Ndwuma 10
10
Peter na Kɔrnelius
1Na ɔbarimba bi wɔ Kaesarea a ne dzin dze Kornelius, ɔyɛ ɔhamupanyin wɔ asafokuw a wɔfrɛ no Italiafo dze no mu, 2nyimpa nyamesuronyi a ɔnye ne fifo nyina suro Nyankopɔn na ɔyɛ adɔyɛ pii ma nkorɔfo, na ɔyɛ nkotoserɛ asɔr ma Nyankopɔn daa. 3Na ohun n’enyido adze petee bɛyɛ ndɔnebiasa no mu dɛ Nyankopɔn bɔfoe baa ne nkyɛn na ɔbɛsee no dɛ, Kornelius. 4Na ɔhwɛɛ no hann no, na hu kaa no no, ɔsee dɛ, Owura, ebɛnadze a? Na ɔsee no dɛ, wo mpaabɔ nye w’adɔyɛ no aba sor abɛyɛ nkaa wɔ Nyankopɔn enyim. 5Na afei soma mbarimba ma wɔnkɔ Jopa nkehyia Simon a wɔfrɛ no Peter no: 6ɔsoɛ Simon a ɔyɛ nwomahyɛfo bi a ne fie wɔ mpoano no hɔ. 7Na bɔfo no a ɔkasaa kyerɛɛ no no kɔree no, ɔfrɛɛ no nkowaa beenu nye sordaanyi nyamesuronyi bi a ofi hɔn a wɔsom no daa no mu. 8Na ɔkaa nsɛm no nyina kyerɛɛ hɔn no, ɔsomaa hɔn wɔ Jopa.
9Na adze kyee no, ber a wɔnam kwan do rebɛn kurow no, Peter kɔr dan no etsifi kɔbɔɔ mpaa bɛyɛ ewiaber duebien no mu; 10na ɔkɔm dzee no, na ɔpɛɛ dɛ odzidzi: na wogu do reyɛ edziban ama no no, n’enyiwa wiaa no ma ɔkɔr tsebea fofor mu. 11Iyi mu na ohun dɛ sor ebue, na adze bi fir sor risian a ɔtse dɛ abradaa kɛse a wɔakyekyer no etwaanan, na worigyaa mu to famu: 12no mu na asaase mbowa a wotsia ntwɛrnan, nye hɔn a wɔweawea, nye wimu ntumbowa nyina bi wɔ. 13Na ndze bi baa no hɔ dɛ, Peter, soɛr: ku na dzi. 14Na Peter see dɛ, Dabida, Ewuradze, osiandɛ minndzii biribi a ɔyɛ ekyiwadze anaadɛ no ho nntsew da. 15Na ndze no baa no hɔ bio ne mprɛnu dɛ, Dza Nyankopɔn asan ho no, mma mmfrɛ no ekyiwadze. 16Na wɔyɛɛ yi mprɛnsa, na wɔfaa adze no kɔr sor bio.
17Na ber Peter rodwendwen enyido adze a ohunii no ho no, hwɛ, nna mbarimba a Kornelius somaa hɔn no ebisabisa Simon fie kwan ebegyinagyina abowano 18refrɛ, na woribisa dɛ Simon a wɔfrɛ no Peter soɛ hɔ anaa? 19Na Peter rodwendwen enyido adzehu no ho no, Sunsum no see no dɛ, Hwɛ, mbarimba baasa rohwehwɛ wo. 20Na soɛr sian nye hɔn nkɔ, mma ɔnnyɛ wo konsee, na mara na masoma hɔn. 21Na Peter sianee kɔr mbarimba no nkyɛn, na ɔsee dɛ, Emi nye nyia hom rohwehwɛ no no: ebɛnadze ntsi na hom bae? 22Na wɔsee dɛ, Ɔhamupanyin Kornelius, ɔbarimba tseneneenyi a osuro Nyankopɔn, na ɔwɔ dzin pa wɔ Jewfo man nyina mu no, na bɔfo krɔnkrɔn beyii kyerɛɛ no dɛ ombehyia wo nkɔ ne fie, ma onketsie w’anomu nsɛm. 23Na ɔfrɛɛ hɔn baa dan mu, na ɔsoom hɔn hɔho.
Na adze kyee no Peter nye hɔn fii hɔ kɔree, na enuanom a wofi Jopa no bi kegyaa no. 24Na adze kyee no wodur Kaesarea. Nna Kornelius rotweɔn hɔn, na ɔafrɛ n’ebusuafo nye n’anyɛnkofo a wɔbɛn aboa ano. 25Na ɔbaa dɛ Peter rehɛn fie no mu no, nna Kornelius kehyiaa no hwee n’ananadze kotoow no. 26Na Peter maa no do see no dɛ, Soɛr: na mo so meyɛ nyimpa. 27Na ɔnye no rekasa no, ɔkɔr fie no mu kohun nyimpa pii a woehyia; 28na ɔsee hɔn dɛ, Hom nyim mbrɛ Jewnyi nnyi ho kwan dɛ ɔdze noho kɔbɔ ɔnanaben ho, anaadɛ ɔkɔ ne nkyɛn; naaso Nyankopɔn akyerɛ me dɛ mma memmfrɛ nyimpa biara ekyiwadze anaadɛ no ho nntsew: 29ntsi na hom somae ma wobehyiaa me no, mennyiyi ano, na maba yi. Nkyii mibisa hom asɛm kor a ɔnam do ma hom behyiaa me. 30Na Kornelius see dɛ, Ndaanan nye yi, bɛyɛ dɔn yi ara mu, nna mowɔ me fie ha ara reyɛ ewiaber ndɔnebiasa asɔr no, na hwɛ, ɔbarimba bi begyinaa m’enyim hyɛ atar hyerɛnn, 31na ɔsee dɛ, Kornelius, wɔatse w’asɔr na wɔakaa w’adɔyɛ no wɔ Nyankopɔn enyim. 32Dɛm ntsi, soma ma wɔnkɔ Jopa nkehyia Simon a wɔsan so frɛ no Peter no: ɔsoɛ Simon nwomahyɛfo no fie wɔ mpoano. 33Dɛm ntsi ntsɛmara mosomae ma wɔbaa wo nkyɛn; na wo so ayɛ no yie dɛ aba. Ntsi nkyii hɛn nyina ehyia wɔ Nyankopɔn enyim ha dɛ yeribetsie dza Nyankopɔn ahyɛ wo nyina.
Peter N’asɛnka
34 #
Deut 10.17
Na Peter buee n’ano see dɛ: Nokwar ara mehu dɛ Nyankopɔn nnhwɛ nyimpa enyim: 35na mbom ɔman biara mu nyia osuro no na ɔyɛ ndzeyɛtsenenee no, ɔpɛ dɛ ɔgye no. 36Asɛm no a ɔsomae brɛɛ Israelmba ma ɔkaa asomdwee a ɔnam Jesus Kraest do ho asɛmpa no (ɔno nye nyimpa nyina wura) 37homara hom nyim asɛm a wɔdze tahyee Judea nyina a ɔhyɛɛ ase wɔ Galilii wɔ enuma a John kae no ekyir: 38mekyerɛ Jesus a ofi Nazarɛt, mbrɛ Nyankopɔn dze Sunsum Krɔnkrɔn nye ahoɔdzen seraa no, na okyinii yɛɛ yie, na ɔyɛɛ hɔn a abɔnsam dzi hɔn do tum no nyina edur, osiandɛ Nyankopɔn ka no ho. 39Na hɛn nye adasefo wɔ ndzɛmba a ɔyɛe wɔ Jewfo asaase do nye Jerusalɛm mu no ho; ɔno so na wɔsɛɛn no wɔ dua do kum no. 40Na Nyankopɔn nyaan no da a otsia ebiasa no mu, na oyii no kyerɛɛ petee, 41nnyɛ ɔman no nyina a, na dasefo a Nyankopɔn eyi ato hɔ dada no a, hɛn a ɔsoɛree fii ewufo mu no ekyir no yɛnye no dzidzii nomee no. 42Na ɔhyɛɛ hɛn dɛ yɛnka nkyerɛ ɔman no, na yendzi dase dɛ ɔno nye nyia Nyankopɔn ahyɛ no atseasefo nye ewufo ɔtsɛmbuafo. 43Ɔno na nkɔnhyɛfo nyina dzi no dase dɛ obiara a ɔbɛgye no edzi no ɔnam ne dzin mu benya bɔnfakyɛ.
Amanamamfo so Nya Sunsum Krɔnkrɔn no
44Na Peter da do reka nsɛm yi no, Sunsum Krɔnkrɔn no boguu hɔn a wɔtsee asɛm no nyina do. 45Na agyedzifo a wofi etwatsiafo no mu a wɔnye Peter bae no ho boow hɔn dɛ woehue Sunsum Krɔnkrɔn no akyɛdze no egu amanamamfo so do. 46Na wɔtsee dɛ wɔrekasa kasa fofor, na woriyi Nyankopɔn ayɛw. Nna Peter buae see dɛ, 47Aso obi botum esiw nsu ho kwan dɛ wonnkonuma yinom a woenya Sunsum Krɔnkrɔn no dɛ hɛnara so yi? 48Na ɔhyɛɛ dɛ wonnuma hɔn wɔ Jesus Kraest ne dzin mu. Nna wɔserɛɛ no dɛ ɔntsena hɔn nkyɛn nda kakra.
Currently Selected:
Ndwuma 10: MFANBRPC
Highlight
Share
Copy
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.
