Nkanee 15
15
Afɔr Ho Mbra
1Na EWURADZE kasaa kyerɛɛ Moses dɛ, 2Kasa kyerɛ Israelmba, na se hɔn dɛ, Sɛ hom du hom tsenabew asaase a medze rema hom no do, 3na wɔrobɔ ogya afɔr ama EWURADZE, ɔhyew afɔr, anaa okum afɔr, dze ahyɛ anohoba bi ma, anaa dɛ ayamuyi afɔr, anaa hom afahyɛ a wɔahyɛ no mu, dze eyi nka huanhuam ama EWURADZE a ofi anantwi, anaa nguan mu a: 4ɔno nyia ɔdze n’ayɛyɛdze ba no, ɔmfa edziban afɔr isiam pa efa ebupɛn du mu kor nka ngo hin ebupɛn anan mu kor ho mbrɛ EWURADZE: 5na ɔnom afɔr wenyin, hin ebupɛn anan mu kor, na fa ka ɔhyew afɔr, anaa okum afɔr eguambaa kor ho siesie. 6Na oguannyin dze, fa isiam pa efa ebupɛn du mu ebien a wɔdze ngo hin ebupɛn ebiasa mu kor afrɔw, siesie yɛ edziban afɔr: 7na ɔnom afɔr no fa wenyin hin ebupɛn ebiasa mu kor bra, ma onyi nka huanhuam mma EWURADZE. 8Na sɛ ɔnantwisaa na irisiesie abɔ ɔhyew afɔr, anaa okum afɔr, dze ahyɛ anohoba bi ma, anaa edze robɔbɔ asomdwee afɔr ama EWURADZE a: 9ɔno edziban afɔr a ɔmfa nka ɔnantwisaa no ho nye isiam pa efa ebupɛn du mu ebiasa a wɔdze ngo hin ɔfa afrɔw. 10Na fa wenyin hin ɔfa yɛ ɔnom afɔr no bra bɔbɔ ogya afɔr a oyi nka huanhuam ma EWURADZE. 11Dɛm na wɔnyɛ ɔnantwisaa kor, anaa oguannyin kor, anaa nguambaanyin no, anaa mpɔnkyemba no nkorkor. 12Dɛ mbrɛ dodow a hom besiesie no tse no, dɛmara na hom nyɛ no nkorkor dɛ mbrɛ hɔn dodow tse. 13Ekuromfo nyinara nyɛ ndzɛmba yi dɛm mfa mbɔ ogya afɔr a oyi nka huanhuam mma EWURADZE. 14Na sɛ ɔhɔho bi soɛ hom mu, anaa obiara a ɔwɔ hom mu wɔ hom ebusuasantsen nyina mu no, na ɔbɔbɔ ogya afɔr a oyi nka huanhuam ama EWURADZE no; dɛ mbrɛ hom yɛ no, dɛmara so na ɔnyɛ. 15Bagua no, ahyɛdze kor na ɔnda hɔ mma hom na ɔhɔho a ɔbɔsoɛ hom mu no, ɔnyɛ daa ahyɛdze wɔ hom ebusuasantsen nyina mu: dɛ mbrɛ hom tse no, dɛmara so na ɔhɔho no nyɛ wɔ EWURADZE enyim. 16Mbra kor nye ɔmom kor na ɔnda hɔ mma hom, nye ɔhɔho a ɔabɔsoɛ hom mu nyina.
17Na EWURADZE kasaa kyerɛɛ Moses dɛ, 18Kasa kyerɛ Israelmba, na se hɔn dɛ, Sɛ hom du asaase a medze hom rokɔ do no do a, 19ɔno ɔba dɛ, sɛ hom ridzi asaase no do edziban no bi a, hom mbɔ ohim afɔr mma EWURADZE. 20Hom mbɔrkan no bi ne tatar na hom mfa nyɛ ohim afɔr: dɛ mbrɛ hom yɛ ewuporoweebea ohim afɔr no, dɛmara so na hom nhim no. 21Hom mbɔrkan no bi na hom mfa mma EWURADZE dɛ ohim afɔr wɔ hom ebusuasantsen nyina mu.
22Na sɛ hom fom, na hom annhyɛ mbransɛm yi a EWURADZE aka akyerɛ Moses no nyinara nsew, 23mekyerɛ dza EWURADZE nam Moses nsa do ahyɛ hom nyinara, ofi da a EWURADZE hyɛɛ mbra no, na ɔdze ba yi wɔ hom ebusuasantsen nyina mu no a; 24ɔno ɔba dɛ, sɛ wɔyɛ no ntɔgon mu, dɛ mboanofo no nnyim a, mboanofo no nyinara mfa ɔnantwisaa eburwa kor mbɔ ɔhyew afɔr a oyi nka huanhuam ma EWURADZE, nka n’edziban afɔr, nye no nom afɔr no ho dɛ mbrɛ mbra no tse, nye apɔnkyenyin kor na ɔnyɛ bɔn ho afɔr. 25Na ɔsɔfo no mpata mma Israelmba mboanofo no nyina, na wɔdze bɛkyɛ hɔn; na ɔyɛ mfom, na hɔn mfom no ntsi, wɔdze hɔn ayɛyɛdze aba dɛ EWURADZE ogya afɔr, nye hɔn bɔn ho afɔr wɔ EWURADZE enyim: 26na wɔdze befir Israelmba mboanofo no nyinara, nye ɔhɔho a ɔabɔsoɛ hɔn mu no; na ɔman no nyinara afamu na wɔyɛɛ no ntɔgon mu. 27Na sɛ nyimpa kor bi annhyɛ da na ɔyɛ bɔn a, ɔno ɔmfa apɔnkyeber a oedzi afrenhyia mbra mbɔbɔ bɔn ho afɔr. 28Na ɔsɔfo no mpata mma ɔkra a ɔfom no, sɛ ɔyɛ bɔn no ber a ɔnndze enyidaho wɔ EWURADZE enyim a, ɔmpata mma no; na wɔdze bɛkyɛ no. 29Hom nnya mbra kor nto hɔ mma nyia ɔyɛ biribi a ɔnndze enyidaho dɛ ɔyɛ okuromnyi wɔ Israelmba mu, anaa ɔhɔho a ɔbɔsoɛ hom mu no. 30Ɔkra a ɔhyɛ da ara yɛ bɔn no dze, sɛ ɔyɛ okuromnyi bi o, ɔhɔho bi o, oedzi etsia EWURADZE; na dɛm ɔkra no wobotwa no efi ne man mu akyen. 31Osiandɛ oebu EWURADZE n’asɛm enyimtsia, na ɔato ne mbra no; otwa ara na wobotwa ɔkra no akyen, n’emumuyɛ nda no do.
32Na aber a Israelmba wɔwɔ sar no do no, wohun ɔbanyin bi a ɔrepɛ nyena ahomgyeda. 33Na hɔn a wohun no dɛ ɔrepɛ nyena no wɔdze no brɛɛ Moses nye Aaron, nye mboanofo no nyinara. 34Na wɔbɔɔ no dua mu, osiandɛ wonnyae nnkyerɛɛ dza wɔmfa nyɛ no. 35Na EWURADZE see Moses dɛ, Oku na wonku banyin no: mboanofo no nyinara nsiw no abo wɔ nseraban no ekyir. 36Na mboanofo no nyinara dze no baa nseraban no ekyir na wosiiw no abo ma owui; dɛ mbrɛ EWURADZE hyɛɛ Moses no.
Ntar No Ndwow Ho Mbra
37Na EWURADZE kasaa kyerɛɛ Moses dɛ, 38Kasa kyerɛ Israelmba, na hyɛ hɔn ma wɔnyɛ hɔn ntar ano ndwow wɔ hɔn ebusuasantsen nyina mu, na wɔmfa bibir ahoma nsusuo n’ano n’ano ndwow no mu: 39na ɔnyɛ ndwow mma hom, ma hom aahwɛ, na wɔaakaa EWURADZE mbrasɛm nyinara, na wɔaayɛ; na hom eennkekyin enndzi hom akoma nye hom enyiwa ekyir, dza hom tɔ dɛ wodzi ekyir ndwamanyɛ mu no: 40ama hom aakaa na wɔayɛ me mbransɛm nyinara, na hom ayɛ krɔnkrɔn ama hom Nyankopɔn. 41Emi nye EWURADZE hom Nyankopɔn a miyii hom fii Egypt asaase do dɛ mebɛyɛ hom Nyankopɔn no: emi nye EWURADZE hom Nyankopɔn.
Currently Selected:
Nkanee 15: MFANBRP
Highlight
Copy
Compare
Share
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.