Thangambere 19

Nyoth mi Sodom ku Gomora

1Man malaika ario nica gibino Sodom uthieno; man Lot ubedo dhugang’ mi Sodom: e Lot unenogi, man eai malu nijologi; man erum arieba wang’e i ng’om; 2man ewacu kumae, Kawono nen, rwodhina, akwayuwu, wukier i ot pa jatic mu, man wubed ku diewor soro, e wulwok tiendwu, man wubiai malu pir, e wubicidho i yo mu. Man giwacu kumae, Ungo; ento wabibedo i gengi ku diewor soro. 3Man edhulogi hai; e gilokri gimondo i bang’e, man gimondo i ot pare; e etimo igi agba, man etedo kwen ma thobi mbe i ie, e gicamu. 4Ento ka fodi givuto piny ungo, dhanu mir adhurane, en e dhanu mi Sodom, gitieko ot gbur, awobi ku ju ma dongo, dhanu ceke m’uai kun ku kun; 5#Pok 19:22-24man gilwong’o Lot, man giwacu ire kumae, Dhanu ma gimondo i beng’i ku diewor maeni gini kani? wodhgi woko i bang’wa, kara wadubgi. 6Man Lot uwok woko i bang’gi i dhugola, man eciko dhugola yor i ng’eye. 7Man ewacu kumae, Akwayuwu, juwada, kud utim rac kumeno. 8Kawono nen, nyiga ario nuti ma fodung’eyo co ngo; akwayuwu, wuyi ira awodhgi woko iwu, man wutim i bang’gi calu ebedo ber i weng’wu: ento jumaeni re kud wutim gin moko i kumgi, kum gimondo the tipo mi ruvindu para. 9Man giwacu kumae, Cung cen. E giwacu kumae, Ng’atu maeni bino ni umondo, man ebidoko ni japoklembe: kawono wabitimo rac i beng’i, ma sagu ma kum jono. Man gitimo ng’atuca ma tek, en e Lot, man gicoro ceng’ni kara gitur dhugola. 10Ento dhanune giroyo cing’gi, man gidwoko Lot i bang’gi i ot, e giciko dhugola. 11#2 Ub 6:18Man gigoyo dhanu ma ni dhugola mi ot ku corwang’, ma thindho ku ma dongo, ketho giol gigi ku yenyo dhugola.

12Man dhanune giwacu ni Lot kumae, Ibedo ku dhanu moko keni m’umedo maeni? cog nyigi, man woti, ku nyigi, man ng’atu ma tek ibedo ko i adhura nini wodhgi woko kud i ka maeni: 13kum wabinyotho ka maeni, kum dwand woi migi doko dit i wang’ Yehova; man Yehova orowa kara wanyothe. 14E Lot uwok woko, man eweco ku cog nyige, m’ugamu nyige, man ewacu kumae, Wuai, wuwodhru woko ku ka maeni; kum Yehova binyotho adhura maeni. Ento ebedo calu ng’atu m’utimo lele i wang’ cog nyige. 15Man ka nyangu dongo, malaika lund udhulo Lot, giwacu kumae, Ai, gam dhaku peri, man nyigi ario ma ni keni, imaru nyothri i dubo mir adhura maeni. 16#2 Pet 2:7Ento egalu; man dhanune gimaku cinge, ku cing’ dhaku pare, ku cing’ nyige ario, kum kisa nego Yehova i kume: man giwodhe woko, gikethe yo woko ni adhura. 17Man etimbre, kinde ma giterogi cen, nia ewacu kumae, Dong’ ibodh kwo peri; kud inen ng’eii, kadi kud ibed i pambu ceke; ring ba got, imaru nyothri. 18Man Lot uwacu igi kumae, A, kumeno ngo, rwoth para: 19kawono nen, jatic peri nwang’u bero i weng’i, man idwoko mer mi bero peri dwong’, i bodh m’ibodho ko kwo para: man acopo ringo ba got ungo, gin ma rac umaru nwang’a, man amaru tho: 20kawono nen, adhura maeni ceng’ni m’aring i ie, man e nyathigi. A wek aring kuca (en e nyathigi ngo?), e ng’eyong’ec para bibedo kwo. 21Man ewacu ire kumae, Nen, ayio iri pi gin maeni bende, nia abinyotho adhura maeni ngo m’iweco pire. 22Tim pio, ring kuca; kum acopo timo gin moko ngo ma fok’itundo kuca ngo. Ka kumeno nying adhura maeca julwong’o Zoar.

23Ceng’ uwok wi ng’om kinde ma Lot umondo i Zoar. 24#Mt 10:15; 11:23, 24; Lk 10:12; 17:29; 2 Pet 2:6; Yud 1:7Yehova lund ukonjo mac ku muganga wi Sodom man wi Gomora kud i polo ku ba Yehova; 25man eng’ielo adhura maeca, ku pambu ceke, ku dhanu ceke m’ubedo i adhurane, ku gin m’utwi wi ng’om. 26#Lk 17:32Ento dhaku pare ma ni yor i ng’eye, ulokre uneno ng’eye, man edoko ni mbegi mi kadu. 27E Ibrahim uidho malu pii’ kugweno ba ka m’ecungo i ie i wang’ Yehova: 28man eneno yo ba Sodom ku Gomora, man yo ba ng’om ceke mi pambu, man eneno, man, nen, yiro mi ng’om uidho malu calu yiro mir uka.

29Man etimbre, kinde ma Mungu nyotho adhura mi pambu, nia Mungu poi pir Ibrahim, man eoro Lot woko kud i kind ng’ielne, kinde m’eng’ielo adhura ma Lot ubedo i ie.

Thekri mi Thekwaru mi Jumoabi ku Juamoni

30E Lot uidho malu kud i Zoar, man ebedo i got, ku nyige ario gikugi; kum elworo bedo i Zoar: e ebedo i odng’om, en ku nyige ario. 31Man ma kayu wacu ni ma nok kumae, Wegwa ti, man ng’atu moko mbe i ng’om ma nico ma bimondo i wiwa calu kura ng’om ceke: 32bin, dong’ waketh wegwa madh pigulok, man wabivuto kude, kara wagwok kodhi m’uai ba wegwa. 33E giketho weggi madhu pigulok i diewor maeca: man kayu mondo, evuto ku weggi de; man eng’eyo ngo kinde m’evuto, kadi kinde m’eai de. 34Man etimbre urwone, nia kayu wacu ni ma nok kumae, Nen, nyaworo avuto ku vwa: dong’ waketh emadh pigulok i diewor maeni bende; man imond, ivut kude de, kara wagwok kodhi m’uai ba wegwa. 35Man giketho weggi madhu pigulok i diewor maeca bende: man ma nok uai, man evuto kude; man eng’eyo ngo kinde m’evuto, kadi kinde m’eai. 36Kum kumeno nyig Lot ario gigamu igi ku weggi. 37Man ma kayu unyolo nyathin ma nico, man elwong’o nyinge Moab: en e weg Jumoabi cil tin. 38Man ma nok, enyolo nyathin ma nico bende, man elwong’o nyinge Ben-ami: en e weg nyithindho mir Amon cil tin.

Currently Selected:

Thangambere 19: AB1970

Highlight

Copy