YUDITƐ 15
15
Oasiri wa yu Oisraɛlɛ
1Osodanɔ ti tɔa tandenɔ ni wa nɛa we zele sakoe ni, nɛ zũ wa vĩ do'do. 2Nɛ sila wa ma ngɔ tana nɛ, nɛ kili ba wa nɛ ge nde ni. Nɛ wa vɛ̃ wa kulu ngɔ fala kpo, nɛ wa hɔ nza fala ɔi 'da wa, nɛ wele do wele ma ngɔ yu do wala kɛ a kɔ̃a ni, nɛ nde wi lengge 'bɔ do ngbɛ ɛ bina. Ombe wa yu do li walanɔ ngɔ mbɛ nùi, nɛ ombe nɛ wa yu do ngɔ kalanɔ. 3Nɛ osoda Asiri kɛ wa dɛa zi fala ɔi 'da wa tɛ ngɔ kalanɔ zĩ le Betuli takpa ni, wa yu tɛ mɛ 'bɔ. Kɔ Oisraɛlɛ wa nɛa we zɔ ni, nɛ owi wili Israɛlɛ vɛ̃ kɛ wa wia we bi bolo ni, wa ma ngɔ ndaka wa.
4Nɛ Oziasi tumba Owi to tɛ le Betomɛstaimɛ, Bebai, Soba, Kola, do tɛ ngɔ nù Israɛlɛ vɛ̃ we tɔ̃ sako mɛ ma dɛa tɛ̃ ɛ ni. Nɛ a tumba 'bɔ hã wa na, wa vɛ̃ wa mba do lo we ndaka 'do Oasiri, hã lo kumu wa do'do. 5Oisraɛlɛ wa nɛa we zele toe ni, nɛ wa mba ngba wa do ti, nɛ wa tia ngɔ Oasiri, nɛ wa gbɛ wa gbaa we hɔ tɛ Soba. Nɛ owi Yeruzalɛmɛ do owanɔ wa ɔ ngɔ kalanɔ ni wa zila we mɛ ma dɛa tɛ̃ ɛ tɛ fala ɔi 'da Oasiri ni, nɛ wa tɛa tɛ mɛ 'bɔ. Nɛ owi Galadɛ do owi Galile wa hɔa do mbee tɛ Oasiri, nɛ wa gbɛ wa wena, nɛ wa ndaka wa gbaa, nɛ wa hɔ tɛ le Damasi do Onùnɔ kɛ zã nɛ ni.
6Nɛ tala owi Betuli wa zĩlĩ dɛ fala ɔi olo Oasiri i, nɛ wa kala ombe gba dɔa mɛnɔ olo wa ni, nɛ wa si do ma. 7Hã Oisraɛlɛ kɛ wa ndaka 'do Oasiri ni wa nɛa we gili tɛ wa, nɛ wa kala tala mɛnɔ kɛ ma 'bana ni. Oasiri wa la omɔ dɛlɛ wena, nɛ owi kɔ lenɔ do Owi ngɔ fɔnɔ, do owinɔ wa ngɔ kalanɔ do ngɔ mbɛ nùnɔ ni, wa kala tɛ mɛ 'bɔ omɔ olo Oasiri wena.
Yangga 'da Oisraɛlɛ olo bole
8Nɛ gã nwa nganga Yoakimɛ, mba do okumu Israɛlɛ kɛ wa zi tɛ Yeruzalɛmɛ ni, wa kulu ngɔ, nɛ wa nɛ tɛ Betuli i. Mba gɔ, wa kɔ̃a zi na, lo zɔ dia dɛa mɛ kɛ Gale dɛa we duzu Oisraɛlɛ ni do li lo ngboo. Nɛ lo kpa 'bɔ Yuditɛ, nɛ lo dɔnggɔ a. 9Wa nɛa we hɔ 'da Yuditɛ i, nɛ wa vɛ̃ wa mba nu wa kpo, nɛ wa dɔnggɔ a na: “Mɔ hã dɔ̃lɔ̃ li hã Yeruzalɛmɛ, obe Israɛlɛ wa dɛa wali, nɛ owi nu kpala lɛ wa kpa dɔngga wi we duzu mɔ! 10Mɔ zu mɔ kpo, mɔ dɛa dia mɔ hã Oisraɛlɛ, nɛ zã Gale kɔ̃a gɛnɛ mɛ mɔ dɛa ni! E kɔ NWA Gale, kɛ a do nganda vɛ̃ ni, wele nu a tɛ mɔ kɔ sabɛlɛ do sabɛlɛ!” Nɛ owinɔ vɛ̃ wa gese na: “Amɛ! E kɔ ma ɔ na mɛ ni!”
11Nɛ Oisraɛlɛ wa kala mɛnɔ kɛ osoda Asiri wa la dɛ fala ɔi 'da wa ni 'do 'bu tũ talɛ. Nɛ wa ba tɔa tande olo Holofɛrnɛ, mba do ofɛ̃a mɔ bolonɔ, do omɔ ɔinɔ, do okpananɔ do omɔ kɔ tɔanɔ olo a ni vɛ̃, nɛ wa hã hã Yuditɛ. Nɛ Yuditɛ kala omɛnɔ ni, nɛ a ɛnzɛ ombe dɛ 'do punda 'da a, nɛ a a ombe kɔ ngilingilinɔ 'da a, nɛ ombalatanɔ wa mana ma la do nɛ. 12Nɛ oboko Israɛlɛ vɛ̃ wa tɛa we zɔ a, nɛ wa dɔnggɔ a. Nɛ ombe sanga owukonɔ ni wa ga zuma, nɛ wa yɔ yɔla hã a. Nɛ Yuditɛ gbini nwá, nɛ a a ma kɔ̃ owukonɔ wa tɛ kã a zununu ni. 13Nɛ a, do owukonɔ wa kã a ni, wa gbini nwá te olivɛ, nɛ wa kpo dɛ zu wa vɛ̃. Nɛ a kpe dati ongba a wukonɔ, nɛ wa ma ngɔ nɛ mɛa mɛa tɛ yɔ do yɔla. Nɛ owi wili Israɛlɛ vɛ̃ wa kpua 'bɔ nwá zu wa, nɛ wa kala omɔ bi bolonɔ 'da wa dɛ kɔ̃ wa, nɛ wa kpe dɛ 'do wukonɔ ni, tɛ ga zuma do nga gɛlɛ vɛ̃. 14Nɛ Yuditɛ ga zuma we hã iɔ̃nae hã Gale dɛ li obe Israɛlɛ ni vɛ̃, nɛ wa vɛ̃ wa kɔ̃a nu zuma ni.
Currently Selected:
YUDITƐ 15: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.