Ruka 3

Ga Yoane Babapatiza tungusapai

(Mt. 3:1-12; Mk. 1:1-8; Yo. 1:19-28)

1Were ti gu bawe na bisue garã nga ga ga Tiberia Kaisara zogarago, Pondio Pirato ki du ni bazogorago Yuda yo, Erode ki du ni bazogorago Gariraya yo, wirinako nangia Firipo ki du ni bazogo gu ringara nga Ituraya na Turakoniti, Rusania ki du ni bazogorago Abirene yo, 2ni gu rago Ana adu ni gbiamotumo na Kayafa, sangba Mbori ki ye fu Yoane ngbakungba yo nangia wiri Zakaraya. 3Ko ki ta ye rogo gu ringara nadu pavuru Yaradene kirikiri dunduko nitungusi pa gu bapatiza nga ga saberã sa vu boro ti ingaapai. 4Wa du he ni keke he rogo gu kitabu nga ga ga Yesaya pai nangia nebi,

“Fugo boro napaa ngbakungba yo: ya

Oni mbákadi ga Gbia gene,

oni rúrugu gako agene.

5I ahísa ngboongboo arago dunduko,

i ki zogo abaagangara azoga na agangara dunduko,

iraira ahe ki du ni ruru he,

keteruketeru agene ki du adu ni kpasakpasa ha,

6aboro abí ga Mbori bata abi dunduko.”

7Si du ko aya ti ni fu gu rimbasa aboro naakura ko bapatizi yo, “Oni, awiri awo! Da rugu roni oni oro be gu zinga nikaye? 8Oni zúku rindi ngua tie rengbe na saberã, ka oni tona nga ka ya ku kpotoroni yo, ‘Ani na barani nga Abarayama ya’; bambiko ya mi fu roni, Mbori rengbe na sa agi ambia asa re si du ni awiri Abarayama. 9Wa du rago re a i moi mangua ti tarã angua; si du i adéwa agu angua adewa ti ni dunduko azu nga wene zuzuhe ya, ki bafu he ku we yo.” 10Rimbasa aboro ki sana ko, ki ya, “Ani amánga wãi tie?” 11Ko ki karaga ha ki ya fu yo, “Gu ni na abaukadi be ni ue, ni fu gu fu gu ni adu nga ha be ni ya; gu ni du riahe be ni, ni mangi kina wo.” 12Abarogo marã ngbeti ki ye a ko bapatizi yo, i ki ya fu ko, “Bayugupai, ani amánga wãi?” 13Ko ki ya fu yo, “Oni rogo kina gu i aringbisi he fu roni.” 14Abanzengere ki sana ko a ki ya, “Ani amánga wãi tigaani?” Ko ki ya fu yo, “Ka oni zúba nga boro wa sa ya, ka oni kíti nga ngbanga boro gbua a ya; oni súngu zezeredi na gaoni mosoro.”

15Wa aboro aza ka angera, aboro ki saki pa Yoane kpotoyo yo dunduko, ya si ngia Kristo nangia ko. 16Yoane ki ta karaga ha niya fu yo dunduko, “Mi nabapatizi roni ni ime ni rengo; ono gu ko nikaye ko nga bahe ti re, mi are nga na zaka giri gako rakata te; ko abapatizi roni ni Ziazia Toro na we. 17Gakoũigita ahe du be ko, ko agirisa gako bataka zendeahe, ki ndukudi gako zendeahe ku rogo gako gbamu; ono umuhe ko ka zo ho ni gu we ka abisa nga ya.”

18Ko atungusi wene pangbanga tie fu aboro, ki nizungadi yo na dungu kura apai. 19Ono Erode nangia bazogo, gu ko Yoane aza ko tipa Erodia nangia dia wirinako, na tipa gu gbigbita apai dunduko Erode anamanga, 20ko ki moi gere ti ri he dunduko, nga ko akisi Yoane ku bambukisa yo.

Bapatiza Yesu

(Mt. 3:13-17; Mk. 1:9-11)

21Si ki du wa gere, ho i abapatizi aboro ni dunduko, i ki bapatizi Yesu a, wa ko akpari, ngbangbaturũ ki za, 22Ziazia Toro ki zorõ wa kpia mbipo, fugo ki ye ngbangbaturũ yo niya, “Mo nga Wire, nyemuro namanga re; ngba mo ti re gbe.”

Ngbatunga Yesu koyo du nako ni

(Mt. 1:1-17)

23Yesu tigako, ho ko atona ka tungusa pai ni, garãko adu wa 30, ko nangia wiri Yosefa, wa aboro aberẽ he tigayo. Yosefa nangia wiri Eri, 24Eri nangia wiri Matata, Matata nangia wiri Revi, Revi nangia wiri Mereki, Mereki nangia wiri Yana, Yana nangia wiri Yosefa, 25Yosefa nangia wiri Matatia, Matatia nangia wiri Amosa, Amosa nangia wiri Nauma, Nauma nangia wiri Eseri, Eseri nangia wiri Naga, 26Naga nangia wiri Mata, Mata nangia wiri Matatia, Matatia nangia wiri Simi, Simi nangia wiri Yoseke, Yoseke nangia wiri Yoda, 27Yoda nangia wiri Yoana, Yoana nangia wiri Resa, Resa nangia wiri Zerubabera, Zerubabera nangia wiri Saratiere, Saratiere nangia wiri Nere, 28Nere nangia wiri Mereki, Mereki nangia wiri Adi, Adi nangia wiri Kosama, Kosama nangia wiri Eremadama, Eremadama nangia wiri Ere, 29Ere nangia wiri Yesu, Yesu nangia wiri Eriezere, Eriezere nangia wiri Yorima. Yorima nangia wiri Matata, Matata nangia wiri Revi, 30Revi nangia wiri Simona, Simona nangia wiri Yuda, Yuda nangia wiri Yosefa, Yosefa nangia wiri Yonama, Yonama nangia wiri Ereyakima, 31Ereyakima nangia wiri Merea, Merea nangia wiri Mena, Mena nangia wiri Matata, Matata nangia wiri Natana, Natana nangia wiri Dawidi, 32Dawidi nangia wiri Yisai, Yisai nangia wiri Obede, Obede nangia wiri Boaza, Boaza nangia wiri Saramona, Saramona nangia wiri Nasona, 33Nasona nangia wiri Aminadaba, Aminadaba nangia wiri Aruni, Aruni nangia wiri Eserone, Eserone nangia wiri Perese, Perese nangia wiri Yuda, 34Yuda nangia wiri Yakoba, Yakoba nangia wiri Yisaka, Yisaka nangia wiri Abarayama, Abarayama nangia wiri Tera, Tera nangia wiri Naora, 35Naora nangia wiri Seruga, Seruga nangia wiri Ru, Ru nangia wiri Perege, Perege nangia wiri Ebare, Ebare nangia wiri Sera, 36Sera nangia wiri Kenana, Kenana nangia wiri Arufakasada, Arufakasada nangia wiri Seme, Seme nangia wiri Noa, Noa nangia Wiri Remeke, 37Remeke nangia wiri Metusara, Metusara nangia wiri Enoka, Enoka nangia wiri Yarede, Yarede nangia wiri Maararere, Maararere nangia wiri Kenana, 38Kenana nangia wiri Enosa, Enosa nangia wiri Sete, Sete nangia wiri Adama, Adama ki angia wiri Mbori.

Currently Selected:

Ruka 3: ZB1978

Highlight

Copy