Nkanee 21
21
Israelfo Sɛɛ Keenanfo
1Na Aradhen, Keenannyi no a, ɔtse Pomu afamu no, tsee dɛ wɔreka dɛ Israel nam Atarim ɔkwan do aba no; nna ɔnye Israel bɔkoe, na ɔfaa hɔn mu binom ndɔmmum. 2Na Israelfo bɔɔ EWURADZE anohoba see dɛ, Sɛ ɔwo dze ɔman yi rehyɛ hɛn nsa dze a, nkyɛ yɛbɛsɛɛ hɔn nkurow huntuhuntu. 3Na EWURADZE tsiee Israelfo ndze, na oyii Keenanfo no mae; na wɔsɛɛ hɔn nye hɔn nkurow no huntuhuntu: na wɔtoo bea no dzin Horma.
Boran Abowatsena
4Na wotui fi bepɔw Hor ho dze faa Mbɛw Po#21.4 MBƐW PO: Hwɛ Eks 14.2. kwan do, dɛ wɔrobɔ Edom asaase ho aprɔw akɔ: na ahomtsew kaa ɔman no hɔn kra pii wɔ ɔkwan no ntsi. 5Na ɔman no kasaa tsiaa Nyankopɔn, nye Moses, dɛ, Ɔyɛ dɛn ntsi na hom eyi hɛn efi Egypt dɛ yembowuwu wɔ sar do yi? Na edziban bi nnyi hɔ; na nsu bi nnyi hɔ; na edzibanhun yi afon hɛn kra. 6Na EWURADZE somaa mbowatsena a wɔsɔw wɔ ɔman no mu, na wɔkɔsosɔɔw ɔman no; na Israel mu nkorɔfo pii wuwui. 7Na ɔman no baa Moses nkyɛn bɛsee dɛ, Yɛayɛ bɔn, osiandɛ yɛakasa etsia EWURADZE, nye ɔwo; pa EWURADZE kyɛw, ma ombeyi mbowatsena no mfi hɛn do. Na Moses paa kyɛw maa ɔman no. 8Na EWURADZE see Moses dɛ, Yɛ boran abowatsena, na fa si dua do: na ɔbɛba dɛ, obiara a abowatsena asɔw no no, sɛ ɔhwɛ a, obenya nkwa. 9Na Moses yɛɛ boran abowatsena, na ɔdze sii dua no do: na ɔbaa dɛ, sɛ abowatsena ka nyimpa bi a, ɔhwɛ boran abowatsena no a, onya nkwa.
Israelmba Sow Hɔn Akwantu Do
10Na Israelmba no tui, na wɔkɛkyeer nsera wɔ Obot. 11Na wotui fii Obot, na wɔkɛkyeer nsera wɔ Iye-abarim, wɔ sar a ɔwɔ Moab enyim, wɔ wipuei afamu no do. 12Hɔ na wofi tui, na wɔkɛkyeer nsera wɔ Zered bɔnsa mu. 13Hɔ na wofi tui, na wɔkɛkyeer nsera wɔ Arnon a ɔwɔ sar do a ofi Amorifo ntoaado ba no, n’egya: na esutsen Arnon Moab ntoaado a, ɔda Moab nye Amorifo ntamu. 14Dɛm ntsi wɔka no EWURADZE Akodzi nwoma no mu dɛ,
Vaheb wɔ Sufa,
Nye Arnon mbɔnsa no,
15Nye mbɔnsa no a ɔtserew no a
Ɔkom kɔ Ar tsenabew afamu no,
Na ɔtwer Moab ntoaado ho no.
16Na hɔ na wofi tui kɔr Beer, nsubura a EWURADZE kaa ho asɛm kyerɛɛ Moses dɛ, Boa ɔman no ano, na mebɛma hɔn nsu.
17Aber no mu na Israel toow ndwom yi dɛ:
Nsubura tue ɛ; hom ngye no do:
18Nsubura a ahenmba tui no,
Ɔman no mu ekunyin no fumfunii,
Wɔdze ahempoma, ɔnye hɔn mpoma.
Na wofi sar no do tui kɔr Mattana: 19na wofi Mattana kɔr Nahaliel: na wofi Nahaliel kɔr Bamot: 20na wofi Bamot kɔr bɔnsa a ɔwɔ Moab haban mu wɔ Pisga etsifi a ɔhwɛ sar yiredede no enyi no mu.
Wodzi Sihon Na Og Do Konyim
21Na Israel somaa abɔfo ma wɔkɔr Amorifo hen Sihon nkyɛn, dɛ, 22Ma muntwa mu mfa w’asaase do: yɛremman haban mu, anaa wenyin ture mu; yɛronnom nsubura mu nsu bi: yɛrefa ɔhen tsempɔn do akɔ, ekodu dɛ yeetwa mu wɔ wo ntoaado. 23Na Sihon amma Israel kwan ma woeenntwa mu wɔ no ntoaado: na mbom ɔboaa ne man nyinara ano, na ofiir edzi kehyiaa Israel wɔ sar no do, na ɔbaa Jahaz: na ɔnye Israel bɔkoe. 24Na Israel dze nkrantsee ano kum no, na ɔfaa n’asaase ofi Arnon do dze kɔ Jabbok do, mekyerɛ okodu Ammonmba ho: osiandɛ Ammonmba ntoaado no ɔyɛ dzen. 25Na Israel faa nkurow yi nyinara: na Israel tsenaa Amorifo nkurow no nyinara mu, wɔ Hesbon, nye no ho nkuroba nyinara mu. 26Na Hesbon yɛ Amorifo hen Sihon kurow, ɔno na ɔnye nkan no Moabhen no ako, na ɔagye ne nsamu n’asaase nyinara kodu Arnon ho. 27Dɛm ntsi hɔn a wɔkasa wɔ mbɛbu mu no ka dɛ,
Hom mbra Hesbon,
Ma wɔnkyekyer na wontsintsim Sihon kurow no:
28Na ogya bi efi Hesbon,
Ogyaframee efi Sihon kurow mu:
Ɔamen Moab Ar,
Arnon mbea sorɔnsorɔm do ekunyin no
29Ɔwo Moab, due!
Kemos ɔman, ɔwo ayera:
Oeyi ne mbabanyin ama dɛ eguamfo,
Na ne mbabaa akɔ ndɔmmum mu,
Wɔ Amorifo hen Sihon hɔ.
30Yɛatotow hɔn; Hesbon ayera araa ekodu Dibon,
Yɛasɛɛ hɔn araa akɔ Nofa a
Ɔdze kodu Medeba.
31Na Israel tsenaa Amorifo asaase do. 32Na Moses somae ma wɔkɛseraa Jazer, na wɔfaa no nkuroba no, na wotuu Amorifo a wɔwɔ hɔ no. 33Na wɔdanee na wɔkɔ fowee kɔr Basan ɔkwan do: na Basanhen Ɔge fiir edzi kehyiaa hɔn, ɔno nye ne man nyinara, dɛ wɔrokɔ ko wɔ Edrei. 34Na EWURADZE see Moses dɛ, Mma nnsuro no: na meyi ɔno, nye ne man nyinara, nye n’asaase mahyɛ wo nsa; na yɛ no dɛ mbrɛ eyɛɛ Amorifo hen Sihon a ɔtsenaa Hesbon no. 35Nna wokunkum ɔno, nye ne mbabanyin, nye ne man nyinara, kodur dɛ woenngyaa obi amma no: na wɔfaa n’asaase no.
Currently Selected:
Nkanee 21: MFANBRP
Highlight
Copy
Compare
Share
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.