Thangambere 42

Utumin Yusuf Gibino i Misiri Nisaku Cam

1Nie Yakobo neno nia cam ni i Misiri, man Yakobo wacu ni wote kumae, Nedi wuneno weng’wu? 2#Tic 7:12Man ewacu kumae, Nen, awinjo nia cam ni i Misiri: wulor piny kuca, man wung’ieu iwa ku kuca; kara wabed kwo, man ku watho. 3E utumin Yusuf apar giloro piny kara ging’ieu cam ku i Misiri. 4Ento Benyamin, m’umin Yusuf, Yakobo ore ngo ku utumin; kum ewacu kumae, Kuno nyo gin ma rac bitimbre i kume. 5Man wot Israel gibino kara ging’ieu i kind ju m’ubino: kum ndru ni i ng’om Kanan. 6Man Yusuf en e jabim wi ng’om; en e ng’atu ma ng’iewo ni dhanu ceke mi ng’om. Man utumin Yusuf gibino, e girum piny gigi ire arieba wang’gi i ng’om. 7E Yusuf uneno utumin mire, man eng’eyogi, ento epale igi gire ni jawirok, man eweco kugi ma tek; man ewacu igi kumae, Wuai kani? E giwacu kumae, Kud i ng’om Kanan kara wang’-ieu cam. 8E Yusuf ung’eyo utumin mire, ento ging’eye ngo. 9#Tha 37:5-10Man Yusuf upoi kum lek m’eleko pigi man ewacu igi kumae, Wun wu juganda; wubino kara wunen muneru mi ng’om. 10E giwacu ire kumae, Ungo, rwoth para, ento jutic peri gibino kara ging’ieu cam. 11Wan ceke wa wot ng’atu acel; wan wa dhanu mandha, jutic peri gi juganda ngo. 12E ewacu igi kumae, Ungo, ento wubino kara wunen muneru mi ng’om. 13Man giwacu kumae, Wan wa jutic peri wa utumego apar wi ario, wa wot ng’atu acel i ng’om Kanan; man, nen, ma cogo ni ba wegwa i ceng’ maeni, man acel umbe. 14E Yusuf uwacu igi kumae, Eno m’uketho ayero iwu awacu kumae, Wun wu julib; 15jubimulo iwu ku maeni: ku kwo pa Farao wubiai keni ngo, tek umegwu ma nok kubino keni ngo. 16Wuor ng’atu acel m’i kindwu, man wek ekel umegwu, man wun wubibedo atwia, kara jumul lembe mu, tek lemandha ni i iwu: tek kumeno ngo ku ba kwo pa Farao wun wu juganda andha. 17Man eketho gi ceke i ka ma jukuro mi ceng’ adek.

18Man Yusuf uwacu igi i ceng’ mir adege kumae, Wutim maeni, man wubed kwo; kum alworo Mungu: 19tek wu dhanu mandha, wek ng’atu acel ma kind utumegwu bed atwia i otkol; ento wucidhi, wuyei cam pi ndru ma ni i udiwu: 20man wukel utumegwu ma cogo i bang’a; kum kumeno lembe mu bibedo andha, man wubitho ngo. Man gitimo kumeca. 21E giwecri gigi kumae, Dubo ni i wiwa andha kum umegwa, kum waneno can mi ng’eyong’ec pare, kinde m’ekwayuwa, e wakwero winjo; ka kumeno can maeni wok i wiwa. 22#Tha 37:21, 22Man Ruben uloko lembe igi, ewacu kumae, Ayero iwu ngo, awacu kumae, Kud wudub kum nyathinne; e wukwero winjo? ka kumeno bende, nen, julwong’o rimbe. 23Man ging’eyo ngo nia Yusuf uwinjogi; kum jaloklembe ni i kindgi. 24Man elokre gire cen kud i bang’gi, e eywak; man edwogo i bang’gi, e eweco i bang’gi, man egamu Simeon kud i kindgi, e etwie i wang’gi.

Utumin Yusuf Gidok i Kanan

25Yusuf ulund ung’olo ya jupong’ jamni migi ku cam, man judwok sente migi kubang’gi kubang’gi ng’atuman i usau pare, man nia jumi igi cemo mi yo: e jutimo igi kumeca.

26E giketho cam migi wi kana migi, man giai keca. 27Man ka ng’atu acel m’i kindgi yabu dhu usau pare kara emi cemo ni kana pare i kagonjo, eneno sente pare; man, nen, eni i dhu usau pare. 28Man ewacu ni utumin mire kumae, Judwoko sente para; man, nen, eni i usau para: e cwinygi ng’abre, man gilokri man ba wadi man ba wadi, ma kumgi bemiel, giwacu kumae, Maeni ang’o ma Mungu timo i bang’wa? 29E gibino ba Yakobo ma weggi i ng’om Kanan, man giyero ire gin ceke m’utimbre i kumgi, giwacu kumae, 30Ng’atu, ma rwoth mi ng’ombuca, eweco ma tek i bang’wa, man ewacu nia wa juganda mi ng’om. 31E wawacu ire kumae, Wan wa dhanu mandha; wan wa juganda ngo: 32wan wan umego apar wi ario, ma wot wegwa; acel umbe, man ma cogo ni karacelo ku wegwa tin i ng’om Kanan. 33Man ng’atuno, ma rwoth mi ng’ombuca, ewacu iwa kumae, Abing’eyo ku maeni nia wu dhanu mandha: wek umegwu acel i bang’a, man wuter cam pi ndru ma ni i udiwu, e wucidh i yo mu; 34e wukel umegwu ma cogo i bang’a: e abilund ng’eyo nia wu juganda ngo, ento nia wu dhanu mandha: kum kumeno abigonyo umegwu, man wubiloko kuloka i ng’om.

35Man etimbre kinde ma gikonjo usau migi, nia, nen, ku ba dhanu ceke ng’atuman sente pare m’atwia ni i usau pare: e kinde ma gin ku weggi gineno sente migi m’atwia, lworo negogi. 36E Yakobo ma weggi wacu igi kumae, Wukabu nyithindho para kud i bang’a: Yusuf umbe, man Simeon de mbe, e wubikabu Benyamin woko: gin maeni ceke ni i wia. 37E Ruben uyero ni won, ewacu kumae, Neg wota ario tek adwoke i beng’i ngo: mie i cinga, man abidwoke i cingi kendo. 38Man ewacu kumae, Woda biloro piny karacelo kudu ngo; kum umin utho, man edong’ e kende: tek gin ma rac utimbre i kume i yo ma wucidho i ie, wubilund tero lwar para ku can i liel.

Currently Selected:

Thangambere 42: AB1970

Highlight

Copy