Ndwuma 9
9
Saul ne Nsakyeree
(Ndwuma 22.6-16; 26.12-18)
1Na Saul da ho ara retseetsee na ɔrehyɛ Ewuradze n’esuafo no amen no, ɔkɔr ɔsɔfopanyin ne nkyɛn, 2na okebisaa no hɔ tum nwoma dɛ ɔdze rokɔ Damaskɔs akɔ nhyiamudan no mu, ama sɛ ohu binom a wɔwɔ Ɔkwan no mu a, mbarimba o, mbaa o, ɔaakyekyer hɔn dze hɔn aaba Jerusalɛm. 3Na ɔnam na ɔbɛɛn Damaskɔs no, awerɛfir mu ara kan fii sor bɛhyerɛnee twaa no ho hyiae; 4na ɔhwee daadze, na ɔtsee ndze bi a ɔsee no dɛ, Saul, Saul, ɔyɛ dɛn na eretseetsee me yi? 5Na ɔsee dɛ, Woana nye wo, Ewuradze? Na ɔsee dɛ, Emi nye Jesus a etaa no do no: 6na soɛr kɔ kurow no mu, na wɔbɛka dza ɔsɛ wo dɛ eyɛ akyerɛ wo. 7Na mbarimba a wɔnye no nam no totɔɔ mmum gyinagyinaa hɔ, osiandɛ wɔtsee ndze dze, naaso woennhu obiara. 8Na Saul soɛree fii famu, na n’enyi do tsetsewee no, oennhu obiara, na wosusuoo ne nsa dze no baa Damaskɔs. 9Na ndaansa nna onnhu adze, eso onndzidzi na ɔnnom.
10Nna osuanyi bi wɔ Damaskɔs a ne dzin dze Ananias; ɔno na Ewuradze kaa kyerɛɛ no wɔ enyido adzehu mu dɛ, Ananias. Na ɔsee dɛ, Emi nye yi, Ewuradze. 11Na Ewuradze see no dɛ, Soɛr kɔ ɔbrɔn a wɔfrɛ no Tɔɔtsen no mu, na kebisa wɔ Judas fie obi a ne dzin dze Saul a ofi Tarsus no n’ekyir kwan, na hwɛ, ɔrosɔr, 12na oehu n’enyiwa do dɛ ɔbarimba a ne dzin dze Ananias reba ne nkyɛn, na ɔdze ne nsa ato no do dɛ onhu adze. 13Na Ananias buaa dɛ, Ewuradze, matse ɔbarimba yi ho asɛm wɔ nyimpa pii anomu, bɔn dodow a ɔdze ayɛ w’ahotseweefo no wɔ Jerusalɛm; 14na ha yi so ɔwɔ tum wɔ asɔfompanyin no nsamu dɛ ɔnkyer hɔn a wɔbɔ wo dzin nyina. 15Na Ewuradze see no dɛ, Kɔ ara, na oyi nye nyia meyi no dɛ ɔnsoa me dzin nkɔ amanaman nye ahemfo, nye Israelmba enyim; 16na mebɛkyerɛ no amandze pii a otwar dɛ ohu wɔ me dzin ntsi. 17Na Ananias kɔree, na ɔkɛhɛɛn ofi no mu, na ɔdze ne nsa too no do see no dɛ, Onua Saul, Ewuradze Jesus a oyii noho kyerɛɛ wo wɔ ɔkwan a enam do reba no mu no, ɔasoma me dɛ hu adze, na Sunsum Krɔnkrɔn nhyɛ wo ma. 18Na ntsɛmara na biribi tse dɛ abon fii n’enyiwa do gui, na ohun adze; na ɔsoɛree ma wonumaa no; 19na ɔgyee edziban dzii ma no ho yɛɛ no dzen.
Saul Ka Asɛm no wɔ Damaskɔs
Na odzii esuafo a wɔwɔ Damaskɔs no nkyɛn nda kakra. 20Na ntsɛmara ɔkaa Jesus ho asɛm wɔ nhyiamudan no mu dɛ ɔno nye Nyankopɔn Ba. 21Na hɔn a wɔtsee nyina hɔn ho boow hɔn, na wɔsee dɛ, Ana nnyɛ oyi nye nyia ɔsɛɛ hɔn a wɔbɔ dzin yi wɔ Jerusalɛm no, ana nyɛ iyi ntsi na ɔbaa ha dɛ ɔrebɛfa hɔn nkyehoma mu akɛma asɔfompanyin no bi? 22Na mbom Saul n’ahoɔdzen yɛɛ dzen mbordo, na ne nkyerɛkyerɛ kofee dɛ Jesus nye Kraest no ara no, maa Jewfo a wɔwɔ Damaskɔs ho boow hɔn.
Saul Guan fi Jerusalɛm
23 #
2 Kor 11.32, 33 Na nda pii durii no Jewfo no paam ne tsir do dɛ woboku no: 24na Saul tsee hɔn apam no. Na wɔweɔɔn mbobow no ano ewia nye anadwe dɛ woboku no; 25na n’esuafo no faa no anadwe dze no too kɛntsɛn mu duaa fasu mu gyaagyaa no too famu.
Saul Kɔ Jerusalɛm
26Na odur Jerusalɛm no, ɔhwehwɛɛ dɛ ɔdze noho kɔbɔ esuafo no ho; naaso hɔn nyina suroo no, na wɔanngye enndzi dɛ ɔyɛ osuanyi. 27Na Barnabas faa no dze no kɔr asomafo no nkyɛn, na ɔkyerɛɛ mu kyerɛɛ hɔn mbrɛ ohun Ewuradze wɔ kwan no mu, na ɔkasaa kyerɛɛ no, na mbrɛ ɔnam Jesus dzin mu kaa asɛm ndam do wɔ Damaskɔs. 28Na ɔnye hɔn dzii ndɔfir wɔ Jerusalɛm, 29na ɔdze ndam kaa asɛm wɔ Ewuradze ne dzin mu; na ɔnye Helenifo no kasae na wɔgyee ekyingye; na wɔhwehwɛɛ dɛ woku no. 30Na enuanom no tsee no, wɔdze no kɔr Kaesarea, na wɔsomaa no fii hɔ kɔr Tarsus.
31Nna asɔrasɔr a wɔwɔ Judea nye Galilii nye Samaria nyina nyaa asomdwee, na wonyaa ntowdo na wɔnam Ewuradze no suro nye Sunsum Krɔnkrɔn no n’awerɛkyekyer do dɔree.
Peter Wɔ Lida na Jopa
32Na ɔbaa dɛ Peter rikyin hɔn nyina do no, ɔbaa ahotseweefo a wɔwɔ Lida no so nkyɛn. 33Na obohun nyimpa bi a ne dzin dze Aeneas a ɔyar mbubui a ɔada ne kɛtɛ do mfe awɔtwe wɔ hɔ. 34Na Peter see no dɛ, Aeneas, Jesus Kraest nsa wo yarba: soɛr, na sɛw wo kɛtɛ. Na ɔsoɛɛr ntsɛmara. 35Na hɔn a wɔwɔ Lida nye Saron nyina hun no, na wɔdanee baa Ewuradze hɔ.
36Nna osuanyi bi wɔ Jopa a ne dzin dze Tabita a ne nkyerɛase nye Dorkas#9.36 Edzin Tabita wɔ Aramaik kasa na Dorkas wɔ Griik kasa mu no ne nkyerɛase nye: Ɔwansan.: nna ndwuma pa nye adɔyɛ ahyɛ ɔbaa yi ma. 37Na ɔbaa dɛ nda no mu ɔyaree na owui; na wowiee no eguar no wɔdze no kɔtoo aborɔsan bi mu. 38Ɔnam dɛ Lida bɛn Jopa ntsi, esuafo no tsee dɛ Peter wɔ hɔ no, wɔsomaa mbarimba beenu wɔ no hɔ kɛserɛɛ no dɛ, Mma nnyɛ ekyim dɛ ebɛba hɛn nkyɛn. 39Na Peter soɛree nye hɔn kɔree. Na odurii no, wɔdze no kɔr aborɔsan no mu, na ekunafo no nyina begyinaa ne nkyɛn sui na wɔdze ntar nye atam a Dorkas nye hɔn wɔ hɔ no ɔyɛe no kyerɛɛ no. 40Na Peter yii hɔn nyina edzi, na obuu ntwɛr bɔɔ mpaa; na ɔdaan noho baa fun no do see dɛ, Tabita, soɛr. Na ɔtseew n’enyiwa, na ohun Peter no, ɔsoɛree tsenaa famu. 41Na Peter tseen ne nsa maa no ma osuoo mu soɛree, na ɔfrɛɛ ahotseweefo no nye ekunafo no dze no enyikan kyerɛɛ hɔn. 42Na wɔtsee no wɔ Jopa nyina, na dodowara gyee Ewuradze dzii. 43Na afei ɔtsenaa Jopa nda pii wɔ Simon nwomahyɛfo bi nkyɛn.
Currently Selected:
Ndwuma 9: MFANBRPC
Highlight
Share
Copy
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.
