Luke 17
17
Bubi ne luse
(Mat 18.6-7,21-22; Mar 9.42)
1Yezu kuambila balongi bende ne:
— Matuku onsu nekuikale malu adi akoka bantu bua kuenzabu bibi. Kadi muntu udi wenzeja bantu malu mabi aa mmuena diakabi! 2Muntu wa nanku mbimpe bamusuike dibue dinene dia kupela nadi mu nshingu, bamuele mu mayi manene, bua kafikishi nansha umue wa ku bakese aba ku dienza bibi. 3Nuadimukayi!
Pikala muanenu wa balume mubunde tshibawu, umubele bimpe. Pikalaye munyingalale bua tshilema tshivuaye muenze, umumvuile luse. 4Nansha yeye mukuenzele bibi misangu muanda mutekete ku dituku, upingana kuudi, ukuambila ne: “Ndi nnyingalala bua bindi mukuenzele,” wamumvuila amu luse.
Ditaba
5Bapostolu kulomba Mfumu ne:
— Kolesha ditaba dietu.
6Mfumu kuandamuna ne:
— Bu nuenu ne ditaba bunene bua lutete lua lusanga,#17.6 Tangila Mat 17.20 ne diumvuija . nuvua mua kuambila mutshi wa sikomore wawa ne: “Juka apa, umene mu mayi manene.” Nanku mutshi newitabe mu diyi dienu.
Nukumbaje mudimu unudi ne bua kuenza
7— Tuambe ne: muntu wa kunudi udi mua kuikala ne muena mudimu wende udi udima, nansha umulamina bimuna. Padiye umona muena mudimu awu ufuma ku budimi nansha ku mpata, neamubikile lukasa bua kudiaye nende ku mesa anyi? 8Kakuenza nanku to. Kadi, neanuambile ne: “Ndambita biakudia. Pashishe vuala bilamba bikuabu bua kungambuluisha pantshidi ndia. Neushishe kudia pebe.” 9Neele muena mudimu wende tuasakidila bua padiye mukumbaje bivuaye mumuambile anyi? 10Ke munudi nuenu kabidi. Panudi nukumbaja bionsu bidi Mvidi Mukulu unuambila, nuambe amu ne: “Tudi amu bena mudimu ba patupu. Tuvua bakumbaje amu bituvua ne bua kuenza.”
Yezu udi ujikija nsudi ya bantu dikumi
11Pavua Yezu mu luendu, mutangile ku Yerushalayime, kupitshilaye ku mikalu ya buloba bua Samariya ne bua Ngalileya. 12Ufika mu musoku mulkuabu, ke bena nsudi dikumi, bantu balume, kusambakena nende. Bavua bimanyine pa bule,#17.12 Tangila Lev 13.45-46. 13bela mbila ne:
— Yezu, Mfumu, utumvuileku luse!
14Yezu ubamona, kubambilaye ne:
— Nuye kudi batuangaji, banukenkete.#17.14 Tangila Lev 14.2-3. Patshivuabu mu njila, disama diabu kujika. 15Umue wa kudibu umona ne: disama dianyi ndijike, kupinganaye kudi Yezu, wenda utumbisha Mvidi Mukulu ne diyi dikole. 16Kudielaye mpala panshi ku makasa a Yezu, umuela tuasakidila. Muntu awu uvua muena Samariya. 17Ke Yezu kuamba ne:
— Disama dia bonsu dikumi ki ndijike anyi? Kadi bakuabu tshitema badi penyi? 18Bobu ki mbapingane bua kutumbisha Mvidi Mukulu bua tshinyi? Amu muenyi ewu!
19Ke Yezu kumuamba ne:
— Juka, uye; ditaba diebe ndikupandishe!
Bukalenga bua Mvidi Mukulu nebufike diba kaayi?
(Mat 24.23-28,37-41)
20Baparushe bavua bakonka Yezu ne:
— Bukalenga bua Mvidi Mukulu nebufike diba kaayi?
Yezu kubandamuna ne:
— Bukalenga bua Mvidi Mukulu kabuena bufika mushindu udi bantu mua kubumona bimpe to. 21Muntu kakuamba ne: “Budi apa!” nansha ne “Budi kuaka!” Numanye amu ne: Bukalenga bua Mvidi Mukulu bukadi munkatshi muenu.#17.21 Bakuabu badi bandamuna ne: munda muenu.
22Ke Yezu kuambila balongi bende ne:
— Tshikondu netshifike tshinuajinga kumona dimue dia ku matuku a Muana wa muntu. Kadi kanuakudimona to. 23Nebanuambile ne: “Nyeye wawa!” nansha ne: “Nyeye ewu!” Kadi kanunyemenyiku bua kuya kumona to! 24Pakumbana dituku diende, Muana wa muntu neafike, bu mudi mukenya wa mvula upenya mu diulu, udikenkesha dionsu musangu umue. 25Kadi Muana wa muntu udi ne bua kudianza kukenga bikole. Bantu ba mu tshikondu etshi nebamubenge. 26Bivua bienzeka mu tshikondu tshia Nowa, nebienzeke mu tshikondu tshidi Muana wa muntu ufika. 27Bantu bavua badia, banua, baselangana, ne ku diba divua Nowa mubuele mu buatu. Ke mvula wa tshipupu kuloka, kubabutula bonsu.#17.27 Tun. 26-27: tangila Tshib 6.9—7.24. 28Nebienzeke bu mu tshikondu tshia Lote: bantu bavua badia, banua, basumba, basumbisha bintu, bakuna, bibaka nzubu. 29Kadi dituku divua Lote mupatuke mu tshimenga tshia Sodome, kapia ne mvuanda bivua biloka, bibutula bantu bonsu.#17.29 Tun. 28-29: tangila Tshib 18.20—19.25. 30Nanku dituku didi Muana wa muntu umueneka, nebienzeke momumue.
31Dituku adi, muntu ku musonga wa nzubu, kena ne bua kutuluka bua kuambula bintu biende bidi mu nzubu to. Muntu mu budimi kena ne bua kupingana kuende to. 32Vulukayi mukaji wa Lote!#17.32 Tangila Tshib 19.26. 33Muntu udi musue kusungidila muoyi wende, neaujimije. Kadi wajimija muoyi wende, neausungidile. 34Ndi nnujadikila ne: bufuku abu ku bantu babidi bikale balale muaba umue, nebaye ne umue, bashiye mukuabu. 35Ku bakaji babidi bikale batue ntete mu tshinu tshiapamue, nebaye ne umue, bashiye mukuabu. [ 36Ku balume babidi bikale badime mu budimi, nebaye ne umue, bashiye mukuabu.#17.36 Mu mikanda mivule ya kale ki mbafunde kanungu aka to (tangila Mat 24.40).]
37Ke balongi kumukonka ne:
— Mfumu, malu aa neenzekele muaba kaayi?
Yezu kuandamuna ne:
— Padi tshitalu, ke padi nyunyi ya mikanku idisangishila.#17.37 Fuanyikija ne Yob 39.30.
Currently Selected:
Luke 17: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996
