Nkanee 17
17
Aaron No Poma No
1Na EWURADZE kasaa kyerɛɛ Moses dɛ, 2Kasa kyerɛ Israelmba, na gyegye hɔn hɔ mpoma, egyanom ofi kor mu kor, wɔ hɔn mbapɔmba no nyinara hɔ dɛ mbrɛ hɔn egyanom efi tsetsee, mpoma duebien: kyerɛw nyimpa biara ne dzin wɔ no poma do. 3Na kyerɛw Aaron ne dzin wɔ Levi poma do: na poma kor nyɛ hɔn egyanom efi do tsitsir kor dze. 4Na gyaa mu gu ehyiadzibuw no mu wɔ Dase no enyim, mbrɛ menye hom hyia no. 5Na ɔbɛba dɛ banyin a mibeyi no no, no poma bɛfefɛw: na mebɛma mo ho ehwinhwin a Israelmba hwinhwin tsia hom no egyaa. 6Na Moses kasaa kyerɛɛ Israelmba, na hɔn mbapɔmba no nyinara memaa no mpoma, ɔbapɔmba kor nedze kor, dɛ mbrɛ hɔn egyanom efi tsetsee no, mekyerɛ mpoma duebien: na Aaron no poma wɔ hɔn mpoma no mu. 7Na Moses gyaa mpoma no mu guu EWURADZE enyim wɔ Dasebuw no mu. 8Na ɔbaa dɛ adze kyee no, Moses kɔr Dasebuw no mu no; na, hwɛ, Aaron no poma no a ɔyɛ Levi ofi dze no afefɛw, ayɛ frɔmfrɔm, na egu nhyiren, na asow almɔnd aba beree. 9Na Moses dze mpoma no nyinara fi EWURADZE enyim brɛɛ Israelmba no nyinara: na wɔhwɛe, na nyimpa biara faa no poma. 10Na EWURADZE see Moses dɛ, Fa Aaron no poma no san to Dase no enyim, ma wɔmfa nsie nyɛ asɛnkyerɛdze mma mba asoɔdzenfo no; ama eetwa hɔn ehwinhwin a wohwinhwin tsia me no do, amma woeennwuwu. 11Dɛm na Moses yɛe: dɛ mbrɛ EWURADZE hyɛɛ no no, dɛmara na ɔyɛe.
12Na Israelmba no kasaa kyerɛɛ Moses dɛ, Hwɛ yeruwu, yɛreyera, hɛn nyinara rehera. 13Obiara a ɔba ho, nyia ɔba EWURADZE ntamadan no ho, owu: ana hɛn nyinara yenwuwu?
Currently Selected:
Nkanee 17: MFANBRP
Highlight
Copy
Compare
Share
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.