammpon haban no, anaa sɛ ɔatɔn haban no ama nyimpa bi so a, mma wɔmmpon bio; 21mbom haban no, sɛ ofir edzi ahosɛpɛw afe no mu kɔ a, ɔnyɛ krɔnkrɔn mma EWURADZE, dɛ haban a woehyira do ama; ɔnyɛ ɔsɔfo no n’enyadze. 22Na sɛ ɔtsew haban a ɔatɔ a ɔnnyɛ n’enyadze haban no bi ho ma EWURADZE a; 23ɔno ɔsɔfo no mbubu w’abotwa a ɔdze kodu ahosɛpɛw afe no do no, no bo a ɔsom no mma no: na ɔmma wo bo a itwae no da no ara, dɛ adzekrɔnkrɔn mma EWURADZE. 24Ahosɛpɛw afe no mu haban no nsan nkɔ nyia wɔtɔɔ no no hɔ, mekyerɛ nyia ɔyɛ n’enyadze asaase no no hɔ. 25Na w’abotwitwa nyinara nyɛ dɛ mbrɛ krɔnkrɔnbea dwetɛbona no tse: gera eduonu yɛ dwetɛbona kor.
26Mbowa mu abakan a wɔayɛ no abakan ama EWURADZE no, noara nkotoo na nyimpa bi nntsew ho; sɛ ɔnantwinyin o, ɔkɔsɔw o, EWURADZE dze a. 27Na sɛ ɔyɛ abowa a no ho nntsew bi a, ɔno ɔmma n’apondze dɛ mbrɛ w’abotwa tse no, na ɔmfa no mu ebupɛn enum mu kor nto do: anaa sɛ wɔammpon no no a, ɔno wɔntɔn no dɛ mbrɛ w’abotwa tse no.
28Naaso ehyiradze biara a nyimpa bi behyira do ama EWURADZE wɔ adze a ɔwɔ nyinara mu no, sɛ nyimpa o, abowa o, n’enyadze mu haban o, mma wɔnntɔn anaa wɔmmpon: ehyiradze biara yɛ krɔnkrɔndze mu adzekrɔnkrɔn ma EWURADZE. 29Na mpo, nyimpa biara a woebu no kumfɔ no, mma wɔmmpon no; oku na wonku no.
30Na asaase no do ebupɛn du du nyinara, sɛ ofi asaase no do o, nduadzewa mu o, dua n’aba mu o, ɔyɛ EWURADZE dze; ɔyɛ krɔnkrɔn ma EWURADZE. 31Na sɛ nyimpa bi bɔpon n’ebupɛn du du no mu bi a, ɔmfa no mu ebupɛn enum mu kor nto do. 32Na anantwi anaa nguan mu ebupɛn du du nyinara, adze a ɔfa poma ase nyinara mu dza otsia du du no nyɛ krɔnkrɔn mma EWURADZE. 33Mma ɔnnhwehwɛ mu dɛ ɔyɛ papa anaa bɔn, nkyii so mma ɔnnsesa bi: na sɛ koraa ɔbɛsesa bi a, ɔno emu ebien nyina, ɔno nye dza wɔdze sesa no no nyɛ krɔnkrɔn; mma wɔmmpon no.
34Iyinom nye mbransɛm a EWURADZE dze hyɛɛ Moses wɔ bepɔw Sinai do ma ɔdze maa Israelmba no.
Currently Selected:
Levitikɔs 27: MFANBRP
Highlight
Copy
Compare
Share
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.