Luke 22
22
Badi balelela Yezu tshifufu tshibi
(Mat 26.1-5; Mar 14.1-2; Yow 11.45-53)
1Tshibilu tshidi bantu badia mampa kaayi mela buanga, tshidibu binyika tshibilu tshia Dipita dia Maweja-Nangila, tshikavua pabuipi.#22.1 Tangila Tshim 12.1-27. 2Bamfumu ba batuangaji, ne balongeshi ba mikenji, bavua bakeba muvuabu mua kushipesha Yezu. Kadi bavua batshina bantu.
Yudase udi utungila Yezu tshitungu
(Mat 26.14-16; Mar 14.10-11)
3Ke diabolu kubuela munda mua Yudase Iskariyote, umue wa ku balongi dikumi ne babidi. 4Yudase kuya kuyukila ne bamfumu ba batuangaji, kabidi ne balombodi ba balami ba mu nzubu wa Mvidi Mukulu. Kumvuanga-nabu bua mushindu uvuaye mua kufila Yezu kudibu. 5Bamfumu kusanka bikole, kumulaya bua kumupesha makuta. 6Ke Yudase kuanyisha, kukeba diba dimpe divuaye mua kufila Yezu kudibu, bantu kabayi bamanye.
Yezu udi ulongoluesha didia dia Dipita dia Maweja-Nangila
(Mat 26.17-25; Mar 14.12-21; Yow 13.21-30)
7Munkatshi mua tshibilu tshia mampa kaayi mela buanga, dituku kukumbanadi di-vuabu ne bua kushipa bana ba mikoku bua didia dia tshibilu tshia Dipita dia Maweja-Nangila. 8Yezu kutuma Petro ne Yowanane, ubambila ne:
— Nuye kutulonguelela didia dia tshibilu tshia Dipita dia Maweja-Nangila.#22.8 Tangila Tshim 12.3-9.
9Ke bobu kumukonka ne:
— Udi musue tulongoluele didia edi penyi?
10Yezu kubandamuna ne:
— Telejayi! Panuabuela mu tshimenga, nenusambakene ne muntu mulume, muambule mulondu wa mayi. Numulonde too ne mu nzubu muabuelaye. 11Nukonke muena lubanza ne: “Mulongeshi udi ukuebeja ne: mu nzubu mutuadila, meme ne balongi banyi, didia dia Dipita dia Maweja-Nangila muepi?” 12Nanku yeye neanuleje kulu nzubu munene udi ne bintu bionsu. Muine amu ke munualongoluela didia.
13Ke Petro ne Yowanane kuya, kusangana bionsu anu muvua Yezu mubambile. Kulongololabu didia dia Dipita dia Maweja-Nangila.
Didia dia Mfumu
(Mat 26.26-30; Mar 14.22-26; 1 Kor 11.23-25)
14Diba dia didia dikumbana, Yezu kusomba ku mesa ne balongi bende. 15Kubambilaye ne:
— Mvuamujinge bikole kudia nenu didia edi dia tshibilu tshia Dipita dia Maweja-Nangila, tshiyi muanji kukenga. 16Bualu ndi nnujadikila ne: tshiakudia kabidi didia edi, too ne pakumbanadi menemene mu Bukalenga bua Mvidi Mukulu.
17Ke Yezu kuangata dikopu, kuela Mvidi Mukulu tuasakidila, wamba ne:
— Angatayi dikopu edi dia nwinyo, nunue bonsu. 18Bualu ndi nnujadikila ne: bituadija ku mpindiewu tshiakunua kabidi nwinyo, too ne pafika Bukalenga bua Mvidi Mukulu.
19Ke Yezu kuangata diampa, kuela Mvidi Mukulu tuasakidila, kudikosolola, kudiabanyina balongi bende, wamba ne:
— Etshi mmubidi wanyi, [undi mufile bualu buenu. Enzayi nenku bua kumvuluka.
20Balongi bamane kudia, Yezu kubapesha kabidi dikopu, wamba ne:
— Dikopu edi ntshiovu tshipiatshipia tshia Mvidi Mukulu, tshidibu bashindika ne mashi anyi, adibu bapumuna bualu buenu.#22.20 Mu mikanda mikuabu ya kale kabena bafunde miaku idi mu []. — Kan. 20: fuanyikija ne Tshim 24.8; Yirm 31.31-34.] 21Kadi monayi: muntu udi mungelele tshitungu udi muaba ewu. Tudi nende ku mesa.#22.21 Fuanyikija ne Mis 41.10. 22Bushuwa, Muana wa muntu neafue, bu muvua Mvidi Mukulu muambe. Kadi muntu udi mumutungile tshitungu mmuena diakabi! 23Ke balongi kukonkanganabu ne: munkatshi muetu emu, udi mua kuenza bualu abu nnganyi?
Udi mupite bakuabu ku buneme nnganyi?
24Balongi kutuadija kuelangana mpata bikole munkatshi muabu bua kumanya ne: wa munkatshi muetu udi mupite bakuabu ku buneme nnganyi? 25Yezu kubambila ne:
— Bakalenga ba matunga badi baatumina diyi. Bena mianzu badi basue bua bantu babinyike ne: “mBatuenzedi ba malu mimpe.” 26Kadi buenu nuenu kabikadi nanku to. Bualu udi mupite bakuabu munkatshi muenu, udi ne bua kudileja mushadile ku bonsu. Udi utuma diyi, udi ne bua kuenzela bakuabu mudimu. 27Muntu udi mupite bakuabu nnganyi? Ngudi musombe ku mesa anyi, udi ukuatshila bakuabu mudimu? Se ngudi musombe ku mesa. Nanku meme ndi munkatshi muenu, nnuenzela mudimu. 28Nuenu nudi bashale nanyi matuku onsu mu makenga anyi. 29Nanku bu mutua Tatu wanyi mumpeshe Bukalenga, meme kabidi ndi nnupeshabu. 30Nuenu nenudie, nunue ku mesa anyi mu Bukalenga buanyi. Nenusombe mu nkuasa ya bumfumu bua kukosa nsambu ya bisamba dikumi ne bibidi bia bena Izrayele.
Yezu udi wambila Petro ne: neumvile
(Mat 26.31-35; Mar 14.27-31; Yow 13.36-38)
31— Simone, Simone! Dimuka! Diabolu mmulombe bua kunuteta, bu mudibu bapepula ntete ya kuenza bukula, bumusha bisote. 32Kadi meme kukulombela kudi Mvidi Mukulu, bua kulenduki mu njila wa ditaba. Nanku pawapingana kundi, ukankamike bana benu.
33Ke Petro kumuandamuna ne:
— Mfumu, meme ndi musue kuya nebe mu nzubu wa lukanu, nansha bua kufua nebe nemfue!
34Yezu kumuandamuna ne:
— Petro, ndi nkujadikila ne: lelu tshitala katshiyi tshianji kusama, neumvile misangu isatu ne: tshiena mumumanye!
Tshibuta tshia makuta, tshia luendu, ne muele wa mvita
35Ke Yezu kukonka balongi bende ne:
— Tshikondu tshimvua munutume kanuyi ne tshibuta tshia makuta, nansha tshia luendu, kanuyi ne bisabata, nuvua bakengele tshintu anyi?
Balongi bende kumuandamuna ne:
— Katutua bakengele kantu nansha kamue.
36Ke Yezu kubambila ne:
— Kadi mpindiewu muntu udi ne tshibuta tshia makuta, atshiangate. Udi ne tshia luendu, atshiangate kabidi. Udi kayi ne muele wa mvita, apanyishe tshinkutu tshiende bua kuusumba. 37Bualu ndi nnujadikila ne: miaku idibu bafunde mu Mukanda wa tshijila bualu buanyi bua ne: “Batua bamuteke munkatshi mua benji ba malu mabi,” neikumbane.#22.37 Yesh 53.12. Bushuwa matuku anyi akadi ku ndekelu.
38Ke balongi bende kumuambila ne:
— Mfumu, tudi ne miele ya mvita ibidi eyi.
Yezu kubandamuna ne:
— mBikumbane.#22.38 mBikumbane: mu mikanda mikuabu ya kale mbandamune ne: bimvua muambe mbikumbane.
Yezu udi utendelela ku mukuna wa Olive
(Mat 26.36-46; Mar 14.32-42)
39Ke Yezu kupatuka, kuya ku mukuna wa Olive, mutua tshibidilu tshiende. Balongi bende kumulonda. 40Bafika amu ku mukuna, Yezu kubambila ne:
— Nutendelele bua kanulenduki, panutetabu.
41Ke Yezu kumuka muaba uvua balongi bende mutantshi wa dibue dikupa. Kutuaye binu, utendelela, 42wamba ne:
— Tatu, paudi musue, angumushile dikopu dia dikenga edi. Kadi kabienzeki mundi musue meme, amu muudi musue wewe. [ 43Ke mutumibue wa Mvidi Mukulu kumumuenekela ufuma mu diulu bua kumukankamika. 44Bowa bukole buvua bukuata Yezu. Ke kutendelelaye bikole bipite. Tshisululu tshiende tshifua tshiandamuka mashi, amata panshi.#22.44 Mu mikanda mikuabu ya kale kabena basangana tun.43-44 to.]
45Yezu mumane kutendelela, kujukaye. Kupinganaye kudi balongi bende, kubasangana balale bua dibungama. 46Ke kubakonkaye ne:
— Nuenu nudi balale bua tshinyi? Jukayi, nutendelele, bua kanulenduki, panutetabu.
Badi bakuata Yezu
(Mat 26.47-56; Mar 14.43-50; Yow 18.3-11)
47Patshivua Yezu wakula, bantu ba bungi kufika. Yudase, umue wa ku balongi bende ke uvua ubaludika. Kuyaye kudi Yezu bua kumutua mishiku. 48Ke Yezu kumukonka ne:
— Yudase, udi upangila Muana wa muntu ne dimutua mishiku anyi?
49Balongi ba Yezu bamona bitua bisue kuenzeka abi, kumukonkabu ne:
— Mfumu, tubatape miele anyi?
50Ke umue wa kudibu kupatula muele, kukosa ditshi dia balume dia muena mudimu wa mutuangaji munene.#22.50 Fuanyikija ne Yow 18.10, 26. 51Ke Yezu kubakandika, wamba ne:
— Lekelayi! Kanutungunuki to.
Yezu kulenga muntu awu ku ditshi. Kupinganadi muadi mua kale. 52Ke Yezu kuambila bamfumu ba batuangaji, balombodi ba balami ba nzubu wa Mvidi Mukulu, ne bakulu, bavua bafika bua kumukuata ne:
— Nudi bafike ne miele ya mvita, kabidi ne mitshi, bua kunkuata bu mushipianganyi anyi? 53Matuku onsu mvua nenu mu nzubu wa Mvidi Mukulu. Kanuena bakebe kunkuata nansha. Kadi diba edi ndienu, didi miidima ileja bukole buayi.
Petro udi uvila Yezu
(Mat 26.57-58,69-75; Mar 14.53-54,66-72; Yow 18.12-18,25-27)
54Kukuatabu Yezu, kuyabu nende mu nzubu wa mutuangaji munene. Petro uvua ubalonda pa bule. 55Bantu bavua batemesha kapia munkatshi mua lubanza. Nanku Petro kuya kusomba munkatshi mua bavua bota kapia. 56Ke muena mudimu mukaji kumona Petro musombe ku kapia. Kumujojaye, wamba ne:
— Muntu ewu kabidi uvua ne Yezu!
57Kadi Petro kuyila, wamba ne:
— Mukaji, tshiena mumumanye nansha.
58Katupa kipi, munga muntu kumona Petro, wamba kabidi ne:
— Wewe kabidi udi umue wa kudibu!
Kadi Petro kuandamuna muntu awu ne:
— Muanetu, meme tshiena wa kudibu to.
59Kupita bu diba dijima, munga muntu kujadika bikole, wamba ne:
— Kamuena mpata! Muntu ewu uvua ne Yezu, bualu mmuena Ngalileya!
60Ke Petro kuandamuna ne:
— Muanetu, tshiena mumanye tshiudi musue kuamba to!
Patshivuaye wakula apu, diakamue tshilala kusamatshi. 61Nanku Mfumu kukudimuka kudi Petro, kumutangila talalaa. Ke Petro kuvuluka tshivua Mfumu mumuambile ne: “Lelu tshitala katshiyi tshianji kusama, newikale mumane kumvila misangu isatu ne: tshiena mumumanye.#22.61 Tangila 22.34.” 62Ke Petro kupatuka pambelu, kudila bikole.
Badi bapenda Yezu, bamutuuta
(Mat 26.67-68; Mar 14.65)
63Bantu bavua balama Yezu bavua bamulembakaja, bamutuuta. 64Bavua bamubuikila ku mesu, bamukonka ne:
— Udi mukutuute nnganyi? Jandula, tumone!
65Bavua bamuela kabidi nsenda mikuabu ya bungi.
Yezu kumpala kua Tshipangu tshikulu
(Mat 26.59-66; Mar 14.55-64; Yow 18.19-24)
66Butshia, bakulu ba bena Yuda, bamfumu ba batuangaji, ne balongeshi ba mikenji, kudisangisha. Kubikilabu Yezu ku Tshipangu tshiabu tshikulu, 67bamuebeja ne:
— Wewe udi Kristu anyi? Utujadikile!
Yezu kubandamuna ne:
— Nansha meme munujadikile, kanuakungitaba to. 68Meme munukonke bualu, kanuakungandamuna to. 69Kadi kutuadijia ku mpindiewu, Muana wa muntu neasombe ku diboku dia balume dia Mvidi Mukulu wa bukole.#22.69 Mis 110.1.
70Ke bonsu kukonka Yezu ne:
— Nanku wewe udi Muana wa Mvidi Mukulu anyi?
Yezu kubandamuna ne:
— Munudi bambe amu, mmomu.
71Nanku kuambabu ne:
— Katukebi kabidi bajadiki to! Bualu tudi badiumvuile miaku ya mukana muende!
Currently Selected:
Luke 22: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996
