Nkanee 22
22
Moabhen Balak Soma Kɔ Balaam Hɔ
1Na Israelmba no tui, na wɔkɛkyeer nsera wɔ Moab tɛtɛr mu wɔ Jeriko Jordan egya.
2Na Zipor ne babanyin Balak hun dza Israel ayɛ Amorifo no nyinara. 3Na Moab suroo ɔman no dodow, osiandɛ wɔdɔɔ so: na nketsenketse kitsaa hɔn wɔ Israelmba no ntsi. 4Na Moab see Midian mpanyimfo dɛ, Afei nyimpadodow yi bɛsɛɛ dza etwa ehyia hɛn ho nyinara, dɛ mbrɛ ɔnantwi we haban mu efuw. Na Zipor ne babanyin Balak nna aber no mu ɔyɛ Moabhen. 5Na ɔsomaa abɔfo ma wɔkɔr Beor ne babanyin Balaam hɔ, wɔ Petor a ɔwɔ Esutsen no ho wɔ ne man mba asaase do dɛ wonkehyia no, dɛ, Hwɛ, ɔman bi efi Egypt aba: hwɛ, wɔkata asaase enyi, na wogu me tsentsendo: 6dɛm ntsi afei, meserɛ wo, bra bɛpaa ɔman yi ma me; na wɔyɛ dzen dodow ma me: dɛ bi a mibedzi nyim, ma meekuku hɔn, na maapam hɔn mefi asaase no do: na minyim dɛ nyia ɔwo ihyira no no woehyira no, na nyia ɔwo edom no no wɔadom no. 7Na Moab mpanyin nye Midian mpanyin no sii mu dze ebisa no ho akatua no wɔ hɔn nsamu kɔree; na wɔbaa Balaam hɔ, na wɔbɛkaa Balak ne nsɛm no kyerɛɛ no. 8Na ɔsee hɔn dɛ, Hom nsoɛ ha anadwe yi, na mebɛbrɛ hom mbuae, dɛ mbrɛ EWURADZE bɛka akyerɛ me no: na Moab mbapɔmba no nye Balaam tsenae. 9Na Nyankopɔn baa Balaam nkyɛn, na ɔsee dɛ, Mbanyin bɛn na wɔnye wo wɔ hɔ yi? 10Na Balaam see Nyankopɔn dɛ, Zipor ne babanyin Balak, Moabhen no, na ɔasoma ma wɔaba mo hɔ dɛ, 11Hwɛ, ɔman a woefi Egypt aba no, akata asaase enyi: afei, bra bɛpaa hɔn ma me; dɛ bi a mubotum menye hɔn ako, na mapam hɔn. 12Na Nyankopɔn see Balaam dɛ, Mma nnye hɔn nnkɔ, mma mmpaa ɔman no: na woehyira hɔn. 13Na Balaam soɛɛr anapa no, na ɔsee Balak mbapɔmba no dɛ, Hom nkɔ hom asaase do: na EWURADZE mmpen dɛ ɔbɛma me kwan ma menye hom akɔ. 14Na Moab mbapɔmba no soɛree, na wɔbaa Balak nkyɛn, na wɔsee dɛ, Balaam ammpen dɛ ɔnye hɛn bɛba. 15Na Balak somaa mbapɔmba a wɔdɔɔ so, na hɔn enyim wɔ nyam sen hɔn so bio. 16Na wɔbaa Balaam nkyɛn, na wɔsee no dɛ, Mbrɛ Zipor babanyin Balak se nye yi, Mepa wo kyɛw, mma biribi nnsiw wo me nkyɛn ba ho kwan: 17na mebɛhyɛ wo enyimnyam kɛsenara, na biribiara a ebɛse me no mebɛyɛ: dɛm ntsi bra, meserɛ wo, bɛpaa ɔman yi ma me. 18#1 Ahe 13.8 Na Balaam buae na ɔsee Balak no nkowaa no dɛ, Sɛ Balak dze dwetɛ nye sika ne fi ma mpo bɛma me a, murunntum mummbu EWURADZE me Nyankopɔn n’asɛm do, mennkɛyɛ biribi, dɛ osuar anaa ɔyɛ kɛse. 19Afei dɛm ntsi, mɛserɛ hom, hom so ntsintsim ha anadwe yi, ma munhu dza EWURADZE bɛka akyerɛ me bio. 20Na Nyankopɔn baa Balaam nkyɛn anadwe, na ɔsee no dɛ, Sɛ mbanyin no ba behyia wo a, Soɛr, nye hɔn nkɔ; mbom dza meka mekyerɛ wo no nko na yɛ. 21Na Balaam soɛɛr anapa no, na ɔhyehyɛɛ n’asoasopɔnkɔ, na ɔnye Moab mbapɔmba no kɔree.
Balaam N’asoasopɔnkɔ Gye No Nkwa
22Na Nyankopɔn n’ebufuw dzɛwee dɛ ɔkɔree: na EWURADZE bɔfoe begyinaa ɔkwan no do dɛ ɔyɛfo bi a otsia no. Na ɔnodze ɔtse n’asoaso do reba, na no nkowaa beenu ka no ho. 23Na asoaso no hun EWURADZE no bɔfoe no dɛ ogyina ɔkwan no mu, ɔatwe ne nkrantsee kitsa ne nsamu: na asoaso no danee fii ɔkwan no mu faa nkyɛn, na ɔkɔr haban mu: na Balaam bɔɔ asoaso no dɛ ɔdze redan no aba ɔkwan mu. 24Nna EWURADZE no bɔfoe no kegyinaa wenyin nture ntamu ɔkwan tokur bi mu, ban wɔ afa ha, na ban wɔ afa ha. 25Na asoaso no hun EWURADZE no bɔfoe no, na ɔdze noho miaa ɔfadum no ho, na ɔdze Balaam n’anan miaa ɔfadum no: na ɔbɔɔ no bio. 26Na EWURADZE no bɔfoe no kɔr kan, na okegyinaa beebi a ɔmoa, mbrɛ ɔkwan bi nnyi a wɔdan fa enyimfa anaa abankum. 27Na asoaso no hun EWURADZE no bɔfoe no, na obutuuw famu wɔ Balaam n’ase: na Balaam n’ebufuw dzɛwee, na ɔdze n’abaa bɔɔ asoaso no. 28Na EWURADZE buee asoaso no ano, na ɔsee Balaam dɛ, Ebɛnadze na mayɛ wo, na abɔ me mpɛn ebiasa yi? 29Na Balaam see asoaso no dɛ, Osiandɛ esi me atwetwe: kɛtseankyɛ nkrantsee kitsa me nsamu, nkyɛ sisei meku wo. 30Na asoaso no see Balaam dɛ, Ana nnyɛ w’asoaso nye me a atsena mo do wo nkwa tsentsen nyinara dze ebodu ndɛ da yi? Ana menya wo dɛm nyɛe pɛn? Na ɔsee dɛ, Oho. 31Nna EWURADZE buee Balaam n’enyiwa, na ohun EWURADZE no bɔfoe no dɛ ogyina ɔkwan no mu, wɔatwe ne nkrantsee kitsa ne nsamu: na ɔbɔɔ ne tsir adze, na ɔdze n’enyim butuuw famu. 32Na EWURADZE no bɔfoe no see no dɛ, Ɔyɛ dɛn ntsi na abɔ w’asoaso mpɛn ebiasa yi? Hwɛ, emi na mefir edzi abɛyɛ wo ɔyɛfo osiandɛ wo kwan no akyea wɔ m’enyim: 33na asoaso no hun me, na ɔdanee fii m’enyim mpɛn ebiasa yi: sɛ wɔanndan emmfi m’enyim dze a, nkyɛ wo so sisei meku wo, na magye no nkwa. 34Na Balaam see EWURADZE no bɔfoe no dɛ, Mayɛ bɔn; na minnyim dɛ ɔwo na igyinaa ɔkwan no mu tsiaa me: dɛm ntsi afei, sɛ emmpɛ a, mebɛsan m’ekyir bio. 35Na EWURADZE no bɔfoe no see Balaam dɛ, Nye mbanyin no nkɔ: na mbom asɛm a mebɛka makyerɛ wo no nko na ka. Nna Balaam nye Balak mbapɔmba no kɔree. 36Na aber a Balak tsee dɛ Balaam reba no, ofiir edzi kehyiaa no wɔ Moab Kurow a ɔda Arnon ntoaado a ɔwɔ ntoaado ano no. 37Na Balak see Balaam dɛ, Ana nnyɛ enyiberdo ara na mosomaa dɛ wombehyia wo ma bra? Ɔyɛ dɛn ntsi na ammba me nkyɛn? Egye dzi dɛ murunntum mennhyɛ wo enyimnyam a? 38Na Balaam see Balak dɛ, Hwɛ, maba wo nkyɛn: ana afei mowɔ tum biara a medze meka asɛm bi? Asɛm a Nyankopɔn dze bɛhyɛ m’anomu no, ɔno na mebɛka. 39Na Balaam nye Balak kɔree, na wɔbaa Kiriat-huzoth. 40Na Balak dze anantwi nye nguan bɔɔ okum afɔr, na ɔdze kɛmaa Balaam nye mbapɔmba a wɔnye no wɔ hɔ no. 41Na ɔbaa dɛ anapa no, Balak faa Balaam, na ɔdze no fowee kɔr Baal ne mbea sorɔnsorɔm no do, na ofi hɔ hun ɔman no ano.
Currently Selected:
Nkanee 22: MFANBRP
Highlight
Copy
Compare
Share
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.