Nkanee 16
16
Kora, Datan Na Abiram Soɛr Tsia Moses
1Afei Kora a n’egya nye Izhar a ɔyɛ Kohat a n’egya nye Levi ne babanyin no na Eliab ne mbabanyin Datan na Abiram na Pelet ne babanyin on (Eliab na Pelet yɛ Reuben ne mbabanyin) 2na wɔsoɛree tsiaa Moses. Wɔnye Israelmba no mu bi, mboanofo no mu mbapɔmba ahaenu eduonum a wɔfrɛ hɔn bagua mu, nyimpa a wɔwɔ dzin: 3na wɔpoon hɔnho hyiae bɔɔ Moses nye Aaron do ngua, na wɔsee hɔn dɛ, Hom yɛ dodow, na mboanofo nyinara yɛ krɔnkrɔn, hɔn mu obiara, na EWURADZE wɔ hɔn mu: ɔyɛ dɛn ntsi mbɔ na hom mema hom ho do wɔ EWURADZE ne baguaa do? 4Na Moses tsee no, ɔdze n’enyim butuuw famu: 5na ɔkasaa kyerɛɛ Kora nye no kuw no nyinara dɛ, Anapa EWURADZE bɛkyerɛ hɔn a wɔyɛ nedze, nye nyia ɔyɛ krɔnkrɔn, na ɔbɛma ɔaba ne nkyɛn: mekyerɛ nyia ɔbɛsan mu eyi no no nna ɔbɛma ɔaba ne nkyɛn. 6Iyi na hom nyɛ; hom mfa nduhuam asɛn, Kora nye no kuw nyinara; 7na wɔmfa ogya ngu mu, na wɔmfa eduhuam ngu do wɔ EWURADZE enyim ɔkyena: na ɔbɛba dɛ nyimpa a EWURADZE bɛfa no no, ɔbɛyɛ krɔnkrɔn: hom yɛ dodow, hom Levi mbabanyin. 8Na Moses see Kora dɛ, Afei hom ntsie, hom Levi mbabanyin: 9ana ɔyɛ hom adze ketseaba, dɛ Israel Nyankopɔn no atsew hom efi Israel mboanofo mu dɛ ɔdze hom rebɛn noho; ma hom aayɛ EWURADZE ntamadan no ho edwuma, na hom egyina mboanofo no enyim asom hɔn; 10Na ɔdze nuanom, Levi ne mbabanyin no nyinara ho abɛn, na hom rohwehwɛ asɔfodzi so yi? 11Dɛm ntsi na ɔwo nye wo kuw nyinara ehyia wɔ EWURADZE do: na Aaron dze, woana nye no na hom hwinhwin tsia no? 12Na Moses somae ma wɔkɛfrɛɛ Datan nye Abiram, Eliab ne mbabanyin no: na wɔsee dɛ, Yɛremmba: 13ana ɔyɛ adze ketseaba dɛ eyi hɛn efi asaase a numfonsu nye ewo pem wɔ do do, ruboku hɛn wɔ sar do, na kyenkyennkyen iridzi hɛn do ahenmbasɛm so yi? 14Nkyii so emmfaa hɛn mmbaa asaase a numfonsu nye ewo pem wɔ do no do, na emmfaa haban nye wenyin nture enyadze no so mmaa hɛn; ana mbanyin yi enyiwa na irubotutu? Yɛremmba. 15Na Moses no bo fuuw kɛsenara, na ɔsee EWURADZE dɛ, Mma w’enyi nnsɔ hɔn afɔrbɔ: menngyee hɔn nsamu asoaso kor, nkyii so mennyɛɛ hɔn mu kor biara bɔn. 16Na Moses see Kora dɛ, Ɔwo nye wo mboanofo no nyinara mbra EWURADZE enyim, ɔwo, nye hɔn, nye Aaron, mbra ɔkyena: 17na hom mu nyimpa biara mfa n’eduhuamsɛn, na hom mfa eduhuam ngugu mu, na hom mu nyimpa biara mfa n’eduhuamsɛn mbra EWURADZE enyim, nduhuamsɛn ahaenu eduonum; ɔwo so, nye Aaron, obiara mfa n’eduhuamsɛn. 18Na wɔfefae, nyimpa biara nye n’eduhuamsɛn, na wɔdze ogya guguu mu, na wɔnye Moses nye Aaron kegyinagyinaa ehyiadzibuw no n’abowano. 19Na Kora poon mboanofo no nyinara hyiae bɔɔ hɔn do ngua wɔ ehyiadzibuw no n’abowano: na EWURADZE enyimnyam yii noho edzi kyerɛɛ mboanofo no nyinara.
20Na EWURADZE kasaa kyerɛɛ Moses nye Aaron dɛ, 21Hom ntsew homho mfi mboanofo yi mu, ma menhyew hɔn amon mu. 22Na wɔdze hɔn enyim butubutuuw famu, na wɔsee dɛ, Ao Nyankopɔn, honam nyinara hɔn esunsum Nyankopɔn, ana nyimpa kor bɛyɛ bɔn, na wo bo efuw mboanofo no nyinara? 23Na EWURADZE kasaa kyerɛɛ Moses dɛ, 24Kasa kyerɛ mboanofo no dɛ, Hom ntwe hom ho do mfi Kora, Datan, nye Abiram ntamadan ho. 25Na Moses soɛree na ɔkɔr Datan nye Abiram nkyɛn; na Israel mpanyimfo no dzii n’ekyir kɔree. 26Na ɔkasaa kyerɛɛ ɔman no dɛ, Mepa hom kyɛw, hom ntwe hom ho mfi nyimpa bɔn yi hɔn asesee ho, na mma hom nnka hɔn biribiara, bɛyɛ na hom ahyew wɔ hɔn bɔn nyinara mu. 27Nna wɔtwee hɔnho fii Kora, Datan, nye Abiram ntamadan ho wɔ afa nyina: na Datan nye Abiram fiir edzi, na wobegyinagyinaa hɔn asesee abowano, hɔn yernom, nye hɔn mbabanyin, nye hɔn mbɔtoaba so. 28Na Moses see dɛ, Iyi na hom dze bohu dɛ EWURADZE na ɔasoma me dɛ mindzi dwuma yi nyinara; na mommbɔɔ mankasa me tsir mu yɛ. 29Sɛ nyimpa nyinara wu ara na iyinom bowuwu, anaa sɛ dza ɔto nyimpa nyinara na ɔbɔtɔ hɔn a, ɔnodze na nnyɛ EWURADZE na ɔasoma me. 30Na sɛ adze fofor bi dze na EWURADZE bɛyɛ, na asaase bobue n’ano, na ɔamen hɔn, nye dza odzi wɔ hɔn nyinara, na wɔnam enyikan akɔ samanadze a; ɔnodze hom ntse ase dɛ mbanyin yi ebu EWURADZE enyimtsia. 31Na ɔbaa dɛ owiee nsɛm yi nyinara ka no, asaase a ɔwɔ hɔn ase no paae: 32na asaase buee n’ano, na ɔmeen hɔn, nye hɔn efifo, nye nyimpa a wodzi wɔ Kora nyinara, nye hɔn adze nyinara. 33Nna hɔn, nye dza odzi wɔ hɔn nyinara, nam enyikan sianee kɔr samanadze: na asaase no seraam hɔn do, na wɔherae wɔ bagua no mu. 34Na Israelfo a woetwa hɔnho ehyia no nyinara guanee wɔ hɔn nkekamu no ntsi: na wɔsee dɛ, Bɛyɛ na asaase amen hɛn. 35Na ogya fii EWURADZE hɔ bae, na ɔbɛhyeew mbanyin ahaenu eduonum a wɔdze eduhuam bae no.
36Na EWURADZE kasaa kyerɛɛ Moses dɛ, 37Kasa kyerɛ ɔsɔfo Aaron ne babanyin Eleazar dɛ, ɔntase nduhuam asɛn no mfi ogyahyewee no mu, na fa ogya no petsepetse enyim noho; na ɔyɛ krɔnkrɔn: 38mekyerɛ ndzebɔnyɛfo yi a wɔayɛ hɔnankasa hɔn nkwa ho bɔn nduhuam asɛn no, na ma wɔnyɛ no ɔborntɛrba mfa nyɛ afɔrmbukyia no ho nkataho: osiandɛ wɔdze baa EWURADZE enyim, dɛm ntsi ɔyɛ krɔnkrɔn: na ɔnyɛ asɛnkyerɛdze mma Israelmba. 39Na ɔsɔfo Eleazar faa boran nduhuam asɛn no a hɔn a wɔhyewee no dze bae no; na wɔboree dze yɛɛ afɔrmbukyia no ho nkataho: 40dɛ ɔnyɛ nkaadze mma Israelmba, amma ɔhɔho bi a ommfi Aaron n’asefo mu aammba ho ammbɛhyew eduhuam wɔ EWURADZE enyim; mma ɔaannyɛ dɛ Kora, nye no kuw no: dɛ mbrɛ EWURADZE nam Moses do kaa kyerɛɛ no no.
41Na n’adzekyee no Israelmba mboanofo no nyinara hwinhwinii tsiaa Moses nye Aaron dɛ, Hom na hom eku EWURADZE ne man. 42Na ɔbaa dɛ, aber a mboanofo no boaboaa hɔn ano tsiaa Moses nye Aaron no, wɔdandaan hɔn enyi wɔ ehyiadzibuw no do: na, hwɛ, mununkum no akata do, na EWURADZE enyimnyam no yii noho edzi. 43Na Moses nye Aaron baa ehyiadzibuw no enyim. 44Na EWURADZE kasaa kyerɛɛ Moses dɛ, 45Hom mma hom ho do mfi mboanofo yi mu, ma menhyew hɔn amon mu. Na wɔdze hɔn enyim butubutuuw famu. 46Na Moses see Aaron dɛ, Fa w’eduhuamsɛn, na sɔ afɔrmbukyia no do ogya gu mu, na fa eduhuam to do, na suo mu nantsew ntsɛmara kɔ mboanofo no nkyɛn, na kɛpata ma hɔn: na ebufuhyew efi EWURADZE hɔ efir; ɔyardɔm no ahyɛ ase. 47Na Aaron fae dɛ mbrɛ Moses kae no, na otuu mbirika kɔr bagua no finimfin; na, hwɛ, ɔyardɔm no ahyɛ ase wɔ ɔman no mu: na ɔdze eduhuam no gui, na ɔpatae maa ɔman no. 48Na ogyinaa ewufo nye enyikamfo no ntamu; na wosiankaa ɔyardɔm no. 49Afei hɔn a wowuwui wɔ ɔyardɔm no mu wɔyɛ mpemduanan nye ahaesuon, ɔsor hɔn a Kora asɛm no ntsi wowuwui no. 50Na ɔyardɔm no siankaa no, Aaron sanee baa Moses nkyɛn wɔ ehyiadzibuw no n’abowano.
Currently Selected:
Nkanee 16: MFANBRP
Highlight
Copy
Compare
Share
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.