Bambata Pai 27
27
Pa fu Yisaka maku fu Yakoba
1Ho Yisaka adu ni ni gbinza ko bangiriko ki du ni tataita ha, ka ko angera nga ngba ya, ko ki yambu Esau nga bambata wiriko, ko ki ya fu ko, “Wire”; ko ki karaga ha fu ko ki ya, “Mi du re.” 2Ko ki ya, “Mo ngére, mi gbinza awere; mi aina nga pa rago kpiore te. 3Were, mi nazungadi ro, mo dí ga ũnoanya na ga kpokoro, na ga mboto, ki ndu ku nvuo yo, ka gbata pasio fere. 4Mo ki mbakadi pasio fere ni nzinziri he, a wa mi akpi nyemu he, ki ye na ni fere mi ri he; mi fu maku mbata foro fu kpi mi.”
5Rebeka ki gi gi pai re ho Yisaka agumba ha ni fu Esau nga wiriko. Esau ki ndu ku nvuo yo ka gbata pasio ka ye na ni. 6Rebeka ki ta gumba pai fu wiriri nga Yakoba niya, “Mo ngére, mi nigi fugo bamo ko nigumba pai fu Esau nga unvuruamo, niya, 7‘Mo yé na pasio fere, ki mbakadi he ni nzinziri he, ya mi ri he, mi ki fu maku foro ku bara bangiri Yekova mbata fu kpi mi.’ 8Were, wire, mo mángi sangbare, a wa mi aruga ro na ni. 9Mo ndú awere ku dagba rimbasa anya yo, ki ye na wene wiri ameme yo ue fere; mi ki mbakadi ra ni wene nzinziri pasio fu bamo a wa ko akpi nyemu he. 10Mo ki ndu na ni fu bamo ko ri he ka fu maku foro mbata fu kpi ko.” 11Ono Yakoba ki ya fu Rebeka nga nako, “Mo ngére, Esau nga unvuruami nga amuamu kpotoboro, mi nga zezerenge kpotoboro. 12Ka ngia buba nikazada kpotore, mi ki du bangiriko ni irabiriki, mi adía motiwa ku ri re angia nga maku ya.” 13Nako ki ya fu ko, “Wire, ga motiwa adú kina ku ri re, mo mángi kina sangbare, ki ndu ka ye na ami fere.” 14Ko ki ndu ki rogo ra ki ye na ami fu nako. Nako ki mbakadi pasio ni nzinziri he a wa bako akpi nyemu he. 15Rebeka ki di ga Esau wene aroko nga bambata wiriri, nadu be ri dimo yo, ki ukadi Yakoba na ni nga kiaro wiriri; 16ri ki moi kpoto wiri ameme auru beko, na auru zezerenge goko. 17Ri ki fu nzinziri pasio nakpokuta, nga gu ri ambakadi he ku be wiriri nga Yakoba.
18Ko ki ye koyo du bako ni, ki ya, “Buba”; ko ki ya, “Mi du re; da nga mo, wire?” 19Yakoba ki ya fu bako, “Mi nga Esau nga bambata wiro. Mi mangi sangbaro a wa mo nirugu re na ni. Mi nazungadi ro, mo gúari ki sungu ka ri gi pasio, ki fu maku fere.” 20Yisaka ki ya fu wiriko, “Wire, si niwiri pa ipo foro waĩ mo nibi he ti ni ni ipo?” Ko ki karaga ha ki ya, “Bambiko Yekova nga ga Mbori niipisi he fere.” 21Yisaka ki ya fu Yakoba, “Wire mi nazungadi ro, mo yé ki mbedi na mi, mi zadi ro, si ngia ndikidi wire nga mo nga Esau, watadu ko te.” 22Yakoba ki ye ki mbedi na Yisaka nga bako. Ko ki zadi ko, ki ya, “Fugoro nga fugo Yakoba, ono bero du wa ga Esau.” 23Ka ko aruga nga tiko na pa ko ya, bambiko beko adu amuamu wa kina be unvuruako nga Esau; si du ko afu maku ti ni fu ko. 24Ko ki ya, “Ndikidi wire nga mo, nga Esau?” Ko ki ya, “Mi du.” 25Ko ki ya, “Mo yé na ni kono, mi ri ga wire pasio, mi fu maku foro.” Ko ki ye na ni fu ko, ko ki ri he. Ko ki ye na imekakue fu ko, ko ki mbiri he. 26Yisaka nga bako ki ya fu ko, “Wire, mo yé kono ki nyoro pa ngbare.” 27Ko ki ye ki nyoro pa ngbako; ko ki gi fuõ gako roko, ki fu maku fu ko, ki ya,
“Mo bí nga, fuõ wire
wa kina fuõ gu ati Yekova afu maku fu he!
28Mbori fú gu ndomo nga ga ngba ngbaturũ foro,
na gu kumuko nga ga kpotosende,
na zende ahe na imekakue kpaima.
29Angbatunga aboro nirá foro;
arikaaboro nitúmusa ku sande foro.
Mo dú ni gbia fu awirinamo,
awirinamo nitúmusa ku sande foro.
Agu aboro ka atiwa ro i dú adu ni tiwatiwa yo,
agu aboro ka afu maku foro, i adía maku!”
30Si ki ta du wa gere, wa Yisaka adigisi pa fu maku fu Yakoba, ka Yakoba ata turã nga pati bako nga Yisaka ya, Esau ki yega gene manga anya yo nga unvuruako. 31Ko ki mbakadi nzinziri pasio a, ki ye na ni fu bako. Ko ki ya fu bako, “Buba, mo gúari ka ri ga wiro pasio, ya mo fú maku fere.” 32Bako ki ya fu ko, nga Yisaka, “Da nga mo?” Ko ki ya, “Mi nga wiro nga bambata wiro, nga Esau.” 33Yisaka ki kigi akiga bakere gbe, ki ya, “Da nga gu ni nidi pasio ki ye na ni fere, mi ki ima ri he dunduko mbata fu ye mo, ki fu maku fu ni? ― ii, maku adú fu ni ni rengo.” 34Ho Esau agi agu apai ni bako ape he fu ko, ko ki poi ku ari ni bakere kpe ni nunga, ki ya fu bako, “Ako buba, mo fú maku fere, fu kina re a.” 35Ono ko ki ya, “Wirinamo niima ye ni biriki, ki di ga maku.” 36Esau ki ya, “A nga ko i ayambu rimoko nga Yakoba nzunzu te? Bambiko ko di be re bara ue awere. Ko adi gi pa dukuri ũkumbo be re mbata; mo ngére, awere ko di gi maku a.” Ko ki ya, “Mo naiga nga maku tipa re te?” 37Yisaka ki karaga ha ki ya fu Esau, “Mo ngére, mi sa ko ni bairaro, mi fu awirinako dunduko fu ko ni gako azogo. Mi kumukosi ko na zende ahe na imekakue. Gini pai tie mi ka manga ha foro, wire?” 38Esau ki ya fu bako, “Ako buba, maku be ro wa kina sa te? Ako buba, mo fú maku fere, fu kina re a.” Esau ki poi ku ari ki nikpari ni aume.
39Yisaka ki karaga ha nga bako ki ya fu ko; “Mo ngére, mo nikaraka tuturu na gu kumuko nga ga kpotosende,
na ti gu ndomo nati ngbangbaturũ yo.
40Mo aráka mbiko ga basape,
ono mo ará fu tamero;
ho mo ka kura ni ni riro,
mo abá gako gonga ti goro.”
Pa keda Yisaka ku Arana yo
41Esau ki nisogo Yakoba tipa gu maku bako afu fu ko, Esau ki ya ku kpotoko yo, “Rago kpara buba nambeda; mi ki imi tamere nga Yakoba.” 42I ki gumba pa agu apai fu Rebeka nga ga Esau nangia bambata wiriri. Ri ki kedi sunge ki yambu Yakoba nangia kiaro wiriri, ki ya fu ko, “Mo ngére, unvuruamo nga Esau ko nazeresa ngbaduko tipa ga pai, niberẽ pa imoro. 43Awere wire, mo mángi sangbare; mo gúari, ki oro koyo du Rabana ni, nga kawire du Arana yo, 44ka sunga yo du ko ni ngbutunko, daho ga unvuruamo erá ka zera ni; 45daho ga unvuruamo zinga kuti ro ka go ni, bangiriko ki go ti gu pai mo amangi ko na ni. Mi akéda sunge, i yega na mo yo. Tipagine mi ka zanga roni ti ni ue rogo uru sa?”
46Rebeka ki ya fu Yisaka, “Omere bati tipa awiri aEto nga ade. Ka Yakoba di de dagba awiri aEto, nga boro gi ringara re, rago wiri pa ngba waĩ ti re?”
Currently Selected:
Bambata Pai 27: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
