Ai 4

1E Musa loko lembe ewacu de kumae, Ento, nen, gibiyia ngo, kadok dwanda de gibiwinjo ngo; kum gibiwacu kumae, Yehova nyuthre iri ngo. 2E Yehova wacu irekumae, Ang’omaniicingi? Man ewacu kumae, Uluth. 3Man ewacu ire kumae, Bole i ng’om. E ebole i ng’om, man elokre edoko ni thwol; e Musa ringo i wang’e. 4Man Yehova wacu ni Musa kumae, Riei cingi, man imake ku yibe (e erieyo cinge, emake, man edoko ni uluth i cinge); 5kara giyi nia Yehova, Mungu pa kwarugi, Mungu pa Ibrahim, Mungu pa Isak man Mungu pa Yakobo, unyuthre iri. 6E Yehova wacu ire kendo kumae, Kawono roi cingi i kori. E eroyo cinge i kore: man kan ewodhe, nen, joi nang’u cinge, e tar calu pei. 7Man ewacu kumae, Roi cingi i kori kendo (E eroyo cinge i kore kendo; man kinde m’ewodhe woko kud i kore, nen, elokre kendo calu ring’kume mange.) 8Man ebitimbre, tek gibiyii ngo, kadok giranyutha ma kwong’a de gibiwinjo dwande ngo, nia gibiwinjo dwal mi giranyutha ma cen. 9Man ebitimbre, tek gibiyio cil giranyutha ario maeni ngo, kadok dwendi de gibiwinjo ngo, nia ibigamu kum pi m’i kulo, man ibikonje wi ng’om m’uthwo: man pi m’igamu kud i kulo bidoko ni rimo wi ng’om m’uthwo.

10E Musa wacu ni Yehova kumae, A, Rwoth, dwanda leng’ ungo, ugambre con, kadok yo ng’ei lembe m’iyero ni jatic peri; kum an a ming’ mi wec, man leba de pek. 11E Yehova wacu ire kumae, Ng’a m’utimo dhu dhanu? kadi ng’a ma dwoko jo ajuba, kadi udhing’, kadi mi nenopiny, kadi abinga? en e an, a Yehova ngo? 12Ka kumeno kawono cidhi, man abibedo ku dhogi, e abiponji ku gin m’ibiyero. 13Man ewacu kumae, A, Rwoth, akwei, or ku cing’ ng’atu m’ibioro. 14E ng’ecwiny pa Yehova opo kum Musa, man ewacu kumae, Haran ma Jalawi m’umeru nuti ngo? Ang’eyo nia ecopo yero dre. Man bende, nen, ebino rombo kudi: e kan eneni, anyong’a binego adundene. 15E ibiyero ire, man ibiketho lembe i dhoge: man abibedo ku dhogi, man ku dhoge, man abiponjowu ku gin ma wubitimo. 16Man ebibedo jayerlembe peri ni dhanu; e ebitimbre, nia ebibedo iri ni dhok, man ibibedo ire calu Mungu. 17E ibimaku uluth maeni i cingi, m’ibitimo ko giranyutha.

Musa Dwogo i Ng’om Misiri

18Man Musa cidho man edok ba Yethro ma jalkwaru mire, man ewacu ire kumae, Akwei, wek acidhi, man adok ba utumira ma ni i Misiri, man anen tek fodi gibedo kwo. E Yethro wacu ni Musa kumae, Ci ku kwiocwiny. 19E Yehova wacu ni Musa i Midian kumae, Cidhi, dok i Misiri; kum dhanu ceke m’uyenyo kwo peri githo. 20E Musa gamu dhaku pare ku wote, man ekethogi wi kana, man edok i ng’om Misiri: e Musa ting’o uluth pa Mungu i cinge. 21Man Yehova wacu ni Musa kumae, Kan idok i Misiri, nen nia itim musana ceke m’aketho i cingi i wang’ Farao: ento abidwoko cwinye nwang’, e ebiweko dhanu cidho ngo. 22Man ibiwacu ni Farao kumae, Yehova wacu kumae, Israel en e woda, ma kayu: 23#Ai 12:29man awacu iri kumae, Wek woda cidhi, kara etim ira; e icere ku cidho: nen, abinego wodi, ma kayu peri. 24E etimbre dhu yo i kagonjo, nia Yehova rombo kude, man eyenyo nege. 25Zipora lund ugamu kidi ma tek, man ethumo dend kum wode, man ebole the tiende; man ewacu kumae, Andha in i won ambadha mi rimo ira. 26Kum kumeno eweke e kende. Elund ewacu kumae, In i won ambadha mi rimo, ni kum yaa.

27Man Yehova wacu ni Harun kumae, Cidh i langa kara iromb ku Musa. E ecidho, man erombo kude wi got pa Mungu, e ecwio limbe. 28E Musa yero lembe pa Yehova m’eore kudo ceke ni Haran, ku giranyutha ceke m’eyero ko ire. 29E Musa giku Haran gicidho man gicoko judongo mi nyithindho mir Israel ceke karacelo: 30e Haran uyero lembe ceke ma Yehova yero ni Musa, man etimo giranyutha i wang’ dhanu. 31E dhanu giyio; e ka giwinjo nia Yehova liewo nyithindho mir Israel, man nia eneno masendi migi, gilund gikulo wigi e girwo.

Currently Selected:

Ai 4: AB1970

Highlight

Copy