Nkanee 31
31
Wotu Midianfo Do Sa
1Na EWURADZE kasaa kyerɛɛ Moses dɛ, 2Dzi Midianfo wer ma Israelmba ho: na n’ekyir no akɛka wo nkorɔfo ho wɔ nsamankyir. 3Na Moses kasaa kyerɛɛ ɔman no dɛ, Hom mma hom mu mbanyin mmia mma ɔsa no, ama woeetu akɔ Midian do, na wɔmfa EWURADZE n’awerdzi nkɔ Midianfo do. 4Hom mma Israel ebusuakuw ebusuakuw nyinara mu, ebusuakuw biara mu nyimpa apem nkɔ ɔsa no. 5Nna woyiyii Israel mpempem mu mpemduebien a womiae maa ɔsa no, ebusuakuw biara mu apem. 6Na Moses somaa hɔn, ebusuakuw biara mu apem no, ma wɔkɔr ɔsa no, hɔn nye ɔsɔfo Eleazar ne babanyin Finehas ɔdze ahotseweebea ndzɛmba no na ewubɔ ntotorobɛnto no wɔ ne nsamu na wɔkɔr ɔsa no. 7Na wɔnye Midian kɔkoe dɛ mbrɛ EWURADZE hyɛɛ Moses no; na wokunkum mbanyin no nyinara. 8Na wokunkum Midian ahemfo no kaa hɔn atɔfo nkaa no ho. Evi, Rekem, Zur, Hur, nye Reba Midian ahemfo beenum no; na wɔdze nkrantsee kum Beor ne babanyin Balaam so. 9Na Israelmba no faa Midian mbaa no nye hɔn mbofraba no ndɔmmum; na wɔfoom hɔn ofiembowa nyinara, nye hɔn nguankuw nyinara, nye hɔn ahodze nyinara. 10Na wɔdze ogya hyehyeew hɔn nkurow nyinara wɔ mbeambea a wɔtsetsee no, nye hɔn nseraban nyinara. 11Na wɔfaa asadze no nyinara, nye afonam no nyinara, nyimpa nye abowa nyina. 12Na wɔdze ndɔmmum no, nye afonam no, nye asadze no, brɛɛ Moses, nye ɔsɔfo Eleazar, nye Israel mboanofo no; wɔ nseraban no mu wɔ Moab tɛtɛr a ɔda Jeriko Jordan ho no do.
13Na Moses, nye ɔsɔfo Eleazar, nye mboanofo no mu mbapɔmba no nyinara fiir edzi kehyiaa hɔn wɔ nseraban no ekyir. 14Na Moses no bo fuuw dɔm no hɔn asafohemfo no, apem apem do asafohemfo nye ɔha ɔha do asafohemfo a wofi asayɛ bae no. 15Na Moses see hɔn dɛ, Ana hom agye mbaa no nyinara nkwa? 16Hwɛ, iyinom, na ɔnam Balaam apam do, wɔmaa Israel yɛɛ bɔn tsiaa EWURADZE wɔ Peor asɛm no mu, na ɔmaa ɔyardɔm baa EWURADZE no mboanofo mu no. 17Afei dɛm ntsi hom nkuku mbofraba no mu mbanyin nyinara, na wonku ɔbaa biara a oehu ɔbanyin dɛ ɔnye no ada. 18Na mbaa mbofraba a wonnhun ɔbanyin dɛ wɔnye no ada no dze, hom ngye hɔn nkwa mma homho. 19Na hom nkyer nsera wɔ nseraban no ekyir nda esuon: obiara a oeku nyimpa bi no, nye obiara a ɔaka ɔtɔfo bi no, hom ntsew homho da a otsia ebiasa no, nye da a otsia esuon no, hom nye hom ndɔmmumfo no. 20Na atar biara dze, nye adze a wɔdze nwoma ayɛ nyinara, nye mpɔnkyenhwi edwuma nyinara, nye adze a wɔdze dua ayɛ nyinara, homara hom ntsew ho. 21Na ɔsɔfo Eleazar see mbanyin akofo a wɔkɔr akono no dɛ, Iyi nye mbra a EWURADZE dze ahyɛ Moses no mu ahyɛdze: 22naaso sika nye dwetɛ, boran, dadze, seenyaa, nye sumbui no, 23adze biara a obotum ogya no, hom mma ɔnkɛfa ogya mu, na no ho ntsew; naaso hom mfa ahoguar nsu no ntsew ho: na adze a onnkotum ogya no nyinara, hom mma ɔnkɛfa nsu mu. 24Na hom nhor hom ntar da a otsia esuon no, na hom ho ntsew, na n’ekyir no na hom mbra nseraban no mu.
25Na EWURADZE kasaa kyerɛɛ Moses dɛ mbu, 26Ɔwo nye ɔsɔfo Eleazar nye mboanofo no egyanom efi mu etsitsir no, afonam a wɔfae no ano, nyimpa nye mbowa nyina, 27na kyɛ afonam no mu akyɛkyɛ ebien; ma mbanyin akofo a wɔkɔr akono no, nye mboanofo no nyinara: 28na gye mbanyin asayɛfo a wɔkɔr akono no hɔ tow ma EWURADZE: nyimpa, nye anantwi, nye nsoasopɔnkɔ, nye nguankuw mu ahaenum mu nkorkor: 29gye no wɔ hɔn ɔfa no mu, na fa ma ɔsɔfo Eleazar, dɛ EWURADZE ɔmado afɔr. 30Na Israelmba ɔfa mu dze, gye nyimpa, anantwi, nsaso, nye nguankuw no, mekyerɛ ofiembowa nyinara mu eduonum eduonum mu nkorkor, na fa ma Levifo no a wɔhwɛ EWURADZE ntamadan ahwɛdodze do no. 31Na Moses nye ɔsɔfo Eleazar yɛɛ dɛ mbrɛ EWURADZE hyɛɛ Moses no. 32Afei afonam a ɔbor asadze a mbanyin asayɛfo no fae no do no, ɔyɛ nguan mpemahaesia eduosuon enum, 33nye anantwi mpemeduosuon ebien, 34nye nsoasopɔnkɔ mpemeduosia biako, 35nye nyimpa, mbaa a wonnhun ɔbanyin dɛ wɔnye no ada, nyinara wɔyɛ mpemeduasa ebien. 36Na ɔfa no a ɔyɛ hɔn a wotui kɔr ɔsa no hɔn kyɛfa no, no dodow yɛ nguan mpemahaebiasa eduasa esuon nye ahaenum: 37na nguan no mu ɔtow a woyiyii maa EWURADZE no yɛ ahaesia eduosuon enum. 38Na anantwi no yɛ mpemeduasa esia; hɔn mu ɔtow a woyiyii maa EWURADZE yɛ eduosuon ebien. 39Na nsoasopɔnkɔ no yɛ mpemeduasa nye ahaenum; hɔn mu ɔtow a woyiyii maa EWURADZE yɛ eduosia biako. 40Na nyimpa no yɛ mpemduesia; hɔn mu ɔtow a woyiyii maa EWURADZE yɛ nyimpa eduasa ebien. 41Na Moses dze ɔtow a ɔyɛ EWURADZE ɔmado afɔr no maa ɔsɔfo Eleazar, dɛ mbrɛ EWURADZE hyɛɛ Moses no. 42Na Israelmba hɔn ɔfa no a Moses gyee no wɔ akofo no hɔ no mu dze, 43(afei mboanofo no hɔn ɔfa no yɛ nguan mpemahaebiasa eduasa, esuon nye ahaenum, 44nye anantwi mpemeduasa esia, 45nye nsoasopɔnkɔ mpemeduasa nye ahaenum, 46nye nyimpa mpemduesia;) 47nye Israelmba hɔn ɔfa no mu dze, Moses faa eduonum eduonum mu nkorkor, nyimpa nye mbowa nyina, na ɔdze maa Levifo no a wɔhwɛ EWURADZE ntamadan ahwɛdodze do no; dɛ mbrɛ EWURADZE hyɛɛ Moses no. 48Na asafohemfo a wɔhwɛ dɔm mpempem do no, nye apem apem do asafohemfo, nye ɔha ɔha do asafohemfo no, baa Moses nkyɛn: 49na wɔbɛsee no dɛ, Wo nkowaa yeebu akofo a wɔwɔ hɛn nsamu no ano, na hɛn mu nyimpa kor mpo annyew. 50Na yɛdze EWURADZE n’ayɛyɛdze aba, dza nyimpa biara enya no a, sika ndwindze, ananadze ntweaban, nye nsakɔnadze, nsɔwanonkaba, nsowamuadze, nye nkɔnmuadze, dɛ wɔmfa mpata mma hɛn akra wɔ EWURADZE enyim. 51Na Moses nye ɔsɔfo Eleazar gyee hɔn hɔ sika no, mekyerɛ edwindze no nyinara. 52Na ɔmado afɔr sika nyinara a wɔdze brɛ EWURADZE a ofi apem apem do asafohemfo, nye ɔha ɔha do asafohemfo hɔ no, ɔyɛ dwetɛbona mpemduesia ahaesuon eduonum. 53Na akofo no hɔn afom asadze dze, hɔnankasa na wɔfefae. 54Na Moses nye ɔsɔfo Eleazar gyee sika no wɔ apem apem nye ɔha ɔha do asafohemfo no hɔ, na wɔdze baa ehyiadzibuw no mu, dɛ ɔnyɛ Israelmba no nkaadze wɔ EWURADZE enyim.
Currently Selected:
Nkanee 31: MFANBRP
Highlight
Copy
Compare
Share
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.