Ruka 5

Zia dungu atĩo

(Mt. 4:18-22; Mk. 1:16-20)

1Si ki ta du wa gere, ya wa aboro agbisa fuo Yesu ka gia ga Mbori pai, ko ki ru pangba gu baime nga Genesareta. 2Ko ki bi akurungba ue ti ngba gango baime; abaziatĩo nakuru rogo ho, ki nigirisi gayo apio. 3Ko ki zorõ ku rogo gu kurungba yo sa, gu nga ga Simona, ki ya fu ko ko turã ha pangba baime ngbutuko. Ko ki sungu kurungba yo ki niyugu pai fu rimbasa aboro. 4Ho ko ambu fugo ni, ko ki ya fu Simona, “Mo túrã ha ku dudungura ime yo, ki zumu gaoni apio ka zia atĩo.” 5Simona ki ta karaga ha fu ko niya, “Baira, ani amangi he yuru sasasa vurũ ka ani azia nga ra wa sa ya; ono mbiko kina sangbaro mi nikazumo apio ti ni.” 6Ho i amangi gi pai ni re, i ki zi dungu atĩo gbe; gayo apio ki nisipi asipa. 7I ki baya gayo abadia sunge nadu rogo kura kurungba yo i ye ka unda yo. I ki ye ki hisi akurungba ue, akurungba ki tona ka rinda. 8Simona Petero ho ko abi he ni, ko ki ta ti pati ndu Yesu, niya, “Ako Gbia, mo gúari ti re; bambiko boro ingapai nga mi.” 9Bambiko si airiwo airiwo ti ko, na ti agu aboro nadu na ko dunduko mbiko gu dungu atĩo i azi ra; 10na ti a Yakoba na Yoane a, nangia awiri Zebedayo nadu ni abadia Simona. Yesu ki ya fu Simona, “Ka mo gúnde nga ya; mo nikazia aboro ni ungayo ku mbata yo.” 11Ho i agara gayo kurungba ni kuti ngba gango ime, i ki mbu ahe dunduko ki nipeke ko.

Yesu ahusi boro ngbataka

(Mt. 8:1-4; Mk. 1:40-45)

12Si ki ta du wa gere, ho ko adu ni rogo gu bakporo, mo ngére, kumba adu yo na kinaku ngbataka. Ho ko abi Yesu ni, ko ki vagadi sande, ki ta kpara fu ko, niya, “Gbia, ka mo kpi nyemu he mo húsi re ahusa.” 13Yesu ki tãi beko, ki ta zada ko, niya, “Mi nakpi nyemu he, mo hú.” Ngbataka ki go ago ti ko ni ba sa. 14Ko ki rugu ko ka ko gumba nga pa ha fu boro wa sa ya. Ono ko ki ya “Mo gá, ki yugu tiro fu boromotumo ki tumo wa mo nahu, a wa Mose arú ndika tipa ha, mbiko yugopai fu yo.” 15Onogako pangbanga ki gbandaka agbandaka ki susi. Bakere rimbasa aboro ki tiria ka gia pai, na ka hu be gayo akaza. 16Ono ko ki guari ni sa ko ku ngbakungba yo, ki kpari.

Yesu ahusi boro ngbaramoni

(Mt. 9:1-8; Mk. 2:1-12)

17Si ki ta du wa gere ni gu rago re, ko ayugu pai; aFarusi ki sungu kina ho na ababio rugute, i akuru rogo akporo Gariraya yo dunduko na Yuda yo na Yerusarema yo. Ga Gbia tandu ki du ti ko ko husi aboro. 18Mo ngére, akumba ki ye na boro auru gbada ngbaramoni azi ko. I ki asadi rimisa ko, ka piga ko barangba Yesu. 19Ka i aina nga gu pai ka i mangi ka rimisa ko be rimbasa aboro ya, i ki dakpa ku ri bambu yo, ki zaki he, ki zogo ko na gako gbada ku dagba aboro ku barangba Yesu. 20Yesu ki bi yo i naidi pa ko, ko ki ya, “Kumba, i vu ro ti ga ingaapai.” 21Abakeapai ki tona saka ha na aFarusi, mva, “Da nga gi boro nagberã ngbani yo re? Da ka vu boro ti ingaapai, wa du kina Mbori sa?” 22Ono Yesu ki ini gayo berã, ki karaga ha ki ya fu yo, “Gini pai oni asaka ha kpotoroni yo? 23Watadu ya mi, ‘I vu ro ti ga ingaapai;’ na ya mi, ‘Mo gúari ki merẽ,’ gini gu ipi? 24Ono ka oni ini ya Wiri boro rengbe tanduko na vu boro ti ingaapai auru kpotosende” ko ki ya fu boro ngbaramoni, “Ya mi foro, mo gúari, ki di ga gbada ki ga ku kpuro yo.” 25Ko ki mo amo ku ari ni ba sa barangba yo, ki di gu he ko api auru he ki ta ga ku kpuko yo, nitaasi rimo Mbori. 26Iriwoho ki ti ati ti yo dunduko, i ki taasi rimo Mbori; gunde ki zi yo, i ki ya, “Am bi iiriwo apai areme.”

Yesu ayambu Revi

(Mt. 9:9-13; Mk. 2:13-17)

27Fuo agi apai re Yesu ki kuru, ki bi barogo marã ngbeti, rimoko nangia Revi, ko nisungu rogo gu ba i anafu marã ku ho ni, ko ki ya fu ko, “Mo nipéke re.” 28Ko ki mbu ahe ambu dunduko, ki guari, ki nipeke ko.

29Revi ki mbakadi bakere pumbo fu ko kpuko yo. Bakere rimbasa abarogo marã ngbeti adu kina yo na kura aboro a nasungu ka ri riahe na yo. 30AFarusi na gayo abakeapai ki gumba rimo ga Yesu abawiriki, ki ya, “Tipagine oni nari riahe ti ni ki nimbiri he na abarogo marã ngbeti na aboro ingapai?” 31Yesu ki ta karaga na fu yo niya, “Agu aboro du zezeredi zingo munganga amanga nga yo te; kina agu yo du na kaza. 32Mi aye nga ka yamba ruru aboro te, ono kina aboro ingapai i sa gayo berã.”

Sanahe tipa gina riahe

(Mt. 9:14-17; Mk. 2:18-22)

33I ki ya fu ko, “Ga Yoane abawiriki nagina riahe dedede, ki nikpari kpe; ga aFarusi abawiriki namanga kina wo a; ono gamo yo nari riahe ari ki nimbiri he.” 34Yesu ki ya fu yo, “Ka oni ya aboro kporo diade gina riahe ni gu rago kumba ku de nidu na yo? 35Ragoho nikada; ho i ka dia kumba ku de ni be yo, i ki nigina riahe agina ni gu rago re.” 36Ko ki gumba sanza fu yo a; “A nga boro sa ka siri vovo remu ki moi he ti kuru remu te; bambiko si ka sira vovo ho asira, vovo ho aida nga na kuru he a te. 37A nga boro sa ka uka vovo imekakue ku rogo kuru amangu imekakue yo te; vovo imekakue ka sipa amangu asipa, si ki ukaga aukaga, amangu ki gberẽ. 38Ono i nauka vovo imekakue kina ku rogo vovo amangu imekakue yo. 39A nga boro sa ka mbiri kuru imekakue nikpi nyemu vovo ho te bambiko ni aya, ‘Kuru he ngba.’ ”

Currently Selected:

Ruka 5: ZB1978

Highlight

Copy