Bambata Pai 26
26
Pa du Yisaka ku Gerara yo na Bera-saba yo
1Gberãngbi ki ti ku rogo gu ringara re, ku ri gu gberãngbi naadu rago Abarayama. Yisaka ki ndu ku Gerara yo, koyo du Abimereke ni nangia bakindo aFereseto. 2Yekova ki yugu tiko fu ko, ki ya, “Ka mo ndú nga ku Ezipeta yo ya; mo súngu kina rogo gu ringara mi ka gumba pa ha foro. 3Mo súngu rogo gi ringara re, mi ki du na mo, ki fu maku foro; bambiko mi afú agi aringara re foro dunduko, na fu angbatungaro. Mi adígisa gu zungahe mi azunga ha fu Abarayama nangia bamo. 4Mi angéesa angbatungaro wa kina akerekuru ngbangbaturũ yo, ki fu agi aringara re fu angbatungaro; rogo ngbatungaro i ka fu maku ni fu arikaaboro zegino dunduko: 5bambiko Abarayama anagia sangbare ki nika kuti gimi apai, na fugore, na gimi rugaapai, na gimi arugute.”
6Yisaka ki niraki Gerara yo. 7Akumba gu rago re ki sana ko tipa diako, ko ki ya, “Dawire nga ri”; bambiko ko agunde ka ya, “Diare nga ri”, niberẽ he ya, akumba gu rago re ka imo ko tipa Rebeka; bambiko ri adu adu mbuyumbuyu. 8Ho ko adu yo ni tipa gbanga rago, Abimereke bakindo aFereseto ki ngere ti bangiri bambu ki bi Yisaka ko ningi angi na diako nangia Rebeka. 9Abimereke ki yambu Yisaka, ki ya, “Atika, diaro nga ri; tipagine mo aya ti ni, ‘Dawire nga ri’?” Yisaka ki ya fu ko, “Bambiko mi aberẽ he ya, ‘Mi ka kpi tipa ri.’ ” 10Abimerake ki ya, “Gini pai nga gi mangi mo ho fu rani were? Ka gu boro ara na diaro gbua, ka mo agbe ngbanga ku ri rani.” 11Abimereke ki rugu gako aboro dunduko ki ya, “Gu boro ka mangi fu gi kumba re watadu diako gbegberẽ i aímo ni aimo.”
12Yisaka ki rũ tunga ahe rogo gu ringara re, ko ki ke he si ki susi gu ko arũ he wa bara kama ni kina gu gara re. Yekova ki fu maku fu ko. 13Gi kumba re ki du ni irakumuko, ki kpatari akpatari daho ko akumuko ni ki susi. 14Ko ki kumuko na rimbasa akandoro na rimbasa abagara, gako aborokporo ki nge ange ki susi, si du aFereseto ki nikpi ko akpi tipa ha. 15(Were agu aguga ga bako amoyambu ageteke he ti rago Abarayama nangia bako, aFereseto akisi he dunduko ki kpisidi he na sende.) 16Abimereke ki ya fu Yisaka, “Mo gúari ti rani ku sa yo; mbiko mo nyaki ki susi rani.”
17Si du Yisaka aguari yo ti ni, ki zi bataya rogo gu ngboongboorago nadu Gerara yo ki niraki ho. 18Yisaka ki geteke agu aguga berewe nga gu i ageteke he rago Abarayama nangia bako; bambiko aFereseto akisi he ki kpisidi he fuo kpio Abarayama; Yisaka ki yambu arimoho ti kina agu arimo bako ayambu he. 19Ga Yisaka amoyambu ki ge due rogo ngboongboorago ki bi gugaabi ho. 20Agu ababanda anya nadu Gerara yo ki poi apaa na agu ababanda anya nga ga Yisaka yo, niya, “Gaani ime du.” Si du ko yambu rimo gu gugaabi re nga Eseke, bambiko yo i apoi ni na ko. 21I ki ge kura guga berewe, i ki poi apaa tipa gure a; ko ki yambu rimoho nga Sitena. 22Ko ki guari yo ki ge kura guga, ka i apaa nga na ko tipa gure ya; ko ki yambu rimoho nga Robota, ki ya, “Bambiko Yekova mbakadi ba fu rani, ani nikazuga rogo gi ringara re.”
23Ko ki guari yo ki ndu ku Bera-saba yo. 24Ti kina gu yuru re Yekova ki yugu tiko fu ko ki ya, “Mi nga ga Abarayama Mbori nangia bamo; ka mo gúnde nga ya, bambiko mi du na mo, mi afú maku foro ki ngeesi ngbatungaro mbiko Abarayama nangia gi moyambu.” 25Ko ki dua bamotumo yo, ki kpari ti rimo Yekova, ki dua gako bamburoko yo. Yo ga Yisaka amoyambu age guga ni.
Pa mokido dagba Yisaka na Abimereke
26Fuo gure Abimereke ki guari Gerara yo na Auzata nangia badiangbako, na Fikora gako barutirivura ki ndu koyo du Yisaka ni 27Yisaka ki ya fu yo, “Tipagine ye oni ti ni kono du mi ni, wa oni nasoga re asoga ki do re ku sa yo ti roni?” 28I ki ya, “Ani bi he nzunzu ya Yekova du na mo; ani ki ya, ‘Awere zungahe dú dagba rani, dagba rani na mo, ani mángi mokido na mo, 29ya ka mo mángi nga rani gbegberẽ ya, a wa ani ata manga nga foro gbegberẽ ya kina manga foro wenengaĩ ki asia ro zezeredi’. Ga Yekova boro maku nga mo.” 30Ko ki mangi pumbo fu yo, i ki ri riahe ki mbiri he. 31Ngbatutu wiso i ki guari ki zunga he dagba yo; Yisaka ki asia yo. I ki guari pati ko zezeredi. 32Ni kina gu uru re ga Yisaka amoyambu ki ye koyo du ko ni na pa gu guga i age he, ki ya fu ko, “Ani ima da ti ime.” 33Ko ki yambu rimoho nga Siba; si du du rimo gu bakporo ti ni re nga Berasaba ki da ku awere.
34Ho gara Esau adu ni 40, ko ki di de nangia Yudita wiri Beri boro Eto, na Basemata wiri Erone nangia boro Eto; 35rago ki nigberẽ agberã ti a Yisaka na Rebeka mbiko gayo pai.
Currently Selected:
Bambata Pai 26: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
