Thangambere 20

Ibrahim gikud Abimelek

1Man Ibrahim uwotho ku keca yo ba ng’om ma yor ariwa ma piny, man ebedo i kind Kadec ku Cur; man ebedo ni umondo i Gerar. 2#Tha 12:13; 26:7Man Ibrahim uwacu pi Sara ma cege kumae, En e nyamira: man Abimelek m’ubimo mi Gerar eoro, man egamu Sara. 3Ento Mungu bino bang’ Abimelek ku wang’ lek ma ku diewor, man ewacu ire kumae, Nen, in i avu, kum dhaku m’igamu; kum en e ci nico. 4Nwang’u Abimelek ubino ceng’ni dhakune ngo: man ewacu kumae, Rwoth, ibinego cil thek ma pwe? 5Ewacu ira en ungo kumae, En e nyamira? man en, cil en gire ewacu kumae, En e umira: e atimo kumeni kud adundena ma cu man ku cinga ma leng’. 6Man Mungu wacu ire ku wang’ lek kumae, Eyo, ang’eyo nia itimo maeni kud adundeni ma cu, man an bende aceri ku dubo ira: kum kumeno ayio ngo imul kume. 7Ka kumeno kawono dwok ci ng’atuno; kum en e jabila, man ebirwo piri, e ibibedo kwo: man tek idwoke ngo, e ing’ei nia ibitho andha, in, man ceke ma peri.

8Man Abimelek uai pir kugweno, man elwong’o jutic pare ceke, e eyero gin maeni ceke i ithgi: man dhanu ma co lworo negogi dit. 9Abimelek ulund ulwong’o Ibrahim, man ewacu ire kumae, Itimo ang’o i bang’wa? man adubo ang’o iri, m’uketho ikelo dubo ma dit i wia man wi ker para? itimo gin ma maku ku jutim bang’a. 10Man Abimelek uwacu ni Ibrahim kumae, Ineno ang’o, m’uketho itimo gin maeni? 11Man Ibrahim uwacu kumae, Kum ia pido kumae, Andha lworo pa Mungu mbe i ka maeni; man gibinega pi dhaku para. 12Man kendo en e nyamira andha, en e nyar vwa, ento en e nyar ma ngo; man edoko dhaku para: 13man etimbre, kinde ma Mungu ketho atugo woth kud i ot pa vwa, nia awacu ire kumae, Maeni beroni m’ibinyutho ira: i ka ceke ma wabiwok i ie, wac pira kumae, En e umira. 14Man Abimelek ugamu rombe ku koni dhiang’, man jumiru ku bong’, man emiogi ni Ibrahim, man edwoko ire Sara, ma cege. 15E Abimelek uwacu kumae, Nen, ng’om para ni i weng’i: bed i ka m’ifoyo. 16Man ni Sara ewacu kumae, Nen, amio ng’et mola ma tar rubanga acel ni umeru: nen, en e jambum mi wang’ iri ni dhanu ceke ma ni kudi; man igamu bedopwe peri i wang’ dhanu ceke. 17E Ibrahim urwo ni Mungu: man Mungu cangu Abimelek, ku dhaku pare, man bong’ pare; man ginyolo nyithindho. 18Kum nwang’u Yehova twio ic ceke m’i ot pa Abimelek, pi Sara, ma ci Ibrahim.

Currently Selected:

Thangambere 20: AB1970

Highlight

Copy