Thangambere 43

Utumin Yusuf Gidok i Misiri ku Benyamin

1Man ndruje dit i ng’om. 2Man etimbre, kinde ma gicamu cam ma gigamu kud i ng’om Misiri, weggi wacu igi kumae, Wucidh kendo, wung’ieu cam ma nyanok iwa. 3E Yuda yero ire, ewacu kumae, Ng’atuca cimowa ma tek, ewacu kumae, Wubineno wang’a ngo, tek umegwu bedo kudu ngo. 4Tek iyio oro umegwa kudwa, wabiloro piny man wabing’iewo iri cam: 5ento tek ibiore ngo, wabiloro piny ungo; kum ng’atuca wacu iwa kumae, Wubineno wang’a ngo, tek umegwu bedo kudu ngo. 6Man Israel uwacu kumae, Wutimo rac kumeni i bang’a nedi, ma wuyero ko ni ng’atuca nia umegwu nuti e? 7Man giwacu kumae, Ng’atuca penjo piwa ngili ngili, man pi wat mwa, ewacu kumae, Wegwu fodubedo kwo? wubedo kud umegwu mange? man wayero ire calku penji mi lembe maeni: wacopo ng’eyo nenedi nia ebiwacu kumae, Wukel umegwu pinyi? 8Man Yuda wacu ni Israel ma won kumae, Or nyathinne kuda, e wabiai wabicidho; kara wabed kwo, man ku watho, wan, wakudu, man nyithindho mwa ma thindho bende. 9Lembe pare bibedo i wia; ibilwong’e i cinga: tek adwoke i beng’i ngo, man akethe i weng’i ngo, e lembene bibedo i wia mi nja: 10kum tek wagalu ngo, nwang’u kawono wadwogo mir arionde andha. 11E weggi ma Israel uwacu igi kumae, Tek ebedo kumeno kawono, wutim kumeni: wugam nying’ piny ma cu mi ng’om maeni i jamni mu, man wulor piny ku giramia ni ng’atuca, mo moko ma liu, ku kic moko nyanok, yath ma jwa jwa kud udogyen, nying yen ma tek, man akpalakpala; 12man wucidh ku sente wang’ ario i cingwu; ku sente ma judwoko i dhu usau mu wutere kendo i cingwu; kuno nyo wigi wil awila: 13wugam umegwu bende, man wuai, wucidh kendo ba ng’atuca: 14man Mungu ma Jategokpo emi kisa iwu i wang’ ng’atuca, kara egony iwu umegwu mucelo man Benyamin. Man tek jukabu nyithindho para kud i bang’a, nwang’u junega. 15E dhanune gigamu giramia maeno, man gigamu sente mir arionde i cing’gi, ku Benyamin; man giai malu, e giloro piny i Misiri, man gicungo i wang’ Yusuf.

16E kinde ma Yusuf uneno Benyamin ni karacelo kugi, ewacu ni jagwokot pare kumae, Kel dhanune i ot, man ithum ring’o, iyik cemo de; kum wabicamu waku dhanunegi dieceng’. 17E ng’atuca timo calu Yusuf uwacu; e ng’atuca kelo dhanu maeno i ot pa Yusuf. 18E lworo nego dhanunegi, kum juterogi i ot pa Yusuf; man giwacu kumae, Jukelowa i ot kum sente ma judwoko i usau mwa ku kwong’a; kara enwang’ lembe i kumwa, man epodh i wiwa, man egamwa ni ng’eca, ku kana mwa. 19E gibino ceng’ni jagwokot pa Yusuf, man giyero ire ku i dhugola mi ot, 20man giwacu kumae, A, rwoth para, ku kwong’a waloro piny andha kara wang’ieu cam: 21man etimbre, kinde ma wawok i kagonjo, nia wayabu usau mwa, man, nen, sente mi dhanu kubang’gi kubang’gi ng’atuman pare ni i dhu usau pare, sente mwa ni bo: man wakele kendo i cingwa. 22Man wakelo sente mange de waloro kudo piny i cingwa kara wang’ieu kudo cam: wang’eyo ng’atu m’uketho sente i usau mwa ngo. 23Man ewacu kumae, Kwiocwiny iwu, lworo kud unegwu: Mungu mu, man Mungu pa wegwu, emio iwu piny i usau mu: abedo ku sente mu. Man ekelo Simeon woko i bang’gi. 24Man ng’atuca kelo dhanunegi i ot pa Yusuf, e emio igi pi, man gilwoko tiendgi; man emio cemo ni kana migi. 25E giyiko giramia kum bino pa Yusuf ma dieceng’: kum giwinjo nia gibicamu kwen keca.

26E kinde ma Yusuf udwogo pacu, gikelo ire giramia ma ni i cing’gi i ot, man girum gigi ire i ng’om. 27Man epenjogi pi bedo migi, ewacu de kumae, Wegwu kume leng’i, ng’atu m’uti ma wuweco pire? Fodi ebedo kwo? 28E giwacu kumae, Jatic peri ma wegwa kume leng’, fodi ebedo kwo. Man gikulo wigi, e girwo. 29Man eting’o wang’e malu, e eneno Benyamin m’umin, nyathin pa min, man ewacu kumae, Maeno umegwu ma cogo, ma wuweco pire ira? Man ewacu kumae, Mungu nyuth bero iri, woda. 30E Yusuf utimo pio; kum ava umin unego adundene: man eyenyo ka ywak; e emondo i kusika pare, man eywak keca. 31E elogo wang’e, man ewok woko; e etwio cwinye gire, man ewacu kumae, Keth cam. 32Man giketho ire ka kende, igi de ka kendgi, man mi Misiri ma gicamu gikugi, ka kendgi: kum Jumisiri gicopo camu kwen ku Juebrania ngo; kum maeno bedo ni ginmajudagu ni Jumisiri. 33E gibedo i wang’e, ma kayu calku dit mi nyol pare, man ma cogo calkud aradu pare: man dhanune igi wang’ lii i kindgi gigi. 34Man eoro cam igi kud i bang’e: ento cam pa Benyamin usagu migi wang’ abic. E gimadhu, man anyong’a negogi gikugi.

Currently Selected:

Thangambere 43: AB1970

Highlight

Copy