Yohana 13

1Nwang’u kan agba mi kadhukuwijo fokutundo ngo, Yesu m’ung’eyo nia saa pare tundo m’ebiai ko i ng’ombuni ecidho ba Wego, m’edaru maru pare ma dhe ma gini i ng’om, emarugi cil i kajikne. 2Man i kinde mi cam mir uthieno, ma nwang’u wonabali daru ketho lembe i adunde Yuda Iskariote, ma wod Simon, nicibe, 3e Yesu, m’eng’eyo nia Wego mio gin ceke i cinge nia eai ba Mungu, ebecidho de ba Mungu, 4eai malu ku dhu cam mir uthieno, eketho kendi pare cen; man egamu bongu mi logo, etwio i piere. 5Elund ekonjo pi i alibi, man emaku lwoko tiend julubne, eyweyogi de ku bongu logo m’etwio i piere. 6Elund ebino ba Simon Petro; Ewacu ire kumae, Rwoth, ilwoko tienda? 7Yesu dwoko lembe ewacu ire kumae, Gin m’atimo ing’eyo ngo kawono; ento ibing’eyo macen. 8Petro wacu ire kumae, Ibilwoko tienda ki ngo. Yesu loko lembe ire kumae, Tek alwoki ngo, nwang’u maka peri mbe i bang’a. 9Simon Petro wacu ire kumae, Rwoth, tienda kende ngo, ento cinga ku wia bende. 10Yesu wacu ire kumae, Ng’atu m’ujom can logo nege ngo ento mi lwoko tiende kende, endre e leng’ ceke; wun de wu leng’, ento ceke re ngo. 11Kum eng’eyo ng’atu ma bicibe; kum kumeno ewacu kumae, Wun ceke wu leng’ ungo.

12 # Lk 22:27 Kum kumeno kan edaru lwoko tiendgi, egamu kendi pare de, man ebedo piny kendo, ewacu igi kumae, Wung’eyo gin m’atimo iwu? 13Wulwong’a Japonji, man Rwoth: e wuyero dre; kum an a kumeno. 14Kumeno tek an, m’a Rwoth man Japonji, alwoko tiendwu, maku wun bende wulwok tiendwu man pa wadi man pa wadi. 15Kum amio iwu por, kara wun bende wutim calu atimo i beng’wu. 16#Mt 10:24; Lk 6:40; Yoh 15:20Andhandha, awacu iwu kumae, Jamiru sagu jadit pare ngo; kadok jakwenda de sagu ng’atu m’uore ngo. 17Tek wung’eyo gin maeni, mugisa iwu tek wutimogi. 18#Zab 41:9Ayero piwu ceke ngo; ang’eyo ju m’alwong’o: ento kara lembagora pa Mungu timbre kakare kumae, Ng’atu m’ucamu kwen para eting’o ufunytiende i kuma. 19Ugambre kawono ayero iwu ma foketimbre ngo, kara, kan etimbre, wubin wuyi nia an a en. 20#Mt 10:40; Mk 9:37; Lk 9:48; 10:16Andhandha, awacu iwu, ng’atu m’ujolo ng’atu m’aoro nwang’u ejolo an; man ng’atu m’ujolo an nwang’u ejolo ng’atu m’uora.

Yesu Nyutho ya Jubicibe

(Mt 26:20-25; Mk 14:17-21; Lk 22:21-23)

21Ka Yesu daru yero kumeno, e cwinye ng’abre, man etuco, ewacu kumae, Andhandha, ayero iwu, nia ng’atu acel m’i kindwu biciba. 22Julub ginendri, kum cwinygi ni jiji kum ng’atu m’eyero pire. 23Nwang’u ng’atu acel ma Yesu maru ma kind julub ubedo dhu mesa, m’ejeng’ ajeng’a kor Yesu. 24Ka kumeno Simon Petro gwele, man ewacu ire kumae, Wac iwa ng’atu m’eyero pire en e ng’a. 25Kan ejeng’ kumeno kor Yesu ewacu ire kumae, Rwoth, en e ng’a? 26Ka kumeno Yesu loko lembe kumae, En e ng’atu, m’abigwio ire kwen, abimio ire de. E kan egwio kwen, eting’e emie ni Yuda, ma wod Simon Iskariote. 27Yo ng’ei gamu kwende, e Jok umondo i ie. Ka kumeno Yesu wacu ire kumae, Gin m’itimo, tim pio. 28Nwang’u ng’atu moko mbe dhu mesa m’ung’eyo nia pirang’o eyero ire kumeni. 29Kum jumoko wacu nyo, kum usau ni ba Yuda, Yesu wacu ire kumae, Ng’ieu gin ma cande ni kumwa mir agba; kadi nia emi gin moko ni jucan. 30E kan edaru gamu kwen, ewok woko ndhu ndhu nica: nwang’u en e diewor.

Cik ma Nyen

31Ka kumeno kan edaru wok woko, Yesu wacu kumae, Kawono juketho Wod dhanu doko dwong’, Mungu de doko dwong’ i ie; 32man Mungu bidwoke dwong’ i ie gire, e ebidoko dwong’ de pio. 33#Yoh 7:34Nyithindho ma thindho, fodi wabedo kudu nindo ma nok. Wubiyenya: man calu awacu ni Juyahudi kumae, Ka m’acidho i ie, wucopo bino ngo; kawono de ayero iwu kumeno. 34#Yoh 15:12, 17; 1 Yoh 3:23; 2 Yoh 1:5Amio iwu cik ma nyen, ya wumeru; cil calu amaruwu, nia wun bende wumeru. 35Kum kumeni dhanu ceke bing’eyo nia wu julubna tek wumeru.

Yesu Nyutho Maram Petro Bikwere Ko

(Mt 26:31-35; Mk 14:27-31; Lk 22:31-34)

36Simon Petro penje kumae, Rwoth, ici dho kani? Yesu loko lembe kumae, Ka m’acidho i ie, icopo lubo ng’eya ngo kawono; ento ibilubo ng’eya macen. 37Petro wacu ire kumae, Rwoth, nedi acopo lubo ng’ei ngo kawono? Abimio kwo para piri. 38Yesu loko lembe kumae, Ibimio kwo peri pira? Andhandha, awacu iri kumae, Kulok bikok ungo, ma fodi k’ikwera wang’ adek ungo.

Currently Selected:

Yohana 13: AB1970

Highlight

Copy