Nkanee 19
19
Ahoguar Nsu No
1Na EWURADZE kasaa kyerɛɛ Moses nye Aaron dɛ, 2Iyi nye mbra ahyɛdze a EWURADZE ahyɛ, dɛ, Kasa kyerɛ Israelmba no, ma wɔmfa ɔnantwiber memen a nkekaa nnyi ho a onndzi dzɛm a kɔndua nnkɔr no do pɛn: 3na hom mfa no mma ɔsɔfo Eleazar, na ɔmfa no mpue mbra nseraban no ekyir, na obi nku no wɔ n’enyim: 4na ɔsɔfo Eleazar mfa ne nsatseaba mfa no bɔgyaa bi, na ɔmpetse no bɔgyaa no bi ngu ehyiadzibuw no enyim afamu mpɛn esuon: 5na obi nhyew ɔnantwiber no wɔ n’enyim; no nwoma, nye ne nam, nye no bɔgyaa, nye n’egyanan no: 6na ɔsɔfo no mfa kyindur dua, nye odwonhataw, nye serdaa, na ɔntow ngu ɔnantwiber a ɔrehyew no do. 7Na afei ɔsɔfo no nhor ne ntar, na onguar wɔ nsu mu, na n’ekyir no na ɔmbra nseraban no mu, na ɔsɔfo no ho nntsew araa kodu ewimbir. 8Na nyia ɔhyew no no nhor ne ntar wɔ nsu mu, na onguar no honam wɔ nsu mu, na no ho nntsew araa kodu ewimbir. 9Na ɔbanyin bi a no ho tsew nsesaw ɔnantwiber no nso no, na ɔmfa nkogu nseraban no ekyir beebi a ɔtsew, na wɔmfa nsie nyɛ Israelmba mboanofo ahoguar nsu: ɔyɛ bɔn ho afɔr. 10Na nyia ɔsesaw ɔnantwiber no nso no ɔnhor ne ntar, na no ho nntsew araa kodu ewimbir: na ɔnyɛ Israelmba no, nye ɔhɔho a ɔsoɛ hɔn mu no, daa ahyɛdze. 11Nyia ɔka nyimpa biara no fun no no ho nntsew araa nda esuon: 12ɔnoara na ɔmfa iyi nguar noho da a otsia ebiasa no, na da a otsia esuon no na no ho atsew: na sɛ oennguar noho da a otsia ebiasa no, nye da a otsia esuon no a, no ho renntsew. 13Obiara a ɔka nyimpa biara a oewu no fun no, na onnguar noho no, ogu EWURADZE ntamadan no ho fi; na ɔkra no wobotwa no efi Israel akyen: osiandɛ wɔammpetse ahoguar nsu no enngu no do ntsi no ho nntsew; n’ahoɔfi da ho wɔ no do. 14Sɛ nyimpa wu asese mu a no ho mbra nye yi: obiara a ɔba asese no mu, na obiara a ɔwɔ asese no mu no, no ho nntsew araa nda esuon. 15Na kɔɔpow biara a n’ano da hɔ a onnyi ebuado wɔ do no, no ho nntsew. 16Na obiara a ɔka obi a ɔatɔr nkrantsee ano, anaa fun bi, anaa nyimpa biew bi, anaa nda bi wɔ haban mu no, no ho nntsew araa nda esuon. 17Na nyia no ho nntsew no wɔmfa bɔn ho afɔr nhyewee no no nso no bi, na wɔmfa mbasu ngu do wɔ kɔɔpow mu mma no: 18na nyimpa a no ho tsew bi mfa odwonhataw, na ɔmfa mbɔ nsu no mu, na ɔmfa mpetse asese no, nye ndzɛmba no nyinara, nye nyimpa a wɔwɔ hɔ no, nye nyia ɔka biew, anaa ɔtɔfo, anaa fun, anaa nda bi no do: 19na nyimpa a no ho tsew no mfa mpetse nyia no ho nntsew no do da a otsia ebiasa no, nye da a otsia esuon no: na da a otsia esuon no onguar no; na ɔnhor ne ntar, na onguar wɔ nsu mu, na no ho ntsew ewimbir no. 20Na nyimpa a no ho nntsew, na oennguar noho no, ɔkra no wobotwa no efi bagua no mu, osiandɛ oegu EWURADZE krɔnkrɔn bea ho fi: wɔmmpetsee ahoguar nsu no wɔ no do; no ho nntsew. 21Na ɔnyɛ daa ahyɛdze mma hɔn: na nyia ɔpetse ahoguar nsu no nhor ne ntar; na nyia ɔka ahoguar nsu no no ho nntsew araa kodu ewimbir. 22Na adze biara a nyimpa a no ho nntsew no ka no, no ho nntsew; na ɔkra a ɔka no no ho nntsew araa kodu ewimbir.
Currently Selected:
Nkanee 19: MFANBRP
Highlight
Copy
Compare
Share
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.