Ai 5

Musa giku Harun i Wang’ Farao

1E yo ku ng’eye Musa giku Harun gicidho, man giwacu ni Farao kumae, Yehova, Mungu mir Israel, uwacu kumae, Wek dhanu para gicidhi, kara gikwir ira agba i langa. 2Man Farao wacu kumae, Yehova en e ng’a, ma nia awinj dwande awek ko Israel gicidhi? Ang’eyo Yehova ngo, mange ke abiweko Israel ungo ya gicidhi. 3E giwacu kumae, Mungu mi Juebrania rombo kudwa: wakwei, wek wacidh mi woth mi ceng’ adek i langa, man walam lam ni Yehova Mungu mwa, emaru podho i wiwa ku thong’om, kadi ku palamularu. 4Man ubimo mi Misiri wacu igi kumae, Wu Musa ku Harun, pirang’o wucero dhanu ku tic migi? wuci ba ter mu. 5Man Farao wacu kumae, Nen, kawono dhanu m’i ng’om gi dupa, e wukwio kumgi ni ter migi. 6E ceng’ nica Farao ng’olo ni juwitic ma ni i wi dhanu, ku jego migi, ewacu kumae, 7Wubimio lum kendo ngo ni dhanu ma gitim kudo biriki, calu ma naka wumio: wek gici gifudh lum gigi. 8Man wubiketho wel biriki igi calu ma naka gitimo: wubijwigo ticne moko ngo: kum gibedo umbe tic; ka kumeno giywak, giwacu kumae, Wek waci walam lam ni Mungu mwa. 9Mi tic ma tek ma sagu ni dhanune, kara gimuli i ie; man kud wuwek giketh wang’gi kum ndra.

10E juwitic mi dhanu gicidho, ku jego migi, man giyero ni dhanu giwacu kumae, Farao wacu kumae, Abimio lum iwu ngo. 11Wucidh giwu, wugam lum ka ma wucopo nwang’e i ie; kum tic mu moko mbe ma bijwik. 12Kum kumeno dhanu lal mba mba i ng’om ceke mi Misiri kara gicok soka ka lum. 13Man juwitic gidhulo, giwacu kumae, Wutim tic mu kakare, tic mu ma ku ba rupiny, calu ma lum nuti. 14Man jufodo jego mi nyithindho mir Israel ma juwitic pa Farao ketho i wigi, man giwacu kumae, Pirang’o wutimo tic mu kakare ngo nyaworo ku tin, ku timo biriki calu ma naka? 15E jego mi nyithindho mir Israel gilund gibino man giywak ba Farao, giwacu kumae, Pirang’o itimo kumeni kum jutic peri? 16Jumio lum moko ngo ni jutic peri, e giwacu iwa kumae, Wutim biriki: man, nen, jugoyo jutic peri; ento kier ni i dhanu peri ma dhe. 17Ento ewacu kumae, Tic umbe kudu, tic umbe kudu: ka kumeno wuwacu kumae, Wek wacidh walam lam ni Yehova. 18Ka kumeno wucidh kawono, man wutim tic; kum lum moko mbe ma jubimio iwu, ento wubitimo wel mi biriki asu. 19Man jego mi nyithindho mir Israel gineno nia gini i lem ma rac, ka juwacu kumae, Kud wujwig kum biriki mu moko, ma tic ma ceng’ ku ceng’. 20E girombo ku Musa giku Harun, ma gicungo i yo, ka giai ba Farao: 21e giwacu igi kumae, Yehova nenwu, man epok lembe; kum wuketho judagu ng’wicwa i wang’ Farao man i wang’ jutic pare, m’uketho palamularu i cing’gi kara unegwa.

Kwayukwac pa Musa

22E Musa dok ba Yehova, man ewacu kumae, Rwoth, pirang’o itimo dhanu maeni raci? nedi iora? 23Kum ugambre m’abino ba Farao niyero ku nyingi, etimo dhanu maeni rac; kadok in de ibodho dhanu peri ki ngo.

Currently Selected:

Ai 5: AB1970

Highlight

Copy