Yohana 12

Mariamu Konjo Mo wi Yesu i Bethania

(Mt 26:6-13; Mk 14:3-9)

1Ka kumeno ka ceng’ mi kadhukuwijo fodi udong’ abusiel Yesu bino Bethania, ka ma Lazaro ni ie, en e ng’atu ma Yesu ting’e ku kind ju m’utho. 2Kum kumeno gitedo ire cam mir uthieno keca: Marsa de poko cam; ento Lazaro en e ng’atu acel ma kind ju ma gibedo dhu cam gikugi. 3#Lk 7:37, 38Mariamu lund uting’o mo ma liu ma ng’wice ng’ar, ma pire tek, ma romo ng’et mukero acel, ewiro ko tiend Yesu, eyweyo tiende de ku yukwie: e ng’wic mone romo ot ceke. 4Ento jalub acel, ma Yuda Iskariote, ma ng’atu ma bicibe, uwacu kumae, 5Nedi jukwero loko mo maeni ku denarii dak adeki, jumi de ni jucani? 6Eyero maeni ngo, kum can m’unege kum jucan; ento kum en e jakwo, usau de ni i bang’e man ewodho gin ma juroyo i ie. 7Ka kumeno Yesu wacu kumae, Wuweke, kum ekane kum ceng’ kuny para. 8#Poi 15:11Kum jucan wubedo kugi thiri thiri; an re wabedo kudu thiri thiri ngo.

Juporo Lembe kum Lazaro

9Ka kumeno dhanu ma sai m’i kind Juyahudi giwinjo nia Yesu ni keca: e gibino, pi Yesu kende ngo ento kara ginen Lazaro bende, m’eting’e ku kind ju m’utho. 10Ento julam ma dongo giporo lembe kara gineg Lazaro bende; 11kum dhanu dupa mi Juyahudi giwekogi, giyio ni Yesu de ni kume.

Mondo pa Yesu i Yerusalem ku Yung

(Mt 21:1-11; Mk 11:1-11; Lk 19:28-40)

12Urwone udul dhanu ma dit ma gibino i agba, ka giwinjo nia Yesu bebino Yerusalem, 13#Zab 118:25, 26gimaku jang thith, gicirombo ko kude man gikok kumae, Hosana: Mugisa ni ng’atu m’ubebino ku nying Rwoth, en e Ubimo mir Israel. 14Yesu de, kan enwang’u nyathi kana, ebedo i wie; calu egore kumae, 15#Zek 9:9Lworo kud unegi, nya Sayuni: nen, Ubimo peri bebino, ebedo wi nyathi kana. 16Julub ular ung’eyo gin maeni ngo: ento ka Yesu daru doko dwong’, e gilund gipoi nia gin maeni yang’ ugore pire, man nia gitimo gin maeni ire. 17Ka kumeno udul dhanu ma ginuti gikugi kinde m’elwong’o Lazaro kud i odliel, m’eting’e de ku kind ju m’utho, ginyutho pire. 18Kum lembe nini udul dhanu bende gicidho nirombo kude, kum giwinjo nia etimo giranyutha maeni. 19Ka kumeno Jufarisayo giwecri kumae, Wunen gin moko ma wutimo mbe; nen, ng’om ubelubo ng’eye.

Juyunani Yenyo Ginen Yesu

20Nwang’u Juyunani moko ni kind ju m’ucirwo malu i agba: 21ka kumeno joni gibino ba Filipo, ma en e ng’atu ma Bethsaida mi Galilaya, man gipenje, giwacu kumae, Rwoth, wayenyo wanen Yesu. 22Filipo bino eyero de ni Andrea: Andrea giku Filipo gibino, giyero de ni Yesu. 23Yesu loko lembe igi, ewacu kumae, Saa wok, ma jubiyungo ie Wod dhanu. 24Andhandha, ayero iwu, Tek nying’ nganu kupodho i ng’om ungo etho de ngo, ebedo e kende; ento tek etho, ecego nyinge dupa. 25#Mt 10:39; 16:25; Mk 8:35; Lk 9:24; 17:33Ng’atu m’umaru kwo pare erwinye; man ng’atu m’udagu kwo pare i ng’ombuni ebigwoke ni kwo ma rondo ku rondo. 26Tek ng’atu moko timo ira, wek elub ng’eya; man ka m’ani ie, jatic para bende bibedo keca: tek ng’atu moko timo ira, Vwa biyunge.

Jubikoting’o Wod Dhanu Malu Be

27Kawono cwinya ng’abre; e abiwacu ang’o? Vwa, lara ni saa maeni. Ento kum lembe nini abino ni saa maeni. 28Vwa, yung nyingi. E dwal ulund ubino uai i polo kumae, Adaru yunge, man abiyunge kendo. 29Ka kumeno udul dhanu, m’ucungo ceng’ni, giwinjo de, giwacu nia polo mor: jumange wacu kumae, Malaika weco kude en. 30Yesu dwoko lembe ewacu kumae, Dwal maeni wok pira ngo, endre piwu. 31Kawono pokolembe mi ng’ombuni nuti: kawono jubibayu jadit mi ng’ombuni woko. 32Man an, tek juting’a malu kud i ng’om, abipeyo dhanu ceke i bang’a. 33Ento maeni eyero m’enyutho ko maram ebitho ko. 34#Zab 110:4; Isa 9:7; Eze 37:25; Dan 7:14Ka kumeno udul dhanu loko lembe ire kumae, Wawinjo i cik nia Kristu bedo rondo ku rondo: ka in iwacu nenedi kumae, Jubikoting’o Wod dhanu malu be? Wod dhanune en e ng’a? 35Ka kumeno Yesu wacu igi kumae, Fodi der ni i kindwu nindo ma nok. Wuwoth ma fodi der ni i beng’wu, kara mudho kud urubwu: man ng’atu ma wotho i mudho ng’eyo ka m’ecidho i ie ngo. 36Ma fodi der ni i beng’wu, wuyi ni der, kara wudok wot der.

Yioyic M’umbe mi Juyahudi

Yesu yero gin maeni, man eai ecidh epale igi. 37Ento kadok edaru timo giranyutha dupa kumeni i wang’gi, ere giyio ire ngo: 38#Isa 53:1kara lembe ma Isaya ma jabila yero utimbre kakare kumae,

Rwoth, ng’a m’uyio rwongwa?

Bot Rwoth de nyuthre ni ng’a?

39Kum lembe maeni gicopo yio ngo, kum Isaya wacu kendo kumae, 40#Isa 6:10Ecido wang’gi, edwoko adundegi nwang’; Kara ku ginen ku wang’gi, ku ging’ei kud adundegi, Ku gilokri de, an de kud acanggi. 41Isaya wacu gin maeni kum eneno dwong’ pare; man eyero pire. 42Ento cil kind jubim ma dongo bende dupa giyio ire; ento gituce ngo kum Jufarisayo, gimaru wodhogi kud i kacokri: 43kum gimaru dwong’ mi dhanu ma sagu dwong’ pa Mungu.

Lem ma Yesu Yero Bipoko Lembe

44Yesu kok akoka ewacu kumae, Ng’atu m’uyio ira, meca eyio ira ngo, ento ni ng’atu m’uora. 45Ng’atu m’ubenena, meca ebeneno ng’atu m’uora. 46Abino i ng’om ni der, kara ng’atu ma tek uyio ira kud ebed i mudho. 47Man tek ng’atu moko winjo lembe para, eworogi de ngo, apoko lembe pare ngo: kum abino nipoko lembe mi ng’om ungo, ento kara alar ng’om. 48Ng’atu m’ukwera, man ejolo lem para ngo, gin acel ni i bang’e m’upoko lembe pare: lembe m’ayero, lembene bipoko lembe pare i kajikceng’. 49Kum ayero gira ngo; ento Wego m’uora, emio ira lembang’ola, m’ayer, ku m’awec de. 50Man ang’eyo nia lembang’ola pare en e kwo ma rondo ku rondo; ka kumeno gin m’ayero, ayero kumeno calu Wego wacu ira.

Yesu Lwoko Tiend Julubne

Currently Selected:

Yohana 12: AB1970

Highlight

Copy