Yohana 18

Jucibo Yesu man Jumake

(Mt 26:47-56; Mk 14:43-50; Lk 22:47-53)

1Ka Yesu daru yero lembe maeni ecidho ku julubne loka kulo Kedron, ka ma podho ni i ie, m’emondo i ie, en ku julubne. 2Nwang’u Yuda bende m’ucibe, eng’eyo kakeca: kum Yesu gibegicokri keca ku julubne wang’ udul. 3Ka Yuda gamu udul asikari, kud asikari mange de m’uai ba julam ma dongo ku Jufarisayo de, elund ebino kakeca ku thala ku ridhro ku jamtho de. 4Ka kumeno Yesu, m’ung’eyo gin ceke ma bibino i wie, ewok woko, man ewacu igi kumae, Wuyenyo ng’a? 5Giloko ire lembe kumae, Yesu ma Nazareti. Yesu wacu igi kumae, An a en. Yuda bende, m’ucibe, gicungo gikugi. 6Ka kumeno kan ewacu igi kumae, An a en, gidok ku ng’eigi, gipodho i ng’om. 7Elund epenjogi kendo kumae, Wuyenyo ng’a? man giwacu kumae, Yesu ma Nazareti. 8Yesu loko lembe kumae, Adaru wacu iwu nia an a en; ka kumeno tek wuyenyo an, wuwek joni gicidh migi: 9kara lembe m’eyero timbre kakare kumae, Ju maeni m’imio ira acel de mbe m’i kindgi m’urwinyo ira. 10Nwang’u Simon Petro m’e won palamularu ewodhe, egoyo ko jamiru pa jalam ma dit, ethumo ithe ma yor acwic bir cen. Nwang’u nying’ jamirune Malko. 11#Mt 26:39; Mk 14:36; Lk 22:42Ka kumeno Yesu wacu ni Petro kumae, Roi palamularu i ukorone: kikombe ma Wego mio ira ni, kud amadhi?

Yesu i Wang’ Jalam ma Dit

(Mt 26:57-58; Mk 14:53-54; Lk 22:54)

12Ka kumeno udul asikari ku jego ma dit, man asikari mi Juyahudi, gimaku Yesu gitwie de, 13gilar gipeye ba Ana; kum en e jalkwaru Kayafa, ma en e jalam ma dit rundi maeno. 14#Yoh 11:49, 50Nwang’u Kayafa en e ng’atu m’umio poro thelembe ni juyahudi, nia en e ber ya ng’atu acel utho pi dhanu.

Petro Kwero Yesu

(Mt 26:69-70; Mk 14:66-68; Lk 22:55-57)

15Nwang’u Simon Petro lubo ng’ei Yesu, ku jalub mange de. Nwang’u jalub maeni ging’eiri ku jalam ma dit, man gimondo giku Yesugi i pondot pa jalam ma dit; 16ento Petro cungo yo woko dhugola. Kum kumeno jalub mange, ma ging’eiri ku jalam ma dit, ecidho woko eweco ba ng’atu ma kuro dhugola, man ekelo Petro i ie. 17Nyaku ma kuro dhugola lund uwacu ni Petro kumae, In bende in i ng’atu ma kind julub ng’atuni? Ewacu kumae, An ungo. 18Nwang’u jumiru kud asikari de gicungo keca, ma gidaru vuko mac mi cukmac; kum koyo nuti; gioyo mac de: man Petro bende gicungo gikugi ebemuro kume.

Jalam ma Dit Upenjo Yesu

(Mt 26:59-66; Mk 14:55-64; Lk 22:66-71)

19Jalam ma dit ulund upenjo Yesu pi julubne, ku ponji pare de. 20Yesu loko lembe ire kumae, Adaru yero kele ni ng’om; abedaponjo i kacokri, i hekalu de, ka ma Juyahudi ceke gibegicokri i ie; man ayero gin moko lwe ngo. 21Ipenja nedi? penj ju m’uwinja, pi lembe m’ayero igi; nen, joni ging’eyo lembe m’ayero. 22E kan edaru yero maeni, ng’atu acel m’i kind asikari m’ucungo keca epadu Yesu ku cinge, ewacu kumae, Iloko lembe kumeno ni jalam ma diti? 23Yesu loko lembe ire kumae, Tek adaru yero raci, nyuth karacne: ento tek dre ke, ipada nedi? 24Ka kumeno Ana ore atwia ba Kayafa ma jalam ma dit.

Petro Kwero Yesu Kendo

(Mt 26:71-75; Mk 14:69-72; Lk 22:58-62)

25Nwang’u Simon Petro cungo acunga ebemuro kume. Ka kumeno giwacu ire kumae, In bende i ng’atu acel m’i kind julubne? Ekwero, ewacu de kumae, An ungo. 26Ng’atu acel ma kind jumiru pa jalam ma dit, ma wadi ng’atu ma Petro thumo ithe, uwacu kumae, Aneni wukude ngo i podho? 27Petro lund ukwero kendo: e ndhu ndhu nino kulok ukok.

Yesu i Wang’ Pilato

(Mt 27:1-2, 11-14; Mk 15:1-5; Lk 23:1-5)

28Gilund gipeyo Yesu ku ba Kayafa gicidho kude Odtiti: man en e pir kugweno; ento gin re gimondo ngo i Odtiti, kara ku gicidri, endre gicam kadhukuwijo. 29Ka kumeno Pilato wok woko i bang’gi, ewacu kumae, Wukelo adote ang’o kum ng’atuni? 30Giloko lembe giwacu ire kumae, Tek ng’atuni jadub lembe ngo, kuno di jukele ngo i beng’i. 31Ka kumeno Pilato wacu igi kumae, Wugame wun, wupok lembe i wie calku cik mu. Juyahudi wacu ire kumae, Cik uyio iwa ngo ya waneg ng’atu moko: 32#Yoh 3:14; 12:32kara lembe pa Yesu timbre kakare, m’eyero, m’enyutho ko maram ebitho ko. 33Ka kumeno Pilato mondo kendo i Odtiti, man elwong’o Yesu, epenje de kumae, In i Ubimo mi Juyahudi? 34Yesu loko lembe kumae, Iwacu lembuni giri, kadi jumange yero pira iri? 35Pilato loko lembe kumae, An a Jayahudi? Thek mu giwu ku julam ma dongo gikeli i bang’a: itimo ang’o? 36Yesu dwoko lembe kumae, Ker para en e mi ng’ombuni ngo: tek ker para en e mi ng’ombuni, kuno di jumiru para gikiedo, kara ku jumia ni Juyahudi: ento kawono ker para en e ma keni ngo. 37Pilato lund uwacu ire kumae, Kara in i ubimo? Yesu loko lembe kumae, Iyero dhe nia an a ubimo. Junyola pi maeni, man abino i ng’om de pi maeni, kara anyuth pi lemandha. Ku ba dhanu ceke ma mi lemandha winjo dwanda. 38Pilato penje kumae, Lemandha en e ang’o?

Jung’olo Tho wi Yesu

(Mt 27:15-31; Mk 15:6-20; Lk 23:13-25)

Kan edaru yero lembe maeni, ewok woko kendo ba Juyahudi, man ewacu igi kumae, Anwang’u dubo moko ngo i ie. 39Ento en e kurawu, ya agony iwu ng’atu acel i kadhukuwijo: ka kumeno wuyenyo agony iwu Ubimo mi Juyahudi? 40Gilund gikok kendo, giwacu kumae, Ng’atuni ngo, ento Baraba. Nwang’u Barabane en e jayek.

Currently Selected:

Yohana 18: AB1970

Highlight

Copy