Ruka 4

Asada Yesu

(Mt. 4:1-11; Mk. 1:12-13)

1Yesu ki ta hi be Ziazia Toro, nikaraga tiko Yaradene yo, Ziazia Toro ki ngbe mbata yo fu ko ku ngbakungba yo, 2rame ki du 40, bakitingbanga niasadi ko. Ko ari nga he ni gu rago te re. Ho si anyasi ni gomoro ki mangi ko amanga. 3Bakitingbanga ki ya fu ko, “Si ngia Wiri Mbori nga mo, mo yá nga fu gi mbia re si du ni riahe.” 4Yesu Ki karaga ha fu ko ki ya, “Si ni keke he ya, ‘Boro anye nga ni ungani mbiko kina riahe te.’ ” 5Bakitingbanga ki ngbe mbata yo fu ko ku ri gbanga bagangara ki yugu angbi zegino dunduko fu ko ni ba sa. 6Bakitingbanga ki ya fu ko, “Mi afú gi tandu foro dunduko re na gaha taarimo; bambiko i afu he ku bere; mi ki fu he fu gu ni idi mi ka fu he fu ni. 7Ka mo irisi re tie, si du adu ni gamo dunduko.” 8Yesu ki karaga ha ki ya fu ko, “Si ni keke he ya, Mo

‘Mo írisi Gbia nga gamo Mbori,

mo ra fu kina ko sa.’ ”

9Ko ki ngbe mbata yo fu ko ku Yerusarema yo, ki moi ko ti ngbahõ yekaru, ki ya fu ko, “Si ngia Wiri Mbori nga mo, mo gíta ku sende; 10bambiko si ni keke he ya,

‘Ko arúga gako amaraika tipa ro, i banda ro,’

11I asóngoda ro ni beyo,

‘mo ka fo nduro ti mbia.’ ”

12Yesu ki ta karaga ha niya fu ko, “I agumba ha ya, ‘Ka mo ásadi nga Gbia nga gamo Mbori ya.’ ” 13Ho bakitingbanga anyasi asadapai ni dunduko ko ki guari pati ko tipa toni rago.

Yesu atona gako mangapai Gariraya yo

(Mt. 4:12-17; Mk. 1:14-15)

14Yesu ki karaga tiko ni gu tandu nga ga Ziazia Toro ku Gariraya yo. Gako pangbanga ki gbandaka agbandaka rogo ringara kirikiri dunduko. 15Ko ki niyugu pai rogo abambutiria yo: aboro nitaasi rimoko dunduko.

I agindiga Yesu Nazareta yo

(Mt. 13:53-58; Mk. 6:1-6)

16Ko ki ye ku Nazareta yo, yo i asonosi ko ni. Ko ki rimi ku bambutiria yo rago sabiti, wa sinoko anidu, ki ru ku ari ka geda pai. 17I ki fu gu kitabu fu ko nga ga Yesaya, ko ki ba waraga ki gbata ho si adu ni ni keke he were,

18“Ga Gbia Toro ti re,

bambiko ko auka nzeme ku ri re mi tungusi wene pangbanga fu rungorungo aboro.

Ko akedi re mi gumba pa kusa kisikisi aboro fu kina yo,

na pa hahasa bangiri airavurari,

ka kusa agu aboro du ni rungosi-rungosi yo,

19ki nitungusi pa garã ga Gbia inapai.”

20Ko ki kisi kitabu, ki gasi he fu babandaha, ki sungu. Aboro dunduko bambutiria yo ki dungura bangiriyo ki nibi ko. 21Ko ki tona ya fu yo, “Areme da gi Ziazia Kekeapai re ti rengo ku turoni yo.” 22Aboro ki gi gako pai dunduko, ki nibaki bangiriyo mbiko gu iiriwo wene apai naakura ngbako yo. I ki ya, “Wiri Yosefa nga gi kumba te re?” 23Ko ki ya fu yo, “Oni agúmba gi pai re fere te? ‘Munganga, mo húsi tiro. Agu apai ani agi he ya mo amangi he Kaparanauma vo, mo mángi he erẽ rogo ga ringara a.’ ” 24Ko ki ya, “Mi nagumba ha fu roni ni rengo, i adia nga nebi ku gume rogo gani ringara wa sa te. 25Mi nagumba ha fu roni ni rengo, dungu adekurugbo adu Yisaraere yo rago Eriya, ho i akisi ngbangbaturũ ni garã ki du biata na diwi sita, ho bakere gberãngbi adu ni rogo ringara yo dunduko; 26ka i akeda nga Eriya koyo du gu ni ni wa sa ya, kina ku Sarefata yo du ringara Sidona yo, koyo du dekurugbo ni. 27Dungu aboro ngbataka adu Yisaraere yo rago Erisa nangia nebi; ka i ahusa nga gu ni wa sa ya, kina Namana nangia boro Suria.” 28I ki hi ahi be zinga dunduko bambutiria yo, wa i agia pa agi apai re; 29i ki ru ku ari ki di ko ti bakporo ku zegi yo, ki ngbe mbata yo fu ko ku ri gu bagangara i amoi gayo bakporo auru he, ka ba ko ni gorõko. 30Ono ko ki susi asusa dagba yo ki nindu gako nduge.

Kumba na gbigbita toro

(Mk. 1:21-28)

31Ko ki zorõ ku Kaparanauma yo nga gu kporo nga ga Gariraya. Ko ki ta yugo apai fu yo rago sabiti. 32Gako yugopai ki niiriwo airiwo ti yo; bambiko gako pai adu na tandu ti ni. 33Kumba ki du bambutiria yo nadu na gu toro nga ga gbigbita daimona ti ko, ko ki poi ku ari ni bakere fugo, 34“Ako, gine ani amánga na mo, mo nga Yesu, nga boro Nazareta? Mo ye ka gbarasa rani? Mi ini ro, mo nga gu Ziazia Ko nga ga Mbori Ko.” 35Yesu ki za ko ki ya, “Mo óngo, ki guari ti ko.” Ho daimona aba ko ni ku sande dagba yo, u ki guari ti ko, ka u aimisa nga ko ya. 36Iriwoho ki ti ti aboro dunduko i ki fura dagba yo, gu ni ki ya fu gu ni. “Gine nga gi pai re? Bambiko ko naruga gbigbita atoro niasia pai na tandu, ami ki kuru.” 37Gako pangbanga ki gbandaka agbandaka ku rogo arago rogo gu ringara kirikiri dunduko re.

Yesu ahusi dungu aboro

(Mt. 8:14-17; Mk. 1:29-34)

38Ko ki guari bambutiria yo, ki rimi ku rogo ga Simona bambu yo. Were kaza narungudi kuti nagbio Simona gbe; i ki kpari fu ko tipa ri. 39Ko ki ru pati ri, ki za kaza; si ki guari ti ri; ri ki ru ku ari ni ba sa ki mangi pa yo.

40Ho uru ati ni, i ki ye na gayo aboro kaza nakaza be ngbatunga akaza fu ko; ko ki moi beko auru yo ni ba sa sa, ki husi yo. 41Adaimona ki ta guari ti dungu aboro a, nipoi ku ari, niya, “Wiri Mbori nga mo!” Ko ki za ra, ka ko aida nga ami fura ya, bambiko ami aini he ya Kristo nga ko.

Yesu ata tipa tungusa pai

(Mk. 1:35-39)

42Ho rago agiri ni ko ki kuru ki merẽ ku ngbakungba yo. Rimbasa aboro ki gbata ko, ki ye koyo du ko ni, ka i aida nga ko guari pati yo ya. 43Ko ki ya fu yo, “Mi nandu ka tungusa gu wene pangbanga nga ga ga Mbori ngbi rogo kura akporo a; bambiko si du i akedi re tipa ha.” 44Ko ki nitungusi pai atungusa rogo agu abambutiria nga ga Gariraya.

Currently Selected:

Ruka 4: ZB1978

Highlight

Copy