Ruka 7
7
Yesu ahusi ga barukuri aboro 100 moyambu
(Mt. 8:5-13)
1Ho Yesu anyasi gako tungusapai ni dunduko ku tu aboro yo, ko ki rimi ku Kaparanauma yo.
2Ga gu barukuri aboro 100 moyambu, nangba ti ko gbe, ki kaza, wa ko nikakpi. 3Ho ko agi pa Yesu ni, ko ki kedi ga aYudo abaakumba koyo du ko ni, ki kpari fu ko, ko ye ka batasa gako moyambu. 4Ho i aye ni koyo du Yesu ni, i ki ta kpara fu ko gbe, niya, “Ngba ringiko gbe, mo mángi gi pai re fu ko; 5bambiko nyemu rikarani namanga ko gbe, ko nadua gaani bambutiria tigako fu rani.” 6Yesu ki ndu na yo, ho ko ambedi ni na bambu, barukuri aboro 100 ki dedi abadiako koyo du ko ni niya fu ko, “Gbia, ka mo fúdi nga tiro ya; bambiko mi are nga na rima mo ku tii gi bambu yo te. 7Si du mi aya ti ni tigimi, mi are nga na ye koyo du mo ni te; ono mo gúmba kina pai, gi moyambu ki bati. 8Bambiko zogo yo re azoga a, mi naruga abazengere aruga: mi ki ya fu gu ni sa, ‘Mo ndú,’ ni ki ndu andu; fu gu ni, ‘Mo yé,’ ni ki ye aye; fu gi moyambu, ‘Mo mángi gere,’ ni ki mangi he amanga.” 9Ho Yesu agi agi apai ni re, si ki iriwo airiwo ti ko mbiko gu barukuri aboro, ko ki sa tiko ki niya fu gu rimbasa aboro naapeka ko, “Ya mi fu roni, mi abi nga bakere idapase wa gere mbata te, oó, dagba aYisaraere a te.” 10Agu aboro i akedi yo, i ki nikaraga tiyo ku bambu yo, ki bi gako moyambu ko nahu.
Yesu azingisi paranga be kpio Naina yo
11Si ki ta du wa gere fuo ho mbembedi, Yesu ki ndu ku rogo gu bakporo rimoho nangia Naina; gako abawiriki ki mongo ndu na ko, na bakere rimbasa. 12Ho ko ambedi ni ku ngbadimo bakporo, mo ngére, i atindi kangba boro ku zegi yo, nangia bangisa gude be nako, dekurugbo nangia ri. Aboro bakporo ki du na ri ni dungu yo. 13Ho Gbia abi ri ni, nungari ki nimangi ko amanga, ko ki ya fu ri, “Ka mo kpári nga ya.” 14Ko ki mbedi ki zadi raga: agu aboro naatindahakiruaruza. Kokiya, “Paranga, ya mi foro, mo gúari.” 15Gu ko nakpi ko ki guari, ki tona ka fura. Ko ki fu ko fu nako. 16Gunde ki zi aboro azia dunduko; i ki ta taasa rimo Mbori, niya, “Bakere nebi kuru ku dagba rani!” na, “Mbori yé ka bi gako aboro!” 17Gako pangbanga ki gbandaka agbandaka ku rogo Yuda yo dunduko, na ku ringara yo dunduko kirikiri.
Ga Yoane Babapatiza abawiriki asana Yesu
(Mt. 11:2-19)
18Ga Yoane abawiriki ki gumba pa agi apai fu ko dunduko re. 19Yoane ki yambu gako abawiriki ue koyo du ko ni, ki ta keda yo koyo du Gbia ni, niya, “A ngia gu ni naye nga mo, na ani ka ngera ti gu kura ni?” 20Ho akumba aye ni koyo du Yesu ni, i ki ya, “Yoane Babapatiza ata keda rani kono du mo ni, niya, ‘A ngia gu ni naye nga mo, na ani ka ngera ti gu kura ni?’ ” 21Ti gu rago re Yesu nihusi dungu aboro be kaza na kere akaza na gbigbita atoro; ko ki fu ngera fu agu yo nangia airavurari. 22Ko ki karaga ha ki ya fu yo, “Oni gá, ki gumba pa agu apai fu Yoane oni abi he ki nigi he; airavurari nangera, airaterenga nata, airangbataka nahu, airangbianga ki nigi pai, kangba aboro ki nizingi, i nitungusi wene pangbanga fu rungorungo aboro. 23Boro maku nga gu ni abi nga ũkota ti re ya!” 24Ho ga Yoane asunge aga ni, Yesu ki tona ya fu rimbasa aboro tipa Yoane wẽ, “Oni andu ku ngbakungba yo ka bi gine? gbaka nawo be yuge? 25Ono oni andu ka bi gine? kumba navo rurungbura roko? Oni ngére, agu yo navo wene ngenzerengenzere remu, ki niri wene riahe, i du ngbanga ku abakindo yo. 26Ono oni andu ka bi gine? nebi? Ii, ya mi fu roni wẽ, ko susi nebi gbe. 27Nga gi ko re i ake he tipa ko ya,
‘Mo ngére, mi nakeda gi sunge mbata yo foro,
ko ambákada ga gene ku mbata yo foro.’
28Ya mi fu roni, dagba agu yo ade avunga yo, a nga gu ni sa susi Yoane te; ono gu ni du ni kina toni ni rogo ga Mbori ngoi ni susi ko.” 29Ho aboro agi he ni dunduko, na abarogo marã ngbeti, i ki ya ru ga Mbori pai aru mbiko i abapatizi yo ni gu bapatiza nga ga Yoane. 30Ono aFarusi abasa sangba Mbori tigayo na abainiparugute, bambiko i abapatizi nga yo ni gu bapatiza nga ga Yoane te.
31“Mi aringbisa gi rika aboro re kuti gine tie? I nawira gine? 321 nawira agude nasunga bangbeahe yo, ki ta fura dagba yo yo, niya,
‘Ani abi bia fu roni, ka oni ado nga ya;
ani ata wawa ka oni akpara nga ya.’
33Bambiko Yoane Babapatiza aye ka ko ari nga riahe, nimbiri imekakue a ya, oni ki ya, ‘Daimona namanga ko.’ 34Wiri boro aye ki niri riahe nimbiri he; oni ki ya, ‘Oni ngére, boro aramana, bambiri imekakue, badia abarogo marã ngbeti na aboro ingapai!’ 35I sapu ngbanga fu tatamana mbiko awirihe dunduko.”
Yesu ku Simona yo nga Farusi
36Gu ni dagba aFarusi yo ki sana Yesu ko ye i ri riahe na ko. Ko ki rimi ku rogo ga Farusi bambu, ki sungu ka ri riahe. 37Mo ngére, de nadu bakporo yo, nangia boro ingapai; ho ri aini he ni ya ko sungu ka ri riahe rogo ga Farusi bambu, ri ki ye na wene fuo nzeme mbeda, 38ki ta ru pati nduko gii ko yo, nikpari. Ri ki tona mbeda nduko ni aumeri ki niwege he ni mangeriri, ki nidungo nduko ki nimbedi he ni nzeme. 39Were ho gu Farusi abi he ni nayambu ko, ko ki ta berã ha tigako, niya, “Gi kumba re, si ngia nebi du, ka ko aini sino gi de nazada ko re na gu pai dũ ti ri, ya de ingapai nga ri.” 40Yesu ki ta karaga ha niya fu ko, “Simona, pai ho mi ka gumba ha foro.” Ko ki ya, “Bayugupai, mo gúmba ha.” 41Akumba ue nadu na ga kumba bape be yo; gu ni sa na bape be ni wa rukutu marã feda 500, gu kura ni na kina 50. 42Ho i adu ni gbua, ko ahe he fu yo. Gini ni dagba yo akpi nyemu ko susi? 43Simona ki karaga ha ki ya, “Ya mi tigimi, gu ni ko ahe bakere he fu ni.” Yesu ki ya fu ko. “Mo asapu he wenengãi.” 44Ko ki sa tiko fuo gu de re, ki ya fu Simona, “Mo bi gi de re? Mi arimi ku rogo ga bambu, mo afu nga ime fere kuti ndure te; ono ri agirisi ndure ni aumeri, ki niwege he ni mangeriri. 45Mo adungo nga re te; ono ri, ti gu rago mi arimi ku dimo no re, ri ambu nga dungo ndure te. 46Mo ambeda nga rire ni nzeme te; ono gi de re ambedi ndure ni nzeme. 47Si du ya mi foro ti ni, i vu ri ti gari dungu ingaapai; bambiko ri adu na nyemuse gbe; ono gu ni ka i vu ni ti kina toni he ni adu na nyemuse kina toni.” 48Ko ki ya fu ri, “I vu ro ti ga ingaapai.” 49Agu yo nasungu ka ri riahe na ko i ki tona ka fura tigayo, “Da nga gi ko re navu boro ti ingaapai?” 50Ko ki ya fu gu de re, “Ga idapase batasi ro, mo ndú zezeredi.”
Currently Selected:
Ruka 7: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
