Luke 11

Yezu udi ulongesha mutudi mua kutendelela

(Mat 6.9-13; 7.7-11)

1Dituku dikuabu Yezu uvua utendelela muaba kampanda. Ujikija, umue wa ku balongi bende kumuebeja ne:

— Mfumu, ubilongeshe mutudi mua kutendelela, muvua Yowanane#11.1 Ke Yowanane-Batiste. mulongeshe balongi bende.

2Ke Yezu kubambila ne:

— Panudi nutendelela, nuambe ne:

“Tatu,

bantu bonsu batumbishe dina diebe dia tshijila.

Bukalenga buebe bufike.

3Utupe ku dituku ku dituku tshiakudia tshitudi tukengela.#11.3 tshitudi tukengela: badi mua kuandamuna kabidi ne: tshia maloba.

4Utulekele bilema bietu,

mutudi balekele bonsu bavua batuenzela bibi.

Kuanyishi bua batutete, tukuvile.”

5Yezu kubambila kabidi ne: — Ambayi tumone. Umue wa kunudi, yeye muye kua mulunda wende mundankulu mua butuku, umuambila ne: “Mulunda wanyi, unsombeshe mampa asatu. 6Bualu muenyi mmufike kuanyi, ufuma ku luendu. Tshiena ne tshia kumulambila nansha.” 7Kadi mukuabu awu mu nzubu kumuandamuna ne: “Umfuile luse! Kumbelu nkukanga. Bana banyi ne meme tukadi bamane kulala. Tshiena ne mushindu wa kujuka, kukupesha mampa to.” 8Kadi meme ndi nnujadikila ne: nansha yeye kayi ujuka bua kumupeshawu, bualu mmulunda wende, kadi neajuke bua kumupesha bionsu bidiye ukengela, bualu mulunda wende udi unanukila ne dimulomba, kayi ufua bundu. 9Nanku meme ndi nnuambila ne: lombayi, nenupete; kebayi, nenumone; kokolayi ku tshiibi, nebanunzuluile. 10Bualu muntu yonsu udi ulomba tshintu, udi utshipeta. Udi ukeba, udi umona. Udi ukokola ku tshiibi, badi bamunzuluila. 11Nuenu nudi batatu. Nganyi wa kunudi udi mua kupesha muanende nyoka, padiye ulomba mushipa;#11.11 Mu mikanda mikuabu ya kale kunyima kua muaku: muanende, mbafunde: dibue, padiye ulomba diampa, nansha (nyoka…). Tangila Mat 7.9. 12nansha kumupesha kaminyiminyi,#11.12 kaminyiminyi: tangila 10.19 ne diumvuija . padiye ulomba diyi? 13Nanku nuenu bantu babi, nudi bamanye mua kupesha bana benu bintu bia nsongu. Mudi Tatu wa mu diulu mua kubenga kupesha bantu Mueyelu wa Tshijila udibu balomba mbishi?

Bukole bua Yezu mbufume penyi?

(Mat 12.22-30; Mar 3.22-27)

14Yezu utshivua wipata mukishi mubi uvuamutulukile muntu, mumushiye kamama. Mukishi mubi mumane kupatuka, kamama kuakula bimpe. Bantu kukema bikole. 15Kadi bantu bakuabu bavua bamba ne:

— Belzebule#11.15 Belzebule: tangila Mat 10.25 ne diumvuija . mfumu wa mikishi mibi, ke udi upesha muntu awu bukole bua kuipata mikishi mibi eyi!

16Bantu bakuabu bavua basue kuteta Yezu. Kumulombabu bua enze tshishima tshidi mua kujadika mudi bumfumu buende bufume kudi Mvidi Mukulu. 17Kadi Yezu uvua mumanye meji avuabu bela. Nanku kubambilaye ne:

— Bukalenga buonsu budi benabu baluishangana nkayabu, nebunyanguke lukasa. Nzubu yabu neyupuke. 18Pikala diabolu udiluisha nkayende, bukalenga buende nebutungunuke munyi? Bualu nudi nuamba ne: Belzebule mmukupeshe bukole bua kuipata nabu mikishi mibi. 19Meme ngipata mikishi mibi ku bukole bua Belzebule, kadi bena dienu udi ubapesha bukole bua kuyipata nnganyi? Nanku bena dienu mene badi bajadika munudi nutupakana. 20Kadi meme ndi ngipata mikishi mibi amu ku bukole bua Mvidi Mukulu. Ke bidi bileja ne: Bukalenga bua Mvidi Mukulu mbumane kufika kunudi.

21“Padi tshilobu ne bia mvita mu bianza, ulama nzubu wende, bintu bionsu bidiye nabi bidi amu katakata. 22Kadi padi muntu udi mumupite dikanda ufika, umutshimuna, udi umunyenga bia mvita bivuaye mutekemene. Udi wabanya kabidi bionsu bidiye mupawule.

23“Udi kayi mutue ku tshianyi, mmumbenge. Udi kayi ungambuluisha bua kukungija mikoku, udi uyitangalaja.

Mukishi mubi udi upingana muaba wawu wa kale

(Mat 12.43-45)

24“Diba didi mukishi mubi mumane kupatuka munda mua muntu, udi utambakana miaba miume, ukeba muaba wa kuikisha. Padiwu kauyi upeta muaba, udi wela meji ne: ‘Nempingane mu nzubu umvua mushiye.’ 25Udi umupingana, usangana nzubu mukomba, utulongolola bimpe. 26Udi uya kuangata mikishi mikuabu muanda mutekete idi mimupite ku bubi. Udi upingana nayi pamue, isomba mu nzubu amu. Nanku bubi bua muntu ewu mpindiewu budi bupite buende bua kale.”

Diakalenga dilelela

27Yezu utshivua wakula, ke mukaji kuela diyi munkatshi mua bantu, wamba Yezu ne:

— Mamu uvua mukulele, mukuamushe, ngwa diakalenga!

28Kadi Yezu kumuandamuna ne:

— To! Badi bateleja muaku wa Mvidi Mukulu, baukumbaja, ke bena diakalenga!

Badi balomba Yezu tshishima

(Mat 12.38-42)

29Bantu bavule bavua bunguila Yezu. Ke Yezu kuamba ne: — Bena lelu mbantu babi. Badi balomba bua Mvidi Mukulu abajadikile malu ne tshishima. Kadi Mvidi Mukulu neabajadikile malu amu muvuaye muenze mu tshikondu tshia muambi Yona. 30Bualu bu muvua Mvidi Mukulu utuma Yona kudi bena Ninive,#11.30 Yona kudi bena Ninive: tangila Yon 3.3-5. — Ninive: tangila Mat 12.41 ne diumvuija. bua kubaleja tshivuaye ujinga, ke mudiye utuma Muana wa muntu kudi bena lelu. 31Dituku didi Mvidi Mukulu ukosa nsambu, mukalenga mukaji wa mu ditunga dia kuinshi, neimane kumpala kua bena lelu, abadiwule. Bualu uvua mufume ku ditunga dia kule bua kuteleja mibelu ya meji ya kudi Shelomu.#11.31 Tangila 1 Bak 10.1-10. Kadi patudi apa padi muntu mupite Shelomu! 32Dituku didi Mvidi Mukulu ukosa nsambu, bena Ninive nebadiwule bena lelu. Bualu bena Ninive bavua badilengeja, pavuabu bumvua muambi Yona ubalongesha.#11.32 Tangila Yon 3.5, 8, 10. Kadi patudi apa padi muntu mupite Yona!

Butoke ne Midima

(Mat 5.15; 6.22-23)

33— Kabena batemesha muendu bua kuusokoka nansha kuubuikila muinshi mua kapanza.#11.33 Mu mikanda mikuabu ya kale kabena bafunde miaku ya ndekelu ayi to (Tangila Mat. 5.15; Mar 4.21). Kadi badi bauteka pa tshitekelu tshiawu, bua ukenkeshe bonsu badi babuela mu nzubu. 34Mesu ebe adi bu muendu wa mubidi webe. Padi mesu ebe amona bimpe, mubidi webe mujima udi patoke. Kadi pikala mesu ebe kaayi amona bimpe, mubidi webe udi mu miidima. 35Nanku udimuke bua butoke budi munda muebe kabuikadi miidima. 36Padi mubidi webe mujima mu butoke, kauyi mu miidima kaba nansha kamue, newikale mu butoke wonsu mujima, bu padi muendu ukutokesha ne nkenke yawu.

Yezu udi udiwula Baparushe ne balongeshi ba mikenji

(Mat 23.1-36; Mar 12.38-40)

37Yezu utshivua wakula, ke Muparushe mukuabu kumubikila bua kudiaye kuende. Yezu kubuela mu nzubu muende, kusomba ku mesa. 38Kadi Muparushe uvua ukema bikole, bualu Yezu uvua udia kayi muanji kuowa bianza. 39Ke Mfumu kumuamba ne:

— Ke munudi nuenu Baparushe: nudi nusukula dikopu nansha dilongu panyima, kadi munda muenu mudi muwule tente ne lukuka lua bivi, kabidi ne tshikisu. 40Nudi bantu batatakane! Mvidi Mukulu uvua muenze panyima, ki ngudi muenze kabidi munda anyi? 41Peshayi bapele bidi mu makopu ne mu malongu enu. Nanku malu enu onsu neakane!

42“Nuenu Baparushe, nudi bena diakabi! Nudi nulambula tshia dikumi tshia bia mu madimi enu, tshia tshiluabenyi, tshia tshikote, nansha tshia bisekiseki bishilangane bikuabu.#11.42 Tangila Lev 27.30; Diel 14.22. Kadi kanuena basue kuenzela bantu bimpe, nansha kunanga Mvidi Mukulu. Ke binuvua ne bua kuenza ebi, kanuyi nulengulula bikuabu abi.

43“Nuenu Baparushe, nudi bena diakabi! Nudi basue kusomba mu nkuasa ya kumpala mu nzubu ya ditendelela. Nudi banange kabidi bua bantu banuele mioyi ya kanemu mu bisalu. 44Nudi bena diakabi! Bualu nudi bu nkita idibu kabatshiyi bamona, bayidiata kabayi bamanye!”

45Mulongeshi mukuabu wa mikenji kumuamba ne:

— Mulongeshi, udi utupenda ne tuetu, paudi wamba nanku!

46Yezu kuandamuna ne:

— Nuenu kabidi balongeshi ba mikenji, nudi bena diakabi! Nudi nuambuisha bantu majitu manene panyima. Kadi nuenu kanuena malenga nansha munu umue. 47Nudi bena diakabi! Nudi nuibakila bambi bavua bankambua benu bashipe nkita mimpe. 48Ke munudi nuleja munudi banyishe malu avua bankambua benu benze. Bobu bavua bashipe bambi! Nuenu kuibaka nkita yabu! 49Ke muvua Mvidi Mukulu mudianze kuamba ne: “Nembatumine bambi ne bapostolu. Nebashipe bamue ba kudibu, bakengesha bakuabu.” 50Kadi nebanyoke bena lelu bua bambi bonsu bavuabu bashipe, biangatshile ku tshibangidilu tshia buloba, 51kutuadija ku Abele too ne ku Zekarya, uvuabu bashipe pankatshi pa tshilambuilu ne muaba wa tshijila.#11.51 Tangila Tshib 4.8; 2 Kul 24.20-22. Eyowa, ndi nnujadikila ne: nebanyoke bena lelu, bua bantu bonsu bavuabu bashipe aba!

52Nuenu balongeshi ba mikenji, nudi bena diakabi! Bualu nudi bumushe nsapi idibu mua kunzulula nayi tshiibi tshia muaba wa kumanya malu. Nuenu mene kanuena numubuela. Kadi nudi nukandika kabidi badi bajinga kubuelamu.

53Yezu mumane kupatuka mu nzubu amu, balongeshi ba mikenji ne Baparushe kumufikila munda bikole, kumuela nkonku ya mishindu yonsu. 54Bavua bakeba kumuteya, bua bamujikile ulongesha malu adi kaayi malelela.

Currently Selected:

Luke 11: TSH96

Highlight

Copy