Bambata Pai 35
35
Pa fu Mbori maku fu Yakoba Betere yo
1Mbori ki ya fu Yakoba, “Mo gúari, ki ndu ku Betere yo, ki sungu yo; ki dua bamotumo yo fu Mbori, nga gu ko nayugu tiko foro ho mo aora ni be bangiri Esau nga unvuruamo.” 2Si du Yakoba ki ya fu gako aborokporo na agu yo nadu na ko dunduko, “Oni báfu gu kungba ambori du dagba roni ku sa yo, oni ki kpara tironi ziazia ki unda gaoni aroko; 3ani gúari ka ndu nga ku Betere yo, yo mi ka dua bamotumo ni fu Mbori, nga gu ko nakaraga pai fere, ni gu rago mi adu ngba pai, ki nidu na mi ho mi anindu ku ho ni.” 4I ki fuku gu kungba ambori nadu be yo dunduko fu Yakoba, na agu atongo naadu ti atuyo; Yakoba ki kpisidi ra ku tii gu gero yo naadu Sekeme yo.
5I ki ndu gayo nduge, bakere gunde ti Mbori ki du adu rogo agu abaakporo nadu pati yo kirikiri, ka i ado nga fuo awiri Yakoba ni zuu ya. 6Si du Yakoba aye ti ni ku Ruza yo, du ringara Kanana yo, si nga Betere, ko na agu aboro dunduko nadu na ko 7Ko ki dua bamotumo yo, ki yambu rimo gu ba re nga Ere-betere, bambiko yo Mbori ayugu tiko ni fu ko, ho ko aora ni be bangiri unvuruako. 8Debora nangia gu de nambuti Rebeka ki kpi, i ki kpisidi ri tii gu gero nadu mbembedi na Betere; i ki yambu rimoho nga Aronabakuta.
9Mbori ki yugu tiko berewe fu Yakoba ho ko ayega ni Padana-arama yo, ki fu maku fu ko. 10Mbori ki ya fu ko, “Rimoro ningia Yakoba; i ayámba nga rimoro berewe nga Yakoba te, ono Yisaraere nikangia rimoro.” Ko ki yambu rimoko nga Yisaraere. 11Mbori ki ya fu ko, “Mi nga Mbori du na tandu apai dũ: Mo zúga ki nge ange; rikaaboro aénga ti ro, na rimbasa arikaaboro a, abakindo ki kuru rogo ro yo. 12Gu ringara mi afu he fu Abarayama na fu Yisaka mi afú he foro; mi afú gu ringara re fu ngbatungaro fuo ro a.” 13Mbori ki guari pati ko rogo gu ba re ho ko afura ni na ko ki ga. 14Yakoba ki dua mbia ku ari rogo gu ba ho i afura ni na ko, ni duadua mbia ki uka motumo mbirimbiri he ku ri he, ki uka nzeme ku auru he a. 15Yakoba ki yambu rimo gu ba Mbori afura rogo ho na ko nga Betere.
Pa kpio Raere
16I ki guari Betere yo na gayo nunguro. I ki turũ ti Efurata ngbutuko, Raere ki niimi aima be vungu, gude ki nimangi ri amanga gbe. 17Ho gude amanga ri ni gbe, nasamba ki ya fu ri, “Ka mo gúnde nga ya; mbiko awere mo nikabatika kura kumbagude.” 18Fuo gure, ho mbisimori aguari ni ti ri bambiko ri akpi, ri ki yambu rimoko Beneoni; ono bako aya ti ko Benyamina. 19Raere ki kpi, i ki kpisidi ri ngba gene Efurata yo, si nga Betereme. 20Yakoba ki dua mbia ri murãri; si nga kina gu mbia du ri murã Raere daku awere. 21Yisaraere ki ndu gako nduge ku mbata yo, ki dua gako bamburoko ku gii gbanga basona bambu Edere yo.
Pa awiri Yakoba
(1 Peka 2:1-2)
22Si ki ta du wa gere wa Yisaraere araka rogo gu ringara re, Rubena ki ndu ki ra na Bira nangia ga bako debadia; Yisaraere ki gi he.
Awiri Yakobaadu 12 niakumba. 23Awiri Rea du re: Rubena, nga bambata wiri Yakoba, Simona, Revi, Yuda, Yisasakara, na Zeburuna. 24Awiri Raere: Yosefa na Benyamina. 25Awiri Bira ga Raere kanga: Dana na Nafatari. 26Awiri Zirepa ga Rea kanga: Gada na Asera. Agi yo re nangia awiri Yakoba nga agu yo i abatika yo fu ko Padana ― arama yo.
Pa kpio Yisaka
27Yakoba ki da koyo du Yisaka ni nangia bako ku Mamare yo, ku Kiriyata-aruba yo, si nga Eburone, yo Abarayama na Yisaka anaraka ni. 28Garã Yisaka adu 180. 29Rame Yisaka ki rengbe ko ki kpi; toroko ki ga koyo du atitako ni, kuru gbinza kumba nangia ko garãko ange ange ki susi. AEsau na Yakoba ki kpisidi ko nangia awiriko.
Currently Selected:
Bambata Pai 35: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
