Ai 2

Nyol pa Musa

1Man ng’atu acel m’i ot pa Lawi cidho, man egamu dhaku ma nya Lawi. 2#Tic 7:20; Ebr 11:23E dhakune gamu ie, man enyolo nyathin ma nico: e kan enene nia en e nyathin ma ber, ekane dwi adek. 3Man kan ecopo kane kendo ngo, egamu yei mi mutabi ire, man efuye kud ulobo man kud udok; e eketho nyathin i ie, man ekethe i usi dhu kulo. 4Man nyamin ucungo ku cen, kara eng’ei gin ma bitimbre i kume. 5Man nya Farao loro piny kara ejom i kulo; man nyir pare giwotho dhu kulo; e eneno yei i kind usi, man eoro bong’ pare game. 6Man eyabe, e eneno nyathin: man, nen, nyathinne ywak. E ngisi nege i kume, man ewacu kumae, Maeni en e nyathin moko mi Juebrania. 7Nyamin ulund uwacu ni nya Farao kumae, Iyenyo acidh alwong’ japidi iri i kind mon mi Juebrania, kara epid nyathinne iri? 8E nya Farao wacu ire kumae, Cidhi. E nyakune cidho man elwong’o min nyathinne. 9Man nya Farao wacu ire kumae, Ting’ nyathin maeni, man ipide ira, e abimio iri sukuliane. E dhakune ting’o nyathinne, man epide. 10#Tic 7:21Man nyathinne dongo, e ekele ba nya Farao, man edoko wode. Man elwong’o nyinge Musa, ewacu de kumae, Kum awodhe woko kud i pi.

Musa Ringo i Ng’om Midian

11 # Tic 7:23-28 # Ebr 11:24 Man etimbre i ceng’ maeca, kinde ma Musa dongo, nia ewok woko ba utumin, man eneno ter migi: e eneno Jamisiri befodo Jaebrania, ma ng’atu acel ma kind utumin. 12Man eneno kun ku kun, e kan eneno nia ng’atu moko mbe, e enego Jamisiri, man eyike i kwio. 13E ewok woko i ceng’ mir arionde, man, nen, Juebrania ario gibenyegri: man ewacu ni ng’atu m’ubetimo wadi rac kumae, Nedi igoyo wedu? 14Man ewacu kumae, Ng’a m’ukethi ni jaditmawijo man japoklembe i wiwa? iyenyo inega calu inego Jamisiri? Man lworo nego Musa, man ewacu kumae, Andha lembe maeni ng’eire. 15#Tic 7:29; Ebr 11:27Nie ka Farao winjo lembe maeni, eyenyo eneg Musa. Ento Musa ringo kud i wang’ Farao, man ebedo i ng’om Midian: e ebedo piny dhu kulo m’atong’a.

16Nwang’u jalam mi Midian ubedo ku nyige abiro: man gibino nitwomo pi, man gipong’o wer kara udul rombe pa weggi madhi. 17E jukwac gibino giriemogi cen; ento Musa cungo man ekonyogi, man eketho udul rombe migi madhu pi. 18Man ka gibino ba Reuel ma weggi, ewacu kumae, Tin wudwogo con nedi? 19E giwacu kumae, Jamisiri bodhowa kud i cing’ jukwac, mange ke etwomo pi iwa, man eketho udul rombe gimadhu. 20Man ewacu ni nyige kumae, Eni kani? nedi wuweko ng’atuca? wulwong’e, kara ecam cemo. 21E Musa yio ebed ku ng’atuca: man emio Zipora ma nyare ni Musa. 22Man enyolo nyathin ma nico, e elwong’o nyinge Gercom; kum ewacu kumae, Abedo ni umondo i ng’om mi juwirok.

23Man etimbre yo ng’ei nindo maeno dupa, nia ubimo mi Misiri tho: e nyithindho mir Israel gigamu cwinygi kum ng’eca, man giywak, man ywak migi idho malu ba Mungu ni kum ng’ecane. 24#Tha 15:13, 14E Mungu winjo cur migi, man Mungu poi kum lembariba pare ma giribo gikud Ibrahim, man kud Isak, man ku Yakobo. 25E Mungu neno nyithindho mir Israel, man Mungu ng’eyogi.

Currently Selected:

Ai 2: AB1970

Highlight

Copy