Thangambere 21

Nyol pa Isak

1Man Yehova liewo Sara calu ewacu, man Yehova timo ni Sara calu eyero. 2#Ebr 11:11E Sara gamu ie, man enyolo nyathin ma nico ni Ibrahim i tio pare, i nindo ma jung’olo ma Mungu yero pire ire. 3Man Ibrahim ulwong’o nying’ nyathin pare ma nico ma junyolo ire, ma Sara nyolo ire, Isak. 4#Tha 17:12; Tic 7:8Man Ibrahim utimo yaa i kum wode ma Isak nwang’u ceng’ pare abora, calu Mungu ng’olo ire. 5Man Ibrahim rundi pare dak, kinde ma junyolo wode ma Isak ire. 6Man Sara wacu kumae, Mungu ketho ang’iero; dhanu ceke kubang’gi kubang’gi m’uwinjo wabing’iero wakugi. 7Man ewacu kumae, Ng’a ma copo yero ni Ibrahim, nia Sara biketho nyithindho dhothi? kum anyolo ire nyathin ma nico i tio pare.

Juriemo Hagar giku Icmael

8E nyathin udongo, man ekwiro cak: man Ibrahim utimo agba ma dit i ceng’ ma Isak ukwiro ie cak. 9Man Sara neno wod Hagar ma Nyamisiri, m’enyolo ni Ibrahim, ubesasu lele. 10#Gal 4:29, 30Kum kumeno ewacu ni Ibrahim kumae, Riem bong’ maeni woko ku wode: kum wod bong’ maeni gibibedo jucampacu giku woda ngo, en e kud Isak. 11Man lembene nyayu can dit i Ibrahim kum wode. 12#Rum 9:7; Ebr 11:18Man Mungu wacu ni Ibrahim kumae, Lembe pa nyathin, ku pa bong’ peri kud ubed rac i weng’i; gin ceke ma Sara yero pire iri, winj dwande; kum kodhini bilwongre ni kum Isak. 13Man abitimo thek bende ni kum wod bong’ maeni, kum en e kodhini. 14Man Ibrahim uai malu pir kugweno, e egamu kwen ku cupa mi pi, man emie ni Hagar, ekethe wi goke de man emio nyathin ire, e eketho ecidho: man eai, man ewotho i yamba mi Ber-ceba. 15E pi thum kud i cupa, man epielo nyathinne the yen moko m’udinyo. 16Man ecidho, ebedo piny de cen i wang’e, ro ku ma jukilo ie athero: kum ewacu kumae, Kud anen wi tho pa nyathin. Man ebedo yo ku m’eni i ie, man eting’o dwande malu, e eywak. 17E Mungu winjo dwand nyathin; man malaika pa Mungu lwong’o Hagar kud i polo, man ewacu ire kumae, Gin moko timi, Hagar? lworo kud unegi; kum Mungu winjo dwand nyathinne ku ka m’eni i ie. 18Ai malu, ting’ nyathin, man imake i cingi; kum abidwoke ni thek ma dit. 19E Mungu yabu wang’e, man eneno kulo mi pi; e ecidho, man epong’o cupa ku pi, man emio ni nyathinne madhi. 20E Mungu ni karacelo ku nyathinne, man edongo; e ebedo i yamba, man kan edongo edoko jakilatum. 21Man ebedo i yamba mi Paran: man min ugamu ire dhaku i ng’om Misiri.

Lembariba i kind Ibrahim gikud Abimelek

22 # Tha 26:26 Man etimbre i nindo maeca, nia Abimelek ku Fikol ma jego mir udul pare yero ni Ibrahim, ewacu kumae, Mungu ni kudi i gin ceke m’itimo: 23ka kumeno kawono kwong’ ira keni ku Mungu nia ibitimo ira abombi ngo, kadi ku woda, kadi ku wod woda: ento calku bero m’atimo i beng’i, ibitimo ira, man ba ng’om m’ibedo ni umondo i ie. 24Man Ibrahim uwacu kumae, Abikwong’o. 25Man Ibrahim ujuko Abimelek kum kulo mi pi m’atong’a, ma jutic pa Abimelek umayu ku rop. 26Man Abimelek uwacu kumae, Ang’eyo ng’atu m’utimo gin maeni ngo: kadok in de iyero ira ngo, kadok pire de fodawinjo ngo, ndhu tin. 27Man Ibrahim ugamu rombe ku koni dhiang’, man emiogi ni Abimelek; man gin ario gitimo lembariba. 28Man Ibrahim ukoyo vong’ rombe abiro ku i udul rombe ekethogi cen. 29Man Abimelek uwacu ni Ibrahim kumae, Thelembe mi vong’ rombe abiro m’iketho cen maeni ang’o? 30Man ewacu kumae, Vong’ rombe abiro maeni ibigamu kud i cinga, kara ebed ni lembanyutha ira, nia atong’o kulo m’atong’a maeni. 31Kum kumeno elwong’o kakeca Ber-ceba; kum gin ario gikwong’o kwong’ keca. 32Kum kumeno gitimo lembariba i Ber-ceba: man Abimelek uai malu, ku Fikol ma jego mir udul pare, man gidok i ng’om mi Jufilisti. 33Man Ibrahim upidho yen i Ber-ceba, man elwong’o nying’ Yehova keca, Mungu mi Nja. 34Man Ibrahim ubedo ni umondo i ng’om mi Jufilisti ceng’ dupa.

Currently Selected:

Thangambere 21: AB1970

Highlight

Copy