Luke 23

Yezu kumpala kua Pilate

(Mat 27.1-2,11-14; Mar 15.1-5; Yow 18.28-38)

1Bena tshipangu bonsu kujuka, kuya ne Yezu kua Pilate. 2Kutuadijabu kumusonguela kua Pilate, bamba ne:

— Tudi basangane muntu ewu upambula bena ditunga. Udi ukandika bantu ne: kanufutshi tshitadi tshia mukalenga wa bakalenga. Udi udiamba kabidi ne: ndi Kristu, mukalenga wa ditunga.

3Ke Pilate kukonka Yezu ne:

— Udi mukalenga wa bena Yuda anyi?

Yezu kumuandamuna ne:

— Muudi muambe mmomu.

4Ke Pilate kuambila bamfumu ba batuangaji, ne bantu bakuabu, ne:

— Tshiena musangane bualu nansha bumue, bundi mua kunyokela muntu ewu.

5Kadi bobu kusuminyina bikole bipite, bamba ne:

— Udi ulongesha bantu, ubasaka bua batomboke. mMutuadije mu Ngalileya; mmuendakane mu Yudeya mujima; mpindiewu mmufike too ne munemu.

Yezu kumpala kua Erode

6Pilate umvua miaku eyi, kuebejaye ne:

— Muntu ewu mmuena Ngalileya anyi?

7Pilate umvua ne: Yezu udi ufuma mu buloba budibu balombola kudi Erode, kumutumaye kudiye. Matuku awu Erode kabidi uvua mu Yerushalayime. 8Erode kusanka bikole pa kumona Yezu, bualu uvua mumvue bakula bualu buende. Kuonsu eku uvua ujinga kumonangana nende. Uvua mutekemene kumona ne ende abidi muvua Yezu wenza tshishima.#23.8 Tangila 9.9. 9Uvua muele Yezu makonka a bungi. Kadi Yezu kavua muandamune ku dikonka nansha dimue. 10Bamfumu ba batuangaji ne balongeshi ba mikenji batua muaba awu. Batua basonguela Yezu bikole. 11Erode ne basolayi bende batua baseka Yezu, bamupepeja. Kumutuadikabu tshilamba tshimpe tshitoke, kumupingaja kudi Pilate. 12Kuonsu eku Erode ne Pilate kabavua bumvuangana to. Kadi dituku edi kudiabu bulunda.

Badi bafundila Yezu tshibawu tshia lufu

(Mat 27.15-26; Mar 15.6-15; Yow 18.39—19.16)

13Pilate kusangisha bamfumu ba batuangaji, bakulu, ne bantu bakuabu bonsu, 14ubambila ne:

— Nudi bamvuile ne muntu ewu, nuamba ne: udi upambula bantu. Kadi ndi mumulumbuluishe kumpala kuenu. Tshiena mumusangane mupila ku bualu bubi nansha bumue, bunudi bamufunde. 15Erode kabidi kena mumusangane ne bualu. Ke padiye mutupingajilaye. Nanku muntu ewu kena muenze bubi nansha bumue budi mua kumukebela lufu. 16Ndi musue amu kumukumisha mikaba. Pashishe nemmulekele. [ 17Ku tshibilu tshionsu tshia Dipita dia Maweja-Nangila, Pilate uvua ulekela muena lukanu umue uvua bantu balomba.#23.17 Mu mikanda mikuabu ya kale kanungu aka kakenaku to. Tangila Mat 27.15; Mar 15.6.]

18Kadi bonsu pamue kuelabu mbila ne:

— Ushipeshe muntu ewu, utulekele Barabase!

19(Batua bela Barabase mu nzubu wa lukanu, bualu mu tshimenga bantu batua batomboke, bashipe muntu.) 20Bu mutua Pilate musue kulekela Yezu, kukonkaye tshiakabidi bantu. 21Kadi bobu kuela Pilate mbila ne:

— Umupopele ku mutshi mutshiamakane! Umupopele!

22Pilate kubakonka kabidi musangu muisatu ne:

— Kadi bualu kaayi bubi budiye muenze? Tshiena mumusangane ne tshilema nansha tshimue tshidiye mua kutuila. Nanku ndi musue anu kumukumisha mikaba. Pashishe nemmulekele.

23Kadi bantu batua bateka amu mutoyi mukole, balomba amu bua bapopele Yezu pa mutshi mutshiamakane. Mbila yabu kupapisha Pilate mua kuenza tshivuaye musue. 24Nanku Pilate kuitaba tshiyuabu balomba. 25Kulekelaye muntu uvuabu bele mu lukanu bua buntomboji ne bua kushiyangana, bualu ke uvuabu balombe. Kadi kubapeshaye Yezu bua benze nende tshiyuabu basue.

Badi bapopela Yezu

(Mat 27.32-44; Mar 15.21-32; Yow 19.17-27)

26Patuabu baya ne Yezu, kusangilabu ne Simone muena Sirene, uvua ufuma ku budimi. Basolayi kumukuata, kumupesha mutshi mutshiamakane, bua alonde nawu Yezu munyima.

27Bantu ba bungi batua balonda Yezu. Munkatshi muabu mutua bakaji batua badila, batua mikemu bualu buende. 28Yezu ukudimuka, kubambilaye ne:

— Nuenu bakaji ba mu Yerushalayime, kanudidi bualu buanyi to. Nudile bualu buenu, ne bua bana benu. 29Bualu matuku neafike, bantu nebambe ne: “Diakalenga ndia bankumba, ndia badi kabayi balela, kabayi banji kuamusha bana.” 30Diba adi bantu nebambile mikuna minene ne: “Nutupukile!” Nebambile mikuna mikese ne: “Nutujibikile!#23.30 Osh 10.8.” 31Bualu padibu benzela lukunyi lubishi nanku, kadi lukunyi luume nebaluenzele tshinyi?

32Kuyabu kabidi mu njila ne bantu balume babidi bena tshibawu, bua babashipe musangu umue ne Yezu. 33Bafika pa muaba udibu binyika ne: “Kabalubalu,” kupopelabu Yezu pa mutshi mutshiamakane. Kuelabu kabidi bena tshibawu babidi abu#23.33 Fuanyikija ne Yesh 53.12. ku mitshi mitshiamakane, umue ku dia balume dia Yezu, mukuabu ku diende dia bakaji. 34Ke Yezu kuamba ne:

— Tatu, ubumvuile luse, bualu kabena bamanye tshidibu benza.

Kuabanyanganabu bilamba bia Yezu, batshinka udi mua kubiangata.#23.34 Mu mikanda mikuabu ya kale, kabena bafunde miaku ya ne: “Ke Yezu kuamba ne: — Tatu, ubumvuile luse, bualu kabena bamanye tshidibu benza.” — Bua tshitupa tshia ndekelu tshia kanungu aka, tangila Mis 22.19. 35Bantu bonsu batua bimane muaba awu, batangile. Bamfumu ba bena Yuda bavua baseka Yezu,#23.35 Tangila Mis 22.8-9. bamba ne:

— Uvua musungile bantu bakuabu. Pikalaye Kristu uvua Mvidi Mukulu musungule, adisungile, tumone!

36Basolayi pabu bavua bamuseka. Kusemenabu kudiye, kumupesha maluvu a buanji,#23.36 Tangila Mis 69.22. 37bamba ne:

— Pawikala mukalenga wa bena Yuda, udisungidile nkayebe! 38Kulu kua mutu wa Yezu, ku mutshi mutshiamakane awu, bavua bafunde ne: “Ke mukalenga wa bena Yuda.”

39Muena tshibawu mukuabu, uvua kabidi mulembelele ku mutshi mutshiamakane, uvua upenda Yezu, wamba ne:

— Wewe kuena Kristu anyi? Nanku udisungidile, utusungile ne tuetu kabidi!

40Kadi mukuabu kutandisha mukuende awu, wamba ne:

— Kuena utshina Mvidi Mukulu anyi? mBakunyoke mushindu umue nende! 41Buetu tuetu, dinyoka edi pa bualu. mBatuenzele bilondeshile bituvua benze. Kadi yeye, kena ne bubi budiye muenze.

42Ke kuambaye kabidi ne:

— Yezu, wamyuluka, pawabuela mu Bukalenga buebe.

43Ke Yezu kumuandamuna ne:

— Ndi nkujadikila bulelela ne: lelu netuikale nebe mu mparadizu

Yezu udi ufua

(Mat 27.45-56; Mar 15.33-41; Yow 19.28-30)

44-45Munda munya, diba kubuitshidila. Midima kuenzeka mu ditunga dijima, too ne ku diba dia isatu wa dilolu. Tshilamba tshiyuabu balembeleje mu nzubu wa Mvidi Mukulu,#23.45 Tangila Tshim 26.31-33. kupandikatshi pankatshikatshi. 46Yezu kuela diyi dikole ne:

— Tatu, ndi nteka muoyi wanyi mu bianza biebe.#23.46 Mis 31.6.

Yeye mumane kuamba miaku eyi, kukulaye muoyi. 47Mfumu wa basolayi ba bena Rome umona bivua bienzeka, kutumbishaye Mvidi Mukulu, wamba ne:

— Bushuwa, muntu ewu kavua ne bualu to.

48Bantu bonsu bavua bavua muaba awu bua kubandila bualu abu. Kumonabu bivua bienzeka abi. Nanku kupinganabu kuabu, badituuta bianza pa tshiadi ne dibungama. 49Balunda bonsu ba Yezu, kabidi ne bakaji bavua bamulonda biangatshile ku Ngalileya, bavua bimanyine pa bule#23.49 Fuanyikija ne Mis 38.12. bua kubandila bionsu bivua bienzeka.

Badi bajika Yezu

(Mat 27.57-61; Mar 15.42-47; Yow 19.38-42)

50-51Muvua muena Yuda mukuabu, dina diende Yozefe, wa mu tshimenga tshia Arimateya.#23.50-51 Tangila Mat 27.57 ne diumvuija . Uvua muntu muimpe, mutshinyi wa Mvidi Mukulu, muindile difika dia Bukalenga buende. Uvua kabidi muena Tshipangu tshikulu. Kadi kavua muanyishe muvua bena Tshipangu bakuabu bakose nsambu, nansha malu makuabu avuabu benza. 52Kuyaye kua Pilate, kulomba tshitalu tshia Yezu. 53Pashishe kutululaye tshitalu atshi ku mutshi mutshiamakane. Kutshijingilaye mu tshilamba tshienza ne buanda bua mitshi, kutshiteka mu lukita luvuabu bimbe mu lubuebue. Mu lukita amu kabavua banji kutekamu muntu mukuabu to. 54Muvua mu ditanu. Nanku dituku dia Dikisha dikavua pa kutuadija.

55Bakaji bavua balonda Yezu biangatshile ku Ngalileya, kulondabu Yozefe. Kutangilabu lukita, ne muaba uvuabu bateke Yezu. 56Pashishe kupinganabu kuabu. Kulongololabu mafuta ne manananshi bua kulaaba tshitalu.

Dituku dia Dikisha, bakaji abu kuikisha, bilondeshile mikenji ya ditunga.#23.56 Mafuta ne manananshi: tangila Mar 14.8 ne diumvuija. — bilondeshile mikenji: Tangila Tshim 20.10; Diel 5.14.

Currently Selected:

Luke 23: TSH96

Highlight

Copy