Nkanee 20
20
Nsɛm A Osisii Wɔ Kades
1Na Israelmba no, mekyerɛ mboanofo no nyina, baa Zin sar do wɔ bosoom a odzi kan no mu: na ɔman no tsenaa Kades; na Miriam wui wɔ hɔ, na wosiee no wɔ hɔ. 2Nna nsu nnyi hɔ mma mboanofo no: na wohyiaa hɔnho hyiae tsiaa Moses nye Aaron. 3Na ɔman no nye Moses hamee, na wɔkaa dɛ, Ka hɛn nko a nkyɛ ber a hɛn nuanom wuwui wɔ EWURADZE enyim no hɛn so yewuwui! 4Na ebɛn ntsi na hom dze EWURADZE bagua aba sar yi do, dɛ yembowuwu wɔ ha, hɛn nye hɛn mbowa? 5Na ɔyɛ dɛn ntsi na hom ayɛ ma yeefi Egypt efir, dɛ hom dze hɛn reba bea bɔn yi do yi? Ɔnnyɛ abadua, anaa adɔmba, anaa wenyindua, anaa pɔmegranate eduaba bea: nkyii so nsu mpo a wɔnom bi nnyi hɔ. 6Na Moses nye Aaron fii bagua no enyim kɔr ehyiadzibuw no n’abowano, na wɔdze hɔn enyim butubutuuw hɔ: na EWURADZE enyimnyam yii noho edzi kyerɛɛ hɔn. 7Na EWURADZE kasaa kyerɛɛ Moses dɛ, 8Fa poma no, na boa mboanofo no ano, ɔwo, nye wo nua Aaron, na hom nkasa nkyerɛ ɔbotan no wɔ hɔn enyim, ma ɔmma no nsu; na yi ɔbotan no mu nsu ma hɔn: ma mboanofo no nye hɔn mbowa nnom. 9Na Moses faa poma no fii EWURADZE enyim, dɛ mbrɛ ɔhyɛɛ no no. 10Na Moses nye Aaron boaboaa bagua no ano wɔ ɔbotan no enyim, na ɔsee hɔn dɛ, Afei hom ntsie, hom asoɔdzenfo; ana yɛntwe ɔbotan yi mu nsu mma hom? 11Na Moses maa ne nsa do, na ɔdze no poma no bɔɔ ɔbotan no mpɛn ebien: na nsu fiir edzi baa pii, na mboanofo no nye hɔn mbowa nomee. 12Na EWURADZE see Moses nye Aaron dɛ, Osiandɛ hom anngye me enndzi, ammfa anntsew mo ho wɔ Israelmba enyim mu ntsi, hom remmfa bagua yi nndu asaase a medze ama hɔn no do. 13Iyi nye Meriba nsu no; osiandɛ Israelmba nye EWURADZE hamee, na ɔtseew noho wɔ hɔn mu.
14Na Moses somaa abɔfo fii Kades kɔr Edomhen hɔ dɛ, Mbrɛ wo nua Israel se nye yi, Woara inyim ɔhaw a aba hɛn do nyinara: 15mbrɛ hɛn egyanom dze sianee kɔr Egypt, na yɛdze tsenaa Egypt mber tsentsen; na Egyptfo yɛɛ hɛn, nye hɛn egyanom bɔn: 16na yesui frɛɛ EWURADZE a, otsiee hɛn ndze, na ɔsomaa ɔbɔfo, na oyii hɛn fii Egypt no: na, hwɛ yɛwɔ Kades, kurow a ɔwɔ wo ntoaado noho no mu: 17meserɛ wo, ma yentwa mu mfa w’asaase do: yerunntwa mu mmfa haban anaa wenyin ture mu, nkyii so yɛronnom bura mu nsu bi: yɛbɛfa ɔhen ne tsempɔn do ara akɔ, yɛremman enyimfa anaa abankum, ekodu dɛ yeetwa mu wɔ wo ntoaado. 18Na Edom see no dɛ, Mma mmbɛfa mo mu, bɛyɛ na medze nkrantsee efir edzi ebehyia wo. 19Na Israelmba no see no dɛ, Yɛrebɛfa ɔtsempɔn do akɔ: na sɛ hɛn nye hɛn mbowa nom wo nsu bi a, ɔno yebotua kaw: ɔnnyɛ biribiara, ma yɛmfa hɛn anamɔn ara mbotwa mu. 20Na ɔsee dɛ, Mma hom nntwa mu. Na Edom dze nkorɔfo pii, nye nsa a ɔyɛ dzen fiir edzi behyiaa hɔn. 21Dɛm na Edom poow dɛ ɔma Israel kwan wɔ no ntoaado: dɛm ntsi Israel danee fii noho.
22Na wotui fii Kades: na Israelmba no, mekyerɛ mboanofo no nyina, baa bepɔw Hor ho. 23Na EWURADZE kasaa kyerɛɛ Moses nye Aaron wɔ bepɔw Hor ho, wɔ Edom asaase ntoaado dɛ, 24Ɔnnkɛkyɛr na Aaron akɛka no nkorɔfo ho wɔ nsamankyir: na ɔronnkɔ asaase a medze ama Israelmba no do, osiandɛ hom yɛɛ asoɔdzen wɔ m’asɛm do wɔ Meriba nsu ho. 25Fa Aaron nye ne babanyin Eleazar, na fa hɔn fow bepɔw Hor: 26na pɔr Aaron ne ntar no, na fa hyɛ ne babanyin Eleazar: na onwu wɔ hɔ nkɛka no nkorɔfo ho. 27Na Moses yɛɛ dɛ mbrɛ EWURADZE hyɛe no: na wɔfoow bepɔw Hor wɔ mboanofo no nyinara enyim. 28Na Moses pɔɔr Aaron ne ntar no, na ɔdze hyɛɛ ne babanyin Eleazar; na Aaron wui wɔ bepɔw no etsifi hɔ: na Moses nye Eleazar fii bepɔw no do sianee. 29Na aber a mboanofo no nyinara hun dɛ Aaron ewu no, wosuu Aaron adaduasa, mekyerɛ Israel fi no nyinara.
Currently Selected:
Nkanee 20: MFANBRP
Highlight
Copy
Compare
Share
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.